Hinihinguwa Mo Daw na Arugon an Pagkamaygurang ni Cristo?

1, 2. Anong klaseng pag-uswag an dapat pagmaigutan na abuton nin lambang Kristiyano? Iilustrar.

PAG namamakal nin prutas sa saudan an sarong ina, bako pirming an pinakadakula o pinakabarato an pinipili niya. Imbes, hinahanap niya an mga hinog na. An gusto niya idtong masiram, mahamot, asin masustansiya. Iyo, pinipili niya an prutas na bako nang putot, buot sabihon gurang o hinog na.

² Pagkatapos na magdusay asin magpabawtismo an saro, padagos siyang minauswag. An pasuhan niya iyo na magin sarong maygurang na lingkod nin Diyos. An pagkamaygurang na pinag-uulayan ta digdi bako sa pisikal kundi sa espirituwal. Nagsurat si apostol Pablo na kaipuhan kan mga Kristiyano sa Efeso na umuswag sa espirituwal. Dinagka niya sinda na magmaigot na “makaabot sa pagkasararo sa pagtubod asin sa tamang kaaraman manungod sa Aki nin Diyos, sa lubos na pagkatawo, sa pagdakula na kasukol kan kalubusan kan Cristo.”​—Efe. 4:13, NW.

3. Ano an sitwasyon sa kongregasyon nin Efeso kaidto na arog man ngunyan sa banwaan ni Jehova?

³ Pirang taon nang naestablisar an kongregasyon nin Efeso kan magsurat si Pablo sa sainda. Dakul na disipulo duman an mauswag na sa espirituwal. Pero, may nagkapira na kaipuhan pang umuswag sa pagkamaygurang. Arog man kaiyan an sitwasyon kan mga Saksi ni Jehova ngunyan. Dakul na tugang an haloy nang naglilingkod sa Diyos asin maygurang na sa espirituwal. Pero bako gabos arog kaiyan an kamugtakan. Halimbawa, rinibong mga baguhan an nababawtismuhan taon-taon, kaya kaipuhan pa kan iba na maghinguwa na umuswag sa pagkamaygurang. Kumusta ka man?​—Col. 2:6, 7.

AN PAG-USWAG NIN SARONG KRISTIYANO

4, 5. Sa anong mga paagi magkakalain an maygurang na mga Kristiyano, pero ano an pagkakapareho ninda? (Hilingon an ritrato sa kapinunan kan artikulo.)

⁴ Pag nagpipili ka nin hinog na mga prutas sa saudan, maririsa mo na bakong magkakapareho an mga ini. Pero, may pararehong karakteristiko an mga prutas na nagpapahiling na hinog na an mga iyan. Kaagid kaiyan, magkakalain man an nasyonalidad, pinaghalian, salud, edad, asin eksperyensiya kan maygurang na mga Kristiyano. Magkakalain pa ngani an saindang personalidad o kultura. Pero, gabos sinda may mga kuwalidad na nagpapahiling na sinda maygurang na. Paano?

⁵ Inaarog nin sarong maygurang na lingkod ni Jehova an halimbawa ni Jesus, na nagwalat sa sato nin arugan tanganing maingat niyatong ‘masunod an saiyang mga lakad.’ (1 Ped. 2:21) Ano an idinuon ni Jesus na mahalagang marhay na gibuhon nin sarong tawo? An mamutan si Jehova nin bilog niyang puso, kalag, asin isip, patin mamutan an saiyang kapwa nin siring sa saiyang sadiri. (Mat. 22:37-39) Hinihinguwa nin sarong maygurang na Kristiyano na mamuhay kauyon kan sadol na iyan. Ipinapahiling kan paagi niya nin pamumuhay na an pinakamahalaga sa saiya iyo an saiyang relasyon ki Jehova asin na igwa siya nin mapagsakripisyong pagkamuot sa iba.

6, 7. (a) Ano an nagkapirang kuwalidad na nagpapahiling na an saro maygurang nang Kristiyano? (b) Ano an puwede niyatong ihapot sa sadiri?

