Mauutob an Katuyuhan ni Jehova!

1, 2. (a) Ano an ipinaaram sa sato ni Jehova? (b) Ano an sinisiyerto sa sato kan Isaias 46:10, 11 asin 55:11?

SIMPLE pero makahulugan an pambukas na mga tataramon kan Bibliya: ‘Sa kapinunan, linalang nin Diyos an langit asin an daga.’ (Gen. 1:1, An Banal na Biblia) Iyo, diit sana an aram niyato manungod sa kadakul na linalang nin Diyos arog kan espasyo, liwanag, saka grabidad, asin sadit na kabtang sana kan uniberso an nahihiling ta. (Par. 3:11) Pero, ipinaaram ni Jehova sa sato an saiyang katuyuhan para sa daga asin sa katawuhan. An daga iyo an magigin tamang-tamang istaran kan mga lalaki asin babayi na linalang na kasugad nin Diyos. (Gen. 1:26) Magigin sindang mga aki niya, asin siya an magigin Ama ninda.

² Arog kan mababasa sa ikatulong kapitulo kan Genesis, napaatubang sa sarong ulang an katuyuhan ni Jehova. (Gen. 3:1-7) Pero, kayang mapangganahan an ulang na iyan huling mayo nin siisay man an makakaulang ki Jehova. (Isa. 46:10, 11; 55:11) Kaya, makakasiyerto nanggad kita na mauutob an orihinal na katuyuhan ni Jehova nin eksakto sa panahon!

3. (a) Anong mahalagang mga katotoohan an makakatabang sa sato tanganing masabutan an mensahe kan Bibliya? (b) Taano ta pag-uulayan niyato ngunyan an mga katukduan na iyan? (c) Anong mga hapot an sisimbagon ta?

³ Siguradong pamilyar na kita sa mga katotoohan sa Bibliya dapit sa katuyuhan nin Diyos para sa daga saka sa katawuhan asin dapit sa mahalagang marhay na papel ni Jesu-Cristo sa kautuban kan katuyuhan nin Diyos. Mahalagang marhay an mga katotoohan na ini asin posibleng kaiba an mga ini sa inot na mga nanudan niyato kan kita nagpupuon pa sanang mag-adal nin Bibliya. Asin gusto man niyatong tabangan an sinserong mga tawo na magin pamilyar sa mahahalagang katukduan na ini. Sa ngunyan, mantang pinag-uulayan ta sa kongregasyon an artikulong ini, hinihinguwa niyatong imbitaran an dakul na tawo, sagkod na posible, na mag-atender sa Memoryal kan kagadanan ni Cristo. (Luc. 22:19, 20) Dakul an manunudan kan mga maatender manungod sa katuyuhan nin Diyos. Kaya sa natatadang pirang aldaw na ini bago an Memoryal, napapanahon nanggad na pag-ulayan an tulong espesipikong hapot na makakadagka sa satong mga tinutukduan sa Bibliya asin sa iba pang sinserong indibidwal na mag-atender sa mahalagang okasyon na ini. An mga hapot na iyan iyo an minasunod: Ano an orihinal na katuyuhan nin Diyos para sa daga asin sa katawuhan? Ano an nagin problema? Asin taano ta an pantubos ni Jesus iyo an nagserbing liyabe na nagbukas kan pinto pasiring sa kautuban kan katuyuhan nin Diyos?

KUN ANO AN ORIHINAL NA KATUYUHAN KAN KAGLALANG

4. Paano ipinapahayag kan mga linalang an kamurawayan ni Jehova?

⁴ Makangangalas na Kaglalang si Jehova. Halangkawon an nagin pamantayan niya sa paglalang kan gabos na bagay. (Gen. 1:31; Jer. 10:12) Ano an manunudan ta sa kagayunan asin pagigin areglado na mahihiling sa mga linalang? Kun oobserbaran niyato an mga linalang, mapapahanga kita sa kapaki-pakinabang na mga katuyuhan kun taano ta linalang an kada saro kaiyan, sadit man o dakula. Siisay baga an dai mapapahanga sa pagkakomplikado kan selula nin tawo, sa kyuton na bagong mundag na umboy, o sa gayon kan pasulnop na saldang? Napapahanga kita sa mga linalang na ini huling tinawan kita nin Diyos nin kakayahan na mag-apresyar nin kagayunan.—Basahon an Salmo 19:1; 104:24.

