Ihayag an Saindong Pag-oswag

“Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.”​—1 TIMOTEO 4:15.

1. Paano nindo masasabing hinog na asin puede nang kakanon an sarong prutas?

IMAHINARA an paborito nindong prutas​—mansanas, peras, mangga, o iba pa. Masasabi daw nindo kun iyan hinog na asin puede nang kakanon? Iyo nanggad. An hamot, kolor, asin an mate nindo dian pagkinaptan nindo gabos nagsasabi sa saindo na may masiramon kamong makakakan. Oras na kamo makakagat dian, tibaad mapakagsing kamo. Matagokon! Abaang hamis! Iyan nagtatao sa saindo nin dakulaon na kagayagayahan asin kaogmahan.

2. Paano nahahayag an pagkamaygurang, asin ano an epekto kaiyan sa personal na mga relasyon?

² An simple alagad kawiliwiling eksperyensiang ini may pagkakaagid sa ibang mga kabtang nin buhay. Halimbawa, kun paanong totoo sa pagigin hinog nin prutas, an espirituwal na pagkamaygurang nin saro naheheling man sa manlaenlaen na paagi. Namimidbid niato an pagkamaygurang sa sarong tawo kun naheheling ta an pakamansay, pakarorop, kadonongan, asin iba pa. (Job 32:7-9) Nakaoogmang marhay nanggad na makiasosyar asin magtrabaho kaiba nin mga tawo na nagpapaheling nin siring na mga kualidad sa saindang mga aktitud asin gawe-gawe.​—Talinhaga 13:20.

3. Ano an ihinayag kan paglaladawan ni Jesus sa mga tawo kan saiyang kaaldawan manongod sa pagkamaygurang?

³ Sa ibong na lado, an sarong tawo tibaad maygurang sa pisikal, alagad tibaad ihayag kan saiyang pagtaram asin paghiro na sia bakong maygurang sa emosyon asin espirituwal. Halimbawa, nagtataram dapit sa maraot na kapag-arakian kan saiyang kaaldawan, si Jesu-Cristo nagsabi: “Si Juan nagdatong na dai nagkakakan ni nag-iinom, pero an mga tawo nagsasabi, ‘Sia may demonyo’; an Aki nin tawo nagkakakan asin nag-iinom, alagad ta sabi man giraray nin mga tawo, ‘Uya! Sarong tawong onason asin parainom nin arak.’” Minsan ngani an mga tawong idto maygurang sa pisikal, sinabi ni Jesus na sinda guminawe na siring sa “mga aki”​—bakong maygurang. Sa siring, sinabi pa nia: “Iyo man sana, an kadonongan napatutunayan na matanos paagi sa mga gibo kaiyan.”​—Mateo 11:16-19.

4. Sa anong mga paagi nahahayag an pag-oswag asin pagkamaygurang?

⁴ Basado sa mga tataramon ni Jesus, maheheling niato na kun baga an sarong tawo igwa nin tunay na kadonongan​—sarong risang tanda nin pagkamaygurang​—ipinaririsa kan saiyang mga ginigibo asin kan mga resultang ibinubunga. Mapadapit digdi, mangnoha an hatol ni apostol Pablo ki Timoteo. Pakatapos na sarosaroon an mga bagay na maninigong pag-aaaboton ni Timoteo, sinabi ni Pablo: “Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.” (1 Timoteo 4:15) Iyo, an pag-oswag nin sarong Kristiano pasiring sa pagkamaygurang ‘hayag,’ o malinaw na namamansayan. An Kristianong pagkamaygurang, arog nin makinang na liwanag, bakong dai naheheling o nakatagong kualidad. (Mateo 5:​14-​16) Kun siring, eestudyaran niato an duwang pangenot na paagi na dian an pag-oswag asin pagkamaygurang puedeng mahayag: (1) pagtalubo sa kaaraman, pakasabot, asin kadonongan; (2) pagpaheling kan bunga kan espiritu.

Pagkasararo sa Pagtubod Asin Kaaraman

5. Paano puedeng tawan nin kahulogan an pagkamaygurang?

⁵ An kadaklan na diksionaryo ilinaladawan an pagkamaygurang bilang an kamugtakan nin pagigin nagtalubo na nin husto, nin lubos na an pagkadakula, asin nakaabot na sa ultimong kamugtakan o pinagmamawot na pamantayan. An sarong prutas, siring kan nasambitan kasubago, maygurang na, o hinog na, kun nakompleto na kaiyan an natural na siklo nin pagtalubo kaiyan asin an itsura, kolor, hamot, asin namit kaiyan nakaabot na sa ibinibilang na kawiliwili. Kun siring, an pagkamaygurang kaparehong kahulogan kan pagigin ekselente, pagigin lubos, pagkasangkap pa ngani.​—Isaias 18:5; Mateo 5:​45-​48; Santiago 1:4.

