Aram daw nin Dios na Magkakasala si Adan Asin Eva?

DAKOL na tawo an sinsero nanggad na naghahapot kaini. Kun pinag-oolayan an isyu dapit sa pagtogot nin Dios sa karatan, tolos na nagigin sentro nin orolay an kasalan kan enot na tawong mag-agom sa hardin nin Eden. Huling iniisip na ‘aram nin Dios an gabos na bagay,’ an nagkapira tibaad magkongklusyon tolos na siertong aram nin Dios antes pa na masuway sa saiya si Adan asin Eva.

Kun talagang aram nin Dios antes pa na magkakasala an perpektong mag-agom na ini, ano an ipinaparisa kaini? An siring na ideya magigin dahelan na an Dios mansayon na igwa nin dakol na negatibong kualidad. Sia magigin garo baga bakong mamomoton, bakong makatanosan, asin bakong sinsero. Tibaad sabihon nin nagkapira na karingisan na ibugtak an enot na mga tawo sa situwasyon na patienot nang aram na maraot an kaaabtan. An Dios magigin garo baga responsable, o kun dai man kasapakat, sa gabos na karatan asin pagsakit na nangyari sa bilog na kasaysayan. Para sa nagkapira, an satong Kaglalang magigin garo baga lolong.

Segun sa ihinahayag kan Kasuratan dapit ki Jehova Dios, angay daw sa saiya an siring na negatibong deskripsion? Tanganing masimbag iyan, siyasaton niato an sinasabi kan Biblia manongod sa mga linalang ni Jehova asin sa personalidad nia.

“Idto Marahayon”

Mapadapit sa mga linalang nin Dios, kaiba na an enot na mga tawo sa daga, an pagkasaysay sa Genesis nagsasabi: “Naheling nin Dios an gabos niang ginibo asin, uya! idto marahayon.” (Genesis 1:31) Si Adan asin Eva linalang na perpekto, na talagang angay sa mga kamugtakan sa daga. Mayo nin kulang sa pagkagibo sa sainda. Huling linalang na “marahayon,” siertong may kakayahan sinda na magpaheling nin marahay na paggawe na hinahagad sa sainda. Linalang sinda “oyon sa ladawan nin Dios.” (Genesis 1:27) Kaya may kakayahan sinda na ipaheling minsan paano an diosnon na mga kualidad na kadonongan, maimbod na pagkamoot, hustisya, asin karahayan. An pagpaheling kan siring na mga kualidad makakatabang sa sainda na makagibo nin mga desisyon na magigin kapakipakinabang sa sainda asin makakapaogma sa saindang langitnon na Ama.

Tinawan man ni Jehova nin libreng kabotan an perpekto asin may intelihensia na mga linalang na ini. Kaya dai nanggad sinda iprinogram antes pa, na garo robot, tanganing mapaogma an Dios. Isip-isipa ini. Arin an mas makahulogan sa saimo—an regalo na itinao na garo mayo sa boot o an regalo na hale sa puso? Malinaw nanggad an simbag. Kaagid kaiyan, kun gikan sa boot na pinili ni Adan asin Eva na kuyogon an Dios, mas magigin makahulogan nanggad sa saiya an pagkuyog ninda. An kakayahan na pumili nagtao nin oportunidad sa enot na mag-agom na kuyogon si Jehova huli sa pagkamoot.—Deuteronomio 30:19, 20.

Matanos, May Hustisya, Asin Marahay

Ihinahayag sa sato kan Biblia an mga kualidad ni Jehova. Huli sa mga kualidad na ini imposible na sia an dahelan nin kasalan. Si Jehova “mamomoton sa katanosan asin hustisya,” an sabi sa Salmo 33:5. Sa siring, an Santiago 1:13 nagsasabi: “An Dios dai puedeng baloon sa maraot na mga bagay ni binabalo man nia sa siring na mga bagay an siisay man.” Bilang pagpaheling nin katanosan asin konsiderasyon, pinatanidan nin Dios si Adan: “Hale sa gabos na kahoy sa hardin puede kang magkakan sagkod na ika mabasog. Alagad kun dapit sa kahoy kan pakamidbid nin marahay asin maraot dai ka magkakan dian, huli ta sa aldaw na kumakan ka dian ika siertong magagadan.” (Genesis 2:16, 17) An enot na mag-agom tinawan nin pagpipilian—buhay na daing katapusan o kagadanan. Bako daw na magigin mapagsaginsagin an Dios kun papatanidan nia sinda dapit sa sarong espesipikong kasalan mantang aram na nia na maraot an magigin resulta kaiyan? Huling si Jehova “mamomoton sa katanosan asin hustisya,” dai sia matao nin pagpipilian kun mayo man talagang pagpipilian.

