“Tanganing Dai Kamo Makalaog sa Sugot”
“Magdanay kamong mapagbantay asin padagos na mamibi, tanganing dai kamo makalaog sa sugot.”—MATEO 26:41.
GRABE an sakit—daing kapareho sa naeksperyensiahan na nia kaidto. Si Jesu-Cristo, an Aki nin Dios, harani na sa katapusan kan saiyang buhay digdi sa daga. Aram ni Jesus na madali na siang arestaron, kondenaron na magadan, asin ipako sa hariging pasakitan. Aram nia na an gabos niang desisyon asin gigibohon may epekto sa ngaran kan saiyang Ama. Aram man ni Jesus na nakataya an esperansa kan katawohan na mabuhay sa ngapit. Sa atubangan kan gabos na sakit na ini, ano an ginibo nia?
2 Nagduman si Jesus sa tatamnan nin Getsemani kaiba kan saiyang mga disipulo. Idto paboritong lugar ni Jesus. Duman ruminayo sia nin kadikit sa saiyang mga disipulo. Kan nasosolo na, duminolok sia sa saiyang langitnon na Ama para sa kosog, na biyong ipinapahayag an nasa saiyang puso sa odok na pamibi—bako sanang sarong beses kundi tolong beses. Minsan ngani sangkap, dai hinona ni Jesus na kaya niang atubangon nin solo an sakit.—Mateo 26:36-44.
3 Ngonyan, nag-aagi man kita nin sakit. Sa kapinonan kan brosyur na ini, pinag-olayan niato an ebidensia na kita nabubuhay sa huring mga aldaw kan maraot na sistemang ini. Nag-oorog an mga sugot asin tension sa kinaban ni Satanas. An mga desisyon asin ginigibo kan siisay man sa sato na naghihingakong naglilingkod sa tunay na Dios may dakulang epekto sa saiyang ngaran asin sa satong indibiduwal na esperansang mabuhay sa saiyang bagong kinaban. Namomotan niato si Jehova. Boot niatong ‘magtagal sagkod sa katapusan’—katapusan kan satong buhay o katapusan kan sistemang ini, arin man an maenot. (Mateo 24:13) Alagad paano kita pirmeng magkakaigwa nin pakamate nin pag-apura asin makakapagdanay na mapagbantay?
4 Sa pakaaram na an saiyang mga disipulo—kaidto sagkod ngonyan—mag-aagi man nin sakit, nagsadol si Jesus: “Magdanay kamong mapagbantay asin padagos na mamibi, tanganing dai kamo makalaog sa sugot.” (Mateo 26:41) Ano an kahulogan kan mga tataramon na iyan para sa sato ngonyan? Anong sugot an inaatubang nindo? Asin paano kamo ‘makakapagdanay na mapagbantay’?
Sugot na Gibohon an Ano?
5 Kita gabos aroaldaw na napapaatubang sa sugot na padara sa “siod kan Diablo.” (2 Timoteo 2:26) Pinapatanidan kita kan Biblia na an nangorognang pinupunteriya ni Satanas iyo an mga parasamba ki Jehova. (1 Pedro 5:8; Kapahayagan 12:12, 17) Sa anong katuyohan? Bako man na tanganing gadanon kita. Bakong kapangganahan para ki Satanas kun kita magadan na maimbod sa Dios. Aram ni Satanas na hahaleon ni Jehova, sa Saiyang itinalaan na panahon, an epekto nin kagadanan paagi sa pagkabuhay liwat.—Lucas 20:37, 38.
6 Gusto ni Satanas na raoton an sarong bagay na mas mahalaga pa sa satong buhay sa presente—an satong integridad sa Dios. Desesperado si Satanas na patunayan na kaya nia kitang patalikodon ki Jehova. Huli kaini, kun masusutsutan kitang dai magmaimbod—pumondo sa paghulit kan maogmang bareta o talikdan an Kristianong mga pamantayan—iyan magigin kapangganahan para ki Satanas! (Efeso 6:11-13) Kaya “an Parasugot” nagbubugtak nin mga sugot sa atubangan niato.—Mateo 4:3.