6, 7. (a) Ano an nagpapaheling na interesadong marhay si Jehova na pataluboon sa espirituwal na pagkamaygurang an gabos na nagsasamba sa saiya? (b) Sa ano konektadong marhay an espirituwal na pagkamaygurang?

⁶ Si Jehova Dios interesadong marhay na pataluboon sa espirituwal na pagkamaygurang an gabos na nagsasamba sa saiya. Sa katuyohan na iyan, naggibo sia nin makangangalas na mga probisyon sa laog kan Kristianong kongregasyon. Sa mga Kristiano sa Efeso, nagsurat si apostol Pablo: “Itinao nia an nagkapira bilang mga apostol, an nagkapira bilang mga propeta, an nagkapira bilang mga paraebanghelyo, an nagkapira bilang mga pastor asin paratokdo, manongod sa pagpakarhay giraray kan mga banal, manongod sa gibohon nin paglingkod, manongod sa pagpakosog kan hawak ni Cristo, sagkod na kita gabos makaabot sa pagkasararo sa pagtubod asin sa tamang kaaraman manongod sa Aki nin Dios, sa lubos na pagkatawo, sa sokol nin pagtalubo na kapareho kan kapanoan kan Cristo; tanganing dai na kita magin mga omboy, na inaanod nin mga alon asin ipinapadpad nin lambang doros nin katokdoan paagi sa kadayaan nin mga tawo, paagi sa katusohan sa pagpakana nin karatan.”​—Efeso 4:11-14.

⁷ Sa mga bersikulong ini, ipinaliwanag ni Pablo na kabilang sa mga dahelan kun taano ta itinao nin Dios an siring kadakol na espirituwal na probisyon sa kongregasyon iyo na tanganing an gabos maninigong “makaabot sa pagkasararo sa pagtubod asin sa tamang kaaraman,” magin ‘lubos an pagkatawo,’ asin magkaigwa kan ‘sokol nin pagtalubo kan Cristo.’ Dangan sana kita magigin ligtas sa pagkapadpad siring kan espirituwal na mga omboy paagi sa falsong mga ideya asin katokdoan. Sa siring naheheling niato an haraning koneksion kan pagtalubo sa Kristianong pagkamaygurang asin pagkamit nin “pagkasararo sa pagtubod asin sa tamang kaaraman manongod sa Aki nin Dios.” Dakol na punto sa hatol ni Pablo an maninigo niatong isapuso.

8. Ano an kaipuhan tanganing maabot an “pagkasararo” sa pagtubod asin sa tamang kaaraman?

⁸ Enot, mantang an “pagkasararo” dapat na papagdanayon, an maygurang na Kristiano dapat na kasaro asin biyong kaoyon kan mga kapagtubod kun dapit sa pagtubod asin kaaraman. Dai nia sinusuportaran o iiniinsistir an personal na mga opinyon o nag-iisip nin personal na mga ideya mapadapit sa pakasabot sa Biblia. Imbes, igwa sia nin lubos na kompiansa sa katotoohan na ihinahayag ni Jehova Dios paagi sa saiyang Aki, si Jesu-Cristo, asin sa “fiel asin may diskresion na oripon.” Paagi sa regular na pag-ako kan espirituwal na kakanon na itinatao “sa igong panahon”​—paagi sa Kristianong mga publikasyon, pagtiripon, asamblea, asin kombension​—makaseseguro kita na pinapagdadanay ta an “pagkasararo” kaiba kan mga kapwa Kristiano sa pagtubod asin kaaraman.​—Mateo 24:45.

