Pinapakosog na Malabanan an Sugot Asin Makaya an Pangluluya nin Boot
“Kamo mag-aako nin kapangyarihan kun dumatong na sa saindo an banal na espiritu.”—GIBO 1:8.
1, 2. Anong tabang an ipinanuga ni Jesus sa mga disipulo nia, asin taano ta kakaipuhanon ninda iyan?
ARAM ni Jesus na kun sa sadiri sanang kosog kan saiyang mga disipulo, dai kaya kan mga ini na otobon an gabos na ipinagboot nia. Kun iisipon an hiwas kan huhulitan ninda, an kosog kan mga kalaban, asin an kaluyahan kan laman, malinaw na kaipuhan ninda nin kosog na nakakalabi sa tawo. Huli kaini, bago sia magsakat sa langit, inasegurar ni Jesus an mga disipulo nia: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi kan daga.”—Gibo 1:8.
2 An panugang iyan nagpoon na maotob kan Pentecostes 33 C.E. kan an banal na espiritu magtao nin kapangyarihan sa mga parasunod ni Jesu-Cristo na palakopon sa Jerusalem an saindang paghuhulit. Mayong pagtumang an nakapapondo kaiyan. (Gibo 4:20) “Sa gabos na aldaw sagkod sa pagtatapos kan sistema nin mga bagay,” an maimbod na mga parasunod ni Jesus, kaiba kita, mangangaipong marhay kan iyo man sanang kosog na itinatao nin Dios.—Mat. 28:20.
3. (a) Ipaliwanag an pagkakalaen kan banal na espiritu asin kapangyarihan. (b) Ano an magigibo niato sa tabang kan kapangyarihan na hale ki Jehova?
3 Nanuga si Jesus sa mga disipulo nia na ‘mag-aako sinda nin kapangyarihan kun dumatong na sa sainda an banal na espiritu.’ An mga terminong “kapangyarihan” asin “espiritu” magkalaen an kahulogan. An espiritu nin Dios, an saiyang aktibong puersa, naglaladawan sa enerhiya na ginagamit sa pagpahiro sa mga tawo o bagay tanganing magibo an kabotan nin Dios. Minsan siring, an kapangyarihan puedeng tawan nin kahulogan na “kakayahan na humiro o magpangyari nin epekto.” Iyan puedeng bakong aktibo mantang nasa sarong tawo o bagay sagkod na kaipuhanon iyan na magpangyari nin sarong bagay. Sa siring, an banal na espiritu puedeng iagid sa kuryente na nagtataong enerhiya sa sarong rechargeable na bateriya, mantang an kapangyarihan siring sa nakatagong enerhiya na ikinarga sa bateriya. An kapangyarihan na itinatao ni Jehova sa mga lingkod nia paagi sa banal na espiritu nagtatao sa lambang saro sa sato kan kakayahan na otobon an satong Kristianong pagdusay asin, kun kaipuhan, na labanan an nakakaraot na mga puersa na ipinapaabot sa sato.—Basahon an Miqueas 3:8; Colosas 1:29.
4. Ano an pag-oolayan sa artikulong ini, asin taano?
4 Paano naririsa an kapangyarihan na itinatao sa sato kan banal na espiritu? Anong klaseng mga gibo o reaksion an puedeng magin resulta kan impluwensia kaiyan? Mantang naghihingoa kitang maglingkod nin maimbod sa Dios, napapaatubang kita sa dakol na olang hale ki Satanas, sa saiyang sistema nin mga bagay, o huli sa sato mismong bakong sangkap na laman. Mahalaga na mapangganahan niato an siring na mga olang tanganing makatagal bilang mga Kristiano, regular na makapakikabtang sa ministeryo, asin mapagdanay an marahay na relasyon ki Jehova. Pag-olayan niato kun paano kita tinatabangan kan banal na espiritu na labanan an sugot asin makaya an pagkapagal asin pangluluya nin boot.
Pinapakosog na Labanan an Sugot
5. Paano an pamibi makakapakosog sa sato?
5 Tinokdoan ni Jesus an saiyang mga parasunod na mamibi: “Dai mo kami darahon sa sugot, kundi iligtas mo kami sa saro na maraot.” (Mat. 6:13) Dai papabayaan ni Jehova an maimbod na mga lingkod nia na nakikiolay kaini. Sa saro pang pangyayari, sinabi ni Jesus na ‘an Ama sa langit matao nin banal na espiritu sa mga naghahagad sa saiya.’ (Luc. 11:13) Nakakapakosog nanggad sa boot na nanunuga si Jehova na itatao nia sa sato an puersang ini tanganing magibo an tama! Siempre, dai ini nangangahulogan na magibo nin paagi si Jehova tanganing mayo nang sugot na mag-abot sa sato. (1 Cor. 10:13) Alagad kun napapaatubang kita sa sugot, panahon iyan na mamibi nin mas odok pa ngani.—Mat. 26:42.
6. Saen ibinasar ni Jesus an saiyang mga simbag sa mga sugot ni Satanas?
6 Bilang simbag sa mga sugot kan Diablo, si Jesus nagkotar nin mga teksto. Malinaw na nasa isip ni Jesus an Tataramon nin Dios kan sia magsimbag: “Nasusurat . . . Sa giraray nasusurat . . . Humale ka, Satanas! Huli ta nasusurat, ‘Si Jehova na saimong Dios an dapat mong sambahon, asin sa saiya ka sana dapat na maggibo nin sagradong paglilingkod.’” An pagkamoot ki Jehova asin sa saiyang Tataramon an nagpahiro ki Jesus na isikwal an mga pang-akit sa saiya kan Parasugot. (Mat. 4:1-10) Pagkatapos na paorootrong labanan ni Jesus an sugot, binayaan sia ni Satanas.
7. Paano nakakatabang sa sato an Biblia na labanan an sugot?
7 Kun si Jesus nagsarig sa Kasuratan tanganing labanan an mga sugot kan Diablo, mas maninigo kitang magsarig dian! Iyo, tanganing malabanan niato an Diablo asin an saiyang mga kampon, kita dapat ngunang magin determinado na maaraman an mga pamantayan nin Dios asin lubos na sunodon iyan. Dakol an napahiro na mamuhay segun sa mga pamantayan kan Biblia mantang pinag-aadalan ninda an Kasuratan asin napapahalagahan an kadonongan asin katanosan nin Dios. Iyo, “an tataramon nin Dios” igwa nin puersa na kayang mabatid an “mga kaisipan asin intension kan puso.” (Heb. 4:12) Mientras na an saro orog na nagbabasa asin naghohorophorop sa Kasuratan, orog man siang nagkakaigwa nin ‘pakarorop sa kaimbodan ni Jehova sa katotoohan.’ (Dan. 9:13) Huling totoo iyan, maninigo kitang maghorophorop sa mga tekstong konektado sa espesipikong mga kaluyahan niato.
8. Sa anong mga paagi maaako niato an banal na espiritu?
8 Apuera sa kaaraman nia sa Kasuratan, kayang labanan ni Jesus an sugot huling sia “pano nin banal na espiritu.” (Luc. 4:1) Tanganing magkaigwa kan kaparehong kosog asin abilidad, kaipuhan tang rumani ki Jehova paagi sa lubos na pag-aprobetsar sa gabos na probisyon nia tanganing mapano kita kan saiyang espiritu. (Sant. 4:7, 8) Kabilang digdi an pag-adal sa Biblia, pamimibi, asin pakikiasosyar sa mga kapagtubod. Napapahalagahan man nin dakol an pakinabang kan pagkaigwa nin iskedyul na pano nin Kristianong mga aktibidad, na nakakatabang na mapagdanay an isip na nakapokus sa nakakapakosog na espirituwal na mga bagay.
