Pag-ako kan Angat nin Kristianong Pagkamaygurang
“Sa pagtaram kan katotoohan, paagi sa pagkamoot kita magtalubo sa gabos na bagay sa saiya na iyo an payo, si Cristo.”—EFESO 4:15.
1, 2. (a) Sa anong mga paagi ‘an bunga kan tulak’ sarong balaog? (b) Ano an lalaoman sa bagong mamundag na mga omboy?
AN SARONG mataba, posog na omboy tunay na sarong dakulang kaogmahan. Pira sana an tawong nakakasayuma sa makunsuwelong mga gawe-gawe kaiyan. Gikanan iyan nin daing katapusan na kawilihan asin karangahan, an sentro nin atension saen man iyan paduman. Malinaw nanggad, an mga magurang namomotan iyan bilang saindang ‘orgolyo asin kaogmahan’ sa ibong kan gabos na kapagalan asin kahaditan na dinadara kaiyan. Talaga na, “an bunga kan tulak sarong balos.”—Salmo 127:3.
2 Minsan siring, gurano man kanamomotan an sarong omboy, ano an mangyayari kun iyan dai magtao nin senyal nin pagtalubo? Kun iyan magdanay sa siring na kamugtakan pakalihis nin mga bulan o tibaad mga taon nin mamomoton na pagataman nin mga magurang, malinaw kun siring na igwa nin seryosong diperensia. Iyo, an pagtalubo pareho nanggad sa buhay; hinahalat niato iyan sa gabos na nabubuhay. Sarong kapahayagan iyan kan kapangyarihan ni Jehova sa paglalang asin kadonongan.—Lucas 2:52.
Espirituwal na Pagtalubo Kaipuhan
3. Anong pagtalubo an ihinula ni Jesus, asin anong kaotoban an naheheling?
3 Kaoyon sa hula ni Jesus, an sarong klaseng pagtalubo maootob. Sa bilog na kinaban, an espirituwal na “pag-ani” nasa kapanahonan. (Mateo 9:37) Durante kan 1984 taon nin paglilingkod, halimbawa, anom na nasyon nagreport nin promedyo na sobra sa sarong gatos na ribo nin parahayag sa Kahadean.Kan 1981, tolong taon sana bago, duwang nasyon pa sana. Sa nakalipas na anom na taon, 827,144 bagong mga saksi ni Jehova an nabautismohan asin sobrang 5,000 bagong kongregasyon an naporma. Pinaririkas ni Jehova an saiyang gibohon.—Isaias 60:22.
4. Ano an nagin resulta sa pankinaban na pagtalubo kan banwaan ni Jehova?
4 An bilang na ini nagpapaheling na haros saro sa kada tolo katawo na regular na nakikiasosyar sa banwaan ni Jehova asin nakikikabtang sa gibohon na paghuhlit ngonyan nabautismohan sa nakalihis na anom na taon. Saro daw kamo sa sainda? Kun iyo, nagin gikanan kamo nin dakulang kaogmahan kan mga nagtabang saindo na makanood kan katotoohan, para sa gabos na mga Kristianong mga kairiba, asin sa saindong langitnon na Ama, si Jehova Dios. (Talinhaga 27:11) Siring sa enot na tangga na naabot nin sarong omboy, an lakdang na saindong ginibo na ididikar an saindong sadiri ki Jehova sarong makawiliwiling pangyayari. Nangangahulogan iyan nin pag-abante, progresibong paghiro sa saindong kabtang. Iyan sarong tanda nin pagtalubo.
5. Anong mga hapot sa saiya man sana an dapat ihapot nin lambang saro? Ano an makakatabang na makua an simbag?
5 Ano na poon kaidto? Sa mamomoton na atensyon kan kapwa nindo mga Kristiano, nagpapaheling daw kamo nin ebidensia nin dayaday na espirituwal na pagtalubo? ‘Paano ko masasabi?’ mahapot gayod kamo. Bueno, girumdoma an sinabi ni apostol Pablo dapit sa pagtalubo: “Kan ako aki pa, nagtataram ako kaidtong siring sa aki, nagiisip siring sa aki, nangangatanosan siring sa aki; alagad ngonyan na ako dakula na, binayaan ko na an mga ugale nin sarong aki.” (1 Corinto 13:11) Kaya, bako sanang an pag-agi nin panahon kundi an pagbaya sa “mga ugale nin sarong aki” na naghaman saiyang magin sarong maygurang na lalaki. Ano an mga ugaleng ini?
