Ingatan an Espirituwalidad Mantang Naglilingkod sa Teritoryong Iba an Lengguwahe

1-3. (a) Ano man an satong kamugtakan, ano an dapat na magin priyoridad niyato? (b) Anong espesipikong mga kadipisilan an inaatubang kan mga nag-aadal nin ibang lengguwahe, asin ano an mga puwede tang maihapot? (Hilingon an ritrato sa itaas.)

RINIBONG Saksi ni Jehova ngunyan an aktibong nakikikabtang sa kautuban kan bisyon na an maugmang bareta ipapahayag “sa gabos na nasyon asin tribo asin lengguwahe saka banwaan.” (Kap. 14:6, NW) Saro ka daw sa mga nag-aadal nin ibang lengguwahe? Naglilingkod ka daw bilang misyonero o need-greater sa ibang nasyon? Nag-aatender ka na daw sa kongregasyon na iba an lengguwahe sa saindong nasyon?

² Bilang mga lingkod nin Diyos, dapat na magin priyoridad niyato gabos an espirituwalidad niyato asin kan satong pamilya. (Mat. 5:3) Pero minsan, huling sibot kitang marhay, tibaad nasasakitan kitang magkaigwa nin kapaki-pakinabang na personal na pag-adal. Pero bako sana iyan an inaatubang na mga kadipisilan kan mga naglilingkod sa teritoryong iba an lengguwahe.

³ Apuwera sa pag-adal nin bagong lengguwahe, kaipuhan man na siguraduhon kan mga naglilingkod sa teritoryong iba an lengguwahe na regular nindang pinag-aadalan an matagas na espirituwal na kakanon. (1 Cor. 2:10) Paano ninda magigibo iyan kun dai man ninda gayong nasasabutan an lengguwaheng ginagamit sa kongregasyon? Asin taano ta dapat na siyertuhon kan Kristiyanong mga magurang na natataros kan Tataramon nin Diyos an puso kan saindang mga aki?

SARONG PELIGRO SA ESPIRITUWALIDAD

4. Ano an puwedeng magin peligro sa satong espirituwalidad? Magtao nin halimbawa.

⁴ Kun dai niyato lubos na nasasabutan an mga katukduan sa Bibliya na nasa ibang lengguwahe, puwedeng magin dakulang peligro ini sa satong espirituwalidad. Kan ikalimang siglo B.C.E., nahadit si Nehemias kan maaraman niyang dai tataong magtaram nin Hebreo an ibang aki kan mga Judio na nagbaralik haling Babilonya. (Basahon an Nehemias 13:23, 24.) Huling dai lubos na nasasabutan kan mga aking ini an kahulugan kan Tataramon nin Diyos, nagigin harayo na an buot ninda sa Diyos asin sa saiyang piniling banwaan.—Neh. 8:2, 8.

5, 6. Ano an narisa kan nagkapirang magurang na naglilingkod sa teritoryong iba an lengguwahe, asin taano?

⁵ Narisa kan nagkapirang Kristiyanong magurang na naglilingkod sa teritoryong iba an lengguwahe na an saindang mga aki nagluluya an interes sa katotoohan. Huling dai lubos na nasasabutan kan mga aki an mga nadadangog ninda sa mga pagtiripon sa Kingdom Hall, dai talaga kaiyan natataros an puso ninda. Haling South America, nagbalyo sa Australia si Pedro^[1] kaiba an saiyang pamilya. An sabi niya: “Dapat kalabot an puso saka emosyon pag pinag-uulayan an espirituwal na mga bagay.”—Luc. 24:32.

⁶ Kun ibang lengguwahe an binabasa niyato, dai lubos na nagigin imbuwelto an satong puso kisa kun sadiri tang lengguwahe an binabasa ta. Dugang pa, nakakaubos kan satong mental asin espirituwal na kusog pag dai kita gayong nakakapagkomunikar gamit an ibang lengguwahe. Kaya mantang pinagdadanay ta an satong pagmawot na maglingkod ki Jehova sa teritoryong iba an lengguwahe, kaipuhan man niyatong ingatan an satong espirituwalidad.—Mat. 4:4.

NAINGATAN NINDA AN SAINDANG ESPIRITUWALIDAD

7. Paano pinurbaran kan mga Babilonyo na ipaako ki Daniel an kultura asin relihiyon ninda?

⁷ Kan si Daniel asin an mga kairiba niya darahon bilang bihag, pinurbaran kan mga Babilonyo na ipaako sa sainda an kultura asin relihiyon kan Babilonya paagi sa pagtutukdo sa sainda kan lengguwahe o ‘tataramon kan mga Caldeo.’ Apuwera kaiyan, an opisyal kan palasyo na nagsasanay sa sainda tinawan sinda nin Babilonyong mga pangaran. (Dan. 1:3-7) An itinaong pangaran ki Daniel nanunungod ki Bel, an panginot na diyos kan Babilonya. Kaya posibleng gustong itukdo ni Hading Nabucodonosor ki Daniel na mas halangkaw an diyos kan Babilonya kisa kan Diyos ni Daniel na si Jehova.—Dan. 4:8.

8. Ano an nakatabang ki Daniel na mapagdanay na makusog an saiyang espirituwalidad mantang nakaistar sa ibang nasyon?

⁸ Dawa iinalok sa saiya an masisiram na kakanon kan hadi, “nagdesisyon si Daniel [sa saiyang puso] na dai niya didigtaan an sadiri.” (Dan. 1:8, An Marahay na Bareta Biblia) Huling padagos niyang pinag-adalan an ‘mga kasuratan’ sa nagimatan niyang lengguwahe, napagdanay niyang makusog an saiyang espirituwalidad mantang nakaistar sa ibang nasyon. (Dan. 9:2) Kaya, pakalihis nin mga 70 taon puon kan mag-abot siya sa Babilonya, midbid pa man giraray siya sa saiyang Hebreong pangaran.—Dan. 5:13.

9. Ano an epekto kan Tataramon nin Diyos sa kagsurat kan Salmo 119?

⁹ Kinaipuhan tagalan kan kagsurat kan Salmo 119 an mga pakaraot sa saiya kan mga opisyal kan palasyo. Pero, nakakua siya nin kusog sa Tataramon nin Diyos para mapagdanay niyang napapalain siya sa iba. (Sal. 119:23, 61) Tinugutan niyang mataros na marhay kan mga tataramon nin Diyos an saiyang puso.—Basahon an Salmo 119:11, 46.

PAPAGDANAYON NA MAKUSOG AN SAINDONG ESPIRITUWALIDAD

10, 11. (a) Ano an dapat na magin pasuhan niyato pag nag-aadal kita kan Tataramon nin Diyos? (b) Paano niyato maaabot an pasuhan na iyan? Iilustrar.

¹⁰ Dawa tibaad sibot-sibot kitang marhay sa teokratiko asin sekular na mga responsabilidad niyato, kaipuhan niyato gabos na magtao nin panahon para sa personal na pag-adal asin pampamilyang pagsamba. (Efe. 5:15, 16) Pero, an dapat na magin pasuhan niyato bako para makabasa sana nin dakul na pahina o makapag-andam sana nin mga komento para makapartisipar sa mga pagtiripon. An gusto niyato iyo na masiguradong mataros kan Tataramon nin Diyos an satong puso asin mapakusog kaiyan an satong pagtubod.

¹¹ Tanganing maabot an pasuhan na iyan, dapat kitang magin timbang. Pag kita nag-aadal, bako sanang dapit sa pangangaipo kan iba an iniisip niyato kundi pati man an espirituwal na mga pangangaipo kan satong sadiri. (Fil. 1:9, 10) Dapat niyatong tandaan na pag nag-aandam kita para sa ministeryo, mga pagtiripon, o nin sarong pahayag, tibaad dai man pirming aplikado sa satong sadiri an mga nababasa ta. Bilang ilustrasyon: Dawa ngani kaipuhan namitan nin sarong paraluto an mga putahe bago iyan iserbi, dai siya mabubuhay kun puro pagnamit sana sa mga kakanon an gigibuhon niya. Kun gusto niyang magdanay na makusog an saiyang hawak, kaipuhan niyang magluto nin masustansiyang kakanon para sa sadiri niya. Kaagid kaiyan, dapat niyatong hinguwahon na pakakanon an satong puso nin espirituwal na kakanon na magpapanigo sa satong personal na mga pangangaipo.