9, 10. (a) Ano an parateng mga sugot na tibaad napapaatubang sa mga Kristiano? (b) Paano an paghorophorop asin pamibi makakapakosog sa saimo na labanan an sugot dawa kun ika napapagal?
9 Anong mga pang-aakit an kaipuhan mong labanan? Nasugotan ka na daw na makipaggitilan sa bako mong agom? Kun mayo kang agom, namatean mo na daw na gusto mong makipag-date sa bakong kapagtubod? Kun nagdadalan nin telebisyon o nag-i-Internet an sarong Kristiano, tibaad bigla siang masugotan na helingon an sarong bagay na maati. Nangyari na daw iyan sa saimo, asin kun iyo, ano an ginibo mo? Madonong na horophoropon kun paano an sarong salang paghiro puedeng magresulta sa saro pa dangan sa magabat na kasalan. (Sant. 1:14, 15) Isip-isipa an kolog na itatao kaiyan ki Jehova, sa kongregasyon, asin sa saimong pamilya. Sa ibong na lado, an pagdadanay na maimbod sa mga prinsipyo nin Dios minaresulta sa malinig na konsensia. (Basahon an Salmo 119:37; Talinhaga 22:3.) Kada mapaatubang ka sa siring na mga pagbalo, magin determinado na mamibi para sa kosog na labanan iyan.
10 May saro pang dapat girumdomon manongod sa mga sugot kan Diablo. Dinolok ni Satanas si Jesus pagkatapos Niang mag-ayuno nin 40 aldaw sa kaawagan. Daing duda na inisip kan Diablo na “kombenyenteng panahon” nanggad idto na baloon an integridad ni Jesus. (Luc. 4:13) Naghahanap si Satanas nin kombenyenteng mga panahon na baloon man an satong integridad. Kun siring, mahalagang marhay na magdanay kitang makosog sa espirituwal. Sa parate, minaatake si Satanas kun naririsa nia na an saiyang bibiktimahon nasa pinakamaluyang kamugtakan. Kaya kada napapagal kita o nangluluya an boot, maninigo kitang magin mas determinado kisa kasuarin man na makimaherak ki Jehova para sa saiyang nagpoprotehir na tabang asin banal na espiritu.—2 Cor. 12:8-10.
Pinapakosog na Makaya an Pagkapagal Asin Pangluluya nin Boot
11, 12. (a) Taano ta dakol an pinangluluyahan nin boot ngonyan? (b) Ano an makakapakosog sa sato na labanan an pangluluya nin boot?
11 Bilang bakong sangkap na mga tawo, kun minsan pinangluluyahan kita nin boot. Posibleng nangorognang totoo iyan ngonyan huling an panahon na kinabubuhayan niato nakakatension nanggad. Nag-aagi kita sa tibaad pinakamasakit na mga panahon na dai pa naeksperyensiahan nin katawohan sa kabilogan. (2 Tim. 3:1-5) Mantang nagdadangadang an Armagedon, nag-oorog man an mga problema sa ekonomiya, emosyon, asin iba pa. Kun siring, dai niato maninigong ipagngalas kun orog na nadedepisilan an nagkapira na otobon an saindang paninimbagan na pag-ataman asin pagsustento sa saindang pamilya. Sinda napapagal, nagagabatan, nangluluya, asin gusto na nganing sumuko. Kun totoo iyan sa saimo, paano mo daw iyan makakaya?
12 Girumdoma na inasegurar ni Jesus an mga disipulo nia na tatawan nia sinda nin katabang—an banal na espiritu nin Dios. (Basahon an Juan 14:16, 17.) Ini an pinakamakapangyarihan na puersa sa uniberso. Paagi kaiyan, si Jehova “labi kaorog” na makakatao kan kosog na kaipuhan niato tanganing matagalan an ano man na pagbalo. (Efe. 3:20) Paagi sa pagsarig dian, an sabi ni apostol Pablo, nag-aako kita nin “puersa na labi sa ordinaryo,” dawa ngani kita ‘nagigipit sa gabos na paagi.’ (2 Cor. 4:7, 8) Dai nanunuga si Jehova na hahaleon an tension, alagad inaasegurar nia nanggad kita na paagi sa saiyang espiritu, itatao nia sa sato an kosog tanganing makaya iyan.—Fil. 4:13.