6, 7. (a) Magsabi nin sarong ‘ugale nin sarong aki’ asin an peligro na dinadara kaiyan. (b) Paano nahahayag an ugaleng ini? Ano an puwedeng magin resulta?
6 Sarong bagay sa mga omboy iyo na sinda madaling maoyam. Minsan ngani sinda mapag-usisa sa mga bagay sa palibot ninda, sinda man dai madeterminaran, pabagobago, asin bako desisyonado. Malinaw nanggad, an siisay man na nagdadanay sa siring na kamugtakan yaon sa grabeng espirituwal na peligro. Sia peligrosong “ianod nin mga alon asin ipadpad nin lambang doros nin katokdoan huli sa kadayaan nin mga tawo, huli sa katosohan sa pagpakana nin karatan,” siring sa ilinadawan ni Pablo sa Efeso 4:14.
7 An mga alon asin doros puwedeng lumataw siring kabigla kan saindang pagkawara. Ngonyan, kun an mga bagay ipinaplano na magin bako uso, mga inklinasyon, mga moda, asin mga estilo paburobuwelta. An mga bagay na ini ibinibilang na kaipuhan sa halipot na panahon kompletong naluluma tolos-tolos asin nalilingawan. Magin man iyan sa langtad nin pagaling-aling, gubing asin pagsulot, o ano man na bagay, gurano kamangmang—asin sa aki—namumugtak sa perming pagmawot o pagkamit kan pinakahuring mga bagay-bagay, pakatapos mahahalean nin klase asin biglang madisganar. Sa espirituwal na mga bagay,an magigin resulta kan siring na pagbagobago magigin mapanlaglag.—Ikomparar an Santiago 1:6-8.
8. Ano pa an sarong ‘ugale’ nin espirituwal na mga aki, asin anong peligro an dinadara kaiyan?
8 Saro pang ‘ugale nin mga aki’ iyo na kadikit an saindang pakaintindi sa kun ano an marahay o maraot, tama o sala. Kapareho nanggad, an espirituwal na mga omboy dai pa an saindang “kakayahan nin pagmansay na napatood na mamidbid kun ano an tama asin sala,” asin ini an rason na dinagka ni Pablo an saiyang kapwa mga Kristiano na “magpadagos sa pagkamaygurang, na dai na giraray nagtotogdok nin pasisikadan.” (Hebreo 5:14; 6:1) An mga espirituwal na mga omboy nangangaipo nin danay na pagpakosog na an inako nindang katotoohan talagang katotoohan, asin an ano man na itinokdo sainda na gibohon kaipuhan nanggad na gibohon ninda. Nangangaipo sindang tabang maski sa pinakapundamental na mga bagay. Ta kun dai madale sindang maribaraw, madisganar, asin nadadaog nin pagduda na makakaraot kan saindang pagtubod.
9. Taano ta kaipuhan na akoon niato an angat nin Kristianong pagkamaygurang?
9 Narisa na daw nindo na an mga aki danay na gustong gibohon an naheheling nindang ginigibo nin mga may edad na? Sierto, sainda, iyan kawat sana. Daing duda, na kabtang kan kaogmahan, an pakagibo kan ano man na gusto ninda na dai nin inaakong responsibilidad na napapalabot dian. Ini gabos, iyo an buhay nin sarong aki. (Helingon an Mateo 11:16, 17.) Alagad sa pagtalubo asin pag-oswag minaabot an paninimbagan asin responsibilidad. Sarong angat na tabangan an sarong aki na magako. Kun paano an saiyang pagako madeterminar, orog na, an saiyang kapangganahan o pagkasudya sa ngapit na buhay. Espirituwalmente, orog kaimportante na na lambang saro sato seryosong horophoropon an angat nin Kristianong pagkamaygurang. Kamo daw andam, tibaad desidido, na magako nin responsibilidad na napapalabot sa may edad, maygurang, espirituwal na twao? O tibaad sige na sana an rabaydabay, na ipinapaubaya sa iba na pasanon an sindong responsibilidad para sa saindo?—Galacia 6:4, 5.
Kristianong Pagkamaygurang—Ano Iyan?
