Magpasalamat ki Jehova Asin Mag-ako nin Bendisyon

1. Taano ta maninigo tang pasalamatan si Jehova?

TALAGANG maninigo tang pasalamatan si Jehova, an Paratao kan ‘gabos na marahay na balaog asin kan gabos na sangkap na [regalo].’ (Sant. 1:17) Bilang an satong mapagpadangat na Pastor, mamumuton niyang itinatao sa sato an gabos tang pangangaipo sa pisikal asin espirituwal. (Sal. 23:1-3) Siya ‘satong pailihan asin kusog’​—lalo na sa mga panahon nin kasakitan! (Sal. 46:1, An Marahay na Bareta Biblia) Totoong kadakul kitang dahilan na bilog na pusong mag-uyon sa isinurat kan salmista: “Magpasalamat kamo ki Jehova, huli ta siya marahay; an saiyang maimbod na pagkamuot nagdadanay sagkod lamang.”—Sal. 106:1, NW.

2, 3. (a) Ano an mga peligro kun babaliwalaon ta an mga bendisyon sa sato? (b) Anong mga hapot an pag-uulayan ta sa artikulong ini?

² Taano ta importanteng pag-ulayan ta an dapit sa pagpapasalamat? Arog kan ihinula, an mga tawo sa huring mga aldaw na ini lalong nagigin bakong mapagpasalamat. (2 Tim. 3:2) Binabaliwala nin dakul an mga bendisyon na inako ninda. Huli sa impluwensiya nin komersiyo asin mga anunsiyo, minilyon an nagmamaigot na makakua nin dakul imbes na makontento na sa mga bagay na igwa sinda. Puwede man kitang maimpluwensiyahan kan pagigin bakong mapagpasalamat. Arog kan suanoy na mga Israelita, puwede kitang magin bakong mapagpasalamat asin mawara an satong pag-apresyar sa mahalagang marhay na relasyon ta ki Jehova asin sa mga bendisyon na inako ta sa saiya.​—Sal. 106:7, 11-13.

³ Dangan, pag-isipan man an puwedeng mangyari pag napaatubang kita sa masakit na mga pagbalo. Sa mga panahon na iyan, puwedeng madali sana kitang magabatan na marhay asin malingawan an mga bendisyon sa sato. (Sal. 116:3) Kaya paano kita magkakaigwa nin mapagpasalamat na puso, asin paano ta iyan mapapagdanay? Ano an makakatabang sa sato na pirming magin positibo dawa nasa grabeng mga pagbalo? Aramon niyato.

KADAKUL NANGGAD ‘KAN SAIMONG MGA GINIBO, O JEHOVA’

4. Paano ta mapapagdanay an mapagpasalamat na puso?

⁴ Kun gusto tang magkaigwa nin mapagpasalamat na puso asin mapagdanay iyan, dapat tang midbidon na hali ki Jehova an mga bendisyon asin mapagpasalamat na hurop-hurupon iyan. Isip-isipon man na marhay an mga ginigibo niya para sa sato huli sa saiyang maimbod na pagkamuot. Kan ginibo iyan kan salmista, napahanga nanggad siya sa dakul na marahayon na bagay na ginibo ni Jehova.—Basahon an Salmo 40:5; 107:43.

5. Ano an manunudan ta ki apostol Pablo dapit sa pagigin mapagpasalamat?

⁵ Dakul kitang manunudan ki apostol Pablo kun dapit sa pagigin mapagpasalamat. Malinaw na hinurop-hurop niya an mga bendisyon sa saiya huling parati siyang nagpapasalamat nin udok sa puso. Aram na marhay ni Pablo na kaidto, siya “paralanghad, asin paralamag, asin parapakaraot.” Huli kaini, nagpapasalamat siya na sa ibong kan saiyang mga nagibong kasalan, pinahilingan siya nin Diyos asin ni Cristo nin pagkahirak asin pinagkatiwalaan siya nin ministeryo. (Basahon an 1 Timoteo 1:12-14.) Naaapresyar man na marhay ni Pablo an mga kapwa niya Kristiyano asin parating pinapasalamatan si Jehova huli sa marahayon na mga kuwalidad asin maimbod na paglilingkod ninda. (Fil. 1:3-5, 7; 1 Tes. 1:2, 3) Asin kan si Pablo nasa masakit na mga sitwasyon, tulos siyang nagpasalamat ki Jehova sa napapanahon na tabang sa saiya kan mga tugang niya sa espirituwal. (Gui. 28:15; 2 Cor. 7:5-7) Kaya bakong makangangalas na sa mga surat ni Pablo, dinadagka niya an mga Kristiyano: ‘Magpasalamat kamo, magpasaradol-sadol nin mga salmo, mga himno, asin mga awit na espirituwal na inawit na may biyaya.’—Col. 3:15-17.

