Ano an Pinakamagayon na Regalo sa Gabos?

“An lambang marahay na balaog asin an lambang pinakamagayon na regalo gikan sa itaas, na minababa hali sa Ama kan mga liwanag sa langit.” (Santiago 1:17) Siyempre, an tekstong iyan nanunungod sa pagigin bukas-palad kan satong Ama sa langit, an Diyos na Jehova. Pero, sa gabos na regalong itinao nin Diyos sa mga tawo, igwa nin saro na nangungurog sa gabos. Ano iyan? Sinasabi sa sato kan bantog na mga tataramon ni Jesus sa Juan 3:16: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.”

An pagtao nin Diyos kan saiyang bugtong na Aki iyo nanggad an pinakamahalagang regalo na puwedeng akuon nin siisay man sa sato, huling paagi kaiyan puwede kitang mapatalingkas sa pagkauripon sa kasalan, paggurang, asin kagadanan. (Salmo 51:5; Juan 8:34) Ano man an pagmamaigot ta, dai niyato kayang makatalingkas sa pagkauripon na iyan. Pero, huling an Diyos namuot na gayo sa sato, itinao niya an kinakaipuhan tanganing mapatalingkas kita diyan. Paagi sa pagtao kan saiyang bugtong na Aki, si Jesu-Cristo, bilang pantubos, tinawan kan Diyos na Jehova an masinunod na mga tawo nin paglaom na buhay na daing katapusan. Pero ano talaga an pantubos? Taano ta kaipuhan iyan? Asin paano kita makikinabang diyan?

An pantubos iyo an halaga na ibinabayad para mabalukat an sarong bagay na naiwara o para makabutas an saro sa pagkauripon. Ipinapaliwanag kan Bibliya na an satong inot na mga magurang, si Adan asin Eva, linalang na daing kasalan, na may paglaom na mabuhay sagkod lamang sa paraisong daga kaiba kan magigin mga aki ninda. (Genesis 1:26-28) Makamumundo, naiwara ninda iyan gabos huli ta sinuway ninda an Diyos—kaya nagin makasalan sinda. Ano an nagin resulta? Sinasabi kan Bibliya: “Paagi sa sarong tawo an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.” (Roma 5:12) Imbes na perpektong buhay, an ipinamana ni Adan sa saiyang mga aki iyo an kasalan asin an resulta kaiyan na kagadanan.

Kun mapadapit sa pantubos, dapat na kapareho kan halaga kan nawara an halagang ibabayad. Kan tuyong suwayon ni Adan an Diyos, nagkasala siya, kaya nawara an sarong perpektong buhay nin tawo—an buhay ni Adan. Uyon sa Bibliya, iyan an dahilan kaya nagin uripon sa kasalan asin kagadanan an gabos na aki ni Adan. Huli kaini, kaipuhan nin sarong perpektong buhay nin tawo—an buhay ni Jesus—na isasakripisyo para magin posible an pagkatalingkas sa pagkauripon. (Roma 5:19; Efeso 1:7) Huli nanggad ta mamumuton na itinao nin Diyos an pantubos na ini kaya nagkaigwa nin paglaom an mga tawo na makamit an naiwara ni Adan asin Eva—an buhay na daing katapusan sa sarong paraisong daga.—Kapahayagan 21:3-5.

Kun iisip-isipon ta an mga pakinabang na maitatao kaini, daing duda na an regalo nin Diyos na pantubos, na nagpagin posible sa buhay na daing katapusan, an pinakamahalagang regalo. Tanganing mapahalagahan kun gurano ‘kagayon kan regalong’ iyan, aramon ta kun paano kaiyan napapaniguan, sa nakakalabing marhay na paagi, an mga bagay na nakakatabang sa sato tanganing magin nakakaugma an pagtao nin regalo, arog kan tinukar sa nainot na artikulo.

Naitatao kun ano an gusto niyato. Gustong-gusto niyatong mga tawo na padagos na mabuhay. (Parahulit 3:11) Kun sa sadiri ta sana, mayo kitang magigibo para mangyari iyan, pero huli sa pantubos nagin posible iyan para sa sato. Sinasabi kan Bibliya: “Huli ta an bayad nin kasalan iyo an kagadanan, alagad an regalo nin Diyos iyo an buhay na daing katapusan paagi ki Cristo Jesus na satuyang Kagurangnan.”—Roma 6:23.

Naitatao kun ano an kaipuhan niyato. Dai kaya kan mga tawo na maitao an pantubos. Sinasabi kan Bibliya: “Huli ta an kabayadan kan buhay nin tawo dakulang gayo, asin an ibabayad niya dai nanggad magkakanigo.” (Salmo 49:8, An Marahay na Bareta Biblia) Kaya, kaipuhan tang marhay an tabang nin Diyos para makatalingkas sa pagkauripon sa kasalan asin kagadanan. Pero “paagi sa nagpapatalingkas na pantubos na ibinayad ni Cristo Jesus,” itinao nin Diyos kun ano talaga an kaipuhan.—Roma 3:23, 24.

Itinao sa tamang panahon. Sinasabi sa sato kan Bibliya: “Si Cristo nagadan para sa sato kan kita mga parakasala pa.” (Roma 5:8) Huling itinao an pantubos “kan kita mga parakasala pa,” nagpapatunay iyan na talagang namumutan kitang marhay nin Diyos sa ibong kan pagigin makasalan niyato. Asin hinahalat-halat niyato an dakul na pakinabang na itatao kaiyan, dawa ngani kaipuhan tang tagalan nguna an mga epekto kan kasalan.

Nahayag an marahayon asin bakong makasadiring motibo. Sinasabi kan Bibliya kun ano an nagpahiro sa Diyos na itao an saiyang Aki bilang pantubos: “Kun manungod sa sato, an pagkamuot nin Diyos nahayag sa arog kaining paagi: isinugo nin Diyos sa kinaban an Saiyang bugtong na Aki tanganing magkamit kita nin buhay paagi sa saiya. Iyo, nahayag an siring na pagkamuot bako dahil namutan niyato an Diyos kundi dahil namutan niya kita.”—1 Juan 4:9, 10.

Paano mo maipapahiling na pinapahalagahan mo an pinakamahalagang regalo? Tandaan na idinuduon kan mga tataramon ni Jesus sa Juan 3:16 na idto sanang “nagtutubod sa saiya” an maliligtas. Sigun sa Bibliya, an pagtubod iyo “an masarig na kumpiyansa na mangyayari an piglalauman.” (Hebreo 11:1) Tanganing magkaigwa kan kumpiyansang iyan, kaipuhan an tamang kaaraman. Iyan an dahilan kaya dinadagka mi kamo na magtao nin panahon na mamidbid an Diyos na Jehova, an Kagtao kan ‘pinakamagayon na regalong’ ini, asin aramon kun ano an dapat mong gibuhon tanganing kamtan an buhay na daing katapusan na pinagin posible kan atang na pantubos ni Jesus.

Manunudan mo an gabos na ini paagi sa pagsiyasat sa mga impormasyon na basado sa Kasuratan na mahihiling online sa www.jw.org/bcl. Mauugma an mga Saksi ni Jehova na tabangan ka. Sigurado kami na mantang nakakanuod ka asin nakikinabang sa pinakamagayon na regalong ini, mapapahiro kang magsabi: “Salamat sa Diyos paagi ki Jesu-Cristo na satuyang Kagurangnan!”—Roma 7:25.