Maghingoang Makaabot sa Pagkamaygurang—‘Harani Na an Dakulang Aldaw ni Jehova’

“Maghingoa kitang makaabot sa pagkamaygurang.”—HEB. 6:1.

1, 2. Paano nagkaigwa nin oportunidad an enot na siglong mga Kristiano sa Jerusalem asin sa Judea na “dumulag pasiring sa kabukidan”?

KAN si Jesus nasa daga, an mga disipulo nia nagdolok sa saiya asin naghapot: “Ano an magigin tanda kan saimong presensia asin kan pagtatapos kan sistema nin mga bagay?” Nangyari kan enot na siglo an enot na kaotoban kan hula na itinao ni Jesus sa sainda bilang simbag sa hapot ninda. May sinabi si Jesus na sarong pambihirang pangyayari na magigin tanda na harani na an katapusan. Oras na maheling an pangyayaring iyan, “an mga nasa Judea [dapat na] magpoon nang dumulag pasiring sa kabukidan.” (Mat. 24:1-3, 15-22) Mamimidbid daw kan mga disipulo ni Jesus an tandang iyan asin susunodon an mga instruksion nia?

² Pakalihis nin haros tolong dekada, kan 61 C.E., si apostol Pablo nagsurat nin mapuersa asin seryosong mensahe sa Hebreong mga Kristiano na nag-iistar sa Jerusalem saka sa palibot kaiyan. Dai aram ni Pablo sagkod kan mga kapagtubod nia na mga limang taon na sana bago mangyari an tanda kan kapinonan nin “dakulang kahorasaan.” (Mat. 24:21) Kan 66 C.E., pinangenotan ni Cestio Gallo an mga soldados na Romano sa haros mapanggana nang pagsalakay sa Jerusalem. Alagad ta bigla na sana siang uminatras, na nagtao nin oportunidad sa mga namemeligro na dumulag pasiring sa ligtas na lugar.

3. Anong sadol an itinao ni Pablo sa Hebreong mga Kristiano, asin taano?

³ Kinaipuhan kan mga Kristianong idto an hararom na pakabatid asin espirituwal na pagrisa tanganing mamidbid an pagbago nin mga pangyayari asin dumulag. Minsan siring, an iba nagin “maluya sa [saindang] pagdangog.” Sinda garo mga omboy sa espirituwal na nangangaipo nin “gatas.” (Basahon an Hebreo 5:11-13.) Pati an mga dakol na taon nang naglalakaw sa dalan nin katotoohan nagpapaheling nin senyales nin “pagbaya sa nabubuhay na Dios.” (Heb. 3:12) An nagkapira nagkaigwa “kan kaugalean” na dai pag-atender sa Kristianong mga pagtiripon sa panahon na an kapahapahamak na ‘aldaw na ini naghaharani na.’ (Heb. 10:24, 25) Si Pablo nagtao sa sainda nin napapanahon na sadol, na nagsasabi: “Ngonyan na binayaan ta na an pundamental na doktrina dapit sa Cristo, maghingoa kitang makaabot sa pagkamaygurang.”—Heb. 6:1.

4. Taano ta mahalagang magdanay na puka sa espirituwal, asin ano an matabang sa sato na magibo iyan?

⁴ Nabubuhay kita sa panahon kan pangultimong kaotoban kan hula ni Jesus. ‘Harani na an dakulang aldaw ni Jehova’—an aldaw na matapos sa bilog na sistema ni Satanas. (Sof. 1:14) Orog kisa kasuarin man, kita dapat na magdanay na makosog asin puka sa espirituwal. (1 Ped. 5:8) Talaga daw na ginigibo niato iyan? An Kristianong pagkamaygurang matabang sa sato na magdanay na nakasentro an isip sa kun saen na kita sa dalagan nin panahon.

Kun Ano an Kristianong Pagkamaygurang

5, 6. (a) Ano an kalabot sa espirituwal na pagkamaygurang? (b) An paghihingoang makaabot sa pagkamaygurang nangangaipo na pagmaigotan niatong magibo an anong duwang bagay?

