Ihayag an Saindong Pag-oswag
1 Girumdoma an panahon kan enot nindong madangog an mensahe kan Kahadean. An simpleng mga katotoohan nakapukaw sa saindong pagmawot para sa kaaraman. Dai nahaloy naheling nindo an pangangaipo na gumibo nin mga pagliliwat sa saindong buhay tangani na maabot an halangkaw na mga pamantayan ni Jehova. (Isa. 55:8, 9) Naggibo kamo nin pag-oswag, nagdusay kan saindong buhay, asin nagpabautismo.
2 Dawa pakatapos na gumibo nin pag-oswag, igwa pa man giraray nin mga kaluyahan na dapat pangganahan. (Roma 12:2) Tibaad takot kamo sa tawo, na nagpangyari saindo na mag-alangan na makikabtang sa paglilingkod sa langtad. O tibaad nagkukulang kamo sa pagpaheling kan mga bunga kan espiritu nin Dios. Pero determinado kamong gumibo nin pag-oswag paagi sa pagbugtak nin teokratikong mga pasohan para sa saindong sadiri.
3 Tibaad nagkapira nang taon an nakaagi poon kan kamo magdusay. Sa pagsalingoy, anong pag-oswag an nagibo na nindo? Naabot na daw nindo an nagkapira sa saindong mga pasohan? Igwa daw kamo kan kaparehong kaigotan na ‘nasa saindo sa kapinonan’? (Heb. 3:14) Si Timoteo maygurang nang Kristiano kan sia dagkahon ni Pablo: “Maghorophorop ka sa mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.”—1 Tim. 4:15.
4 Kaipuhan an Personal na Pagsiyasat: Kun hinohorophorop niato an satong nakaagi, igwa pa daw kita kan nagkapira sa mga kaluyahan niato kan kita pumoon? Nasudya daw kitang aboton an nagkapira sa mga pasohan na ibinugtak niato? Kun iyo, taano? Dawa ngani igwa kita nin marahay na mga intension, tibaad nagpanuodma kita. Tibaad tinogotan niato an mga kahaditan sa buhay na pogolon kita.—Luc. 17:28-30.
5 Minsan ngani dai niato maliliwat an nakaagi, siertong may magigibo kita dapit sa ngapit. Madedeterminaran niato kun saen kita nagkukulang, dangan gumibo nin konsentradong paghihingoa na umoswag. Tibaad kaipuhan niatong umoswag sa pagpaheling kan mga bunga kan espiritu nin Dios, siring baga kan pagpopogol sa sadiri o pakatios. (Gal. 5:22, 23) Kun nadedepisilan kita sa pakikikooperar sa kamagurangan, kaipuhan niatong kultibaron an kapakumbabaan asin kababaan nin pag-isip.—Fil. 2:2, 3.
6 Ikapahahayag daw niato an satong pag-oswag paagi sa pag-aaabot sa mga pribilehio nin paglilingkod? Paagi sa dagdag pang paghihingoa an mga tugang na lalaki puedeng makualipikar bilang ministeryal na mga lingkod o kamagurangan. Dakol sa sato an puedeng magpalista bilang regular o auxiliary payunir. An iba puedeng maghingoa na paoswagon an personal na ugale sa pag-adal o orog pang magpartisipar sa mga pagtiripon kan kongregasyon.
7 Siempre, bahala na an kada saro sa sato na magdesisyon kun saen kita kaipuhan gumibo nin pag-oswag. Makasisierto kita na an satong odok sa boot na paghihingoa na ‘magpadagos sa pagkamaygurang’ makadadagdag nin dakula sa satong kagayagayahan.—Heb. 6:1.