Ano an Pag-adal sa Bibliya na Iinaalok kan mga Saksi ni Jehova?
Nag-aalok an mga Saksi ni Jehova nin epektibong paagi para manudan mo an mga itinutukdo kan Bibliya. An samong programa nin pag-adal sa Bibliya makakatabang saimo na:
Magkaigwa nin maugmang buhay
Magin amigo nin Diyos
Maaraman an mga pangako kan Bibliya para sa maabot na panahon
Sa page na ini
Puwede daw na purbaran ko nguna an sarong sesyon nin pag-adal?
Kun mag-adal ako nin Bibliya, pipiriton daw akong magin Saksi ni Jehova?
Igwa kamo nin programa sa pag-adal nin Bibliya na mayo nin personal na paratukdo?
Paano ginigibo an pag-adal sa Bibliya?
Tatabangan ka nin sarong personal na paratukdo na magin pamilyar sa Bibliya nin tema por tema. Gamit an interactive na pantabang sa pag-adal nin Bibliya na Mabuhay nin Maugma Sagkod Pa Man! maaaraman mo an mensahe kan Bibliya asin manunudan mo kun paano iyan makakatabang sa saimo. Para sa dagdag na impormasyon, hilingon an videong ini.
May bayad daw an pag-adal?
Mayo. Sinusunod kan mga Saksi ni Jehova an pagbuot ni Jesus sa saiyang mga disipulo: “Inako nindong daing bayad, itao nindong daing bayad.” (Mateo 10:8) Dai mo man kaipuhan magbayad para sa mga reperensiya na gagamiton sa pag-adal, kaiba an Bibliya asin an publikasyon na Mabuhay nin Maugma Sagkod Pa Man!
Gurano kalawig an pag-adal?
An bilog na pag-adal igwa nin 60 leksiyon. Depende saimo an rikas kan saindong pag-adal, pero dakul na estudyante an natatapos an saro o labi pang leksiyon kada semana.
Paano ako makakapuon sa pag-adal?
1. Mag-fill out nin online form. An personal na mga impormasyon na itatao mo gagamiton sana para maproseso an saimong request na kontakon ka kan saro sa mga Saksi ni Jehova.
2. Sarong paratukdo an makontak saimo. Ipapaliwanag kan matukdo saimo kun ano an mga aasahan mo sa saindong interactive na pag-adal nin Bibliya, asin sisimbagon niya an mga hapot mo.
3. Kamo an maulay kan paratukdo mo kun paano gigibuhon an pag-adal. An pag-adal puwedeng gibuhon na magkaibanan kamo sa sarong lugar o paagi sa telepono, video call, surat, o email. Sa parati, mga sarong oras an pag-adal, pero puwedeng mas halipot o mas halawig diyan an saindong pag-adal depende sa iskedyul mo.
Puwede daw na purbaran ko nguna an sarong sesyon nin pag-adal?
Iyo. Para mapurbaran mo, mag-fill out ka kan online form. Pag kinontak ka nin sarong paratukdo, sabihon mo saiya na gusto mong purbaran nguna an pag-adal para mahiling kun magugustuhan mo iyan. Gagamiton niya an brosyur na Mabuhay nin Maugma Sagkod Pa Man! na igwa nin tulong pambukas na leksiyon para mahiling mo kun magugustuhan mo an pag-adal.
Kun mag-adal ako nin Bibliya, pipiriton daw akong magin Saksi ni Jehova?
Dai. Gustong-gusto kan mga Saksi ni Jehova na tukduan an mga tawo manungod sa Bibliya, pero dai mi lamang pinipirit an siisay man na maglaog sa relihiyon mi. Imbes, magalang ming itinutukdo an mga katotoohan sa Bibliya asin irinerespeto an deretso kan lambang indibidwal na magdesisyon kun ano an papaniwalaan niya.—1 Pedro 3:15.
Puwede ko daw gamiton an sadiri kong Bibliya?
Iyo, puwede mong gamiton an arin man na traduksiyon nin Bibliya na gusto mo. Dawa ngani mas gusto ming gamiton an Bagong Kinaban na Traduksiyon kan Banal na Kasuratan huling malinaw saka tama an pagkatradusir kaiyan, aram ming dakul na tawo an mas gustong gamiton an traduksiyon na pamilyar na sa sainda.
Puwede daw na may imbitaran ako na mag-iba sa pag-adal?
Iyo. Puwede mong imbitaran na mag-iba sa pag-adal an bilog mong pamilya o an siisay man na amigo mo.
Paano kun nakipag-adal na ako nin Bibliya sa mga Saksi ni Jehova kaidto? Puwede daw akong mag-adal giraray?
Iyo. Sa katunayan, tibaad mas ma-enjoy mo an bagong programa nin pag-adal ta pig-update iyan para magin mas angay sa kamugtakan kan mga tawo ngunyan. Mas dakul iyan nin artwork saka video asin mas interactive kisa sa dating mga programa nin pag-adal sa Bibliya.
Igwa kamo nin programa sa pag-adal nin Bibliya na mayo nin personal na paratukdo?
Igwa. Dawa ngani mas epektibo an pag-adal kan kadaklan na estudyante pag may nagtutukdo sainda, may mga gustong mag-adal na mayo nguna nin nagtutukdo sa sainda sa inot. An samong web page na Pantabang sa Pag-adal nin Bibliya igwa nin libreng mga pantabang saka mga reperensiya na makakatabang saimo sa pag-adal mo nin Bibliya. Ini an mga pantabang na puwedeng magin kapaki-pakinabang saimo:
Online Bible Study Lessons. Sinisimbag kan interactive lessons na ini an nagkapira sa pinakaimportanteng hapot sa buhay, arog kan: Siisay an Diyos? Taano ta igwa nin mga pagsakit saka karatan? Hahalion pa daw nin Diyos an mga pagsakit?
Mga Video sa Bibliya. Ipinapaliwanag kan haralipot na videong ini an mahahalagang katukduan sa Bibliya.
Simbag sa mga Hapot sa Bibliya. Sinisimbag kan mga artikulo digdi an dakul na hapot sa Bibliya.
Bible Verses Explained. Aramon an kahulugan kan popular na mga teksto saka frase sa Bibliya.