⁵ Dai sana dinagka ni Pablo an Hebreong mga Kristiano kan enot na siglo na maghingoang makaabot sa pagkamaygurang kundi sinabi man nia sa sainda kun ano an kalabot sa espirituwal na pagkamaygurang. (Basahon an Hebreo 5:14.) An “mga maygurang” dai nakokontento sa pag-inom sana nin “gatas.” Sinda nagkakakan nin “matagas na kakanon.” Kun siring, aram ninda ‘an pundamental na mga bagay’ sagkod “an harararom na bagay” kan katotoohan. (1 Cor. 2:10) Dugang pa, an saindang kakayahan sa pagrisa nasasanay paagi sa paggamit—paagi sa pag-aplikar kan aram ninda—na nakakatabang sa sainda na mamidbid an tama asin an sala. Kun sinda napapaatubang sa pagdesisyon, an pagsasanay na ini nakakatabang sa sainda na mabatid kun anong mga prinsipyo sa Kasuratan an kalabot asin kun paano iaaplikar iyan.

⁶ “Kinakaipuhan na kita magtao nin orog kisa sa dating atension sa mga bagay na satong nadangog,” an surat ni Pablo, “tanganing dai kita noarin man ikaanod.” (Heb. 2:1) An siring na pagkaanod parayo sa pagtubod puedeng mangyari bago niato maaraman iyan. Malilikayan niato na mangyari ini sa sato paagi sa pagtao nin “orog kisa sa dating atension” sa panahon na pinag-aadalan niato an espirituwal na mga katotoohan. Kun siring, kaipuhan na ihapot kan lambang saro sa sato: ‘An pinag-aadalan ko daw sagkod ngonyan iyo sana an pundamental na mga bagay? Posible daw na basta ko na sana ginigibo iyan na mayo sa boot, na dai lubos na isinasapuso an katotoohan? Paano ako makakagibo nin tunay na pag-oswag sa espirituwal?’ An paghihingoa niatong makaabot sa pagkamaygurang nangangaipo na pagmaigotan niatong magibo an kisiera duwang bagay: kita dapat na magin may kabatidan na marhay sa Tataramon nin Dios asin makanood nin pagkuyog.

Magin May Kabatidan na Marhay sa Tataramon

7. Paano kita makikinabang sa pagigin mas may kabatidan sa Tataramon nin Dios?

⁷ “An lambang nakikikabtang sa gatas dai pang kabatidan sa tataramon nin katanosan,” an surat ni Pablo, “huli ta sia omboy pa.” (Heb. 5:13) Tanganing magin maygurang, kita dapat na magin may kabatidan na marhay sa tataramon nin Dios, an mensahe nia sa sato. Mantang an mensaheng ini yaon sa saiyang Tataramon, an Biblia, kita maninigo na mahigos na mga paraadal kan Kasuratan asin kan mga publikasyon kan “maimbod asin mapagmansay na oripon.” (Mat. 24:45-47) An paaging ini nin pag-adal dapit sa kaisipan nin Dios makakatabang sa sato na masanay an satong kakayahan sa pagrisa. Isip-isipa an halimbawa kan Kristianang si Orchid.a Sia nagsabi: “An pagirumdom na nagkaigwa nin pinakadakulang epekto sa buhay ko iyo an manongod sa regular na pagbasa sa Biblia. Inabot ako nin mga duwang taon tanganing matapos an bilog na Biblia, alagad garo baga kaidto ko pa sana namimidbid an sakong Kaglalang. Nanodan ko an manongod sa mga dalan nia, mga gusto nia asin dai nia gusto, kun gurano sia kamakapangyarihan, saka an rarom kan kadonongan nia. An aroaldaw na pagbasa sa Biblia nakatabang sa sako durante kan nagkapira sa depisilon na mga panahon sa buhay ko.”

8. Paano puedeng magkaigwa nin puersa sa sato an Tataramon nin Dios?

⁸ Paagi sa regular na pagbasa nin sarong kabtang kan Tataramon nin Dios, an mensahe kaiyan ‘nagkakaigwa nin puersa’ sa sato. (Basahon an Hebreo 4:12.) An siring na pagbasa puedeng makaimpluwensia sa satong panglaog na pagkatawo asin makatabang sa sato na magin mas nakakapaogma ki Jehova. Kamo daw mismo kaipuhan na mag-iskedyul nin orog pang panahon na basahon an Biblia asin horophoropon an sinasabi kaiyan?

