Tabangan an Saindong mga Aki na Magin Hilig an Pagbasa Asin Pag-adal

AN PAGHIHINGOA na tokdoan an saindong mga aki na magbasa asin mag-adal puedeng magkaigwa nin dakulang epekto sa futuro ninda. Asin nakakapagayagaya nanggad an mga aktibidad na ini! An pinakanagigirumdoman nin nagkapira dapit sa saindang pagkaaki iyo an pagbasa sa sainda kan mga magurang ninda. An pagbasa mismo nakakagayagaya, kun paanong nakakagayagaya an mga resulta kaiyan. Nangorognang totoo ini sa mga lingkod nin Dios, huling an pag-adal sa Biblia nakakatabang na marhay sa espirituwal na pagtalubo. Sarong Kristianong magurang an nagsabi, “An mga bagay na pinakapinapahalagahan mi iyo an mga may koneksion sa pagbasa asin pag-adal.”

An marahay na mga ugale sa pag-adal puedeng makatabang sa saindong mga aki na magin mas dayupot sa Dios. (Sal. 1:1-3, 6) Minsan ngani bakong kahagadan sa kaligtasan an pagigin tataong magbasa, ikinokonektar kan Biblia an pagbasa sa dakol na espirituwal na pakinabang. Halimbawa, an Kapahayagan 1:3 nagsasabi: “Maogma an nagbabasa nin makosog asin an mga nagdadangog sa mga tataramon kan hulang ini.” Dugang pa, an halaga nin pagkonsentrar, na importanteng kabtang nin pag-adal, malinaw na maririsa sa ipinasabong na hatol ni apostol Pablo ki Timoteo: “Pensaron mo an mga bagay na ini; magin lubos an atension mo dian.” Taano? “Tanganing an saimong pag-oswag maheling.”—1 Tim. 4:15.

Siempre, an basta pagigin tataong magbasa asin mag-adal bakong garantiya na magtatao ini nin pakinabang sa saro. An dakol na igwa kan mga abilidad na iyan dai ginagamit iyan; imbes, an pinagmamaigotan nindang gibohon iyo an mga aktibidad na mayong gayo nin pakinabang. Kaya, paano matatabangan nin mga magurang an saindang mga aki na magmawot na marhay nin kapakipakinabang na kaaraman?

An Saindong Pagkamoot Asin Halimbawa

Nagugustohan nin mga aki an mga pag-adal kun namamatean ninda dian na namomotan sinda. An Kristianong mag-agom na si Owen asin Claudia nagsabi manongod sa saindang duwang aki: “Inaantisipar ninda an panahon nin pag-adal huling espesyal na panahon iyan—an pagmate ninda protektado asin komportable sinda. Ikinokonektar ninda an aktibidad na ini sa mamomoton na kamugtakan.” Dawa mantang an mga aki pasiring na sa posibleng masakit na mga taon nin pagkatinedyer, an mamomoton na kamugtakan durante nin pampamilyang mga pag-adal padagos na makakaimpluwensia sa pagmansay ninda. An mga aki ni Owen asin Claudia mga payunir na ngonyan asin padagos na nakikinabang sa pagkahilig ninda sa pagbasa asin pag-adal na itinokdo sa sainda.

An sarong mapuersang pantabang apuera sa pagkamoot iyo an halimbawa. Kun parateng naheheling nin mga aki an saindang mga magurang na nagbabasa asin nag-aadal, mas posibleng marhay na mansayon ninda na normal na kabtang kan sainda mismong buhay an mga aktibidad na ini. Alagad, bilang magurang, paano ka makakapaheling nin halimbawa kun bako mong hilig an pagbasa? Tibaad kaipuhan mong liwaton an saimong mga prioridad o saboot sa pagbasa. (Roma 2:21) Kun an pagbasa sarong mahalagang kabtang kan saindong pangaroaldaw na rutina, dakula an magigin epekto kaini sa mga aki nindo. Malinaw na ipaparisa kan saindong kaigotan—nangorogna sa pagbasa sa Biblia, pag-andam sa mga pagtiripon, asin pampamilyang pag-adal—na mahalaga an siring na mga aktibidad.

Sa siring, mahalaga an saindong pagkamoot asin halimbawa tanganing matabangan an saindong mga aki na magin hilig an pagbasa. Alagad anong praktikal na mga paagi an magigibo nindo tanganing madagka sinda?

Pagkahilig na Minapoon sa Pagbasa

Ano an nagkapirang mahalagang paagi tanganing maabot an pasohan na matabangan an saindong mga aki na magin hilig an pagbasa? Mientras aki pa, patuodon na sinda sa libro. An sarong Kristianong magurang sa kongregasyon na tinabangan kan mga magurang nia na magin hilig an pagbasa nagsabi: “Patuodon an saindong mga aki na maggamit nin mga libro. Sa paaging iyan, an mga libro nagigin mga katood ninda asin nagigin kabtang kan saindang buhay.” Sa siring, an mga libro na basado sa Biblia, arog kan Makanood sa Dakulang Paratokdo asin My Book of Bible Stories, nagigin garo dayupot na mga kaibaiba nin dakol na aki bago pa sinda makanood na magbasa. Kun an saindong mga aki binabasahan nindo kan siring na mga publikasyon, tinatabangan nindo sindang magin pamilyar bako sana sa lenguahe kundi pati sa “espirituwal na mga bagay” asin “espirituwal na mga tataramon.”—1 Cor. 2:13.

