Ginigibo Mo Daw an Hinahagad nin Diyos?

“Ano man na gusto mo sabihon mo lang. Gigibuhon ko iyan para saimo.” Tibaad mag-alangan kang sabihon iyan sa sarong estranghero o sa saro na dai mo gayong midbid. Pero posibleng dai ka mag-alangan na sabihon iyan sa sarong namumutan na amigo. Natural sana sa mga mag-amigo na gibuhon an pabor na hinahagad kan kada saro.

Sinasabi kan Bibliya na pirming ginigibo ni Jehova an aram niyang makakapaugma sa saiyang mga parasamba. Halimbawa, si Hading David na nagkaigwa nin haraning relasyon sa Diyos, nagsabi: ‘Dakul na ngangalasan an ginibo mo para samo. O Kagurangnan, na samuyang Diyos. Kun ako mangahas na ipahayag iyan gabos, sa kadakulan dai ko mauubos!’ (Salmo 40:5, An Marahay na Bareta Biblia) Naggigibo pa ngani si Jehova nin mga bagay na nakakapaugma dawa sa mga dai pa nakakamidbid sa saiya, asin ‘pinapano an saindang mga puso nin kakanon asin nin kaugmahan.’​—Guibo 14:17.

Nauugma si Jehova na gibuhon kun ano an nakakapaugma sa iba. Kaya rasonable sanang mag-asa na gigibuhon man kan mga gustong magin amigo nin Diyos an mga bagay na ‘makakapaugma sa puso’ niya. (Talinhaga 27:11) Pero, ano an puwede mong gibuhon para mapaugma an Diyos? Sinasabi kan Bibliya: ‘An paggibo nin marahay asin [pagtao sa iba] dai nindo paglingawan, huli ta an siring na mga atang nauuyunan nin Diyos.’ (Hebreo 13:16) Buot daw sabihon iyan sana an kaipuhan para mapaugma si Jehova?

‘Kun dai nin pagtubod dai mahihimo na mapaugma an Diyos,’ an sabi kan Bibliya. (Hebreo 11:6) Mahalagang mangnuhon na kan si Abraham magkaigwa nin pagtubod sa Diyos saka sana siya ‘inapod na katuod nin Diyos.’ (Santiago 2:23) Idinuon man ni Jesu-Cristo na kun gusto tang makamtan an bendisyon nin Diyos, kaipuhan tang magpahiling nin ‘pagtubod sa Diyos.’ (Juan 14:1) Kaya paano ka magkakaigwa kan pagtubod na hinahanap nin Diyos sa siisay man na irinarani niya sa saiya? Puwede mong punan iyan paagi sa regular na pag-adal kan Tataramon nin Diyos, an Bibliya. Sa paggibo kaiyan, magkakaigwa ka nin tamang kaaraman sa saiyang kabutan asin manunudan mo kun paano siya mapapaugma nin lubos. Dangan, mantang nadadagdagan an saimong tamang kaaraman manungod ki Jehova asin inaaplikar an mga nanunudan mo sa saiyang matanos na mga kahagadan, makusog an pagtubod mo sa saiya asin lalo man na magigin harani siya sa saimo.​—Colosas 1:9, 10.