5. Paano sinigurado ni Jehova na magpunsiyonar na magkauruyon an gabos na linalang?

⁵ Arog kan mahihiling sa mga linalang, mamumuton na nagbugtak si Jehova nin mga sagkudan o limitasyon. Ginibo niya an mga ley nin naturalesa asin an mga ley sa moral tanganing masigurado na magpunsiyonar na magkauruyon an gabos na bagay. (Sal. 19:7-9) Kaya, gabos na bagay sa uniberso may kanya-kanyang lugar asin asignasyon kauyon kan saindang papel sa katuyuhan nin Diyos. May mga pamantayan si Jehova kun paano dapat magpunsiyonar nin iriba an saiyang mga linalang. Halimbawa, an ley nin grabidad an nagpapadanay sa atmospera na magin harani sa daga, an nagkokontrol sa kadagatan—an pag-atí saka pagtaob kaiyan—asin an nagtatabang para magdanay na areglado an mga bagay-bagay na kaipuhan para mabuhay an mga linalang sa daga. An gabos na linalang, kaiba an mga tawo, naghihiro asin nagpupunsiyonar na sinusunod an mga ley nin naturalesa. Malinaw, an pagigin areglado kan mga linalang patotoo na may katuyuhan an Diyos para sa daga asin sa katawuhan. Sa satong paghuhulit, puwede daw niyatong tabangan an iba na mamidbid an Saro na nagpangyari kan kahanga-hangang areglong ini?—Kap. 4:11.

6, 7. Ano an nagkapira sa mga regalo ni Jehova ki Adan asin Eva?

⁶ An orihinal na katuyuhan ni Jehova iyo na mabuhay sagkod lamang sa daga an mga tawo. (Gen. 1:28; Sal. 37:29) Abunda niyang tinawan si Adan asin Eva nin lain-lain na mahalagang marhay na regalo tanganing ikaugma an buhay. (Basahon an Santiago 1:17.) Tinawan sinda ni Jehova nin libertad na magdesisyon asin kakayahan na magrason, mamuot, saka makipag-amigo. Nakipag-ulay ki Adan an Kaglalang asin sinabi sa saiya kun paano maipapahiling an pagigin makinuyog. Nanudan man ni Adan kun paano paniguan an saiyang mga pangangaipo, asin kun paano atamanon an mga hayop saka kultibaron an daga. (Gen. 2:15-17, 19, 20) Linalang man ni Jehova si Adan asin Eva na may kakayahan na makanamit, makamati, makahiling, makadangog, asin makaparong. Kaya ikakaugmang marhay ninda an kagayunan asin pagigin abunda kan saindang istaran na Paraiso. Para sa inot na mag-agom, mayong katapusan an puwede nindang gibuhon, mahaman, asin madiskubre.

⁷ Ano pa an kaiba sa katuyuhan nin Diyos? Linalang ni Jehova si Adan asin Eva na may kakayahan na magkaigwa nin perpektong mga aki. Nasa isip nin Diyos na magkaaki man an saindang mga aki sagkod na mapano nin tawo an bilog na daga. Gusto ni Jehova na kamutan ni Adan asin Eva saka kan gabos na iba pang magigin magurang an saindang mga aki, kun paanong namutan ni Jehova an inot niyang perpektong mga aking tawo. An daga, kaiba kan gabos na yaon diyan, iyo an magigin nindang permanenteng istaran.—Sal. 115:16.