9. Ipaliwanag an kahulogan kan tataramon na “pagtubod” siring sa pagkagamit ni Pablo sa saiyang surat sa mga taga Efeso.

⁹ Ikaduwa, an tataramon na “pagtubod” nanonongod, bako sa kombiksion na hinihingako kan lambang indibiduwal na Kristiano, kundi sa kabilogan kan satong pagtubod, “an lakbang asin laba asin langkaw patin rarom” kaiyan. (Efeso 3:18; 4:5; Colosas 1:23; 2:7) Sa katunayan, paano an sarong Kristiano magigin kasaro kan mga kapagtubod kun tinutubod o inaako sana nia an nagkapirang kabtang kan “pagtubod”? Nangangahulogan ini na kita dai dapat makontentong maaraman sana an pundamental na katokdoan kan Biblia o magkaigwa sana nin malibog o parsial na kaaraman kan katotoohan. Imbes, kita maninigong magin interesadong aprobetsaran an gabos na probisyon ni Jehova paagi sa saiyang organisasyon sa sigidong pagsiyasat sa saiyang Tataramon. Dapat tang hingoahon na makua an tamang kaaraman asin lubos na pakasabot kan kabotan asin katuyohan nin Dios sagkod sa mapupuede. Kaiba digdi an pagtao nin panahon na basahon asin pag-adalan an Biblia asin mga publikasyon sa Biblia, mamibi sa Dios sa pag-arang kan saiyang tabang asin paggiya, umatender nin regular sa Kristianong mga pagtiripon, asin makikabtang nin lubos sa paghuhulit kan Kahadean asin paggibo nin mga disipulo.​—Talinhaga 2:1-5.

10. Ano an kahulogan kan mga tataramon na “sagkod na kita gabos makaabot,” na ginamit sa Efeso 4:13?

¹⁰ Ikatolo, iinintrodusir ni Pablo an paglaladawan kan tolong pasohan paagi sa mga tataramon na “sagkod na kita gabos makaabot.” Mapadapit sa pananaram na “kita gabos,” an sarong libro sa Biblia nagtatao kan kahulogan na “bakong gabos, saro-saro, sa suruway na paagi, kundi magkairiba gabos.” Sa ibang pagtaram, an kada saro sa sato maninigong gumibo nin rasonableng paghihingoa na aboton an pasohan na Kristianong pagkamaygurang kaiba kan enterong kasararoan nin magturugang. An The Interpreter’s Bible nagsasabi: “An kabilogan nin espirituwal na nagibo dai makakamtan kan indibiduwal na nagsosolosolo, kun paanong an sarong kabtang kan hawak dai makakaabot sa hustong pagtalubo apuera sana kun an enterong hawak nagpapadagos sa tamang pagtalubo.” Ipinagirumdom ni Pablo sa mga Kristianong taga Efeso na sa “kaibanan kan gabos na banal” ninda maninigong pagmaigotan na masabotan an kabilogan kan pagtubod.​—Efeso 3:18a.

11. (a) Ano an dai ipinapakahulogan kan pag-oswag sa espirituwal? (b) Ano an kaipuhan tang gibohon tanganing umoswag?

¹¹ Malinaw na maheheling sa mga tataramon ni Pablo na an espirituwal na pag-oswag dai nangangahulogan nin pagpano sana kan isip nin kaaraman asin dakulaon na inadalan. An maygurang na Kristiano bakong saro na biyong pinahahanga an iba sa saiyang pagigin matali. Imbes, an Biblia nagsasabi: “An dana kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.” (Talinhaga 4:18) Iyo, “an dana,” bakong an indibiduwal, an “paorog nang paorog na nagliliwanag.” Kun kita padagos na maghihingoang makisabay sa padagos na nagliliwanag na pakasabot sa Tataramon nin Dios na itinatao ni Jehova sa saiyang banwaan, kita maoswag sa espirituwal. Digdi, an pagsabay nangangahulogan nin pag-abante, asin iyan sarong bagay na kaya niato gabos na gibohon.​—Salmo 97:11; 119:105.

Ipaheling an “Bunga kan Espiritu”

12. Taano ta mahalaga na ipaheling an bunga kan espiritu sa satong pagmamaigot na kamtan an espirituwal na pag-oswag?

¹² Minsan ngani mahalaga na maabot an “pagkasararo sa pagtubod asin sa tamang kaaraman,” mahalaga man para sa sato na ipaheling an bunga kan espiritu nin Dios sa gabos na aspekto kan satong buhay. Taano? Ini huli ta an pagkamaygurang, siring kan naheling ta na, bakong dai naheheling o nakatago, kundi iyan midbid sa namamansayan nin malinaw na mga karakteristiko na puedeng pakinabangon asin parigonon an iba. Siempre, an satong pagmamaigot na kamtan an espirituwal na pag-oswag bako sanang paghihingoa na magsagin igwa nin pinong ugale. Imbes, mantang kita nagtatalubo sa espirituwal, na sinusunod an paggiya kan espiritu nin Dios, magkakaigwa nin makangangalas na pagkaliwat sa satong mga aktitud asin gawe-gawe. “Magpadagos kamong maglakaw sa espiritu asin dai kamo makakagibo nin ano man na horot nin laman,” an sinabi ni apostol Pablo.​—Galacia 5:16.