⁶ Pero an pagkamuot saro sana sa mga aspekto kan bunga kan espiritu na mahihiling sa sarong maygurang na Kristiyano. (Gal. 5:22, 23) Mahalaga man an iba pang aspekto, arog kan kahuyuan, pagpupugol sa sadiri, asin pasensiya. Makakatabang iyan sa saiya na maatubang an dipisil na mga sitwasyon na dai naiiritar asin matagalan an mga pagkadisganar na dai nawawaran nin paglaom. Sa saiyang personal na pag-adal, padagos niyang hinahanap an mga prinsipyo sa Bibliya na makakatabang sa saiya na mamidbid an tama asin sala. Kaya, mahihiling sa mga desisyon niya na siya sarong maygurang sa espirituwal. Halimbawa, nagdadangog siya sa saiyang konsiyensiya na sinanay sa Bibliya. Mapakumbaba an sarong maygurang na Kristiyano kaya nagtutubod siya na pirming mas marahay an mga paagi asin pamantayan ni Jehova kisa kan sa saiya.a Maigot siya sa paghuhulit kan maugmang bareta asin ginigibo an gabos para makatabang na magdanay na nagkakasararo an kongregasyon.

⁷ Gurano man kita kahaloy nang naglilingkod ki Jehova, puwedeng ihapot kan lambang saro sa sato, ‘May mga dapat pa daw akong baguhon para mas maarog ko si Jesus asin padagos na mag-uswag sa espirituwal?’

“AN MATAGAS NA KAKANON PARA SA MGA MAYGURANG”

8. Ano an masasabi niyato sa kaaraman asin pakasabot ni Jesus sa Kasuratan?

⁸ May hararom na pakasabot sa Tataramon nin Diyos si Jesu-Cristo. Dawa kan siya 12 anyos pa sana, kaya na niyang ipakipag-ulay sa mga paratukdo sa templo an manungod sa Kasuratan. ‘An gabos na nakadangog sa saiya nagngaralas sa saiyang pakasabot asin sa saiyang mga simbag.’ (Luc. 2:46, 47) Dangan sa panahon kan saiyang ministeryo, pinasilensiyo ni Jesus an mga nagkokontra sa saiya paagi sa mahusay na paggamit kan Tataramon nin Diyos.​—Mat. 22:41-46.

9. (a) Anong mga kaugalian sa pag-adal sa Bibliya an dapat na igwa an mga gustong umuswag sa espirituwal? (b) Ano an katuyuhan kan pag-adal sa Bibliya?

⁹ Kauyon kan arugan na itinao ni Jesus, an sarong Kristiyano na gustong umuswag sa espirituwal dai makokontento sa hababaw na kaaraman sa Bibliya. Regular niyang sisiyasaton an mga laog kaiyan huling aram niya na “an matagas na kakanon para sa mga maygurang.” (Heb. 5:14, NW) Malinaw nanggad, gusto nin sarong maygurang na Kristiyano na magkaigwa nin “tamang kaaraman manungod sa Aki nin Diyos.” (Efe. 4:13, NW) Igwa ka daw nin iskedyul sa pagbasa kan Bibliya aroaldaw? Igwa ka daw nin iskedyul sa personal na pag-adal o nagtatagama ka daw nin panahon kada semana para sa pampamilyang pagsamba? Mantang pinag-aadalan mo an Tataramon nin Diyos, hanapon an mga prinsipyo na makakatabang sa saimo na mas masabutan an kaisipan asin namamatian ni Jehova. Dangan hinguwahon na iaplikar an mga prinsipyo sa Bibliya asin ibasar diyan an saimong mga desisyon. Sa paaging iyan, mas mapaparani ka ki Jehova.

10. Paano nakakaimpluwensiya sa buhay nin sarong maygurang na Kristiyano an kaaraman niya sa Bibliya?

¹⁰ Nasasabutan nin sarong maygurang na Kristiyano na bako sanang kaaraman sa Bibliya an kaipuhan. Dapat man niyang mamutan an naaraman niyang mga sadol asin prinsipyo nin Diyos. An sarong paagi na maipapahiling niya an pagkamuot na iyan iyo an pag-inot niya sa saiyang buhay kan mga kabutan ni Jehova imbes na an saiyang sadiring kagustuhan. Saro pa, hinihinguwa niyang ‘halion’ an saiyang dating mga kaisipan asin paggawi. Mantang ginigibo nin sarong Kristiyano an pagbabagong iyan, isinusulot niya an bagong arog-Cristong personalidad, na linalang uyon sa kabutan nin Diyos sa tunay na katanusan asin kaimbudan. (Basahon an Efeso 4:22-24.) Isinurat an Bibliya sa irarom nin paggiya kan banal na espiritu nin Diyos. Mantang pinapararom nin sarong Kristiyano an saiyang kaaraman asin pagkamuot sa pamantayan kan Bibliya, tinutugutan niyang impluwensiyahan kan banal na espiritu an saiyang puso asin isip. Nakakatabang iyan tanganing umuswag siya sa espirituwal.

