Rumani sa Dios
‘Ako si Jehova, Ako an Saimong Dios, na Nagkakapot kan Saimong Toong Kamot’
“KUMAPOT ka sako,” an sabi nin sarong ama sa saiyang sadit na aking lalaki mantang pabalyo sa matawong tinampo. Huling higot an kapot kan ama sa saradit na guramoy kan aki, ini kampante asin dai natatakot. Nasabi mo na daw sa sadiri mo na kutana igwa man nin saro na magkapot sa kamot mo asin ligtas kang giyahan sa mga bagay sa buhay na mayong kasegurohan? Kun iyo, magiginhawahan ka sa mga tataramon na isinurat ni Isaias.—Basahon an Isaias 41:10, 13.
Sinabi iyan ni Isaias sa Israel. Dawa ngani an nasyon na iyan ibinilang nin Dios na “piniling kayamanan” o espesyal na pagsasadiri nia, napapalibotan iyan nin mga kaiwal. (Exodo 19:5) May dahelan daw na matakot an Israel? Ipinaabot ni Jehova paagi ki Isaias an sarong nakakapakosog na mensahe. Mantang pinag-aadalan niato an mga tataramon na iyan, tandaan na aplikado man iyan sa mga nagsasamba sa Dios ngonyan.—Roma 15:4.
“Dai ka matakot,” an pagpakosog ni Jehova sa mga lingkod nia. (Bersikulo 10) Bako ining basta tataramon sana. Ipinaliwanag ni Jehova kun taano ta mayo sindang dahelan na matakot: “Ta yaon ako saimo.” Sia bakong paratabang na nasa harayong lugar, na nanunuga sana na maabot sa mismong oras na kaipuhan sia. Gusto niang maaraman kan mga lingkod nia na sia yaon sa sainda—na garo baga kataed ninda—na pirmeng andam na sumuporta. Bako daw na nakakaginhawa iyan?
Pinakosog pa ni Jehova an mga nagsasamba sa saiya: “Dai ka magluya [“mangalagkalag,” NW].” (Bersikulo 10) An Hebreong verb na ginamit digdi puedeng nanonongod sa mga “nangangalagkalag sa palibot tanganing maheling kun baga may ano man na makakadanyar sa sainda.” Ipinaliwanag ni Jehova kun taano an mga lingkod nia ta mayong dahelan na mangalagkalag huli sa takot: “Ta ako an saimong Dios.” Igwa pa daw nin mas nakakapakosog sa boot kisa dian? Si Jehova an “Kahorohalangkaue,” an “Makakamhan.” (Salmo 91:1) Mantang an Dios ninda iyo si Jehova na makapangyarihan sa gabos, taano ta matatakot sinda?
Kaya, ano an maaasahan ki Jehova kan mga nagsasamba sa saiya? Nanunuga sia: “Danay takang popogolan kan too nin sakuyang kabanalan.” (Bersikulo 10) Sinabi man nia: ‘Ako si Jehova, ako an saimong Dios, na nagkakapot kan saimong toong kamot.’ (Bersikulo 13) Ano an iisipon mo kun madangog mo an mga tataramon na iyan? “Kun pag-iibanon, an duwang bersikulong ini kahangahangang naglaladawan sa sarong magurang asin aki,” an paliwanag nin sarong reperensia. “[An ama] bako sanang basta andam na magdepensa, kundi sia mismo kataed man kan aki; dai sia matogot na mapasuway sa saiya an aki.” Imahinara na sana—dai matogot si Jehova na mapasuway sa saiya an mga lingkod nia, dawa sa pinakamasakit na mga panahon sa buhay ninda.—Hebreo 13:5, 6.
An mga nagsasamba ki Jehova ngonyan magiginhawahan na marhay sa mga isinurat na iyan ni Isaias. Sa “magña panahon [na ini] na makahahandal,” kun beses nagagabatan kita huli sa mga panggigipit sa buhay. (2 Timoteo 3:1) Pero, dai niato dapat atubangon iyan nin solo. Andam si Jehova na aboton asin kapotan an satong kamot. Arog nin nagtitiwalang mga aki, puede kitang kumapot sa makapangyarihan niang kamot, na may kompiansa na kita gigiyahan nia sa tamang direksion asin tatabangan sa panahon na kaipuhan niato iyan.—Salmo 63:7, 8.
Isinusuherir na babasahon sa Biblia para sa Enero: