Gikan sa Boot na Iprinesentar an Saindang Sadiri—Sa Ecuador
SI Bruno, sarong hoben na brother sa Italia, napaatubang sa panggigipit. Kagagradwar pa sana nia sa haiskul asin sia an may pinakahalangkaw na grado sa klase. Ngonyan pinipirit sia kan saiyang mga paryente asin maestra na kumua nin halangkaw na edukasyon. Pero pirang taon pa sana an nakaagi, idinusay nia ki Jehova an sadiri nia, na nanuga na eenoton sa saiyang buhay an kabotan nin Dios. Ano an nagin desisyon nia? Sia nagpaliwanag: “Sinabi ko ki Jehova sa pamibi na ootobon ko an sakong pagdusay asin eenoton ko sia. Alagad onesto kong idinagdag sa sakong pamibi na an gusto kong buhay bakong nakakasawa kundi buhay na nagagamit sa manlaenlaen na gibohon sa paglilingkod sa saiya.”
Pakalihis nin pirang taon, yaon na si Bruno sa Ecuador, Amerika del Sur. Sia nagsabi: “Sinimbag ni Jehova an sakong pamibi na sobra pa sa inaasahan ko.” Pag-abot nia sa Ecuador, dai nia inaasahan na makamidbid an dakol na iba pang hoben na adulto na nagduman man tanganing orog na maglingkod ki Jehova.
MGA HOBEN NA ‘BINALO SI JEHOVA’
Arog kan rinibo pang hoben sa bilog na kinaban, inako ni Bruno an pangagda ni Jehova: “Tabi baloa nindo ako . . . kun baga dai ko bukasan sa saindo an mga gaha kan kalangitan asin ulaan ko nanggad kamo nin bendisyon.” (Mal. 3:10, NW) Huling napahiro kan pagkamoot sa Dios, nagdesisyon sinda na ‘baloon si Jehova’ paagi sa gikan sa boot na pagtao kan panahon, kosog, asin materyal na rogaring ninda tanganing suportaran an saiyang intereses sa nasyon na mas dakula an pangangaipo para sa mga parabalangibog kan Kahadean.
Pagkaabot tolos kan gikan sa boot na mga parabalangibog na ini sa saindang bagong asignasyon, nahiling ninda mismo na “kadakol kan anihon, alagad kadikit an paraani.” (Mat. 9:37) Halimbawa, si Jaqueline na taga Alemania entusiastikong nagsurat sa sangang opisina kan Ecuador: “Labing duwang taon pa sana akong naglilingkod sa Ecuador, asin igwa na ako nin 13 tinotokdoan sa Biblia, na an 4 sa sainda regular nang nag-aatender sa mga pagtiripon. Bako daw na nakakaogma iyan?” Si Chantal na taga Canada nag-estorya: “Kan 2008, buminalyo ako sa sarong lugar sa may baybayon nin Ecuador na saro sana an kongregasyon. Ngonyan igwa na nin tolong kongregasyon asin labing 30 payunir sa lugar na iyan. Mayo nang maorog pa sa pakahiling na kadakol na bagohan an nag-ooswag!” Sinabi pa nia: “Kasuarin pa sana buminalyo ako sa siudad na 2,743 metros an langkaw, na nasa Kabukidan nin Andes. An siudad may labing 75,000 na residente alagad saro sana an kongregasyon. Mabungang teritoryo nanggad iyan! Ikinakaogma kong marhay an sakong ministeryo.”
AN MGA KADEPISILAN NA KALABOT
Siempre, an paglilingkod sa ibang nasyon igwa man nin dakulang mga kadepisilan. An totoo, an nagkapirang hoben napaatubang sa mga olang bago pa man sinda buminalyo. Si Kayla na taga Estados Unidos nagsurat: “Nakakadesganar an negatibong reaksion kan nagkapirang tugang sa samong lugar na may marahay man na intension. Dai ninda nasasabotan kun taano ta gusto kong bumalyo sa ibang nasyon tanganing magpayunir. Kun beses, napapaisip ako, ‘Tama daw an desisyon ko?’” Dawa siring, nagdesisyon si Kayla na bumalyo. Sia nagpaliwanag: “An dakol na pamibi ki Jehova asin halawig na pakikipag-olay sa maygurang na mga tugang nakatabang sa sako na masabotan na binebendisyonan ni Jehova an espiritu nin pagigin andam.”
