Magin Progresibo—Umoswag
KAN enot kamong makanood na iaplikar an mga prinsipyo sa Biblia, luway-luway na nabago an nakatanom nang marhay na mga kaisipan, pagtaram, asin gawe-gawe. An kadaklan digdi nangyari bago pa man kamo nagpalista sa Teokratikong Paadalan sa Pagmiministro. Ngonyan posibleng marhay na kamo nagprogreso na sagkod sa punto na idinusay na nindo an saindong buhay ki Jehova. Iyan daw nangangahulogan na puede na kamong pumondo sa pagprogreso? Dai nanggad. Kapinonan sana an saindong bautismo.
An disipulong si Timoteo naglilingkod na bilang Kristianong magurang sa kongregasyon kan sabihan sia ni Pablo na “pensaron” an hatol na itinao sa saiya sagkod an mga pribilehio sa paglilingkod na ipinaniwala sa saiya—na ‘ipanongod an bilog niang buhay’ sa mga bagay na ini—tangani na an saiyang “pag-oswag mahayag sa gabos.” (1 Tim. 4:12-15) Baga man kamo nagpopoon pa sanang sumunod sa dalan kan katotoohan o dakula na an eksperyensia sa Kristianong pamumuhay, maninigo na kamo magin interesado sa pag-oswag.
Kaaraman Asin Pagkaliwat
Sa Efeso 3:14-19, mababasa niato na si apostol Pablo namibi na logod an saiyang mga kapagtubod ‘lubos na masabotan kan saindang isip an lakbang asin laba asin langkaw patin rarom’ kan katotoohan. Sa katuyohan na iyan, nagtao si Jesus nin balaog na mga lalaki na magtotokdo, magpapakarhay giraray, asin magpapakosog sa kongregasyon. An regular na paghorophorop sa ipinasabong na Tataramon nin Dios, kaiba an paggiya nin eksperyensiadong mga paratokdo, makatatabang sa sato na “magtalubo” sa espirituwal.—Efe. 4:11-15.
Kaiba sa pagtalubong iyan an pagigin “bago sa puersa na nagpapahiro sa saindong isip.” Kalabot digdi an pag-establisar nin marigon na inklinasyon nin isip kaoyon kan isip nin Dios asin ni Cristo. Nagkakaipo iyan nin dayaday na pagkalantad sa saindang kaisipan, tangani na ‘ikasolog an bagong personalidad.’ (Efe. 4:23, 24) Kun pinag-aadalan nindo an mga Ebanghelyo, an pagheling daw nindo sa mga salaysay na ini kan buhay ni Cristo modelo na dapat nindong arogon? Hinihingoa daw nindong aramon an espesipikong mga ugale na ipinaheling ni Jesus dangan talagang pagmaigotan na arogon an mga ini sa saindong buhay?—1 Ped. 2:21.
An mga topikong iiniiba nindo sa pakikipag-olay puedeng magparisa kun gurano na an nagibo nindo sa siring na pag-oswag. An mga nakapagsolog na kan bagong personalidad dai nagtataram nin madaya, mapanlibak, malaswa, o negatibo. Imbes, an pagtaram ninda “marahay para sa pagpakosog . . . tangani na ikatao kaiyan an paborable sa mga nagdadangog.” (Efe. 4:25, 26, 29, 31; 5:3, 4; Jud. 16) An saindang mga komento asin kapahayagan sa pribado sagkod sa mga pagtiripon kan kongregasyon naghahayag na liniliwat kan katotoohan an saindang buhay.
Kun kamo dai na “inaanod nin mga alon asin ipinapadpad nin lambang doros nin katokdoan,” ini ebidensia man nin pag-oswag. (Efe. 4:14) Halimbawa, ano an reaksion nindo kun pinaooranan kamo kan kinaban nin bagong mga ideya, mobimiento, o klase nin aling-alingan? Nasusugotan daw kamong ibalyo an panahon hale sa espirituwal na mga obligasyon tangani na masunod an siring na mga bagay? An paggibo kaiyan puedeng makapogol sa espirituwal na pag-oswag. Kanigoan nanggad kamas madonong na tuboson an panahon para sa espirituwal na mga okupasyon!—Efe. 5:15, 16.
An pagtratar nindo sa ibang tawo puede man na magparisa nin espirituwal na pag-oswag. Nakanood na daw kamong magin ‘madinamayon sa mamomoton na paagi, na sueltong nagpapatawad’ sa saindong mga tugang na lalaki asin babae?—Efe. 4:32.
An progreso nindo sa paggibo sa mga bagay sa paagi ni Jehova maninigong mahayag sa kongregasyon sagkod sa harong. Iyan maninigo man na risang-risa sa eskuelahan, sa pampublikong mga lugar, asin sa saindong pinagtatrabawohan. (Efe. 5:21–6:9) Kun sa gabos na kamugtakan na iyan mas lubos kamong nagpapaheling nin diosnon na mga kualidad, kun siring nahahayag na an saindong pag-oswag.
Gamiton an Balaog sa Saindo
An lambang saro sa sato pinaniwalaan ni Jehova nin mga abilidad asin talento. Inaasahan nia na gamiton niato an mga ini para sa iba tangani na paagi sa sato, ikapahayag nia an saiyang dai na kutana maninigong kabootan. Mapadapit digdi nagsurat si apostol Pedro: “Kaoyon sa sokol nin balaog na naako kan lambang saro, gamiton iyan sa paglingkod sa lambang saro bilang marahay na mga mayordomo kan dai na kutana maninigong kabootan nin Dios.” (1 Ped. 4:10) Paano nindo ginigibo an saindong pagkamayordomo?
Nagpadagos si Pedro: “Kun may nagtataram, magtaram sia na garo baga iyan sagradong mga kapahayagan nin Dios.” (1 Ped. 4:11) Idinodoon kan bersikulong ini an responsibilidad na magtaram na lubos na kaoyon kan Tataramon nin Dios, tangani na mapamuraway an Dios. An paagi kan siring na pagtaram maninigo na magpamuraway man ki Jehova. An pagpatood na itinatao paagi sa Teokratikong Paadalan sa Pagmiministro makatatabang sa saindo na gamiton an balaog sa saindo sa siring na paagi—pinamumuraway an Dios sa paagi kan saindong pagtabang sa iba. Mantang iyan an katuyohan nindo, paano nindo maninigong sokolon an saindong progreso sa paadalan?
Imbes na isipon kun pira nang punto an natapos nindo sa saindong porma nin konseho sa pagtaram o an klase nin asignasyon na itinao sa saindo, isip-isipon kun gurano napakarhay kan pagpatood an kualidad kan saindong atang nin pag-omaw. Inaandam kita kan paadalan na magin mas epektibo sa ministeryo sa langtad. Kaya ihapot sa sadiri: ‘Talaga daw na inaandam ko an sasabihon ko sa paglilingkod sa langtad? Nakanood na daw akong magpaheling nin personal na interes sa mga hinuhulitan ko? Nagbubugtak daw ako kan pundasyon para sa pagdalaw liwat paagi sa pagwalat nin hapot sa mga tawo na pag-oolayan sa masunod? Kun may inaadalan ako sa Biblia, naghihingoa daw ako na umoswag bilang paratokdo na natataros an puso?’
Dai paghelingon an progreso may koneksion sana sa mga pribilehio sa paglilingkod na itinatao sa saindo. An pag-oswag nindo naheheling, bakong sa asignasyon, kundi sa ginigibo nindo dian. Kun tinawan nin asignasyon na kalabot an pagtotokdo, ihapot sa sadiri: ‘Talaga daw na ginamit ko an teknika sa pagtotokdo? Ginamit ko daw an materyales sa paagi na iyan nagkaepekto sa buhay kan mga nakadangog dian?’
An sadol na gamiton an saindong balaog nagpapasentido nin paggamit nin inisyatiba. Ginigibo daw nindo an inisyatiba na umiba sa iba sa ministeryo sa langtad? Naghahanap daw kamo nin mga oportunidad na tabangan an mga miembro kan saindong kongregasyon na bagohan, hoben pa, o maluya an hawak? Nagboboluntaryo daw kamo na maglinig sa Kingdom Hall o tumabang sa manlaenlaen na paagi sa mga kombension asin asamblea? Puede daw kamong magpalista sa panapanahon bilang auxiliary payunir? Kaya daw nindong maglingkod bilang regular payunir o tumabang sa sarong kongregasyon na mas dakula an pangangaipo? Kun kamo tugang na lalaki, naghihingoa daw kamo na maabot an sono sa Kasuratan na mga kualipikasyon para sa ministeryal na mga lingkod asin kamagurangan? An pagigin andam nindo na tumao nin tabang asin mag-ako nin responsibilidad sarong tanda nin pag-oswag.—Sal. 110:3.
An Kabtang kan Eksperyensia
Kun sa pagmate nindo limitado kamo huli sa kakulangan nin eksperyensia sa Kristianong pamumuhay, magpakapusoan kamo. Kaya kan Tataramon nin Dios na gibohon na ‘madonong an daing eksperyensia.’ (Sal. 19:7; 119:130; Tal. 1:1-4) An pag-aplikar kan hatol kan Biblia nagpapangyari sa sato na makinabang sa sangkap na kadonongan ni Jehova, na mas mahalaga kisa ano man na nanodan paagi sana sa eksperyensia. Pero, mantang kita nag-ooswag sa satong paglilingkod ki Jehova, kita talagang nagkakamit nin mahalagang eksperyensia. Paano niato iyan magagamit sa pinakamarahay?
Huling nag-agi na sa laen-laen na kamugtakan sa buhay, an saro puedeng matentaran na mangatanosan: ‘Napaatubang na ako kaidto sa situwasyon na arog kaini. Aram ko na an gigibohon ko.’ Ini daw an dalan nin kadonongan? An Talinhaga 3:7 nagpapatanid: “Dai ka magpakadonong sa saimong sadiring mga mata.” An eksperyensia tunay na maninigong magpahiwas sa satong punto de vista sa mga bagay na dapat konsideraron kun inaatubang an mga situwasyon sa buhay. Alagad kun kita nagpoprogreso sa espirituwal, maninigo man na itudok sa satong isip asin puso kan satong eksperyensia na kaipuhan niato an bendisyon ni Jehova tanganing magin mapanggana. Kun siring, an satong pag-oswag nahahayag, bakong paagi sa pag-atubang niato sa mga situwasyon na may kompiadong pagsarig sa sadiri, kundi paagi sa daing pag-alangan na pagdolok niato ki Jehova para sa paggiya sa satong buhay. Iyan ikinapaheheling kan pagigin kompiado niato na mayo nin ano man na puedeng mangyari na dai nia itinogot asin kan pagpapadanay niato nin nagtitiwala saka mapagpadangat na relasyon sa satong langitnon na Ama.
Padagos na Piriton na Aboton
Rinekonoser ni apostol Pablo, apisar na sia sarong maygurang sa espirituwal, linahidan na Kristiano, na kaipuhan na padagos niang ‘piriton na aboton’ an pasohan na buhay. (Fil. 3:13-16) Arog man daw kaiyan an punto de vista nindo?
Gurano na an nagibo nindong progreso? Sokolon an saindong pagtalubo may koneksion sa kun gurano kabiyo na kamo nagsolog kan bagong personalidad, kun gurano kalubos na kamo nagpapasakop sa soberaniya ni Jehova, asin kun gurano kaigot na saindong ginagamit an mga balaog sa saindo sa pagtao nin onra ki Jehova. Mantang kamo nakikinabang sa edukasyon sa Teokratikong Paadalan sa Pagmiministro, an mga kualidad na tinatawan nin pagdodoon sa Tataramon nin Dios maninigo na progresibong marisa sa saindong pagtaram asin pagtotokdo. Magkonsentrar sa mga aspektong ini kan saindong pagtalubo. Iyo, ipaggayagaya an mga iyan, asin an saindong pag-oswag mahahayag tolos.