10. Taano ta dinagka ni Pablo an Kristianong mga Hebreo na “magpadagos sa pagkamaygurang”?
10 Kan dagkahon ni apostol Pablo an mga Kristiano na “magtalubo sa pagkamaygurang,” ano daw an nasa isip nia? (Hebreo 6:1) An konteksto nagpapaheling na kadakol an boot sabihon ni apostol Pablo sa mga Kristianong Hebreo dapit sa “halangkaw na saserdote sono sa orden ni Melquizedek,” si Jesu-Cristo. Alagad namatean nia na bako sindang andam para kaiyan huli ta an nasa isip nia “mapawot na saboton.” (Hebreo 5:10, 11) Imbes, pinagirumdom nia sinda: “Magin kamo siring sa mga nangangaipo nin gatas, asin bakong kakanon na matagas huli ta an lambang nagkakakan nin gatas dai pang kinabatidan sa tataramon nin katanosan, huli ta sia omboy pa. Alagad an matagas na kakanon manongod sa mga darakula na, na iyo idtong, huli sa paggamit nakapagpatood kan saindang mga pakamate sa pagmidbid kan marahay asin kan maraot.”—Hebreo 5:12-14; ikomparar an Judas 3.
11. Ano an ipinapanongod kan pagigin maygurang?
11 Kun siring, nangangahologan daw ini, na an pagkamaygurang bagay na pagkaigwa sana nin kaaraman kan hararom na mga bagay sa Biblia? Mantang an Kristianong pagkamaygurang minaimbuwelto nin kaaraman asin pakasabot kan Biblia, orog pa an kinakaipuhan. An pakasabot sa mga tataramon na ginamit ni apostol Pablo matabang sato na masabotan ini nin orog. An Griegong tataramon na isinalin na “pagkamaygurang” iyo an te·lei·oʹtes, asin an adhetibong “maygurang” isinalin hale sa teʹlei·os. An mga tataramon na ini konektado sa teʹlos, na nangangahulogan nin “katapusan.” An Expository Dictionary of New Testament Words ni W.E. Vine, kun siring, nagpapaliwanag na an pagigin maygurang (teʹlei·os) “nagpapaheling na naabot na an saiyang katapusan (teʹlos), natapos, kompleto, sangkap.” Kaya, an maygurang na Kristiano iyo an nakaabot na nin sarong depinidong katapusan, o pasohan. Anong pasohan ini?
12. Oyon sa Efeso 4:11-13, ano an kalabot sa pagkamaygurang?
12 Si apostol Pablo, sa Efeso 4:11-13, nagpaliwanag na si Cristo-Jesus, bilang an payo kan Kristianong Kongregasyon, guminibo nin dakol na probisyon tanganing tabangan an “mga banal” na aboton an patolodan na iyan, iyo na, “kita gabos makaabot sa pagkasararo sa pagtubod asin sa tamang kaaraman dapit sa aki nin Dios, sa lubos na pagkatawo, sa sokol nin pagtalubo na kapareho kan kapanoan kan Cristo.” Digdi, an pagkamaygurang, o lubos na pagkatawo (Griego, teʹlei·os), konektado bako sanang sa pagkaigwa nin “tamang kaaraman” kundi man sa “pagkasararo sa pagtubod” asin na sukolon an satong sadiri oyon sa kamugtakan na nakamtan ni Cristo.
13. Taano ta dai magkakaigwa nin Kristianong pagkamaygurang kun mayo nin “pagsararo sa pagtubod”?
13 “An pagkasararo sa pagtubod” nagdodoon nin pagkaoroyon. Bago makanood an saro kan “sarong pagtubod,” tibaad igwa sia kan mga sadiring ideya asin opinyon kun paano an mga bagay gigibohon, dapit sa kun ano an tama asin sala, asin iba pa. (Efeso 4:4, 5) Kun totogotan nia an siring na mga ideya na magdanay, madedepisilan siang gayo na magtalubo sa espirituwal. Makasarong inapod ni Pablo an mga Kristiano sa suanoy na kongregasyon nin Corinto na “mga omboy dian ki Cristo” asin “makalaman” huli ta sinda nababanga nin “pangimon asin pasurohay,” an iba naghihingako na nagsosonod ki Pablo, an iba ki Apolos. (1 Corinto 3:1-4) Madaling maheling kun siring, na an pagkasararo, o “pagsararo dian sa pagtubod,” danay na kaiba sa Kristianong pagkamaygurang. Dai an saro kun mayo an saro. Kaya hapoton an satuyang sadiri: Binayaan na daw niato an dating kinabanon na mga kaisipan? Naheling daw niato an importansia nin pagkasararo sa kaisipan asin hiro sa banwaan ni Jehova? “An pagsararo sa pagtubod” importante nanggad na ingrediente sa Kristianong pagkamaygurang.—Efeso 4:2, 3.