PAGTABANG NA MAPAGDANAY AN PAGKASARARO

11. Ano an naeksperyensiyahan ni Jesus kan siya nasa daga?

¹¹ Kan nasa daga si Jesus bilang perpektong tawo, napapalibutan siya nin mga bakong perpekto. Bakong perpektong mga magurang an nagpadakula sa saiya asin haloy niyang nakaibanan sa harong an saiyang bakong perpektong mga tugang. Maski an pinakadayupot niyang mga parasunod naimpluwensiyahan kan mahambog asin makasadiring ugali na lakop kan panahon ninda. Halimbawa, kan banggi bago gadanon si Jesus, nagkaigwa nin mainit na diriskutiran ‘kun [baga] siisay sa sainda an ibinibilang na pinakadakula.’ (Luc. 22:24) Pero may tiwala si Jesus na magigin mauswag sa espirituwal an saiyang bakong perpektong mga parasunod asin makakabilog sinda nin kongregasyon na may pagkasararo. Kan banggi man sanang idto, hinagad ni Jesus sa saiyang Ama na magkasararo an saiyang mga apostol. Siya namibi: “[Lugod] sinda gabos magin saro, kun paanong ika, Ama, kasaro ko asin ako kasaro mo, na sinda man magin kasaro niyato, . . . tanganing sinda magin saro kun paanong kita saro.”​—Juan 17:21, 22, NW.

12, 13. (a) Paano ipinapahiling kan Efeso 4:15, 16 an pangangaipo na magtabang na mapagdanay an pagkasararo kan kongregasyon? (b) Paano napangganahan nin sarong brother an saiyang kaluyahan asin nanudan na magkontribwir sa pagkasararo?

¹² An sarong maygurang na Kristiyano nagtatabang na mapagdanay an pagkasararo sa laog kan kongregasyon. (Basahon an Efeso 4:1-6, 15, 16.) Bilang banwaan nin Diyos, katuyuhan niyato na an gabos na miyembro magtarabangan na may pagkasararo. Sabi kan Tataramon ni Jehova, kaipuhan niyato an kapakumbabaan para magibo ini. Kaya dawa naaapektaran kan pagkabakong perpekto kan iba, an sarong maygurang na brother o sister mapakumbabang nakikipagtabangan para magdanay an pagkasararo kan kongregasyon. Ano an reaksiyon mo kun nakakagibo nin sala an sarong brother o sister? O paano kun ika mismo an nagibuhan nin sala? Parati ka daw na nagigibo nin lanob, sabi ngani, tanganing makasuway ka sa nagkasala sa saimo? O pinagmamaigutan mo daw na maggibo nin tulay sa pag-ultanan nindong duwa? Gugustuhon​—iyo, pagmamaigutan—​nin sarong maygurang na Kristiyano na maggibo nin tulay imbes na lanob.

¹³ Pag-ulayan ta an halimbawa ni Uwe. Kaidto, pirmi siyang nagpapaapektar sa pagkabakong perpekto kan mga tugang. Dangan, nagdesisyon siyang gamiton an Bibliya asin an Insight on the Scriptures para pag-adalan an buhay ni David. Taano ta si David? Ipinaliwanag ni Uwe: “Nahiling ni David an bakong maka-Kasuratan na paggawi kan nagkapirang kapagtubod niya. Halimbawa, hininguwa ni Hading Saul na gadanon siya, gusto siyang gapuon kan nagkapira sa banwaan, saka tinuya pa ngani siya kan mismong agom niya. (1 Sam. 19:9-11; 30:1-6; 2 Sam. 6:14-22) Pero dawa arog kaidto an ginibo kan iba sa saiya, dai lamang tinugutan ni David na mabawasan an pagkamuot niya ki Jehova. Saka mahihirakon si David, sarong bagay na dapat ko man na pauswagon. Huli sa nanudan ko sa pag-adal, nabago an hiling ko sa pagkabakong perpekto kan mga tugang. Dai na ako ngunyan naglilista nin mga sala. Imbes, nagmamaigot akong makakontribwir sa pagkasararo kan kongregasyon.” Pasuhan mo man daw na makatabang na mapagdanay an pagkasararo sa laog kan kongregasyon?