9, 10. Ano an kalabot sa pagigin may kabatidan sa Tataramon nin Dios? Iilustrar.

⁹ An kalabot sa pagigin may kabatidan sa Biblia bako sanang pagigin pamilyar sa sinasabi kaiyan. An mga omboy sa espirituwal kan panahon ni Pablo bako man na biyong dai pamilyar sa ipinasabong na Tataramon nin Dios. Minsan siring, dai ninda iyan personal na ginamit asin dai ninda binalo an kahalagahan kaiyan paagi sa aktuwal na pag-aplikar kaiyan. Sinda dai nagmaigot na magkaigwa nin kabatidan sa mensahe kaiyan huling dai sinda nagpagiya dian sa paggibo nin madonong na mga desisyon sa saindang buhay.

¹⁰ An pagigin may kabatidan sa Tataramon nin Dios nangangahulogan nin pakaaram sa kun ano an sinasabi kaiyan asin pag-aplikar kan kaaraman na iyan. An eksperyensia kan Kristianang si Kyle nagpapaheling kun paano ini magigibo. Nakadiskusyon ni Kyle an saro sa mga katrabaho nia. Ano an ginibo nia tanganing maresolberan an problema? Sia nagpaliwanag: “An teksto na tolos kong nagirumdoman iyo an Roma 12:18, na nagsasabi: ‘Sagkod na nasa saindo, makipagkatoninongan kamo sa gabos na tawo.’ Kaya sinabihan ko an katrabaho kong ini kun puede kaming mag-olay pakatapos nin trabaho.” Mapangganang marhay an pag-oolay, asin an kapwa empleyadang ini naghanga huling ginibo ni Kyle an lakdang na iyan. “Nanodan ko na an pirmeng tama niatong gibohon iyo na iaplikar an mga prinsipyo sa Biblia,” an sabi ni Kyle.

Makanood nin Pagkuyog

11. Ano an nagpapaheling na puedeng magin depisil an pagkuyog kun nasa masakit na mga kamugtakan?

¹¹ An pag-aplikar kan nanonodan niato sa Kasuratan puedeng magin depisil, partikularmente kun masakit an mga kamugtakan. Halimbawa, dai nahaloy pakatapos na patalingkason ni Jehova sa kaoripnan sa Egipto an mga aki ni Israel, sinda ‘nakipag-iwal ki Moises’ asin padagos na ‘binalo si Jehova.’ Taano? Huling mayo nin tubig na maiinom. (Ex. 17:1-4) Mayo pang duwang bulan pakatapos na makipagtipan sa Dios asin mag-oyon na gibohon “an gabos na tataramon na isinabi ni Jehova,” binalga ninda an saiyang ley dapit sa idolatriya. (Ex. 24:3, 12-18; 32:1, 2, 7-9) Ini daw huling natakot sinda dahel sa haloy na mayo si Moises mantang sia tinatawan nin instruksion sa Bukid nin Horeb? Sinda daw tibaad nag-isip na masakyada giraray an mga Amalequita asin na an mga Israelita daing magiginibo kun mayo si Moises, na kan enot nagtao sa sainda nin kapangganahan paagi sa saiyang nakaitaas na mga kamot? (Ex. 17:8-16) Posible iyan, alagad ano man an dahelan, an mga Israelita “nagsayumang magin makinuyog.” (Gibo 7:39-41) Sinadol ni Pablo an mga Kristiano na ‘gibohon an pinakamakakaya ninda’ tanganing dai “mahulog sa kaparehong klase nin pakisuway” na ipinaheling kan mga Israelita kan sinda natakot na lumaog sa Dagang Panuga.—Heb. 4:3, 11.

12. Paano si Jesus nakanood nin pagkuyog, asin may anong pakinabang?

¹² An paghihingoang makaabot sa pagkamaygurang nangangaipo na gibohon niato an satong pinakamakakaya na kuyogon si Jehova. Siring kan halimbawa ni Jesu-Cristo, sa parate an pagkuyog nanonodan sa mga bagay na tinios. (Basahon an Hebreo 5:8, 9.) Bago si Jesus nagdigdi sa daga, sia makinuyog sa saiyang Ama. Minsan siring, an paggibo kan kabotan kan saiyang Ama digdi sa daga may kalabot na pagsakit sa pisikal asin sa isip. Paagi sa pagkuyog ni Jesus mantang nasa grabeng kasakitan, sia nagin “sangkap” para sa bagong katongdan na nasa isip nin Dios para sa saiya, an pagigin Hade asin Halangkaw na Saserdote.