12, 13. Taano ta nahiling kan dakul na naglilingkod sa teritoryong iba an lengguwahe na kapaki-pakinabang an regular na pag-adal sa Bibliya sa sadiri nindang lengguwahe?

¹² Nahiling kan dakul na naglilingkod sa teritoryong iba an lengguwahe na kapaki-pakinabang an regular na pag-adal sa Bibliya sa ‘sadiri nindang lengguwahe.’ (Gibo 2:8, NW) Dawa an mga misyonero nakakaaram na tanganing magdanay na makusog sa espirituwal mantang nasa asignasyon ninda sa ibang nasyon, dai sinda dapat magsarig sana sa espirituwal na kakanon na nadadangog ninda sa mga pagtiripon.

¹³ Mga walong taon nang nag-aadal nin lengguwaheng Persian si Alain. Sinabi niya: “Pag nag-aandam ako para sa mga pagtiripon sa lengguwaheng Persian, mas nagpopokus ako sa mismong lengguwahe. Huling sibot na marhay an isip ko sa pagsasanay sa lengguwahe, dai na natataros kan nababasa kong espirituwal na mga bagay an puso ko. Iyan an dahilan kaya regular akong nagtatagama nin panahon para pag-adalan an Bibliya asin an iba pang publikasyon sa sadiri kong lengguwahe.”

TARUSON AN PUSO KAN SAINDONG MGA AKI

14. Ano an dapat na siguraduhon kan mga magurang, asin taano?

¹⁴ Kaipuhan na siguraduhon kan Kristiyanong mga magurang na luway-luway na mataros kan Tataramon nin Diyos an isip asin puso kan saindang mga aki. Pakalihis nin labing tulong taon na paglilingkod sa teritoryong iba an lengguwahe, narisa ni Serge asin kan agom niyang si Muriel na bako nang maugma sa teokratikong mga aktibidad an 17 anyos nindang aking lalaki. Sinabi ni Muriel: “Nauuyam na siyang maghulit sa ibang lengguwahe, mantang kaidto, gustong-gusto niyang maghulit sa nagimatan niyang lengguwaheng French.” Sinabi pa ni Serge: “Kan marealisar ming nakakaulang sa pag-uswag sa espirituwal kan aki mi an kamugtakan mi, nagdesisyon kaming bumalik sa dati ming kongregasyon.”

15. (a) Ano an makakatabang sa mga magurang na magdesisyon kun baga mabalyo sinda sa kongregasyon na may lengguwaheng mas nasasabutan kan saindang mga aki? (b) Ano an isinasadol kan Deuteronomio 6:5-7 sa mga magurang?

¹⁵ Ano an makakatabang sa mga magurang na makapagdesisyon kun baga mabalyo sinda sa kongregasyon na may lengguwaheng mas nasasabutan kan saindang mga aki? Inot, dapat nindang aramon kun baga talagang kaya kan saindang panahon asin kusog na itukdo sa mga aki ninda na mamutan si Jehova mantang kasabay kaiyan, tinutukduan man an mga ini nin ibang lengguwahe. Ikaduwa, tibaad marisa ninda na mayo nang interes an mga aki sa espirituwal na mga aktibidad o sa paglilingkod sa teritoryong iba an lengguwahe. Sa arog kaiyan na mga kamugtakan, puwedeng pag-isipan kan Kristiyanong mga magurang na bumalik sa kongregasyon na may lengguwaheng mas nasasabutan kan saindang mga aki sagkod na mahiling nindang marigon nang naninindugan sa katotoohan an mga ini.—Basahon an Deuteronomio 6:5-7.

