Isaias 41:10—“Dai Ka Matakot, Ta Yaon Ako Saimo”

“Dai ka matakot, ta kaibanan mo ako. Dai ka maghadit, ta ako an saimong Diyos. Papakusugon taka, iyo, tatabangan taka, talagang kakaputan taka kan sakong tuong kamot nin katanusan.”—Isaias 41:10, Bagong Kinaban na Traduksiyon.

“Dai ka matakot, ta yaon ako saimo; dai ka magluya, ta ako an saimong Dios na nagpapakosog sa saimo: danay takang tatabagñan, danay ta kang popogolan kan too nin sakuyang kabanalan.”—Isaias 41:10, Magna Banal na Kasuratan (BIC).

Kahulugan kan Isaias 41:10

Inaasigurar kan Diyos na Jehovaa an saiyang maimbod na mga parasamba na tatabangan niya sinda, ano man na problema an inaatubang ninda.

“Kaibanan mo ako.” Tinatawan ni Jehova an saiyang mga parasamba nin dahilan kun taano ta dai dapat sinda matakot—dai sinda nagsosolo. Huling nahihiling niya an mga inaagihan ninda asin dinadangog an saindang mga pamibi, masasabing garo man lang yaon siya kaibanan ninda.—Salmo 34:15; 1 Pedro 3:12.

“Ako an saimong Diyos.” Tinatabangan ni Jehova na magin kalmado an saiyang mga parasamba paagi sa pagpagirumdom sa sainda na siya pa man giraray an Diyos ninda asin na inaako niya sinda bilang saiyang mga parasamba. Makakasigurado sinda na sa ano man na sitwasyon, mayo nanggad na makakapugol sa Diyos na tabangan sinda.—Salmo 118:6; Roma 8:32; Hebreo 13:6.

“Papakusugon taka, iyo, tatabangan taka, talagang kakaputan taka kan sakong tuong kamot nin katanusan.” Naggamit si Jehova nin tulong magkakalain na ekspresyon para iduon an saro sanang ideya—na talagang tatabangan niya sinda. Naggamit siya nin ilustrasyon na nagpapahiling kun ano an gigibuhon niya pag nangangaipo nin tabang an saiyang mga lingkod: iinuunat niya an saiyang tuong kamot para tabangan sindang makatindog giraray.—Isaias 41:13.

Pinapakusog saka tinatabangan nin Diyos an saiyang mga parasamba panginot na paagi sa saiyang Tataramon, an Bibliya. (Josue 1:8; Hebreo 4:12) Halimbawa, an Tataramon nin Diyos nagtatao nin praktikal na kadunungan sa mga napapaatubang sa mga pagbalo, arog nin pagtios, hilang, o pagkagadan nin mahal sa buhay. (Talinhaga 2:6, 7) Ginagamit man nin Diyos an saiyang banal na espiritu, o aktibong puwersa, tanganing matabangan an mga parasamba niya na magkaigwa nin malinaw na kaisipan asin nin kusog na kaipuhan ninda para matagalan an mga pagbalo.—Isaias 40:29; Lucas 11:13.

Konteksto kan Isaias 41:10

An mga tataramon na ini nakatao nin karangahan sa maimbod na mga Judio na dinarang bihag sa Babilonya. Ihinula ni Jehova na sa pagtatapos kan pagkadistiyero kan mga Judio, may mababaretaan sinda na may maabot na kongkistador na masalakay sa kataraid na mga nasyon dangan aatakihon an Babilonya. (Isaias 41:2-4; 44:1-4) Mantang an Babilonya asin an kataraid na mga nasyon matarakig sa takot huli sa baretang iyan, dai kaipuhan na matakot kan mga Judio dahil poprotektaran sinda ni Jehova. Tulong beses niya sindang inasigurar kan mga tataramon na “dai ka matakot.”—Isaias 41:5, 6, 10, 13, 14.

Dawa isinurat ini para sa maimbod na mga Judio na idinistiyero sa Babilonya, iningatan ni Jehova an mga tataramon na nasa Isaias 41:10 para makatao iyan nin karangahan sa gabos na parasamba niya. (Isaias 40:8; Roma 15:4) Tinatabangan niya sinda ngunyan, kun paanong tinabangan niya an saiyang mga lingkod kaidto.