Gikan sa Buot na Iprinesentar an Saindang Sadiri—Sa Turkey

NAGHINGUWANG marhay an mga Kristiyano kan inot na siglo para maipaabot sa pinakadakul na tawo an ‘maugmang bareta kan Kahadian.’ (Mat. 24:14) May mga nagbiyahe pa ngani pasiring sa ibang nasyon. Halimbawa, nagduman si apostol Pablo sa rehiyon kun sain yaon ngunyan an nasyon nin Turkey dangan naghulit sa dakul na lugar diyan kaidtong nagbibiyahe siya bilang misyonero.a Pakalihis nin mga 2,000 na taon, kan 2014, may espesyal na kampanya giraray nin paghuhulit na ginibo sa Turkey. Taano ta inorganisar an kampanyang iyan? Sairisay an mga nagpartisipar diyan?

“ANONG IGWA?”

Labing 2,800 an parahayag sa Turkey, pero 79 milyones an populasyon kan nasyon na iyan. Nangangahulugan iyan na haros 1 sa kada 28,000 na tawo an ratio kan parahayag sa populasyon sa Turkey. Kaya talagang kakadikit sana sa mga nakaistar diyan an napapaabutan kan mga parahayag. Katuyuhan kan espesyal na kampanya nin paghuhulit na mapaabutan an pinakadakul na tawo sa halipot na panahon. Mga 550 tugang na tataong mag-Turkish hali sa ibang nasyon an nagpa-Turkey tanganing maghulit kaiba kan mga parahayag duman sa panahon kan kampanya. Ano an nahaman ninda?

Nagkaigwa nin lakop na pagpapatotoo. Sarong kongregasyon sa Istanbul an nagsurat: “Pag nahihiling kami kan mga tawo, naghahapot sinda: ‘May espesyal na kumbensiyon kamo digdi? Dawa kaya sain may mga Saksi ni Jehova!’” Sarong kongregasyon man sa siyudad nin Izmir an nagsurat: “Sarong lalaki na nagtatrabaho sa halatan nin mga taxi (taxi stand) an nagdulok sa sarong elder dangan naghapot, ‘Anong igwa? Garo mas aktibo kamo ngunyan?’” Iyo, narisa kan mga tawo an kampanya.

Nagustuhan talaga kan mga nagpartisipar hali sa ibang nasyon an paghuhulit. Si Steffen, na taga Denmark, nagsabi: “Aroaldaw, nakakapagpatotoo ako sa mga tawo na dai pa lamang nadangog an dapit ki Jehova. Namati ko na talagang ipinapamidbid ko an pangaran ni Jehova.” Si Jean-David na taga Pransia nagsurat: “Pirang oras kaming naghulit sa saro sanang kalye. Maugmahon talaga idto! An kadaklan mayo pang ideya dapit sa Mga Saksi ni Jehova. Haros kada harong na madumanan mi, nakakapuon kami nin pag-uulay, nakakapahiling nin video, saka nakakapagwalat nin literatura.”

An 550 nagpartisipar nakapag-alok nin haros 60,000 na literatura sa laog sana nin duwang semana! Nagresulta talaga sa lakop na pagpapatotoo an kampanya.

Nadagdagan an kaigutan sa ministeryo. Nagkaigwa nin positibong epekto sa mga tugang sa Turkey an espesyal na kampanya. Dakul an naengganyar na maglaog sa bilog na panahon na paglilingkod. Sa katunayan, 12 bulan pagkatapos kan kampanya, nagdakul nin 24 porsiyento an mga regular payunir sa Turkey.

Sinabi man kan mga nagpartisipar hali sa ibang nasyon an nagin positibong epekto kan kampanya sa ministeryo ninda dawa kaidtong nakapuli na sinda. Si Şirin, na sarong sister na taga Alemania, nagsurat: “Dai nag-aalangan na magpatotoo nin impormal an mga tugang sa Turkey. Masusupgon talaga ako pag-abot sa pagpapatotoo nin impormal. Pero huli sa espesyal na kampanya, sa marahay na halimbawa kan mga tugang duman, asin sa dakul na pamibi, nagibo ko an dai ko nagigibo dati. Nagpapatotoo saka nag-aalok na ngani ako nin mga tract sa subway! Bako na akong arog kaidto kamasusupgon.”

“May mga nanudan ako na magagamit ko sa sakuyang ministeryo,” an sabi ni Johannes na taga Alemania. “Gusto talaga kan mga tugang sa Turkey na maipaabot an katotoohan sa pinakadakul na tawo. Nagpapatotoo sinda kada may oportunidad. Pagbalik ko sa Alemania iyan man an gigibuhon ko. Asin ngunyan mas dakul na talaga an nahuhulitan ko.”