KUN ANO AN NAGIN PROBLEMA

8. Ano an katuyuhan kan itinaong pagbuot nin Diyos na nasa Genesis 2:16, 17?

⁸ Dai tulos nangyari an katuyuhan nin Diyos. Taano? Tinawan ni Jehova si Adan asin Eva nin sarong simpleng pagbuot tanganing mahiling kun baga masunod sinda sa mga sagkudan kan saindang katalingkasan. Sinabi niya: ‘Makakakakan ka [hali sa gabos] na kahoy sa tatamnan. Alagad [kun dapit sa] kahoy nin pakamidbid kan karahayan asin karatan dai ka magkakan [diyan]; huli ta sa aldaw na kumakan ka [diyan], ika [siyertong] magagadan.’ (Gen. 2:16, 17) Bakong masakit para ki Adan asin Eva na masabutan an pagbuot na ini; ni masakit man sa sainda na sunudon iyan huling kadakul man nin iba pang kakánon sa Paraiso na puwede nindang kakanon.

9, 10. (a) Ano an iinakusar ni Satanas tumang ki Jehova? (b) Ano an nagin desisyon ni Adan asin Eva? (Hilingon an ritrato sa kapinunan kan artikulo.)

⁹ Gamit an sarong halas, dinaya ni Satanas na Diyablo si Eva para suwayon an pagbuot ni Jehova na saiyang Ama. (Basahon an Genesis 3:1-5; Kap. 12:9) Ginibuhan nin isyu ni Satanas an pagbabawal nin Diyos ki Adan asin Eva na dai ninda puwedeng kakanon an bunga kan ‘kahoy nin pakamidbid kan karahayan asin karatan.’ Garo man sana sinabi ni Satanas ki Eva: ‘Buot mong sabihon dai nindo magigibo an gusto nindo?’ Pagkatapos, grabeng kaputikan an sunod na sinabi niya: “Dai [nanggad] kamo magagadan.” Dangan, hininguwa niyang kumbinsiron si Eva na dai kaini kaipuhan na magsunod sa Diyos: ‘Naiisihan nin Diyos na sa aldaw na kumakan kamo [kan bunga] kaiyan, mabubuklat an saindong mga mata.’ Pinapalataw ni Satanas na habo ni Jehova na magkakan sinda kan bunga huling maliliwanagan an saindang isip. Dugang pa, saro pang grabeng kaputikan an sinabi ni Satanas: ‘Kamo magigin [arog nin Diyos] na nakakaaram kan marahay asin kan maraot.’

¹⁰ Kaipuhan na ngunyan ni Adan asin Eva na magdesisyon. Makuyog daw sinda ki Jehova, o maniniwala sinda sa halas? Nagdesisyon sinda na dai magkuyog sa Diyos. Sa paggibo ninda kaini, uminiba sinda sa pagrebelde ni Satanas. Isinikwal ninda si Jehova bilang saindang Ama asin isinuway an saindang sadiri sa mapagprotektar Niyang pamamahala.—Gen. 3:6-13.

11. Taano ta dai kinonsinte ni Jehova an pagrebelde sa Eden?

¹¹ Huli sa pagrebelde ninda ki Jehova, naiwara ni Adan asin Eva an saindang pagigin perpekto. Dugang pa, nagin sindang mga kaiwal ni Jehova huling “dalisay na marhay an [Saiyang] mga mata para maghiling sa maraot.” Kaya, “dai [Niya] kinokonsinte an karatan.” (Hab. 1:13, NW) Dai niya kinonsinte iyan para sa kapakanan kan gabos na nabubuhay na linalang—sa langit asin sa daga. Urog sa gabos, kun binaliwala sana nin Diyos an kasalan ni Adan asin Eva, magkakaigwa nin pagduwa-duwa kun baga mapagtitiwalaan pa an mga sinasabi Niya. Pero maimbod si Jehova sa saiyang mga pamantayan; nungka niyang binabalga iyan. (Sal. 119:142) Kaya, dawa may libertad na magdesisyon si Adan asin Eva, dai ini nangangahulugan na dai na ninda iintindihon an pagbuot nin Diyos. Bilang resulta kan pagrebelde ninda ki Jehova, nagadan sinda asin nagbalik sa kabo-kabo kun sain sinda kinua.—Gen. 3:19.