Si Jehova abunda man sa karahayan. (Salmo 31:19) Sa pagladawan sa karahayan nin Dios, si Jesus nagsabi: “Siisay na tawo sa saindo na hinahagadan nin tinapay kan saiyang aki—dai nia sia tatawan nin gapo, bako daw? O, tibaad, mahagad sia nin sira—dai nia sia tatawan nin halas, bako daw? Kun siring, kun kamo, minsan ngani maraot, tataong magtao nin marahay na mga regalo sa saindong mga aki, gurano pa daw an saindong Ama na nasa kalangitan na dai matao nin marahay na mga bagay sa mga naghahagad sa saiya?” (Mateo 7:9-11) An Dios nagtatao nin “marahay na mga bagay” sa saiyang mga linalang. An pagkalalang sa mga tawo asin sa Paraisong istaran na inandam para sa sainda nagpapatotoo sa karahayan nin Dios. An arog daw kaiyan karahay na Soberano magigin maringison na magtao nin magayon na istaran na aram niang kukuanon man sana sa sainda? Dai. An satong matanos asin marahay na Kaggibo dai dapat basolon huli sa pagrebelde nin tawo.

“Iyo Sana an Madonong”

Ipinapaheling man kan Kasuratan na si Jehova “iyo sana an madonong.” (Roma 16:27) Naheling kan mga anghel nin Dios sa langit an dakol na ebidensia kan daing sagkod na kadonongan na ini. Sinda “nagkururahaw sa pag-omaw” kan gibohon ni Jehova an mga linalang nia sa daga. (Job 38:4-7) Mayong duda na an mga pangyayari sa hardin nin Eden sinubaybayan na may dakulang interes kan espiritung mga linalang na ini na may intelihensia. Kun siring, pagkatapos lalangon an kahangahangang uniberso asin kadakoldakol na makangangalas na bagay sa daga, magigin rasonable daw para sa sarong madonong na Dios na maggibo nin duwang daing kaparehong linalang na aram niang dai magigin mapanggana asin naheheling pa iyan kan saiyang mga aking anghel? Malinaw nanggad, bakong rasonable na magplano nin arog kaiyan na kapahamakan.

Pero, tibaad may magkontra paagi sa pagsabing, ‘Alagad paanong dai iyan aram kan madonong sa gabos na Dios?’ Totoo, sarong aspekto kan dakulang kadonongan ni Jehova an kakayahan nia na aramon an “katapusan poon pa sa kapinonan.” (Isaias 46:9, 10) Minsan siring, dai nia kaipuhan na gamiton an kakayahan na ini, kun paanong dai nia pirmeng kaipuhan na gamiton nin lubos an dakulaon niang kapangyarihan. Madonong asin mapamili si Jehova sa paggamit kan saiyang kakayahan na aramon nin patienot an mangyayari. Ginagamit nia iyan kun iyan makatanosan na gibohon asin angay sa kamugtakan.

An kakayahan na dai aramon nin patienot an mangyayari puedeng iilustrar paagi sa sarong bagay na nagigibo nin modernong teknolohiya. Puedeng pilion nin saro na nagheheling nin irinekord na kawat sa isport na enot na helingon an ultimong mga minuto tanganing maaraman an resulta. Alagad dai kaipuhan na arog kaiyan an gibohon nia. Igwa daw masabing sala sia kun pinili niang helingon o dalanon an bilog na kawat poon sa kapinonan? Kaagid kaiyan, minalataw na pinili kan Kaglalang na dai helingon kun ano an kaaabtan kan mga pangyayari. Imbes, pinili niang maghalat asin helingon kun paano mahiro an saiyang mga aki sa daga mantang nagpapadagos an mga pangyayari.

Arog kan nasambitan na, huli sa kadonongan ni Jehova dai nia linalang an enot na mga tawo na garo mga robot na ginigibo sana kun ano an iprinogram na gibohon kaiyan. Imbes, mamomoton nia sindang tinawan nin libreng kabotan. Paagi sa pagpili kan tamang dalan, puede nindang ipaheling an saindang pagkamoot, pagpasalamat, asin pagkuyog, sa siring mas mapapaogma ninda an saindang sadiri asin si Jehova na saindang Ama sa langit.—Talinhaga 27:11; Isaias 48:18.