13. Anong pagbabago an malinaw na tanda nin pag-oswag?

¹³ Ilinista ni Pablo “an mga gibo kan laman,” na balakid asin “hayag.” Bago masabotan nin sarong tawo an mga kahagadan nin Dios, an saiyang buhay kaayon kan pamumuhay kan kinaban asin tibaad igwa kan nagkapira sa mga bagay na nasambitan ni Pablo: “pakikisaro, karompotan, malaswang gawe, idolatriya, paggibo nin espiritismo, mga pakikienemigo, iriwal, pangimon, mga pagputok nin kaanggotan, mga pasuruhay, pagkabaranga, mga sekta, mga pagkauri, mga pagburat, mariribok na katiriponan sa pag-ogma, asin an siring na mga bagay.” (Galacia 5:19-21) Alagad mantang an saro nag-ooswag sa espirituwal, luway-luway niang nahahale an bakong kawiliwiling “mga gibo kan laman” na ini asin nasasalidahan kan “bunga kan espiritu.” An naheheling na panluwas na pagbabagong ini malinaw na tanda na an saro nag-ooswag pasiring sa Kristianong pagkamaygurang.​—Galacia 5:22.

14. Ipaliwanag an duwang pananaram na “mga gibo kan laman” asin “bunga kan espiritu.”

¹⁴ Maninigong mangnohon niato an duwang pananaram na “mga gibo kan laman” asin “an bunga kan espiritu.” An “mga gibo” iyo an resulta kan ginigibo kan saro, an bunga kan gawe-gawe nin saro. Sa ibang pagtaram, an mga bagay na ilinista ni Pablo na mga gibo kan laman resulta magsalang kan may pag-aram na paghihingoa nin saro o kan impluwensia kan makasalan na laman. (Roma 1:​24, 28; 7:​21-​25) Sa ibong na lado, an pananaram na “bunga kan espiritu” nagpaparisa na an mga kualidad na nakalista digdi, bakong resulta nin mga paghihingoa sa inaapod na pagpakarhay sa ugale o pagpaoswag sa personalidad, kundi resulta kan pagpunsionar kan espiritu nin Dios sa sarong tawo. Kun paano an sarong kahoy mabunga kun iyan inaataman nin tama, an sarong tawo mapaheling man kan bunga kan espiritu kun an banal na espiritu sueltong naghihiro sa saiyang buhay.​—Salmo 1:1-3.

15. Taano ta mahalaga na tawan nin atension an gabos na aspekto kan “bunga kan espiritu”?

¹⁵ An saro pang punto na maninigong estudyaran iyo an paggamit ni Pablo kan terminong “bunga” tanganing iiba an gabos na kawiliwiling kualidad na nasambitan nia. An espiritu dai namumunga nin manlaenlaen na bunga tangani na pilion ta an satong paborito. An gabos na kualidad na ilinista ni Pablo​—pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri​—parareho mahalaga, asin magkairibanan na pinapagin posible kaiyan an bagong Kristianong personalidad. (Efeso 4:​24; Colosas 3:10) Kun siring, minsan ngani tibaad manompongan niato na an nagkapira sa mga kualidad na ini mas risa sa satong buhay huli sa sato mismong personalidad asin mga inklinasyon, mahalaga na tawan ta nin atension an gabos na aspekto na nasambitan ni Pablo. Sa paggibo kaiyan, mas lubos tang ikapababanaag an arog-Cristong personalidad sa satong buhay.​—1 Pedro 2:​12, 21.

16. Ano an satong obheto sa satong pag-aaabot kan Kristianong pagkamaygurang, asin paano iyan maaabot?

¹⁶ An mahalagang leksion na manonodan ta sa pagtokar ni Pablo iyo na sa pag-aaabot kan Kristianong pagkamaygurang, an satong obheto bakong tangani na makakua nin dakulang kaaraman asin inadalan ni tangani na magkaigwa nin pinong ugale. Iyan tanganing kamtan an daing kaolangan na pagbolos kan espiritu nin Dios sa satong buhay. Kun sagkod saen an paghimate kan satong kaisipan asin paghiro sa paggiya kan espiritu nin Dios, sagkod man dian an satong pagigin maygurang sa espirituwal. Paano niato maaabot an obhetong ini? Dapat na buksan niato an satong puso asin isip sa impluwensia kan espiritu nin Dios. Kalabot digdi an satong fiel na pag-atender asin pakikikabtang sa Kristianong mga pagtiripon. Maninigo man kitang regular na mag-adal asin maghorophorop sa Tataramon nin Dios, na tinotogotan an mga prinsipyo kaiyan na gumiya sa satong pagtratar sa iba asin sa mga pagpili patin desisyon na ginigibo ta. Kun siring, tunay nanggad na an satong pag-oswag malinaw na mahahayag.