MAKIAMIGO SA MGA NAGIGIBO KAN KABUTAN NIN DIYOS

14. Anong klaseng mga tawo an pinili ni Jesus na magin mga katuod niya?

¹⁴ Makikatuod si Jesus sa gabos. Mga lalaki man o babayi, hoben saka gurang, asin dawa mga aki pamugtak an buot sa saiya. Pero nagin maingat si Jesus sa pagpili nin dayupot na mga kaiba-iba. Sinabi niya sa maimbod niyang mga apostol: ‘Kamo iyo an sakong mga katuod kun kamo magibo kan mga ipinagbubuot ko sa saindo.’ (Juan 15:14) Nagpili si Jesus nin magigin mga katuod hali sa maimbod na mga nagsusunod sa saiya asin naglilingkod ki Jehova nin bilog na puso. Nagpipili ka man daw nin magigin dayupot na mga amigo hali sa mga naglilingkod ki Jehova nin bilog na puso? Taano ta mahalaga ini?

15. Paano makikinabang an mga hoben sa pakikiiba sa maygurang na mga Kristiyano?

¹⁵ Dakul na klase nin prutas an mas magayon an pagkahinog pag naiinitan nin saldang. Kaagid kaiyan, an init kan satong kasararuan nin magturugang makakatabang sa saimo na umuswag sa pagkamaygurang. Tibaad saro kang hoben na pinag-iisipan kun ano an gigibuhon mo sa saimong buhay. Sarong kadunungan nanggad na makiiba sa mga kapagtubod na haloy nang naglilingkod ki Jehova asin nagtatabang na mapagdanay an pagkasararo kan kongregasyon! Sa pag-agi nin mga taon, tibaad may nagin mga problema sinda sa buhay asin natagalan ninda an mga pagbalo mantang naglilingkod sa Diyos. Matatabangan ka ninda na mapili an pinakamarahay na paagi nin pamumuhay. Kun sa siring na mga tugang ka makikiiba-iba, matatabangan ka ninda na makagibo nin madunong na mga desisyon asin umuswag sa pagkamaygurang.​—Basahon an Hebreo 5:14.

16. Paano natabangan kan mga mas matua sa saiya sa kongregasyon an sarong hoben na sister?

¹⁶ Halimbawa, nagigirumduman ni Helga na kan huring taon niya sa hayskul, pinag-uulayan kan kadaklan sa mga kaklase niya an mga pasuhan ninda sa buhay. Dakul sa sainda an gustong magkolehiyo para magkaigwa nin mapangganang karera. Ipinakipag-ulay iyan ni Helga sa mga kaamigo niya sa saiyang kongregasyon. Pagkatapos, sinabi niya: “Dakul sa sainda an mas matua sa sako saka dakula an naitabang ninda. Pinakusog ninda ako na lumaog sa bilog na panahon na ministeryo. Kaya, limang taon na akong payunir. Pakalihis nin pirang taon, nauugma akong marhay ngunyan na ginamit ko an sakong pagkahoben sa paglilingkod ki Jehova. Dai ko lamang ini pinagbabasulan.”

17, 18. Paano makakatabang sa sato an espirituwal na pagkamaygurang tanganing mapaglingkudan ta si Jehova?

¹⁷ Kun hihinguwahon niyatong arugon an mga halimbawa ni Jesus, matatabangan kita kaini na umuswag bilang Kristiyano. Mas mapaparani kita ki Jehova asin mas makusog an satong pagmawot na maglingkod sa saiya sagkod sa pinakamapupuwede. Maitatao nin sarong lingkod nin Diyos an pinakamakakaya niya ki Jehova kun siya saro nang maygurang na Kristiyano. Dinagka ni Jesus an saiyang mga parasunod: ‘Paliwanaga an saimong ilaw sa atubangan nin mga tawo, tanganing mahiling ninda an saindong mga marahay na gibo, asin pamurawayon ninda an saindong Ama na nasa langit.’​—Mat. 5:16.

¹⁸ Arog kan napag-ulayan niyato, dakulang tabang nanggad sa kongregasyon an sarong maygurang na Kristiyano. Asin an siring na pagkamaygurang mahihiling sa kun paano ginagamit nin sarong Kristiyano an saiyang konsiyensiya na itinao nin Diyos. Paano kita matatabangan kan satong konsiyensiya na gumibo nin madunong na mga desisyon? Asin paano ta igagalang an suno sa konsiyensiyang mga desisyon kan satong mga kapagtubod? Pag-uulayan niyato an mga iyan sa masunod na artikulo.