Para sa dakol, depisil an pag-adal nin ibang lenguahe. Nagigirumdoman ni Siobhan na taga Ireland: “Depisil para sa sako na dai ikapahayag an gusto kong sabihon. Kaipuhan kong makanood na magin mapasensia, maigot na adalan an lenguahe, asin ngisihan an sadiri ko kun nasasala ako.” Nagsabi man si Anna na taga Estonia: “Mas depisil nanggad na manodan an Kastila kisa sa matuod sa init sa tropiko, dakol na alpog, asin mayong mainit na shower. Kun beses, garo gusto ko nang sumuko. Kaipuhan kong makanood na magpokus sa sakong pag-oswag, bako sa mga sala ko.”
Depisil man atubangon an kapungawan. Si Jonathan na taga Estados Unidos nagsabi: “Dai nahaloy pag-abot ko, nangluya an boot ko huling harayo na ako sa sakong mga katood asin pamilya. Alagad napangganahan ko iyan paagi sa pagkonsentrar sa sakong personal na pag-adal sa Biblia asin sa ministeryo. Dai nahaloy, an nakakaogmang mga eksperyensia ko sa langtad asin an bagong mga katood ko sa kongregasyon nakatabang sa sako na magin magayagaya giraray.”
An saro pang kadepisilan iyo an kamugtakan nin pamumuhay. Posibleng marhay na bako iyan kapareho kan kinatodan mo. Si Beau na taga Canada nagsabi: “Sa pinaghalean mong nasyon, tibaad ipinapasipara mo an mga serbisyong yaon pirme arog kan kuryente asin tubig na nagbobolos sa gripo. Alagad digdi, pawarawara iyan.” Sa dakol na nagpoprogreso pa sanang nasyon, parateng bakong kombenyente an transportasyon, dakol an dukha asin dai tataong magbasa saka magsurat. Nakakayanan ni Ines na taga Austria an siring na mga kamugtakan paagi sa pagkonsentrar sa positibong mga kualidad kan mga taga duman. “Mapag-istimar, maboot, matinabang, asin mapakumbaba sindang marhay,” an sabi nia. “Orog sa gabos, interesado sindang marhay na mas makanood manongod sa Dios.”
“BENDISYON SAGKOD NA MAYO NA NIN KULANG”
Minsan ngani nagsakripisyo an hoben na mga adultong ini na naglilingkod sa Ecuador, naeksperyensiahan ninda na nagtatao si Jehova nin ‘labi kaorog kisa sa gabos’ na inaasahan ninda. (Efe. 3:20) Tunay nanggad, namatean ninda na nag-ako sinda nin “bendisyon sagkod na mayo na nin kulang.” (Mal. 3:10, NW) Arog kaini an namatean ninda sa saindang ministeryo:
Bruno: “Pinonan ko an sakong paglilingkod digdi sa Ecuador sa interesanteng rehion nin Amazon. Kan huri, nagtabang ako sa pagpahiwas kan sangang opisina sa Ecuador. Ngonyan naglilingkod ako sa Bethel. Kan ako nasa Italia pa, nagdesisyon ako na enoton si Jehova, asin pinapanigoan nanggad nia an sakong pagmawot na magkaigwa nin buhay na nakakaogma asin nagagamit sa manlaenlaen na gibohon sa paglilingkod sa saiya.”