Regular na magbasa nin makosog. Gibohon na rutina an pagbasa kaiba kan saindong mga aki kada aldaw. Sa paggibo kaiyan, natotokdoan sinda nin tamang pagpronunsiar asin natatabangan sinda kaini na magin ugale an pagbasa. An paagi nindo nin pagbasa mahalaga man. Magin entusiastiko, asin magigin entusiastiko man sinda. Sa katunayan, tibaad marisa nindo na paorootrong ipapabasa sa saindo kan saindong mga aki an parehong estorya. Paonrahan sinda! Maabot an panahon, gugustohon ninda na magsiyasat nin bagong mga tema. Alagad mag-ingat na dai ipirit sa aki an pagbasa. Nagpaheling si Jesus nin halimbawa paagi sa pagtokdo sa mga nagdadangog sa saiya “sagkod na kaya nindang maghinanyog.” (Mar. 4:33) Kun dai nindo pipiriton an saindong mga aki, aantisiparon nanggad ninda an kada pagbasa, asin nakakatabang iyan na maabot nindo an saindong pasohan na ikatokdo sa sainda an pagkahilig sa pagbasa.

Dagkahon sinda na magpartisipar, asin pag-olayan an binasa. Maoogma kamong marhay na dai mahahaloy matatandaan, masasayod, asin masasabotan kan saindong mga aki an kahulogan nin dakol na tataramon. Dakula an ikakatabang sa pag-oswag ninda kun pag-oolayan nindo an saindong binasa. An pag-oolay nakakatabang sa mga aki na “manodan an mga tataramon na sa huri kaipuhan nindang matandaan asin masabotan kun nagbabasa,” an paliwanag nin sarong libro dapit sa kun paano matatabangan an mga aki na magin matibay magbasa. “Para sa mga aki na an nagtatalubong isip nagmamaigot na makanood na magbasa asin magsurat,” an sinabi pa kan iyo man sanang reperensia, “mahalagang marhay an pag-oolay—kun mas makahulogan . . . mas marahay.”

Dagkahon an saindong mga aki na basahan kamo asin na maghapot. Tibaad booton nindong kamo mismo an maghapot dangan magsuherir nin posibleng mga simbag. Sa paaging iyan, naaaraman kan mga aki na an mga libro gikanan nin impormasyon asin na may kahulogan an mga tataramon na binabasa ninda. Nangorognang nakakatabang an paaging ini kun an binabasa nindo basado sa Tataramon nin Dios, an pinakakapakipakinabang na libro.—Heb. 4:12.

Pero, nungkang paglingawan na dakol an kalabot sa abilidad na pagbasa. Kaipuhan nin panahon asin pagpraktis tanganing magin matibay dian.a Kaya seguradohon na pirmeng komendaran an mga aki sa ipinapaheling nindang hilig sa pagbasa. Makakadagka ini sa saindong mga aki na magin hilig talaga an pagbasa.

Kapakipakinabang Asin Nakakaogma

Paagi sa pagtokdo sa saindong mga aki kun paano mag-adal, nasasabotan ninda an katuyohan nin pagbasa. Kalabot sa pag-adal an pakanood nin mga impormasyon saka pakasabot kan koneksion kaiyan sa lambang saro. Kaipuhan dian an abilidad sa pag-organisar, paggirumdom, asin paggamit nin impormasyon. Kun nanodan na kan aki kun paano mag-adal asin naheheling na nia an praktikal na halaga nin pag-adal, iyan nagigin kapakipakinabang sagkod nakakaogma.—Ecl. 10:10.

Itokdo an mga kaipuhan sa pag-adal. An mga banggi nin Pampamilyang Pagsamba, pag-orolay dapit sa pangaroaldaw na teksto, asin mga kaagid kaiyan nagtatao nin marahayon na mga oportunidad na itokdo sa saindong mga aki an mga pamamaagi nin pag-adal. Paagi sa pagtukaw asin pagsentro kan atension sa sarong partikular na tema sa haralipot na panahon, matotokdoan sinda na magkonsentrar, na kaipuhan sa pakanood. Dugang pa, puede nindong dagkahon an saindong aking lalaki na sabihon sa saindo kun ano an koneksion kan nanodan pa sana nia sa dati na niang aram. Natotokdoan sia kaini na magkomparar. Ano daw kun ipasumaryo nindo sa saindong aking babae sa sadiri niang tataramon an nabasa pa sana nia? Makakatabang ini sa saiya na masabotan an kahulogan kaiyan asin magirumdoman iyan. An pagrepaso, an boot sabihon, pag-otro kan pangenot na mga punto pagkabasa sa sarong artikulo, saro pang pantabang sa memorya na puede nindong itokdo sa sainda. Dawa an sadit na mga aki puedeng tokdoan na kumua nin haralipot na nota durante kan mga pag-adal o mga pagtiripon kan kongregasyon. Makakatabang nanggad ini na magkonsentrar sinda! Huli sa simpleng mga pamamaaging ini, an pag-adal nagigin interesante asin makahulogan para sa saindo sagkod sa mga aki nindo.