PAGHUROP-HUROP ASIN PAMIBI—MAHALAGA TANGANING MAGDANAY NA MAPAGPASALAMAT

6. Ano an partikular na ipinagpapasalamat mo ki Jehova?

⁶ Paano ta maaarog an marahayon na halimbawa ni Pablo sa pagigin mapagpasalamat? Arog ni Pablo, kaipuhan tang hurop-hurupon an mga ginibo ni Jehova para sa sato mismo. (Sal. 116:12) Kun ika haputon, ‘Anong mga bendisyon hali ki Jehova an ipinagpapasalamat mo?’ ano daw an isisimbag mo? Kaiba daw sa sasabihon mo an mahalagang marhay na relasyon mo ki Jehova? O an inako mong kapatawadan huli sa pagtubod mo sa atang na pantubos ni Cristo? Sasambiton mo daw an pangaran kan mga tugang na nagtabang sa saimo kan ika mag-agi nin lain-lain asin grabeng mga pagbalo? Siyempre siguradong kaiba diyan an saimong namumutan na agom asin padangat na mga aki. An paghurop-hurop sa marahayon na mga bendisyon na iyan hali sa saimong mamumuton na Ama, si Jehova, mapahiro sa saimong puso na pasalamatan siya aroaldaw.—Basahon an Salmo 92:1, 2.

7. (a) Taano ta dapat kitang magpasalamat ki Jehova sa pamibi? (b) Paano ka makikinabang sa mga pamibi nin pasasalamat?

⁷ Kun pirmi tang isinasaisip asin isinasapuso an mga bendisyon sa sato, magigin andam kitang mamibi asin magpasalamat ki Jehova. (Sal. 95:2; 100:4, 5) An dakul namimibi sana pag may hahagadon sa Diyos. Pero, aram ta na nauugma si Jehova pag nagpapasalamat kita sa mga bagay na igwa kita. Dakul an halimbawa sa Bibliya nin magagayon na pamibi nin pasasalamat, arog kaidtong pamibi ni Hana asin Hezekias. (1 Sam. 2:1-10; Isa. 38:9-20) Kaya arugon an maimbod na mga lingkod na idto na nagin mapagpasalamat. Iyo, pasalamatan si Jehova sa pamibi huli sa mga bendisyon na nakakamtan mo. (1 Tes. 5:17, 18) Dakul an pakinabang sa paggibo kaiyan. Mapapakusog ka, mararom an pagkamuot mo ki Jehova, asin mas lalo kang mapaparani sa saiya.​—Sant. 4:8.

8. Ano an puwedeng magin dahilan na mawara an pag-apresyar ta sa gabos na ginibo ni Jehova para sa sato?

⁸ Taano ta dapat na magdanay kitang alisto sa peligro na mawara an satong pag-apresyar sa karahayan ni Jehova? Huling minana ta an tendensiya nin pagigin bakong mapagpasalamat. Pag-isipan ini: Ilinaag an inot tang mga magurang na si Adan asin Eva sa sarong paraisong hardin. Itinao sa sainda an gabos nindang pangangaipo, asin may paglaom sindang mabuhay sagkod lamang sa katuninungan. (Gen. 1:28) Pero dai ninda inapresyar an mga bendisyon sa sainda. May kahanaban sindang nagmawot nin urog pa. Bilang resulta, nawara sa sainda an gabos. (Gen. 3:6, 7, 17-19) Huling yaon kita sa bakong mapagpasalamat na kinaban, puwedeng malingawan ta man an gabos na ginibo ni Jehova para sa sato. Tibaad binabaliwala ta na an pakikikatuod ta ki Jehova. Tibaad dai ta na naaapresyar an pribilehiyo ta na magin kabtang kan satong pambilog na kinaban na kasararuan nin magturugang. Puwedeng nauubos na an panahon ta sa mga bagay kan kinaban na ini na madali nang mawara. (1 Juan 2:15-17) Tanganing malikayan an mga peligrong iyan, dapat tang hurop-hurupon an mga bendisyon sa sato asin regular na pasalamatan si Jehova sa pribilehiyo tang magin lingkod niya.—Basahon an Salmo 27:4.