Umoswag Para sa Kamurawayan nin Dios

17. Paanong an pag-oswag konektado sa pagpamuraway sa satong langitnon na Ama?

¹⁷ Sa katapustapusi, an satong hayag na pag-oswag nagtatao nin kamurawayan asin kaomawan, bakong sa sato, kundi sa satong langitnon na Ama, si Jehova, na nagpapagin posible para sa sato na magkaigwa nin espirituwal na pagkamaygurang. Kan banggi bago gadanon si Jesus, sinabihan nia an saiyang mga disipulo: “An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo.” (Juan 15:8) Pareho paagi sa bunga kan espiritu asin paagi sa bunga kan Kahadean sa saindang ministeryo, an mga disipulo nagtao nin kamurawayan ki Jehova.​—Gibo 11:​4, 18; 13:48.

18. (a) Anong magayagayang pag-ani an nangyayari ngonyan? (b) Anong angat an iinaatubang kan pag-aning ini?

¹⁸ Ngonyan, an bendisyon ni Jehova nasa saiyang banwaan mantang sinda nakikikabtang sa sarong panglobong espirituwal na pag-ani. Sa dakol na taon na ngonyan, mga 300,000 na bagohan taon-taon an nagdudusay kan saindang sadiri ki Jehova asin sinisimbolisaran an saindang pagdusay paagi sa bautismo sa tubig. Pinaoogma kita kaini asin daing duwa-duwa na pinagagayagaya man an puso ni Jehova. (Talinhaga 27:11) Minsan siring, tanganing ini magin sarong dagos-dagos na gikanan nin kagayagayahan asin kaomawan ki Jehova, an gabos na bagohan na iyan kaipuhan na “padagos [na] maglakaw na kasaro [ni Cristo], na nakagamot asin itinitindog dian sa saiya patin pinaririgon sa pagtubod.” (Colosas 2:​6, 7) Ini nag-aatubang nin duwang angat sa banwaan nin Dios. Sa sarong lado, kun kamo nabautismohan pa sana, aakoon daw nindo an angat na magmaigot kamo tanganing ‘an saindong pag-oswag mahayag sa gabos’? Sa ibong na lado, kun kamo haloy-haloy na sa katotoohan, aakoon daw nindo an angat na isaabaga an paninimbagan na asikasohon an espirituwal na kapakanan kan mga bagohan? Arin man digdi, malinaw an pangangaipo na magpadagos sa pagkamaygurang.​—Filipos 3:16; Hebreo 6:1.

19. Anong pribilehio asin mga bendisyon an puedeng mapasaindo kun ihahayag nindo an saindong pag-oswag?

¹⁹ Makangangalas na mga bendisyon an naghahalat sa gabos na nagmamaigot na ihayag an saindang pag-oswag. Girumdoma an nakaparirigon sa boot na mga tataramon ni Pablo pakatapos niang sadolon si Timoteo na umoswag: “Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.” (1 Timoteo 4:16) Paagi sa mahigos na paghayag kan saindong pag-oswag, kamo man puedeng makikabtang sa pribilehio nin pagpamuraway sa ngaran nin Dios asin pagkamit kan saiyang mga bendisyon.

Nagigirumdoman daw Nindo?

• Sa anong mga paagi ikahahayag an espirituwal na pagkamaygurang?

• Anong klaseng kaaraman asin pakasabot an nagpapabanaag nin pagkamaygurang?

• Paanong an pagpaheling kan “bunga kan espiritu” nagpaparisa nin espirituwal na pag-oswag?

• Anong angat an maninigong akoon niato mantang kita nagpapadagos sa pagkamaygurang?

[Ritrato sa pahina 13]

An pagkahinog, o pagkamaygurang, malinaw na namamansayan

[Ritrato sa pahina 15]

Kita nag-ooswag sa espirituwal paagi sa pagsabay sa ihinahayag na katotoohan

[Ritrato sa pahina 17]

An pamibi nakatatabang sa sato na ipaheling an “bunga kan espiritu”