Kahadian nin Diyos​—Sarong Gobyerno na Daing Korapsiyon

Dai ka daw mauyon na kun korapto an sosyedad nin tawo, magigin korapto man an ano man na gobyerno na parte kaiyan? Kun arog kaiyan, bako talagang sa sosyedad nin tawo magikan an sarong gobyerno na daing korapsiyon. Iyan an klase nin gobyerno na pigsasabi kan Bibliya​—an Kahadian nin Diyos, an gobyerno na itinukdo ni Jesus na ipamibi kan saiyang mga parasunod.​—Mateo 6:9, 10.

An Kahadian nin Diyos sarong totoong gobyerno na nasa langit asin namamahala na. Iyan an masalida sa gabos na gobyerno nin tawo. (Salmo 2:8, 9; Kapahayagan 16:14; 19:19-21) Kaiba sa mga bendisyon na itatao kan Kahadian sa katawuhan iyo an paghali kan korapsiyon sa gobyerno. Pag-isipan an anom na panginot na bagay manungod sa Kahadian na naggagarantiya kaini.

1. KAPANGYARIHAN

PROBLEMA: An pondo kan gobyerno hali sa mga tawo, na sa parati paagi sa mga buhis asin impuwesto. Huli sa naglalaog na pondong ini, may mga opisyal na natetentaran na maghabon; an iba man nag-aako nin suhol sa mga tawo na gustong pabawasan an binabayadan na buhis o iba pang bayadan sa gobyerno. Puwede ining magresulta sa daing katapusan na problema​—lalangkawan kan gobyerno an buhis para mataparan an siring na kawaran, na pupunan na man nin mas grabeng korapsiyon. Sa arog kaining kamugtakan, an mga tawong onesto an naaapektaran na marhay.

SOLUSYON: An kapangyarihan kan Kahadian nin Diyos hali sa Diyos na makakamhan sa gabos, si Jehova.a (Kapahayagan 11:15) Dai kaini kaipuhan na mangolekta nin buhis para magpunsiyonar. Imbes, an makangangalas na “kapangyarihan” nin Diyos asin pagigin bukas-palad niya garantiya na abundang itatao kan Kahadian an mga pangangaipo kan gabos na nasasakupan kaini.​—Isaias 40:26; Salmo 145:16.

2. TAGAPAMAHALA

PROBLEMA: An paghihinguwang halion an korapsiyon “dapat magpuon sa itaas,” an sabi ni Susan Rose-Ackerman, na nasambit sa nainot na artikulo. Nawawaran nin kredibilidad an gobyerno pag pinupurbaran nindang halion an korapsiyon sa mga pulis o sa mga opisyal nin customs pero kinokonsinte man an mga ginigibo kan haralangkaw na opisyal. Dawa an pinakamarahay na tawong tagapamahala igwa nin tendensiyang magkasala huli sa pagigin bakong perpekto. Arog kan sinasabi kan Bibliya, “mayo nanggad nin sarong matanos na tawo na danay na naggigibo nin karahayan sa gabos na panahon.”​—Parahulit 7:20, BPV.b

SOLUSYON: Bakong arog kan bakong perpektong mga tawo, si Jesu-Cristo, na pinili nin Diyos na magin Tagapamahala kan Kahadian, dai matetentaran na gumibo nin sala. Ipinahiling ini ni Jesus kan sayumahan niya an pinakadakulang suhol kasuarin man​—‘an gabos na kahadian kan kinaban asin an kamurawayan ninda.’ Ini an ipinangako ki Jesus karibay kan sarong akto nin pagsamba sa tagapamahala kan kinaban, an Diyablo. (Mateo 4:8-10; Juan 14:30) Dawa kan pinapasakitan si Jesus sagkod sa magadan, determinado siyang marhay na dai nuarin man magkasala. Sinayumahan niya an ipinapainom sa saiya na puwede kutanang makatabang para dai niya mamatian an kulog pero mawawaran man siya nin bilog na kontrol sa sadiri. (Mateo 27:34) Binuhay siya liwat nin Diyos asin yaon na ngunyan sa langit. Pinatunayan ni Jesus na talagang kuwalipikado siyang mamahala sa Kahadian.​—Filipos 2:8-11.

3. PAGIGIN MASARIG

PROBLEMA: Sa dakul na nasyon regular an eleksiyon. Paagi kaini, magigibo daa kan mga tawo na pahalion sa puwesto an koraptong mga opisyal. Pero an totoo, sa mga kampanya asin eleksiyon mas dakula an posibilidad kan korapsiyon, dawa sa inaapod na mauswag na mga nasyon. Paagi sa pagtao nin donasyon kan mga mayaman para sa kampanya asin iba pa, naiimpluwensiyahan nindang marhay an mga nakatukaw sa puwesto saka an masurunod pang matukaw.

An huwes na si John Paul Stevens kan Korte Suprema kan Estados Unidos nagsurat na nararaot kan siring na impluwensiya “bako sana an pagigin lehitimo asin kalidad kan Gobyerno kundi pati an tiwala kan mga tawo diyan.” Kaya bakong makangangalas na dakul na tawo sa bilog na kinaban an nag-iisip na an mga partido pulitikal an pinakakorapto sa gabos na institusyon.

SOLUSYON: Dai na nin pandadaya sa kampanya o sa eleksiyon huling establisado asin permanente an pamamahala kan Kahadian nin Diyos. (Daniel 7:13, 14) Huling an Diyos an nagpili kan Tagapamahala kaini, an Kahadian dai nakadepende sa boto kan mga tawo asin dai ninda puwedeng pabagsakon. Huli sa pagigin masarig kan Kahadian, makakasiguro kita na an mga ginigibo kaiyan pirming para sa pinakaikakarahay kan mga nasasakupan kaiyan.