12. Ano an nangyari sa mga gikan ni Adan?

¹² Kan kakanon ni Adan asin Eva an bunga, dai na sinda maaako ni Jehova bilang miyembro kan saiyang unibersal na pamilya. Pinaluwas sinda nin Diyos sa Eden, asin nungka na sindang makakabalik diyan. (Gen. 3:23, 24) Sa paggibo kaini, makatanusan na pinangyari ni Jehova na saparon ninda an konsekwensiya kan saindang bakong madunong na desisyon. (Basahon an Deuteronomio 32:4, 5.) Huling bako nang perpekto, dai na magigibo kan tawo na maarog sa perpektong paagi an mga kuwalidad nin Diyos. Naiwara ni Adan bako sana an sarong marahayon na puturo kundi naipasa man niya sa saiyang mga aki an pagkabakong perpekto, kasalan, asin kagadanan. (Roma 5:12) Iwinara niya an oportunidad kan saiyang mga gikan na mabuhay na daing sagkod. Dugang pa, bako nang perpekto an gabos na magigin aki ni Adan asin Eva; siring man kaiyan an magigin aki kan mga aki ninda. Pagkatapos na patalikudon sa Diyos si Adan asin Eva, padagos na dinadaya ni Satanas na Diyablo an mga tawo sagkod ngunyan.—Juan 8:44.

HULI SA PANTUBOS NAGIN POSIBLE AN PAKIKIKATUOD SA DIYOS

13. Ano an gusto ni Jehova para sa mga tawo?

¹³ Pero, padagos na namutan nin Diyos an mga tawo. Dawa nagrebelde si Adan asin Eva, gusto ni Jehova na magkaigwa nin marahay na relasyon sa saiya an mga tawo. Habo niyang magadan an siisay man. (2 Ped. 3:9) Kaya pagkatapos tulos kan pagrebelde sa Eden, naggibo an Diyos nin mga areglo tanganing magin posible para sa mga tawo na maibalik an pakikikatuod sa saiya mantang pinagdadanay niyang ipinapautob an saiyang matanos na mga pamantayan. Paano ini ginibo ni Jehova?

14. (a) Uyon sa Juan 3:16, anong probisyon an itinao ni Jehova tanganing iligtas an katawuhan? (b) Anong hapot an puwede niyatong ipakipag-ulay sa mga interesado?

¹⁴ Basahon an Juan 3:16. Pamilyar sa tekstong ini an dakul sa naiimbitaran niyato sa Memoryal. Pero an hapot, Paano pinagin posible kan atang ni Jesus an buhay na daing katapusan? May oportunidad kitang tabangan an mga sinserong naghahanap nin katotoohan na maaraman an simbag sa mahalagang hapot na ini pag iniimbitaran ta sinda sa Memoryal, pag nasa Memoryal mismo, asin pag dadalawon ta sinda pagkatapos kan Memoryal. Miyentras na mas nasasabutan ninda an pantubos, mas nahihiling ninda kun gurano kanamumutan ni Jehova an katawuhan asin kun gurano siya kadunong. Anong mga punto dapit sa pantubos an puwede tang itukdo sa sainda?

15. Paano naiiba an tawong si Jesus sa tawong si Adan?

¹⁵ Nagtao si Jehova nin sarong perpektong tawo na puwedeng magin pantubos. An perpektong tawong ini dapat na magin maimbod ki Jehova asin andam na itao an saiyang buhay para sa kaligtasan kan katawuhan. (Roma 5:17-19) An buhay kan kainot-inuting linalang ni Jehova ibinalyo niya hali sa langit pasiring sa daga. (Juan 1:14) Kaya si Jesus nagin perpektong tawo, arog ni Adan. Pero bakong arog ni Adan, nagsunod si Jesus sa pamantayan ni Jehova arog kan linalauman Niyang gigibuhon nin sarong perpektong tawo. Dawa sa pinakamasakit na mga pagbalo, dai nagkasala si Jesus ni binalga man niya an ano man na pagbuot nin Diyos.

