TEMA SA COVER | GUSTO MO DAW MAG-ADAL NIN BIBLIYA?

Sarong Programa Nin Pag-adal Sa Bibliya Para Sa Gabos

Midbid na marhay an Mga Saksi ni Jehova sa saindang pakikipag-ulay sa mga tawo manungod sa Bibliya. Pero aram mo daw na igwa man kami nin sarong programa nin pag-adal sa Bibliya na ginigibo sa bilog na kinaban?

Sarong lalaki na nakikipag-adal nin Bibliya sa pinagtatrabahuhan niya

Kan 2014, labing 8,000,000 na Saksi sa 240 kadagaan an nagsasagibo nin haros 9,500,000 na pag-adal sa Bibliya kada bulan.a Sa katunayan, mas dakul pa an bilang kan mga tawo na nakikipag-adal nin Bibliya sa samuya kisa sa indibidwal na populasyon kan mga 140 nasyon!

Para magibo an pagtutukdo na ini, an Mga Saksi ni Jehova nagpupublikar nin haros saro may kabangang bilyon na Bibliya, libro, magasin, asin iba pang pantabang sa pag-adal sa Bibliya kada taon—sa mga 700 na lengguwahe! Huli sa daing kaagid na paghihinguwang ini sa pagpublikar, nagin posible para sa mga tawo na mag-adal nin Bibliya sa lengguwahe na gusto ninda.

“Habo ko talagang mag-eskuwela ta habo kong mag-adal, pero an pag-adal na ini maugma. Saka an mga nanunudan ko talagang nakakaranga!”—Katlego, South Africa.

“Sa pag-adal na ini, nasimbag gabos an hapot ko saka dakul pang iba.”—Bertha, Mexico.

“Nag-aadal kami nin Bibliya sa harong mi sa oras na kumbenyente sako. Kaya mayo na akong hahanapon pa!”—Eziquiel, Brazil.

“Kun beses, inaabot nin 15 sagkod 30 minutos an pag-adal—kun minsan mas halawig—depende sa kun ano an kumbenyente sako.”—Viniana, Australia.

“Libre an pag-adal—pambihira talaga ini!”—Aime, Benin.

“Mapasensiyang marhay saka mabuuton an nagtutukdo sako sa Bibliya. Nagin dayupot kami.”—Karen, Northern Ireland.

“Dakul an nag-aadal nin Bibliya na dai man nagigin Saksi.”—Denton, Inglatera.

SIMBAG SA PARATING MGA IHINAHAPOT MANUNGOD SA SAMONG PROGRAMA NIN PAG-ADAL SA BIBLIYA

Paano ginigibo an pag-adal?

Pag-uulayan an manlain-lain na topiko sa Bibliya asin sisiyasaton an mga bersikulo sa Bibliya na may koneksiyon sa temang pinag-uulayan. Halimbawa, sinisimbag kan Bibliya an mga hapot na arog kaini: Siisay an Diyos? Anong klaseng Diyos siya? Igwa daw siya nin pangaran? Sain siya nakaistar? Puwede daw kitang magin dayupot sa saiya? Pero an hapot iyo kun sain hahanapon sa Bibliya an simbag.

Para tabangan an mga tawo na makua an simbag, sa parati, ginagamit mi an librong Ano Man Nanggad an Itinotokdo kan Biblia?b na may 224 pahina. Dinisenyo talaga an librong ini tanganing tabangan an mga tawo na masabutan an panginot na mga katukduan sa Bibliya. Kaiba diyan an manungod sa Diyos, ki Jesu-Cristo, pagsakit nin tawo, pagkabuhay liwat, pamibi, asin dakul pang iba.

Nuarin asin sain puwedeng gibuhon an pag-adal?

Puwedeng gibuhon iyan sa oras asin lugar na kumbenyente sa saimo.

Gurano kalawig an kada sesyon nin pag-adal?

Dakul an nagtatagama nin sarong oras o labi pa kada semana para sa pag-adal nin Bibliya. Pero an lawig kan pag-adal depende sa kamugtakan. Puwede ming ibagay iyan sa saimong iskedyul. An iba nag-aadal sa laog nin 10 o 15 minutos sana kada semana.

Gurano an bayad sa pag-adal?

Daing bayad an pag-adal saka an mga ginagamit sa pag-adal. Kauyon ini kan pagbuot ni Jesus sa saiyang mga disipulo: “Inako nindong daing bayad, itao man nindong daing bayad.”—Mateo 10:8.

Gurano kalawig an bilog na kurso nin pag-adal?

An lawig kan kurso nin pag-adal nakadepende sa saimo. An librong Ano Man Nanggad an Itinotokdo kan Biblia? may 19 leksiyon. Puwede mong pag-adalan an arin man na leksiyon o an gabos na leksiyon sa rikas na puwede sa saimo.

Kaipuhan ko daw na magin saro sa Mga Saksi ni Jehova?

Dai. Iginagalang mi an deretso kan kada indibidwal na pumili kan papaniwalaan ninda. Pero, an mga tawo na igwa na nin pundamental na kaaraman sa Bibliya puwedeng magdesisyon uyon sa nanudan niya.

Sain ako makakakua nin dagdag na impormasyon?

Makukua sa Web site na jw.org/bcl an tamang impormasyon manungod sa mga paniniwala asin aktibidad kan Mga Saksi ni Jehova.

Paano ako ma-request nin pag-adal sa Bibliya?

An mga tawo nagre-request nin pag-adal sa Bibliya sa lain-lain na paagi: sa internet, surat, asin telepono

Mag-submit nin request online sa www.jw.org/bcl.
Sumurat sa pinakaharaning adres na nasa pahina 2 kan magasin na ini.
Kontakon an mga Saksi ni Jehova sa lugar nindo.

a Sa parati, ginigibo an mga pag-adal sa Bibliya sa mga indibidwal o saradit na grupo.

b Ipinublikar kan Mga Saksi ni Jehova. Labing 230 milyones na kopya kan librong ini an naimprenta na sa labing 260 lengguwahe.

TABANG PARA SA MGA PAMILYA

“Puon kan mag-adal nin Bibliya an agom ko, narisa ko na dakula an nagin pagbabago niya. Nagin mas marahay an buhay pampamilya mi. Gusto kong maaraman kun ano an pig-aadalan niya, kaya nag-adal man ako. Huli sa nanudan ko, nagin mas marahay akong tawo. Mas nagin dayupot an pamilya mi huli sa pag-adal sa Bibliya.”—Eziquiel.

“Kan nag-aadal na ako nin Bibliya, ipinundo ko an pagdroga, pagburat, saka nanudan kong kontrulon an pagkaanggot ko. Mas malinig asin mas areglado an samong harong. Mas pinapahalagahan ko na an sakong pamilya saka nauugma akong gibuhon an mga bagay na nakakapaugma sa sainda. Mas maugma nanggad ako ngunyan.”—Karen.

“May mga nagkikritika sa pag-adal ko nin Bibliya. Pero sinuportaran kan agom ko an sakong desisyon. An sabi niya: ‘Mayo akong pakiaram sa sinasabi kan iba. An mahiling na marahay an nagigin epekto kaiyan saimo—iyan an mahalaga sako. Ipadagos mo sana an ginigibo mo.’ Dai pa nuarin man nagin arog kaini karahay an samong buhay pampamilya!”—Viniana.