7 Laen-laen an “mapandayang mga taktika” ni Satanas. (Efeso 6:11, Jewish New Testament) Tibaad sugotan nia kita nin materyalismo, takot, pagduda, o paghanap nin kasingawan. Alagad an saro sa pinakaepektibong paagi nia may labot sa pagkadesganar. Bilang tusong oportunista, aram nia na puede kitang manluya huli sa kadaihan nin paglaom, kaya madali na kitang mabiktima. (Talinhaga 24:10) Kaya nangorogna kun kita “lupaypay na” an boot, sinusugotan nia kita na sumuko na.—Salmo 38:8.
8 Mantang kita parani nang parani sa katapusan kan huring mga aldaw, garo baga nagdadakol an mga dahelan nin pagkadesganar, asin bako kitang libre sa impluwensia kaiyan. (Helingon an kahon na “Nagkapirang Bagay na Dahelan nin Pagkadesganar.”) Ano man an dahelan, an pagkadesganar puedeng makapaluya sa sato. An ‘pagtubos kan angay na panahon’ para sa espirituwal na mga obligasyon—kaiba an pag-adal kan Biblia, pag-atender sa Kristianong mga pagtiripon, asin pakikikabtang sa ministeryo—puedeng magin masakit kun kamo pagal-pagal sa pisikal, mental, asin emosyonal. (Efeso 5:15, 16) Girumdoma na gusto kan Parasugot na kamo pumondo. Alagad bako ini an panahon na lumuya o mawaran kan saindong pakamate nin pag-apura mapadapit sa mga panahon na kinabubuhayan niato! (Lucas 21:34-36) Paano nindo mapaglalabanan an sugot asin paano kamo makakapagdanay na mapagbantay? Estudyare an apat na suhestion na makakatabang.
“Padagos na Mamibi”
9 Manarig ki Jehova paagi sa pamibi. Girumdoma an halimbawa ni Jesus sa tatamnan nin Getsemani. Huling grabe an emosyonal na tension, ano an ginibo nia? Nagpatabang sia ki Jehova, na odok na marhay an pamibi kaya “an saiyang ganot nagin siring sa mga toro nin dugo na nagdadalahay sagkod sa daga.” (Lucas 22:44) Isip-isipa iyan. Midbid na marhay ni Jesus si Satanas. Namasdan ni Jesus duman sa langit an gabos na sugot na ginagamit ni Satanas sa paghihingoa nia na siodon an mga lingkod nin Dios. Pero, dai inisip ni Jesus na kayang-kaya nia an ano man na sugot na tibaad ibugtak kan Parasugot sa atubangan nia. Kun an sangkap na Aki nin Dios nakamate kan pangangaipo na umarang nin tabang asin kosog gikan sa Dios, lalo na kita!—1 Pedro 2:21.
10 Girumdoma man na, pakasadola kan saiyang mga disipulo na “padagos na mamibi,” sinabi ni Jesus: “Siempre, an espiritu nagmamawot na gayo, alagad an laman maluya.” (Mateo 26:41) Kiisay na laman an sinasabi ni Jesus? Seguradong bakong saiya; mayong kaluyahan sa saiyang sangkap na laman bilang tawo. (1 Pedro 2:22) Alagad laen man an saiyang mga disipulo. Huli sa minanang pagkabakong sangkap asin makasalan na mga tendensia, sinda nangorognang mangangaipo nin tabang na mapaglabanan an sugot. (Roma 7:21-24) Kaya ngani sinadol nia sinda—asin an gabos na tunay na Kristianong masurunod sa sainda—na umarang nin tabang sa pag-atubang sa sugot. (Mateo 6:13) Sinisimbag ni Jehova an siring na mga pamibi. (Salmo 65:2) Paano? Kisuerra sa duwang paagi.