Humanap nin mga oportunidad na nakakadagka sa pag-adal. An lugar na mapresko asin maliwanag, pati an toninong asin komportableng palibot, nakakatabang na mas makapagkonsentrar. Siempre, importante nanggad kun paano minamansay nin mga magurang an pag-adal. “Mahalagang marhay na magin regular asin bakong pabarobago sa saindong iskedyul sa pagbasa asin pag-adal,” an sabi nin sarong ina. “Nakakatabang ini sa saindong mga aki na magin organisado. Naaaraman ninda kun ano an kaipuhan na magibo sa sarong partikular na panahon.” Dai nanggad itinotogot nin dakol na magurang na magkaigwa nin ibang aktibidad sa panahon nin pag-adal. Segun sa sarong eksperto, an paaging ini dakulang impluwensia sa pagtokdo sa mga aki kan marahay na mga ugale sa pag-adal.

Itampok an halaga nin pag-adal. Pangultimo, tabangan an saindong mga aki na maheling an praktikal na mga pakinabang sa pag-adal. An paggamit kan impormasyon na nanodan ninda nagdodoon kan tunay na katuyohan kan pag-adal. Sarong hoben na tugang na lalaki an nag-admitir: “Kun mayo akong naheheling na praktikal na halaga sa pinag-aadalan ko, nasasakitan talaga ako na magustohan an pag-adal kaiyan. Alagad kun magagamit ko iyan personalmente, bakong masakit sa sako na magustohan iyan.” Kun namamatean nin mga aki na an pag-adal makakatabang na makamit an importanteng bagay, magigin interesado nanggad sinda dian. Aantisiparon ninda an pag-adal, kun paanong inaantisipar ninda an pagbasa.

An Pinakamarahay na Balos

Kulang nanggad an espasyo kan pahinang ini tanganing ikalista an gabos na pakinabang kan pagtabang sa saindong mga aki na magin hilig an pagbasa. An kapangganahan sa eskuelahan, sa trabaho, sa pakikiiba sa mga tawo, sa pagsabot sa kinaban na kinabubuhayan niato, asin sa pagkaigwa nin dayupot na relasyon sa pag-oltanan nin magurang asin aki pira sana sa mga iyan, apuera pa sa lubos na pagkakontento na nakakamtan sa pagbasa asin pag-adal.

Orog sa gabos, an hilig sa pag-adal makakatabang sa saindong mga aki na magin espirituwal an kaisipan. An hilig sa pag-adal mahalaga sa pagbukas kan saindang isip asin puso tanganing makamtan an “lakbang asin laba asin langkaw patin rarom” kan katotoohan kan Kasuratan. (Efe. 3:18) Siempre, dakol an kaipuhan na itokdo nin Kristianong mga magurang sa saindang mga aki. Mantang an mga magurang nagdudusay nin panahon asin atension sa saindang mga aki asin ginigibo an gabos na posible tanganing tawan sinda nin marahay na kapinonan sa buhay, naglalaom sinda na pag-abot nin panahon pipilion kan saindang mga aki na magin mga parasamba ki Jehova. An pagtokdo sa saindong mga aki nin marahay na mga ugale sa pag-adal nakakatabang sa sainda na magkaigwa nin marahay na relasyon sa Dios asin mapagdanay iyan. Kun siring, mapagngayongayo nanggad nindong hagadon an bendisyon ni Jehova mantang pinagmamaigotan nindong tabangan an saindong mga aki na magin hilig an pagbasa asin pag-adal.—Tal. 22:6.

[Nota sa Ibaba]

[Kahon/Mga Ritrato sa pahina 26]

Pagbasa . . .

• Patuodon sa mga libro

• Magbasa nin makosog

• Dagkahon na magpartisipar

• Pag-olayan an binasa

• Dagkahon an mga aki nindo na basahan kamo

• Dagkahon an mga aki nindo na maghapot

Pag-adal . . .

• Magpaheling nin marahay na halimbawa bilang magurang

• Sanayon an saindong mga aki na . . .

○ magkonsentrar

○ magkomparar

○ magsumaryo

○ magrepaso

○ magkua nin nota

• Humanap nin mga oportunidad na nakakadagka sa pag-adal

• Itampok an halaga nin pag-adal