14. Sa ano pa konektado an pagkamaygurang?
14 Konektado man an Kristianong pagkamaygurang sa pagkaigwa nin “sokol nin pagtalubo na kapareho kan kapanoan kan Cristo.” Ano daw an boot sabihon kaini? Si Pablo nagpadagos na magsabi na an nakaabot sa pagtalubong ini bako nang mga omboy, na “inaanod nin mga alon asin ipinapadpad nin lambang doros nin katokdoan huli sa kadayaan nin mga tawo” na mataktikang nagpaplano nin kasalan. Imbes, igwa sinda kan tamang kaaraman kan katotoohan. Nagtalubo na sinda sa pagkamoot kan Cristo, asin nagpapaheling na sinda nin ibang diosnon na mga kuwalidad, siring kan kadonongan, katanosan, asin kapangyarihan. (Efeso 4:13, 14; Juan 15:12, 13; 1 Corinto 1:24, 30; 2:7, 8; Talinhaga 8:1, 22-31) Mantang kita bakong mga sangkap na mga tawo, tibaad dai niato makamit nin kompleto an ‘pagtalubo kan Cristo,’ gibohon niato siyang Arogan, magbugtak para sa satong sadiri nin katapusan o pasohan, sa pagpatalubo kan parehong klase nin diosnon na personalidad. (Colosas 3:9) Sagkod na maabot niato an pasohan na ini kita magigin maygurang.
Magtalubo sa Pagkamoot
15. Ano an enot na lakdang sa paghimuyawot para sa pagkamaygurang?
15 Sa paghorophorop kan kahulogan kan terminong “Kristianong pagkamaygurang,” dapat maaraman niato kun paano makakamtan iyan. Siring sa naheling niato, an Hebreo 6:1 nagpapaheling na sa paghimuyawot nin Kristianong pagkamaygurang igwa nin pundasyon na dapat niatong patindogon. Kun haman na ini, maghingoa na pasiring sa pagkamaygurang. Enot sa manlaenlaen na elemento na minakumpuwesto kan pundasyon iyo an “pagsolsol sa mga gadan na gibo.”
16. Sa anong “gadan na mga gibo” dapat kitang magsolsol?
16 Maririsa na, an “gadan na mga gibo” kaiba kan mga gibo kan makasalan na laman, na, kun dai mabantayan magiya sa kagadanan. Mamimidbid tolos niato an mga kasalan siring kan pakikisaro, karompotan, malaswang gawe, pagsamba sa ladawan, asin espiritismo siring karaot, asin linilikayan ta iyan. Alagad an mga gibo kan laman, “an gadan na mga gibo,” kalabot man an inaapod nin iba na naturalesa nin tawo siring baga kan pagkaongis, iriwal, pangimon, kaanggotan, pasuruhay, pagkabaranga, mga sekta asin mga pagkauri. (Galacia 5:19-21) Sagkod na an mga naturalesang iyan dai haklason asin salidahan “kan bagong pagkatawo na linalang oyon sa kabotan nin Dios sa tunay na katanosan asin kaimbodan,” daing kasigurohan na an saro magoswag pasiring sa Kristianong pagkamaygurang.—Efeso 4:22-24.
17. Ano pa an ibang ikakabilang na “gadan na mga gibo”? Taano?
17 Apuwera kan mga gibo nin laman, an “mga gadan na gibo” na kaipuhan haklason niato sa satuya kaiba an mga gibo asin mga paghihingoa na espirituwalmenteng gadan, sayang, asin daing bunga. Iyan man pagkakakuwartahan, biglang-yaman na mga maniobra. Magin man iyan mga ambisyon asin mga planong nakakaobos nin panahon para sa orog na edukasyon o kinabanon na mga mobimiento para sa sosyal na reporma, katoninongan asin iba pa. An mga bagay na ini tibaad igwa nin nagkapirang mga pakinabang sa saiya man sana alagad iyan “gadan na mga gibo” huli ta nagdadara nin espirituwal na kagadanan sa mga nagagapos kaiyan. An gabos na gustong magkamit nin Kristianong pagkamaygurang kaipuhan ‘magsolsol sa’ o umontok na sa paghihingoa, kan siring na “gadan na mga gibo” asin sunodon an sadol ni Jesus na “padagos na hanapon ngona an kahadean asin an katanosan [nin Dios].”—Mateo 6:33.
18, 19. (a) Sa Efeso 4:15, ano an boot sabihon kan “pagtaram kan katotoohan”? (b) Paano konektado iyan sa Kristianong pagkamaygurang?