11 Enot, tinatabangan kita nin Dios na mamidbid an mga sugot. An mga sugot ni Satanas garo mga siod na iwinarak sa madiklom na dalan. Kun dai nindo iyan maheling, tibaad masiod kamo. Paagi sa Biblia asin sa mga publikasyon na basado sa Biblia, ibinubuyagyag ni Jehova an mga siod ni Satanas, sa siring nakakalikay kita na padara sa sugot. Sa nag-aging mga taon, paorootro kitang pinapatanidan nin mga babasahon asin mga programa sa kombension saka asamblea manongod sa mga peligro na arog baga kan pagkatakot sa tawo, seksuwal na inmoralidad, materyalismo, asin iba pang sugot ni Satanas. (Talinhaga 29:25; 1 Corinto 10:8-11; 1 Timoteo 6:9, 10) Dai daw kamo nagpapasalamat ki Jehova sa pagpatanid sa sato manongod sa mga pakana ni Satanas? (2 Corinto 2:11) An gabos na patanid na iyan simbag sa mga pag-arang nindo nin tabang na mapaglabanan an sugot.
12 Ikaduwa, sinisimbag ni Jehova an satong mga pamibi paagi sa pagtao sa sato kan kosog na matagalan an sugot. Sinasabi kan saiyang Tataramon: ‘Dai itotogot nin Dios na kamo masugotan nin labi sa saindong makakaya, kundi kaibahan kan sugot matao man sia nin luluwasan.’ (1 Corinto 10:13) Nungka na itotogot nin Dios na magin dakulaon an sugot kaya mayo na kita nin espirituwal na kosog na labanan iyan—kun padagos kitang mananarig sa saiya. Paano sia ‘nagtatao nin luluwasan’ niato? Sia ‘nagtatao nin banal na espiritu sa mga naghahagad sa saiya.’ (Lucas 11:13) An espiritung iyan puedeng tumabang sa sato na magirumdoman an mga prinsipyo sa Biblia na makakapakosog sa satong desisyon na gibohon an tama asin makakatabang sa sato na gumibo nin madonong na mga desisyon. (Juan 14:26; Santiago 1:5, 6) Makakatabang iyan sa sato na ipaheling an mismong mga kualidad na kaipuhan niato tangani na madaog an salang mga tendensia. (Galacia 5:22, 23) Puede pa nganing pahiroon kan espiritu nin Dios an mga kapagtubod niato na ‘magin tabang na nagpapakosog sa sato.’ (Colosas 4:11) Dai daw kamo nagpapasalamat na sinisimbag ni Jehova sa siring kamamomoton na mga paagi an mga pag-arang nindo nin tabang?
Magin Realistiko sa mga Inaasahan Nindo
13 Tanganing makapagdanay na mapagbantay, kaipuhan na realistiko kita sa satong mga inaasahan. Huli sa mga sakit sa buhay, kita gabos may beses na nakakapoy. Alagad dapat na girumdomon niato na nungkang nanuga an Dios na magkakaigwa kita nin buhay na mayong kaproble-problema sa daan na sistemang ini. Dawa kaidtong mga panahon kan Biblia, an mga lingkod nin Dios napaatubang sa mga kasakitan, kaiba an paglamag, kadukhaan, depresyon, asin helang.—Gibo 8:1; 2 Corinto 8:1, 2; 1 Tesalonica 5:14; 1 Timoteo 5:23.