KUN NAGTATAGAL NIN MGA PAGBALO

9. Kun napapaatubang sa grabeng mga pagbalo, taano ta dapat tang hurop-hurupon an mga bendisyon sa sato?

⁹ Makakatabang sa sato an pagkaigwa nin mapagpasalamat na puso tanganing makatagal sa grabeng mga pagbalo. Tibaad mapurisaw kitang marhay kun bigla kitang mapaatubang sa mga sitwasyon na mabago kan satong buhay, arog kan pagsambay nin agom, pagkaigwa nin nakakagadan na hilang, pagkagadan nin sarong namumutan, o grabeng mga epekto nin natural na kalamidad. Sa siring na mga panahon, mararanga asin mapapakusog kita kan paghurop-hurop sa mga bendisyon sa sato. Pag-ulayan ta an minasunod na mga eksperyensiya.

10. Paano nakinabang si Irina sa paghurop-hurop niya kan mga bendisyon sa saiya?

¹⁰ Si Irinaa, sarong regular payunir sa North America, naagom nin sarong elder na dai nagin maimbod sa saiya asin inabandonar siya saka an saindang mga aki. Ano an nakatabang ki Irina na padagos na maglingkod nin maimbod ki Jehova? Sinabi niya: “Nagpapasalamat ako sa personal na pag-ataman sako ni Jehova. Pag sinasaro-saro ko an mga bendisyon na inaako ko sa kada aldaw, nahihiling ko na sarong pribilehiyo nanggad na mamidbid asin mamutan kan satong mapagprotektar na Ama sa langit. Aram kong nungka niya akong babayaan.” Dawa dakul an mamundong pangyayari sa buhay ni Irina, an pagigin magaya-gaya niya an padagos na nagpakusog sa saiya asin siya mismo nakapakusog man sa iba.

11. Ano an nakatabang ki Kyung-sook na matagalan an sarong nakakagadan na hilang?

¹¹ Si Kyung-sook, sarong sister sa Asia, nagpayunir nin labing 20 taon kaiba kan saiyang agom. Bigla na sana, na-diagnose siya na grabe na an saiyang kanser sa baga asin sinabihan siya na tulo sagkod anom na bulan na sana an buhay niya. Minsan ngani dakul na problema na an inagihan nindang mag-agom, dakula asin sadit, tiwala sinda na mayo sindang hilang. Sinabi niya: “Grabe an nagin epekto sako kan hilang na ini. Pagmati ko nawara sako an gabos saka natakot akong marhay.” Ano an nakatabang ki Kyung-sook na makatagal? Sinabi niya: “Burubanggi bago magturog, nagsasakat ako sa may atop mi asin makusog akong namimibi dapit sa limang bagay na ipinagpapasalamat ko sa aldaw na iyan. Tapos napapakusog na an buot ko, asin napapahiro akong ipahayag an pagkamuot ko ki Jehova.” Paano nakinabang si Kyung-sook sa mga pamibi niyang ini burubanggi? Siya nagsabi: “Narealisar ko na sa masakit na mga kamugtakan, pinapakusog kami ni Jehova asin na mas dakul nanggad na bendisyon an inaako mi kisa sa mga kasakitan na inaagihan mi.”

12. Ano an nakaranga ki Jason pagkagadan kan saiyang agom?

¹² Si Jason, na naglilingkod sa sarong sangang opisina sa Aprika, labing 30 taon nang nasa bilog na panahon na paglilingkod. Sinabi niya: “Pitong taon na an nakaagi, nagadan an sakong agom, asin garo dai ko makaya an kulog. Nangluluyang marhay an buot ko pag iniisip ko an mga inagihan niya mantang nakikipaglaban sa kanser.” Ano an nakatabang ki Jason na makatagal? “May panahon kaidto,” an sabi niya, “na ginirumdom ko an maugmang panahon na magkaibanan kaming mag-agom, dangan pinasalamatan ko si Jehova sa pamibi huli sa magayon na pangyayaring iyan na nakakaugmang girumdumon. Naginhawahan ako asin puon kaidto regular ko nang pinapasalamatan si Jehova huli sa mga pangyayaring iyan na maugmang balik-balikan. Binagong marhay kan pagigin mapagpasalamat an sakong pananaw. Namamatian ko pa man giraray an kulog na mawaran nin agom, pero nabago na an sakong pananaw huli sa pasasalamat ko ki Jehova sa pagkaigwa nin maugmang buhay bilang may agom asin sa pribilehiyong makapaglingkod sa saiya kaiba kan saro na namutan siyang marhay.”