13. Ano an nagpapaheling kun baga kita nakakanood nin pagkuyog?

¹³ Kumusta man kita? Determinado daw kita na kuyogon si Jehova dawa kun kita napapaatubang sa masakiton na mga problema? (Basahon an 1 Pedro 1:6, 7.) Malinaw an hatol nin Dios mapadapit sa moral, pagkaonesto, angay na pagtaram, personal na pagbasa asin pag-adal sa Kasuratan, pag-atender sa Kristianong mga pagtitipon, saka pakikikabtang sa paghuhulit. (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Kita daw makinuyog ki Jehova sa mga bagay na ini dawa kun nasa kasakitan? An pagkuyog niato nagpaparisa na kita nag-ooswag sa pagkamaygurang.

Kristianong Pagkamaygurang—Taano ta Kapakipakinabang?

14. Iilustrar kun paano puedeng magin proteksion an paghihingoang makaabot sa pagkamaygurang.

¹⁴ Sarong proteksion nanggad para sa sarong Kristiano an pagkaigwa nin kakayahan sa pagrisa na sinanay nin tama tanganing mamidbid an tama asin an sala mantang kita nasa sarong kinaban na “nawaran na kan gabos na pakamate sa moral.” (Efe. 4:19) Halimbawa, an Kristianong si James, na regular na nagbabasa asin may hararom na pagpapahalaga sa mga publikasyon na sono sa Kasuratan, nakakua nin trabaho na mga babae an gabos niang katrabaho. “Minsan ngani an dakol sa sainda malinaw nanggad na nagpaheling nin kadaihan nin pakamate sa moral,” an sabi ni James, “an sarong empleyada garo baga marahay an ugale asin nagpaheling nin interes sa katotoohan sa Biblia. Pero kan kami sanang duwa an nasa sarong kuarto sa trabaho, nagpoon sia na akiton ako sa seksuwal na paagi. An paghona ko suba sana idto alagad nadepisilan na gayo ako na papondohon sia. Tolos kong nagirumdoman an sarong eksperyensia na isinaysay sa An Torrengbantayan mapadapit sa sarong Kristiano na napaatubang sa kaagid na sugot sa trabaho nia. Ginamit kan artikulong iyan an halimbawa dapit ki Jose asin sa agom ni Potifar.b Tolos kong itinulod an babae, asin sia duminalagan paluwas.” (Gen. 39:7-12) Nagpasalamat si James na mayo na nin iba pang nangyari asin na napagdanay nia an malinig na konsensia.—1 Tim. 1:5.

15. Paano makakapakosog sa piguratibong puso niato an paghihingoang makaabot sa pagkamaygurang?

¹⁵ An pagkamaygurang kapakipakinabang man huling pinapakosog kaiyan an piguratibong puso niato asin pinupugolan kita kaiyan na “magpadara sa manlaenlaen asin dai midbid na mga katokdoan.” (Basahon an Hebreo 13:9.) Kun nagmamaigot kita na umoswag sa espirituwal, an isip niato danay na nakasentro sa “orog na mahalagang mga bagay.” (Fil. 1:9, 10) Sa siring, kita orog na nagpapasalamat sa Dios asin sa gabos na probisyon na ginigibo nia para sa kapakinabangan niato. (Roma 3:24) An Kristianong “maygurang sa mga kakayahan nin pagsabot” nakakapatalubo nin siring na pagpasalamat asin igwa nin dayupot na relasyon ki Jehova.—1 Cor. 14:20.