Beau: “Mas duminayupot akong marhay ki Jehova huling sa Ecuador nagagamit ko sa espirituwal na mga aktibidad an gabos kong panahon. Kasabay kaiyan, igwa ako nin dugang pang bendisyon na makaduman sa kawiliwiling mga lugar—sarong bagay na kaidto ko pa gustong gibohon.”
Anna: “Dai ko pighona na posible para sa sako, na daing agom, na magin garo misyonera. Alagad ngonyan aram ko nang posible iyan. Salamat sa bendisyon ni Jehova, maogma akong marhay sa paggibo nin mga disipulo, pagtogdok nin mga Kingdom Hall, asin pagkaigwa nin bagong mga katood.”
Elke: “Sa pinaghalean kong nasyon na Austria, parate akong namimibi ki Jehova na magkaigwa nin saro sanang tinotokdoan sa Biblia. Digdi, 15 an tinotokdoan ko sa Biblia! Nakakakontento nanggad na mahiling sinda na maogmang nag-ooswag.”
Joel: “Maogmang eksperyensia na makaabot sa ibang lugar tanganing maglingkod ki Jehova. Makakanood ka na manarig sa saiya nin orog pa, asin nakakaogma na mahiling na binebendisyonan nia an mga paghihingoa mo! Kan enot kong taon digdi pagkahale sa Estados Unidos, an dating 6 na parahayag sa grupo kun saen ako naglilingkod nagin nang 21. May 110 na nag-atender sa samong Memorial.”
KUMUSTA KA MAN?
Mga hoben na tugang, itinotogot daw kan saindong kamugtakan na maglingkod sa sarong nasyon na mas dakula an pangangaipo para sa mga parabalangibog kan Kahadean? Totoo, an paggibo nin dakulang desisyon na siring kaiyan mangangaipo nin maingat na pagplano. Orog sa gabos, kaipuhan an makosog na pagkamoot ki Jehova asin sa kapwa para sa siring na desisyon. Kun igwa ka kan siring na pagkamoot asin kualipikado ka, odok na mamibi ki Jehova manongod sa paglilingkod na ini sa ibang nasyon. Dugang pa, ipakipag-olay sa saimong Kristianong mga magurang asin sa mga elder sa kongregasyon an manongod sa pagmawot mo. Posibleng makapagkongklusyon ka na puede ka man makikabtang sa nakakaogma asin nakakakontentong paaging ini nin sagradong paglilingkod.
[Blurb sa pahina 3]
“An dakol na pamibi ki Jehova asin halawig na pakikipag-olay sa maygurang na mga tugang nakatabang sa sako na masabotan na binebendisyonan ni Jehova an espiritu nin pagigin andam.”—Kayla, taga Estados Unidos
[Kahon/Ritrato sa pahina 6]
Kun paano mag-andam sa paglilingkod sa ibang nasyon
• Magkaigwa nin regular na personal na pag-adal
• Repasohon An Satong Ministeryo sa Kahadean na Agosto 2011, pahina 4-6
• Makipag-olay sa iba na naglingkod na sa ibang nasyon
• Magsiyasat dapit sa kultura asin kasaysayan kan nasyon
• Kumua nin pundamental na kurso sa pag-adal kan lenguahe
[Kahon/Ritrato sa pahina 6]
An nagkapirang naglilingkod sa ibang nasyon sinusuportaran an saindang sadiri sa pinansial paagi sa . . .
• pagtrabaho nin pirang bulan kada taon sa nasyon na pinaghalean ninda
• pagpaarkila kan harong o apartment ninda, o pagpamahala kan saindang negosyo
• pagtrabaho paagi sa Internet
[Mga Ritrato sa pahina 4, 5]
1 Si Jaqueline na taga Alemania
2 Si Bruno na taga Italia
3 Si Beau na taga Canada
4 Si Siobhan na taga Ireland
5 Si Joel na taga Estados Unidos
6 Si Jonathan na taga Estados Unidos
7 Si Anna na taga Estonia
8 Si Elke na taga Austria
9 Si Chantal na taga Canada
10 Si Ines na taga Austria