Sarong hoben na lalaki na nadadara nin sugot dahil may nahihiling siyang magkailusyon, duwang lalaki na naghihiling sa sarong gadget, asin sarong babayi na nag-aagi

HAPOT KAN MGA HOBEN

Paano Ko Malalabanan an Sugot?

Si apostol Pablo nagsurat: “Pag gusto kong gibuhon an tama, an maraot an yaon sa sako.” (Roma 7:21) Namatian mo na daw iyan? Kun iyo, makakatabang saimo an artikulong ini na malabanan an sugot na gumibo nin sala.

An dapat mong maaraman

Sa parati, masusugutan kang gumibo nin sala pag ginigipit ka kan mga kaedad mo. An totoo, sinasabi kan Bibliya na “an maraot na pag-iriba minaraot kan marahay na mga ugali.” (1 Corinto 15:33) Dahil sa panggigipit kan iba o kan media puwede kang magkaigwa nin salang mga pagmawot saka masugutan na gumibo nin sala asin ‘magsunod pa ngani sa kadaklan sa paggibo nin maraot.’—Exodo 23:2.

“Dahil gusto mong akuon ka kan iba, ’baad gibuhon mo man an ginigibo ninda para lang magustuhan ka ninda.”—Jeremy.

Pag-isipan: Taano ta mas masakit labanan an sugot pag sobra mong iniisip kun ano an magigin paghiling saimo kan iba?—Talinhaga 29:25.

Tandaan: Dai pagtugutan an panggigipit kan mga kaedad mo na masugutan kang ikompromiso an saimong mga pamantayan.

An puwede mong gibuhon

Aramon an saimong paninindugan. Kun dai mo aram an pinaniniwalaan mo, puwede kang magin garo sarong puppet na kinokontrol kan iba. Mas marahay nanggad na sunudon an sadol kan Bibliya: “Siyertuhon an gabos na bagay; pangaptan nin higot an marahay.” (1 Tesalonica 5:21) Pag mas naiintindihan mo an mga paniniwala mo, mas makakapanindugan ka asin malalabanan an sugot na gumibo nin sala.

Pag-isipan: Taano ta naniniwala ka na para sa ikakarahay mo an mga pamantayan nin Diyos sa moral?

“Nahiling ko na pag naninindugan ako sa mga pinaniniwalaan ko saka dai nagpapadara sa sugot, mas irinerespeto ako kan iba.”—Kimberly.

Marahay na arugan sa Bibliya: Daniel. Dawa tin-edyer pa lang, “determinado si Daniel sa saiyang puso” na susunudon niya an mga pagbuot nin Diyos.—Daniel 1:8.

Sarong hoben na lalaki na may mga lubid na nakagakod sa saiya asin na kinokontrol siya na garo sarong puppet — Kun dai mo aram an pinaniniwalaan mo, puwede kang magin garo sarong puppet na kinokontrol kan iba

Aramon an saimong mga kaluyahan. Sinasabi kan Bibliya na “an mga kamawutan na dara nin pagigin hoben” talagang makusugon. (2 Timoteo 2:22) Kaiba digdi bako lang an seksuwal na pagmawot kundi pati man an pagmawot na akuon ka kan iba asin magin independent dawa dai ka pa man handa para diyan.

Pag-isipan: Sinasabi kan Bibliya na “an lambang saro nababalo pag naguguyod siya asin naaakit kan sadiri niyang pagmawot.” (Santiago 1:14) Anong pagmawot an pinakanasusugutan kang gibuhon?

“Magin totoo ka sa sadiri mo sa kun anong mga sugot an talagang nakakaakit saimo na gibuhon. Mag-research ka kun paano mo malalabanan an mga sugot na iyan, saka isurat an mga puntong makakatabang saimo. Para sa sunod na mapaatubang ka sa sugot na iyan, aram mo na kun paano iyan malalabanan.”—Sylvia.

Marahay na arugan sa Bibliya: David. May panahon na nagpadara siya sa panggigipit kan iba pati ngani sa saiyang mga pagmawot. Pero nakanuod si David sa mga sala niya asin hininguwa niya na gibuhon an tama. “Lalangon mo sa sako an sarong dalisay na puso,” an pamibi niya ki Jehova, “asin ibugtak mo sa sako an sarong bagong espiritu, saro na marigon.”—Salmo 51:10.

Dai magpadara sa sugot. Sinasabi kan Bibliya: “Dai mo pagtugutan na madaog ka kan maraot.” (Roma 12:21) Buot sabihon, dai mo kaipuhan na magin biktima kan sugot. Puwede mong pilion na gibuhon an tama.

Pag-isipan: Paano ka dai mapadara sa sugot asin masigurado mo na magayon an kaluluwasan sa sarong sitwasyon na nasusugutan kang gumibo nin sala?

“Iniisip ko kun ano an mamamatian ko kun mapadara ako sa sugot. Magigin magian daw an pagmati ko? Siguro, pero madali lang iyan. Magigin okey daw an pagmati ko sa paglihis nin panahon? Dai, mas malala lang iyan. Sulit daw talaga iyan? Dai!”—Sophia.

Marahay na arugan sa Bibliya: Pablo. Dawa ngani inako niya na igwa siya nin tendensiya na gumibo nin maraot, dai si Pablo nagpadara diyan. Isinurat niya: “Istriktong dinidisiplina ko an sakuyang hawak asin ginigibo iyan na magin siring sa uripon.”—1 Corinto 9:27, nota sa ibaba.

Tandaan: Ika an may kontrol kun paano mo malalabanan an sugot.

Girumdumon na malihis sana an mga sugot. “Dakul na grabeng sugot an naatubang ko kan high school ako na ngunyan bako nang mahalaga,” sabi kan 20 anyos na si Melissa. “Pag iniisip ko iyan, napapakusog ako na an mga sugot na inaatubang ko ngunyan malihis sana saka maabot an panahon na masasabi kong mas nagin marahay an buhay ko dahil linabanan ko an mga iyan.”

An sinasabi kan ibang tin-edyer

“An determinasyon saka an kusog nin buot na manindugan nakakatabang sako na malabanan an sugot. Halimbawa, pag nakapagdesisyon na ako na dai gibuhon an sarong bagay, pinapanindugan ko iyan, saka dai na ako nagduduwa-duwa o nagpapaimpluwensiya sa desisyon kan iba.”—Olivia.

“Napi-pressure an mga tin-edyer na magduman sa mga party tapos gibuhon an mga bagay na ginigibo duman—pag-inom nin arak, pagdroga, saka pakikipag-sex. Nakatabang sako pag kinakaulay ko an mga magurang ko manungod sa mga panggigipit na iyan. Tapos, sinisigurado ko na may mga ginigibo ako pirmi para maiwasan ko na dai masugutan na gumibo nin sala.”—Jared.

“Saro sa mga pinakamasakit na sugot na labanan iyo idtong sarong bagay na para sa iba bako man maraot pero para sako puwedeng magin maraot—arog kan pagpili nin mga libangan. Dapat aram mo an paninindugan mo para dai ka madara sa arog kaiyan na panggigipit, saka kaipuhan iyan nin panahon saka eksperyensiya.”—Mayan.

“Pag may sugot, kaipuhan na magin totoo ka sa sadiri mo. Kaipuhan mo man na aramon kun anong mga website sa Internet an may imoral na mga materyal na puwedeng masugutan ka na gumibo nin sala, saka dapat aram mo an gigibuhon pag may nahiling kang arog kaiyan. Kaipuhan mong gumibo nin plano para dai ka madara nin sugot na gumibo nin sala.”—Julian.