16. Ano an nakatabang sa sarong Kristiana na magkaigwa nin ‘marigon na puso’?

¹⁶ Inadmitir kan Kristianang si Louise na sa sarong panahon pakabautismo sa saiya, an pangenot na inisip nia iyo an magigin impresyon sa saiya nin iba. “Mayo akong ano man na ginigibong sala,” an sabi nia, “alagad an puso ko mayo nin makosog na pagmawot na paglingkodan si Jehova. Napag-isip-isip ko na kaipuhan kong gumibo nin nagkapirang pagbabago tanganing mamatean ko na itinatao ko ki Jehova an sakong bilog na makakaya. An pinakadakulang pagbabago iyo an magin bilog an puso sa pagsamba ko sa saiya.” Paagi sa siring na paghihingoa, si Louise nagkaigwa nin ‘marigon na puso,’ asin iyan nagin mahalagang marhay kan sia mapaatubang sa masakit na problema sa salud. (Sant. 5:8) Si Louise nagsabi, “Nasakitan akong gayo, alagad talagang duminayupot ako ki Jehova.”

‘Magin Makinuyog Gikan sa Puso’

17. Taano ta an pagkuyog nangorognang mahalagang marhay kan enot na siglo?

¹⁷ An hatol ni Pablo na ‘maghingoang makaabot sa pagkamaygurang’ an nagligtas sa buhay kan mga Kristiano kan enot na siglo na nag-iistar sa Jerusalem asin sa Judea. An mga naghimate dian nagkaigwa kan malinaw na espirituwal na pakabatid na kinaipuhan tanganing mamidbid an tanda na itinao ni Jesus na sinda “magpoon nang dumulag pasiring sa kabukidan.” Kan maheling ninda “an makababaldeng bagay na nagpapangyari nin kagabaan . . . na nagtitindog sa sarong banal na lugar,” an boot sabihon, an mga hukbo nin Roma na nakapalibot asin nagpupuersang laogon an Jerusalem, aram ninda na panahon nang dumulag. (Mat. 24:15, 16) Sa paghimate sa makahulang patanid ni Jesus, an mga Kristiano nagdulag hale sa siudad nin Jerusalem bago iyan laglagon asin, segun sa eklesiastikong historyador na si Eusebio, nag-istar sa siudad nin Pella sa mabukid na rehion nin Galaad. Sa siring, nalikayan ninda an pinakagrabeng kapahamakan sa kasaysayan nin Jerusalem.

18, 19. (a) Taano ta an pagkuyog mahalagang marhay sa panahon niato? (b) Ano an pag-oolayan sa sunod na artikulo?

¹⁸ An pagkuyog na resulta kan paghihingoang makaabot sa pagkamaygurang makakapagligtas man sa buhay kun mapaatubang na kita sa mayor na kaotoban kan hula ni Jesus na “magkakaigwa nin dakulang kahorasaan” na dai pang kaagid. (Mat. 24:21) Kita daw magigin makinuyog sa ano man na importanteng instruksion sa ngapit na puedeng akoon niato hale sa “maimbod na mayordomo”? (Luc. 12:42) Mahalaga nanggad na makanood kita na ‘magin makinuyog gikan sa puso’!—Roma 6:17.

¹⁹ An pagkamit niato nin pagkamaygurang nangangaipo na sanayon niato an satong kakayahan sa pagrisa. Ginigibo niato ini paagi sa paghihingoang magin mas may kabatidan sa Tataramon nin Dios asin paagi sa pakanood nin pagkuyog. An pagtalubo sa Kristianong pagkamaygurang nagtatao sa mga hoben nin partikular na mga kadepisilan. Pag-oolayan sa sunod na artikulo kun paano mapangganang maaatubang an siring na mga kadepisilan.

[Mga Nota sa Ibaba]

Ano an Nanodan Nindo?

• Ano an espirituwal na pagkamaygurang, asin paano niato makakamtan iyan?

• Sa paghihingoa niato na makaabot sa pagkamaygurang, ano an papel kan pagigin may kabatidan sa Tataramon nin Dios?

• Paano kita nakakanood nin pagkuyog?

• Sa anong mga paagi kita nakikinabang sa pagkamaygurang?

[Ritrato sa pahina 10]

An pag-aplikar kan hatol kan Biblia nagtatabang sa sato na atubangon an mga problema sa maygurang na paagi

[Ritrato sa pahina 12, 13]

An pagsunod sa hatol ni Jesus an nagligtas sa buhay kan enot na mga Kristiano