18 Kun ikinatogdok na an pundasyon, ano na an masunod? Nagsadol si Pablo: “Kundi sa pagtaram kan katotoohan, paagi sa pagkamoot kita magtalubo sa gabos na bagay sa saiya na iyo an payo, si Cristo.” (Efeso 4:15) Enot sa gabos, maririsa niato na sinambit ni Pablo an pangangaipo sa “pagtaram kan katotoohan.” An ekspresyon na ini minaimbuwelto nin orog pa sa pagtaram; iyan aktuwalmenteng nangangahulogan nin “pagpadanay kan katotoohan.” (Kingdom Interlinear) An ibang salin ginamit ini na “mamuhay oyon sa katotoohan”; “may pagkamoot na sumonod sa katotoohan sa gabos na panahon—pagtaram nin totoo, pakiiba nin totoo, mamuhay nin totoo”.—Efeso 4:15, The Jerusalem Bible; The Living Bible.
19 Kaya, an paghanap nin Kristianong pagkamaygurang nangangaipo na papagdanayon niato, o pangaptan, an katotoohan paagi sa satong pamumuhay, pagtaram, hiro, asin pakibagay sa iba. Ini nangangahulogan na gamiton niato an kaaraman na nakua niato sa Biblia sa satong aroaldaw na pamumuhay asin mapabilang “duman sa mga tawo na huli sa paggamit kan saindang kakayahan nin pagmansay napatood na mamidbid kun ano an tama asin an sala.” (Hebreo 5:14) Ginigibo daw nindo ini? Sa kada panahon nin pagdesisyon naninindogan daw kamo kaoyon sa mga prinsipyo kan Biblia? Inaako daw nindo an angat nin pagigin sarong maygurang na Kristiano, nangangapot sa katotoohan paagi sa tataramon asin gibo, o magdadanay daw kamong espirituwal na omboy, libre sa mga responsibilidad asin libre sa paghanap kan sadiring mga horot asin mga mawot?
20, 21. (a) Paano an pagkamoot kalabot sa pagtalubo sa pagkamaygurang? (b) Anong mga hapot an kaipuhan pang pag-olayan?
20 Sabi ni Pablo: “Paagi sa pagkamoot kita magtalubo sa gabos na bagay sa saiya na iyo an payo, si Cristo.” (Efeso 4:15) Digdi, si Pablo nagtotokdo sa sentro kan bagay—an motibasyon. Sa 1 Corinto 13:1-3 ipinaheling nia na an mga gibong tibaad mahalaga puwedeng magin daing pakinabang kun iyan ginigibo na mayo nin tamang motibasyon. Kaya aramon niato an satong motibo sa mga bagay na ginigibo niato. Ginigibo daw iyan tanganing maheling nin iba, tanganing pahangaon sinda na magisip na kita maygurang? O, imbes, ginigibo daw iyan huli sa pagkamoot sa Dios asin pagkamoot sa satong kataed? Kun an pagkamoot iyo an satong motibo, “magtatalubo kita sa gabos na bagay,” magigin balanse, masasarigan, maygurang na mga Kristiano, sa biyong pagmidbid sa “saiya na iyo an payo, si Cristo.”
21 Mantang an paghihingoa na aboton an Kristianong pagkamaygurang sarong nahalagang patolodan, bako pa iyan an katapusan. Kun naabot na nin saro an patolodan na ini, igwa pa daw nin orog na magigibo sia? Kumusta naman an mga haloy na sa katotoohan asin nakamtan na an patolodan nin Kristianong pagkamaygurang? Ini an pag-oolayan sa masunod na artikulo.
Ikakapaliwanag Daw Nindo?
◻ Ano an pira sa “mga ugale nin aki,” asin anong peligro an dinadara kaiyan?
◻ Paano an “pagsararo sa pagtubod” asin “kapanoan kan Cristo” konektado sa pagkamaygurang?
◻ Tanganing maabot an Kristianong pagkamaygurang, anong “gadan na mga gibo” an dapat niatong bayaan?
◻ Paano an saro “paagi sa pagkamoot magtatalubo”?
[Blurb sa pahina 15]
SA NAKALIHIS NA ANOM NA TAON
—827,144 nabautismohan na bagong mga Saksi
—Labing 5,000 bagong mga kongregasyon an naporma
—Sa mga nakikabtang na sa trabahong paghuhulit ngonyan, saro sa kada tolo an nabautismohan sa panahon na ini
[Blurb sa pahina 15]
Sa laog kan 1984 taon nin paglilingkod, anom na mga nasyon nagpromedyo nin labing sanggatos na ribo na parahayag nin Kahadean
[Ritrato sa pahina 17]
Pinipili ngonyan nin dakol an ministeryo nin pangenot sa materyalistikong paghanap