13. (a) Paano an sarong hoben napakosog na makaya an masakit na kamugtakan? (b) May aram ka daw na kaparehong mga eksperyensia?
13 Isip-isipa an halimbawa kan 19 anyos na regular payunir na si Stephanie. Sa edad na 12, sia naistrok asin nadiskobre na may tumor sa hotok. Poon kaidto, sia naoperaran nin duwang beses, binolong paagi sa radyasyon, asin naistrok nin duwang beses pa, kaya daing gayo makahiro an walang parte kan hawak nia asin nagluya an pagheling nia. Kaipuhan na itagama ni Stephanie an saiyang kosog para sa ibinibilang niang mas mahahalagang bagay, siring baga kan Kristianong mga pagtiripon asin paglilingkod sa langtad. Pero, namamatean nia na tinatabangan sia ni Jehova na magtagal sa dakol na paagi. Kun sia pinangluluyahan nin boot, napapakosog sia kan basado sa Biblia na mga publikasyon na may mga eksperyensia nin mga kapwa Kristiano. Sinuportaran sia nin mga tugang paagi sa pagsurat sa saiya o sa nakakapakosog na pakikipag-olay sa saiya bago asin pagkatapos nin mga pagtiripon. Pinahalagahan man kan mga interesado an itinotokdo sa sainda ni Stephanie kaya sinda na mismo an nagduduman sa harong nia para sa pag-adal sa Biblia. Sa gabos na ini, dakula an pasasalamat ni Stephanie ki Jehova. An paborito niang teksto iyo an Salmo 41:3, na para sa saiya, totoo sa kamugtakan nia.
14. Ano an dai niato dapat gibohon kun kita pinangluluyahan nin boot, asin taano?
14 Kun kita napapagal o natetension, nungka niatong isipon na an pagbawas sa satong espirituwal na mga aktibidad iyo an solusyon sa problema. Iyan an pinakasalang magigibo niato. Taano man? Huling an mga aktibidad na arog baga nin personal asin pampamilyang pag-adal sa Biblia, paglilingkod sa langtad, asin pag-atender sa mga pagtiripon iyo an mga paagi na inaako niato an nakakapakosog na banal na espiritu. Pirmeng nakakapaginhawa an Kristianong mga aktibidad. (Basahon an Mateo 11:28, 29.) Parate nanggad na may mga tugang na pagal-pagal kun minaabot sa mga pagtiripon, alagad kun papuli na, garo man sana may bago sindang enerhiya, na nakargahan giraray an saindang espirituwal na mga bateriya!
15. (a) Nanunuga daw si Jehova na gigibohon niang pasil an buhay nin Kristiano? Ipaliwanag basado sa Kasuratan. (b) Ano an ipinapanuga sa sato nin Dios, na nagpapalataw nin anong hapot?
15 Siempre, dai ini nangangahulogan na mayong kasakit-sakit an Kristianong pagkadisipulo. Kaipuhan an paghihingoa tanganing magin maimbod na Kristiano. (Mat. 16:24-26; Luc. 13:24) Minsan siring, paagi sa banal na espiritu, mapapakosog ni Jehova an napapagal. “An mga naglalaom ki Jehova magkakamit nin bagong puersa,” an isinurat ni propeta Isaias. “Sinda maralayog na may mga pakpak na siring sa mga agila. Sinda madaralagan asin dai makakapoy; sinda maralakaw asin dai magkakaparagal.” (Isa. 40:29-31) Huli kaiyan, maninigong ihapot niato, Ano man nanggad an tunay na dahelan nin espirituwal na pagkapagal?