16, 17. Paano nagibo kan ibang mga magurang na sanayon sa espirituwal an saindang mga aki mantang naglilingkod sa teritoryong iba an lengguwahe?

¹⁶ Pero, may mga magurang na nakakahanap nin mga paagi para matukduan an saindang mga aki sa nagimatan kan mga ining lengguwahe mantang nag-aatender sa mga pagtiripon sa kongregasyon o grupo na iba an lengguwahe. Si Charles, ama nin tulong aking babayi na mga 9 sagkod 13 anyos an edad, nag-aatender sa sarong grupo na Lingala an lengguwahe. An sabi niya: “Napag-ulayan mi na pag tinutukduan mi sa Bibliya an mga aki o pag pampamilyang pagsamba mi, an sadiri ming lengguwahe an gagamiton mi. Pero nagkakaigwa man kami nin mga pagsasanay saka mga kawat sa lengguwaheng Lingala tanganing manudan ninda an lengguwaheng ini mantang nag-uugma.”

¹⁷ Si Kevin, ama nin duwang aking babayi na singko asin otso anyos, naggibo nin mga paagi para mahipnuan an dai ninda pakasabot sa mga pagtiripon na nasa ibang lengguwahe. Sinabi niya: “Nagpe-personal study kami ni agom kaiba kan mga aki mi gamit an lengguwaheng French, an nagimatan nindang lengguwahe. Ginibo mi man na pasuhan na mag-atender sa mga pagtiripon sa lengguwaheng French nin sarong beses kada bulan, saka pag may mga kumbensiyon na nasa sadiri ming lengguwahe, nagbabakasyon kami para makaatender diyan.”

18. (a) Anong prinsipyo sa Roma 15:1, 2 an makakatabang sa saindo para maaraman an pinakamarahay para sa saindong mga aki? (b) Anong mga suhestiyon an itinao kan ibang mga magurang? (Hilingon an nota.)

¹⁸ Siyempre, an lambang pamilya an madesisyon kun ano an pinakamarahay para sa espirituwalidad kan saindang mga aki.^[2] (Gal. 6:5) Sinabi ni Muriel, na nasambitan sa inutan, na kinaipuhan niya asin kan agom niyang si Serge na isakripisyo an mga kagustuhan nindang maglingkod sa teritoryong iba an lengguwahe para sa kapakanan kan espirituwalidad kan saindang aki. (Basahon an Roma 15:1, 2.) Kumbinsido ngunyan si Serge na tama an nagin desisyon ninda. Sinabi niya: “Puon kan magbalik kami sa kongregasyon na nasa lengguwaheng French, nag-uswag an espirituwalidad kan aki mi dangan nabawtismuhan siya. Regular payunir na siya ngunyan. Pinag-iisipan pa ngani niyang maglingkod giraray sa grupong iba an lengguwahe!”

PABAYAAN NA MATAROS KAN TATARAMON NIN DIYOS AN SAINDONG PUSO

19, 20. Paano niyato maipapahiling na iniingatan ta sa satong puso an Tataramon nin Diyos?

¹⁹ Huli sa pagkamuot ni Jehova, pinangyari niyang makua sa ginatos na lengguwahe an saiyang Tataramon, an Bibliya, tanganing ‘an gabos na klase nin tawo makaabot sa tamang kaaraman mapadapit sa katotoohan.’ (1 Tim. 2:4, NW) Aram niyang mas mapapaniguan nin mga tawo an saindang espirituwal na mga pangangaipo kun nababasa ninda an Saiyang mga kaisipan sa lengguwahe kan saindang puso.

²⁰ Ano man an kamugtakan ta, dapat na magin determinado kitang pakakanon an satong puso nin matagas na espirituwal na kakanon. Kun regular niyatong pag-aadalan an Kasuratan sa lengguwahe kan satong puso, mapapagdanay tang makusog an espirituwalidad niyato saka kan satong pamilya asin maipapahiling niyato na talagang iniingatan ta sa satong puso an Tataramon nin Diyos.—Sal. 119:11.