Ipinapaheling kan Kasuratan na sa dakol na pagkakataon dai ginamit nin Dios an kakayahan nia na aramon nin patienot an mangyayari. Halimbawa, kan iaatang na kan maimbod na si Abraham an saiyang aki, masasabi ni Jehova: “Ngonyan aram ko nang ika may takot sa Dios ta dai mo man lamang isinayuma an saimong aki, an saimong bugtong na aki, sa sako.” (Genesis 22:12) Sa ibong na lado, may mga pagkakataon man na ‘nakolgan an boot’ nin Dios huli sa maraot na iginawe nin nagkapirang indibiduwal. Makokolgan daw sia nin arog kaiyan kun haloy na niang aram an gigibohon ninda?—Salmo 78:40, 41; 1 Hade 11:9, 10.

Sa siring, rasonable sanang magkongklusyon na dai ginamit kan madonong sa gabos na Dios an kakayahan niang iyan tanganing aramon antes pa kun baga magkakasala an satong enot na mga magurang. Bako nanggad siang mangmang na maglalang nin mga tawo, asin pagkatapos gagamiton an saiyang kakayahan na aramon nin patienot an kaaabtan ninda, dangan ipapaakto sana sa sainda an mga pangyayari na dati na niang aram.

“An Dios Pagkamoot”

Si Satanas na kaiwal nin Dios an nagpoon kan rebelyon sa Eden na nagbunga nin negatibong mga resulta, kaiba na an kasalan asin kagadanan. Sa siring, si Satanas nagin “sarong paragadan.” Sia man nagin “sarong putikon asin iyo an ama kan kaputikan.” (Juan 8:44) Huling maraot an motibo nia, pinagmamaigotan niang palatawon na an satong mamomoton na Kaglalang may maraot na motibo. Gustong-gusto niang ibasol ki Jehova an kasalan nin tawo.

An kualidad na pagkamoot an pinakamakosog na dahelan kaya pinili ni Jehova na dai aramon nin patienot kun baga magkakasala si Adan asin Eva. Pagkamoot an pangenot na kualidad nin Dios. “An Dios pagkamoot,” an sabi sa 1 Juan 4:8. An pagkamoot positibo, bakong negatibo. Hinahanap kaiyan an marahay sa iba. Iyo, huling pinahiro nin pagkamoot, gusto ni Jehova Dios an pinakamarahay para sa enot na tawong mag-agom.

Minsan ngani may opsion an mga aki nin Dios sa daga na gumibo nin bakong madonong na desisyon, an satong mamomoton na Dios mayong tendensia na magin negatibo o mapagduda sa saiyang perpektong mga linalang. Bastante niang itinao an kaipuhan ninda asin itinao an gabos na kaipuhan nindang maaraman. Bilang balos, angay sana na an asahan nin Dios mamomoton na pagkuyog, bakong pagrebelde. Aram nia na may kakayahan si Adan asin Eva na magin maimbod, siring kan pinatunayan kan huri dawa kan bakong perpektong mga tawo na arog ni Abraham, Job, Daniel, asin dakol na iba pa.

“Sa Dios posible an gabos na bagay,” an sabi ni Jesus. (Mateo 19:26) Nakakarangang isipon iyan. An pagkamoot ni Jehova, kaiba na an iba pang nangingibabaw na mga kualidad nia na hustisya, kadonongan, asin kapangyarihan, naggagarantiya na sa itinalaan na panahon kaya niang haleon asin hahaleon nia an gabos na epekto kan kasalan asin kagadanan.—Kapahayagan 21:3-5.

Malinaw nanggad, dai aram ni Jehova antes pa na magkakasala an enot na mag-agom. Minsan ngani nakolgan sia sa pagsuway nin tawo asin sa pagsakit na resulta kaiyan, aram nin Dios na an temporaryong situwasyon na ini dai makakaolang sa pagkaotob kan daing sagkod na katuyohan nia para sa daga asin sa mga tawo na yaon dian. Taano ta dai aramon nin orog pa an manongod sa katuyohan na iyan asin kun paano ka puedeng makinabang sa mamuraway na kaotoban kaiyan?a

[Nota sa Ibaba]

[Blurb sa pahina 14]

Dai linalang ni Jehova an enot na mga tawo na garo mga robot na ginigibo sana kun ano an iprinogram na gibohon kaiyan

[Blurb sa pahina 15]

Aram nin Dios na may kakayahan si Adan asin Eva na magin maimbod