16. Taano ta mahalagang marhay na regalo an pantubos?

¹⁶ Bilang perpektong tawo, puwedeng iligtas ni Jesus sa kasalan asin kagadanan an katawuhan paagi sa pagtao kan saiyang buhay para sa sainda. Eksakto siyang katimbang sa kun ano an inasahan ki Adan—sarong perpektong tawo na lubos na magigin maimbod asin makinuyog sa Diyos. (1 Tim. 2:6) Si Jesus an nagin atang na pantubos na nagbukas kan dalan pasiring sa daing katapusan na buhay “[para] sa dakul”—mga lalaki, mga babayi, asin mga aki. (Mat. 20:28) Iyo, an pantubos an nagserbing liyabe na nagbukas kan pinto para mautob an orihinal na katuyuhan nin Diyos. (2 Cor. 1:19, 20) Huli sa pantubos, nagkaigwa nin paglaom an gabos na maimbod na tawo na mabuhay nin daing katapusan.

BINUKSAN NI JEHOVA AN PINTO PARA MAKABALIK KITA

17. Ano an pinagin posible kan pantubos?

¹⁷ Dakulaon an isinakripisyo ni Jehova para maitao an pantubos. (1 Ped. 1:19) Pinapahalagahan niyang marhay an katawuhan, mala ngani ta andam siyang itao an saiyang bugtong na Aki tanganing magadan para sa sato. (1 Juan 4:9, 10) Masasabing si Jesus an nagin karibay kan satong dating ama na tawo na si Adan. (1 Cor. 15:45) Huli kaini, tinawan kita ni Jesus nin oportunidad bako sanang para magkaigwa nin daing katapusan na buhay kundi para makabalik sa pagigin miyembro kan pamilya nin Diyos pag-abot nin panahon. Iyo, basado sa atang ni Jesus, maaako na giraray ni Jehova an katawuhan para mapabilang sa saiyang pamilya mantang dai niya ikinokompromiso an saiyang matanos na mga pamantayan. Bako daw na nakakaugmang isip-isipon an panahon na perpekto na an gabos na maimbod na tawo? Magkakaigwa nin lubos na pagkasararo an pamilya nin Diyos—sa langit asin sa daga. Asin sa lubos na paagi, magigin na kitang mga aki nin Diyos.—Roma 8:21.

18. Nuarin ‘lubos na mangingibabaw sa gabos’ si Jehova?

¹⁸ Dai nakapugol ki Jehova an pagrebelde ni Satanas para dai na niya kamutan an katawuhan ni mapupugulan man kaiyan an mga tawo, dawa bakong perpekto, na magin maimbod ki Jehova. Paagi sa probisyon na pantubos, tatabangan ni Jehova an gabos niyang aki na magin lubos na matanos. Imahinara an magigin buhay kun an gabos “na nakakamidbid sa Aki asin nagtutubod sa saiya” mabubuhay na nin daing katapusan. (Juan 6:40) An satong mamumuton asin madunong na Ama, si Jehova, ibabalik an katawuhan sa pagigin perpekto, uyon sa saiyang orihinal na katuyuhan. Dangan, ‘lubos na siyang mangingibabaw sa gabos.’—1 Cor. 15:28.

19. (a) Dapat na pahiruon kita kan pasasalamat sa pantubos na gibuhon an ano? (Hilingon an kahon na “Padagos Niyatong Hanapon an mga Maninigo.”) (b) Ano an pag-uulayan sa masunod na artikulo?

¹⁹ An pasasalamat ta sa pantubos dapat na magpahiro sa sato na gibuhon an satong pinakamakakaya na maipaaram sa iba na puwede man sindang makinabang sa mahalagang marhay na regalong ini. Kaipuhan na maaraman kan mga tawo na an pantubos iyo an paagi kan satong mamumuton na Diyos, si Jehova, para itao sa gabos na tawo an paglaom na buhay na daing katapusan. Pero urog pa diyan an nagibo kan pantubos. Pag-uulayan sa masunod na artikulo kun paano naresolberan kan atang ni Jesus an mga isyu na ibinangon kaidto ni Satanas sa hardin nin Eden.