13. Ano an nakatabang ki Sheryl na makaya an pagkagadan kan haros bilog niyang pamilya?

¹³ Kan tuminama an Super Typhoon Haiyan o Yolanda sa sentral na parte kan Pilipinas sa huring kabtang kan 2013, haros nawara an gabos ki Sheryl, na 13 anyos pa sana kaidto. Sinabi niya: “Nawaran ako nin harong, saka nawara an haros bilog kong pamilya.” Nagadan an saiyang ama, ina, asin an tulo niyang tugang huli sa makusugon na storm surge. Ano an nakatabang ki Sheryl na malampasan an trahedyang ini na dai nadidisganar sa buhay? Igwa siyang mapagpasalamat na puso asin pirmi niyang iniisip an mga bendisyon na igwa pa siya. “Nahiling ko an gabos na ginibo kan mga tugang tanganing magtao nin ayuda asin pagpakusog sa buot sa mga nangangaipo nin tabang. Aram kong ipinapamibi ako kan mga tugang sa bilog na kinaban.” Sinabi pa niya: “Nagpapasalamat akong marhay na si Jehova an sakong Diyos. Pirmi niyang itinatao sa sato an mga bagay na kaipuhan ta.” Iyo, an pagsaisip sa mga bendisyon na inaako ta sarong makusog na pangontra sa grabeng kamunduan. Tinatabangan kita kan mapag-apresyar na puso na magpadagos sa ibong nin ano man na mamundong pangyayari na puwedeng mapaatubang sa sato.​—Efe. 5:20; basahon an Filipos 4:6, 7.

‘ALAGAD AKO, MAG-UUGMA KI JEHOVA’

14. Anong nakakaugmang paglaom an naghahalat sa sato? (Hilingon an ritrato sa kapinunan kan artikulo.)

¹⁴ Sa bilog na kasaysayan, nag-uugma an banwaan ni Jehova sa mga bendisyon na inaako ninda. Halimbawa, pagkatapos na mailigtas an mga Israelita tumang ki Faraon asin sa mga hukbo kaini sa Dagat na Pula, ipinahayag kan mga Israelita an saindang kagaya-gayahan paagi sa mga awit nin pag-umaw asin pasasalamat. (Ex. 15:1-21) Ngunyan, an saro sa pinakamamahal tang mga bendisyon iyo an siguradong paglaom niyato na ililigtas kita sa ano man na matao sa sato nin kulog asin kasakitan. (Sal. 37:9-11; Isa. 25:8; 33:24) Imahinaron an mamamatian ta kun runuton na ni Jehova an gabos na kaiwal niya asin maugma niya kitang akuon sa sarong matuninong asin matanos na bagong kinaban. Magigin aldaw nanggad iyan nin pasasalamat!​—Kap. 20:1-3; 21:3, 4.

15. Ano an determinado mong gibuhon sa bilog na taon nin 2015?

¹⁵ Inaantisipar ta an kadakul na espirituwal na bendisyon hali ki Jehova sa taon 2015. Siyempre, puwedeng mag-agi man kita nin mga pagbalo. Ano man an mangyari, aram tang nungka kitang babayaan ni Jehova. (Deut. 31:8; Sal. 9:9, 10) Padagos niyang itatao an gabos na kaipuhan ta tanganing maimbod na makapaglingkod sa saiya. Kaya, magin determinado lugod kitang papagdanayon an kaisipan na arog kan ki propeta Habacuc, na nagsabi: ‘Minsan an higera dai magburak, maski sa mga ubas dai magkaigwa nin mga bunga; an gibo kan oliba dai mangyari, asin an mga bukid dai magtarao nin pagkakan; asin an mga karnero halion diyan sa languban, asin dai magkaigwa nin mga baka diyan sa mga pasabsaban; alagad ako, mag-uugma ki Jehova; asin maggagaya-gaya ako sa Diyos nin sakuyang kaligtasan.’ (Hab. 3:17, 18) Iyo, sa bilog na taon na ini, maugma lugod niyatong hurop-hurupon an mga bendisyon sa sato asin mapahirong sumunod sa sadol kan satong teksto para sa taon 2015: ‘Magpasalamat kamo ki Jehova, huli ta siya marahay.’​—Sal. 106:1.