4. LEY

PROBLEMA: Sa inot, puwedeng maisip mo na makakatabang an pagpautob nin bagong mga ley para mapakarhay an mga bagay-bagay. Pero uyon sa mga eksperto, pag nadadagdagan an mga ley, sa parati, mas nagdadakul sana an oportunidad para sa korapsiyon. Saro pa, an ipinapasar na mga ley na an partikularmenteng katuyuhan bawasan an korapsiyon, sa parati, magastos iimplementar pero dikit an nagiginibo.

SOLUSYON: An mga ley kan Kahadian nin Diyos nakakalabing marhay sa mga ley kan mga gobyerno nin tawo. Halimbawa, imbes na magtao si Jesus nin halabang listahan nin susundon manungod sa dapat asin dai dapat gibuhon, itinao niya an parating inaapod na Golden Rule. Sinabi niya: ‘An gabos na buot nindong gibuhon sa saindo nin mga tawo, gibuhon man nindo iyan sa sainda.’ (Mateo 7:12) An mas mahalaga pa, an mga ley kan Kahadian nakapokus sa motibo sagkod sa gibo. ‘Mamutan mo an saimong [kapwa] siring sa saimo man sana,’ an sabi ni Jesus. (Mateo 22:39) Siyempre, an Diyos, na nakakabasa nin puso, puwede talagang magpautob nin siring na mga pagbuot.​—1 Samuel 16:7.

5. MOTIBO

PROBLEMA: An puwersang nasa likod kan korapsiyon iyo an kahanaban asin pagigin makasadiri. Parating nahihiling sa mga opisyal kan gobyerno sagkod sa mga nasasakupan ninda an siring na negatibong ugali. Sa nagabang department store sa Seoul, na sinambit sa nainot na artikulo, nag-ako nin suhol an mga opisyal kan gobyerno sa mga kontratista, na nakakaaram na mas makakatipid kun matao nin suhol kisa sa gumamit nin tamang mga materyales asin sunudon an mga susundon sa pagtugdok.

Kaya para mawara an korapsiyon, dapat matukduan an mga tawo na halion an nakagamot nang mga motibo, arog kan kahanaban asin pagkamakasadiri. Pero, an mga gobyerno nin tawo mayo nin pagmawot asin kakayahan na iimplementar an arog kaining programa nin edukasyon.

SOLUSYON: Hahalion kan Kahadian nin Diyos an ugat kan korapsiyon paagi sa pagtukdo sa mga tawo kun paano madaog an salang mga motibo na pinupunan kaiyan.c Tinatabangan sinda kan edukasyon na ini na ‘mabago an saindang pag-iisip.’ (Efeso 4:23) Nanunudan nindang magin kontento asin magmakulog sa iba imbes na magin mahanab asin makasadiri.​—Filipos 2:4; 1 Timoteo 6:6.

6. SAKOP

PROBLEMA: Dawa sa pinakamarahay na kamugtakan asin pagtutukdo sa moral, may mga tawo na pinipiling magin bakong onesto asin magin korapto. Sinabi mismo nin mga eksperto na iyo ini an dahilan kun taano ta dai kayang halion kan mga gobyerno nin tawo an korapsiyon. An pinakamalalauman ta sana iyo na puwedeng mabawasan an korapsiyon asin an maraot na epekto kaiyan.

SOLUSYON: Sinabi kan United Nations Convention Against Corruption na para malabanan an korapsiyon, dapat na itulod kan gobyerno an “integridad, pagkaonesto asin pagigin responsable.” Iyo, marahayon an katuyuhan na ini, pero dai sana itinutulod kan Kahadian nin Diyos an mga kuwalidad na ini​—hinahagad iyan sa mga sakop kan Kahadian. Sinasabi kan Bibliya na an mga “paslo” o mahanab asin “putikon” dai magmamana kan Kahadian.​—1 Corinto 6:9-11, BPV; Kapahayagan 21:8.

Puwedeng manudan kan mga tawo na sunudon an halangkaw na mga pamantayan na ini sa moral, arog kan ginibo kan inot na mga Kristiyano. Halimbawa, kan an sarong disipulo na an pangaran Simon nagpurbar na bakalon sa mga apostol an banal na espiritu, sinayumahan ninda an suhol asin nagsabi: ‘Magsulsol ka kan karatan mong ini.’ Kan maaraman ni Simon an puwedeng kaabtan kan saiyang salang pagmawot, pinakiulayan niya an mga apostol na ipamibi siya tanganing mapaglabanan niya iyan.​—Guibo 8:18-24.

KUN PAANO MAGIN SAKOP KAN KAHADIAN

Ano man an saimong nasyonalidad, may oportunidad kang magin sakop kan Kahadian nin Diyos. (Guibo 10:34, 35) Paano? Maaaraman mo iyan sa pig-aalok kan Kahadian na programa nin edukasyon​—na bukas ngunyan sa gabos na tawo sa bilog na kinaban. Mauugma an Mga Saksi ni Jehova na ipahiling sa saimo kun paano ginigibo an libreng pag-adal sa Bibliya, na puwedeng gibuhon dawa sampulong minutos sana kada semana. Apuwera kaiyan, makakanuod ka nin urog pa manungod sa ‘marahay na bareta kan Kahadian nin Diyos,’ kaiba na kun paano kaiyan hahalion an korapsiyon sa gobyerno. (Lucas 4:43) Puwede mong kaulayon an mga Saksi ni Jehova sa saindong lugar o buksan an samong Web site na jw.org.