14 Ngonyan, may mga problema man kita. Tibaad kita mapaatubang sa paglamag, makaeksperyensia nin mga kahaditan sa pinansial, masakitan huli sa depresyon, magkahelang, asin magdusa sa iba pang mga paagi. Kun kita milagrosong poprotehiran ni Jehova sa gabos na kapahamakan, dai daw iyan matao nin basehan para ki Satanas na duhagion si Jehova? (Talinhaga 27:11) Itinotogot nanggad ni Jehova na masugotan asin mabalo an saiyang mga lingkod, na sa nagkapirang pangyayari sagkod pa ngani sa mayo pa sa panahon na kagadanan sa kamot nin mga paratumang.—Juan 16:2.
15 Kun siring, ano an ipinanuga ni Jehova? Arog kan nasabi niato sa enotan, ipinanuga nia na papangyayarihon nia na mapaglabanan niato an ano man na sugot na tibaad atubangon niato, basta biyo kitang magtiwala sa saiya. (Talinhaga 3:5, 6) Paagi sa saiyang Tataramon, sa saiyang espiritu, asin sa saiyang organisasyon, pinoprotehiran nia kita sa espirituwal, na tinatabangan kitang maingatan an satong relasyon sa saiya. Basta yaon an relasyon na iyan, dawa kun kita magadan, gana kita. Mayo nin ano man—dawa pa ngani an kagadanan—na makakaolang sa Dios sa pagtao nin balos sa saiyang maimbod na mga lingkod. (Hebreo 11:6) Asin sa bagong kinaban na harani na, seguradong ootobon ni Jehova an gabos na iba pang makangangalas na ipinanuga niang bendisyon para sa gabos na namomoot sa saiya.—Salmo 145:16.
Girumdoma an mga Isyu
16 Tanganing makatagal sagkod sa katapusan, dapat na girumdomon niato an mahalagang marhay na mga isyung kalabot sa pagtogot nin Dios sa karatan. Kun may beses na garo baga dakulaon an mga problema niato asin nasusugotan kitang pumondo na, marahay na ipagirumdom niato sa satong sadiri na inangat ni Satanas an pagigin makatanosan kan soberaniya ni Jehova. Kinuestion man kan Paradaya an debosyon asin integridad kan mga parasamba sa Dios. (Job 1:8-11; 2:3, 4) An mga isyung iyan asin an pinili ni Jehova na paagi nin pagresolber kaiyan mas importante kisa siisay man sa sato bilang mga indibiduwal. Taano man?
17 An temporaryong pagtogot nin Dios sa kasakitan nagtao nin panahon sa iba na maogmang akoon an katotoohan. Isip-isipa ini: Nagdusa si Jesus tangani na kita magkaigwa nin buhay. (Juan 3:16) Dai daw niato iyan pinapasalamatan? Alagad andam daw kitang tagalan nin kadikit pang panahon an kasakitan tangani na magkamit nin buhay an iba pa? Tanganing makatagal sagkod sa katapusan, dapat na rekonoseron niato na an kadonongan ni Jehova mas dakulang marhay kisa kadonongan niato. (Isaias 55:9) Tataposon nia an karatan sa panahon na pinakamarahay para sa paghusay kan mga isyu sagkod lamang asin para sa daing sagkod na ikakarahay niato. An totoo, ano pa baga an mas marahay digdi? Mayo nin inhustisya sa Dios!—Roma 9:14-24.
“Rumani Kamo sa Dios”
18 Tanganing mapagdanay an satong pakamate nin pag-apura, kaipuhan na magdanay kitang harani ki Jehova. Nungkang paglingawan na ginigibo ni Satanas an gabos niang makakaya na raoton an marahay na relasyon niato ki Jehova. Gusto kitang papaniwalaon ni Satanas na an katapusan dai noarin man maabot asin na mayo nin katuyohan an paghuhulit kan maogmang bareta o pamumuhay oyon sa mga pamantayan kan Biblia. Alagad sia “putikon asin iyo an ama kan kaputikan.” (Juan 8:44) Dapat na determinado kitang ‘tumangon an Diablo.’ An relasyon niato ki Jehova bagay na dai niato noarin man maninigong bali-walaon. Mamomoton kitang sinasadol kan Biblia: “Rumani kamo sa Dios, asin sia marani sa saindo.” (Santiago 4:7, 8) Paano daw kamo orog na makakarani ki Jehova?