16. Ano an magigibo niato tanganing haleon an posibleng mga dahelan nin pagkapagal o pangluluya nin boot?
16 Sinasadol kita kan Tataramon ni Jehova na ‘siertohon an orog na mahalagang mga bagay.’ (Fil. 1:10) Sa pagkomparar kan pamumuhay bilang Kristiano sa sarong halawig na daralaganan, pinasabngan si apostol Pablo na magsabi: “Pabayaan ta man an gabos na kagabatan . . . , asin dumalagan kita na may pakatagal sa paorumbasan na ibinugtak sa atubangan ta.” (Heb. 12:1) An punto nia iyo na dapat niatong likayan an dai kaipuhan na mga pagmamaigot asin pagabat, na makakapapagal sa sato. Tibaad pinipirit pa giraray nin nagkapira sa sato na isingit an kadakol na aktibidad sa dati nang sibot na buhay niato. Kaya kun parate kang napapagal asin natetension, puede kang makinabang kun pag-aadalan mo kun guranong kosog asin panahon an ginagamit mo sa sekular na trabaho, sa pagbiahe tanganing mag-aling-aling, asin sa mga isport o iba pang libangan. An pagkarasonable asin kababaan nin boot maninigong magpahiro sa sato gabos na akoon an satong mga limitasyon asin bawasan an dai kaipuhan na mga aktibidad.
17. Taano ta tibaad pinangluluyahan nin boot an nagkapira, alagad ano an inaasegurar sa sato ni Jehova dapit digdi?
17 Tibaad man an nagkapira sa sato pinangluluyahan nin boot huling an katapusan kan sistemang ini nin mga bagay dai pa nag-aabot sa panahon na linalaoman niato. (Tal. 13:12) Minsan siring, an siisay man na nakakamate nin arog kaiyan puedeng mapakosog kan mga tataramon sa Habacuc 2:3: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Dawa pa iyan maatraso, padagos iyan na halaton; huli ta iyan daing salto na maootob. Dai iyan mahuhuri.” Inaasegurar kita ni Jehova na an katapusan kan sistemang ini nin mga bagay maabot sa mismong itinalaan na panahon!
18. (a) Anong mga panuga an nakakapakosog sa saimo? (b) Paano an sunod na artikulo makakatabang sa sato?
18 Siertong gustong-gusto na kan gabos na maimbod na lingkod ni Jehova na umabot an panahon na mayo na an pagkapagal asin pangluluya nin boot, na an gabos na nabubuhay magkakaigwa nin “kakosogan nin pagkahoben.” (Job 33:25) Dawa ngonyan puede kitang magkaigwa nin panglaog na kosog sa tabang kan banal na espiritu mantang nakikikabtang kita sa nakakapakosog na espirituwal na mga aktibidad. (2 Cor. 4:16; Efe. 3:16) Dai pagtogotan na huli sa pagkapagal mawara sa saimo an daing sagkod na mga bendisyon. An gabos na pagbalo—baga man huli sa sugot, pagkapagal, o pangluluya nin boot—malihis, kun bakong tolos-tolos, sa bagong kinaban nin Dios. Sa masunod na artikulo, sisiyasaton niato kun paano pinapakosog kan banal na espiritu an mga Kristiano na makaya an persekusyon, labanan an nakakaraot na panggigipit nin kairiba, asin tagalan an manlaenlaen na iba pang kasakitan.
Ano an Isisimbag Nindo?
• Paano nakakapakosog sa sato an pagbasa sa Biblia?
• Paano nakakapakosog sa sato an pamimibi asin paghorophorop?
• Paano mo mahahale an posibleng mga dahelan nin pangluluya nin boot?
[Ritrato sa pahina 24]
An Kristianong mga pagtiripon makakapakosog sa sato sa espirituwal