19 Kaipuhan an mapagngayongayong paghorophorop. Kun garo baga grabe na an mga sakit sa buhay, biyo nindong ipahayag ki Jehova an nasa saindong puso. Mientras na mas espesipiko kamo, mas pasil man na maheling an simbag nia sa mga kahagadan nindo. An simbag tibaad bako pirmeng eksakto sa iniisip nindo, alagad kun an kamawotan nindo tawan sia nin onra asin papagdanayon an saindong integridad, itatao nia an tabang na kaipuhan nindo tangani na kamo makatagal. (1 Juan 5:14) Mantang naheheling nindo an paggiya nia sa saindong buhay, orog kamong magigin harani sa saiya. Kaipuhan man an pagbasa manongod sa asin pagpensar kan mga kualidad asin paagi nin paghiro ni Jehova, na ihinahayag sa Biblia. An siring na paghorophorop nakakatabang sa saindo na orog siang mamidbid; pinapahiro kaiyan an saindong puso asin pinapararom an saindong pagkamoot sa saiya. (Salmo 19:14) Asin an pagkamoot na iyan, orog kisa ano pa man, matabang sa saindo na labanan an sugot asin magdanay na mapagbantay.—1 Juan 5:3.
20 Tanganing magdanay na harani ki Jehova, importante man na magdanay kitang harani sa satong mga kapagtubod. Totokaron ini sa huring kabtang kan brosyur na ini.
MGA HAPOT PARA SA PAG-ADAL
• Ano an ginibo ni Jesus kan sia nag-aagi nin grabeng sakit kan harani na an katapusan kan saiyang buhay, asin ano an isinadol nia sa saiyang mga disipulo na gibohon? (Par. 1-4)
• Taano ta pinupunteriya ni Satanas an mga parasamba ki Jehova, asin sa anong mga paagi nia kita sinusugotan? (Par. 5-8)
• Tanganing mapaglabanan an sugot, taano ta dapat kitang padagos na mamibi (Par. 9-12), magin realistiko sa mga inaasahan niato (Par. 13-15), maggirumdom sa mga isyu (Par. 16-17), asin ‘rumani sa Dios’ (Par. 18-20)?
[Kahon sa pahina 25]
Nagkapirang Bagay na Dahelan nin Pagkadesganar
Salud/edad. Kun kita may helang na dai nararahayan o kun may itinatao nang mga limitasyon an pagkakaedad, tibaad magmondo kita nin makuri huli ta dai na niato kayang dagdagan an paglilingkod sa Dios.—Hebreo 6:10.
Pagkasudya kan linalaoman. Tibaad panluyahan kita nin boot kun kakadikit an naheheling niatong marahay na reaksion sa satong mga paghihingoa sa paghuhulit kan Tataramon nin Dios.—Talinhaga 13:12.
Pakamate nin kadaihan nin kamanungdanan. Huli sa dakol na taon nin pagmaltrato, puedeng makombensir an sarong tawo na dai sia namomotan, pati ni Jehova.—1 Juan 3:19, 20.
Kakologan sa boot. Kun an saro nakolgan na marhay an boot nin sarong kapagtubod, tibaad mapurisaw siang marhay kaya nasusugotan siang dai na mag-atender sa Kristianong mga pagtiripon o makikabtang sa ministeryo sa langtad.—Lucas 17:1.
Paglamag. Tibaad kontrahon, paglamagon, o pag-olog-ologon kamo nin iba na bako nindong kapareho sa pagtubod.—2 Timoteo 3:12; 2 Pedro 3:3, 4.
[Kahon sa pahina 26]
Sinadol kita ni Jesus na “padagos na mamibi” para sa tabang sa paglaban sa sugot