“Dakula talaga an nagin epekto kan kampanyang ini sa ministeryo ko. Nakatabang ini sako na magin mas makusog an buot saka mas magtiwala ki Jehova,” an sabi ni Zeynep, na taga Pransia.

Nagin mas harani sa kada saro an mga parahayag. Dai malilingawan kan gabos an ipinahiling na pagkamuot asin pagkasararo kan mga tugang hali sa manlain-lain na nasyon. “‘Nanamítan’ mi an pagkamapag-istimar kan mga tugang,” an sabi ni Jean-David, na sinambit kasubago. Sinabi pa niya: “Inako ninda kami bilang mga amigo saka mga kapamilya ninda. Binuksan ninda an harong ninda para samo. Aram kong yaon kita sa sarong internasyonal na kasararuan nin magturugang; dakul na beses ko nang nabasa iyan sa mga publikasyon ta. Pero ngunyan, naeksperyensiyahan ko mismo iyan. Mas lalo kong ikinaugma na parte ako kan banwaan ni Jehova, saka nagpapasalamat ako saiya sa pambihirang pribilehiyong ini.”

“Taga Denmark man kita, taga Pransia, taga Alemania, o taga Turkey, gabos kita sarong pamilya. Garo baga pinara nin Diyos an mga sagkudan kan mga nasyon gamit an sarong dakulang pamárà,” an sabi ni Claire na taga Pransia.

Ini man an sabi ni Stéphanie na taga Pransia: “Nanudan mi sa espesyal na kampanya na nagkakasararo kita bakong huli sa kultura o lengguwahe kundi huli sa satong pagkamuot ki Jehova.”

NAGKAIGWA NIN PANGHALUYAN NA MGA PAKINABANG

Dakul sa mga nagpartisipar hali sa ibang nasyon an nagpuon na mag-isip na magbalyo sa Turkey tanganing tumabang sa dakulaon pang gibuhon diyan. Medyo dakul na an nagbalyo. Asin pinapasalamatan na marhay an mga need-greater na ini.

Halimbawa, sa sarong lugar, igwa nin sarong napapasuway na grupo na may 25 sanang parahayag. Saro sana an elder diyan sa laog nin dakul na taon. Kaya isipa na sana an kaugmahan kan mga parahayag kan magbalyo sa lugar ninda kan 2015 an anom na need-greater haling Alemania asin Netherlands tanganing tabangan sinda!

PAGLILINGKOD NA NASA PRONTERA

Ano an masasabi kan mga need-greater na dai pa sana nahahaloy na magbalyo sa Turkey dapit sa buhay ninda duman? Totoo, masakit kun minsan, pero nakakaugmang marhay an buhay nin sarong need-greater. Pag-isipan an sinabi nin pira sa sainda:

“Huling dikit sana an mga pagsadiri ko, buwelo ako, kaya mas nakakapagpokus ako sa pinakamahalagang mga bagay,” an sabi ni Federico, may agom na brother haling Espanya na labi nang 40 anyos. Irerekomendar daw niya an arog kaining klase nin paglilingkod? “Siyempre, iyo!” an sabi niya. “Kun nagbalyo ka sa ibang nasyon tanganing tumabang sa mga tawo na mamidbid si Jehova, an totoo, ipinagkakatiwala mo sa saiya an saimong sadiri. Talagang mas lalo mong mamamatian an pag-ataman ni Jehova.”

“Nagtatao samo nin dakulaon na kaugmahan an paglilingkod na nasa prontera, sabi ngani, asin an pagpaabot kan katotoohan sa dakulon na tawo na dai pa lamang nadangog iyan,” an sabi ni Rudy, sarong may agom na brother haling Netherlands asin madali nang mag-60 anyos. “Nakakagaya-gaya talaga na mahiling an kaugmahan kan mga tawo pag inaako ninda an katotoohan.”

Si Sascha, na sarong may agom na brother na labi nang 40 anyos asin haling Alemania, nagsabi: “Pag naghuhulit ako, pirmi akong may mga nakakaulay na dai pa lamang nadangog an katotoohan. An pagtao nin oportunidad sa sainda na mamidbid si Jehova nagtatao talaga sa sako nin dakulaon na kaugmahan.”

Ini an sabi ni Atsuko, may agom na sister haling Hapon na mga 35 anyos na: “Kaidto, gusto kong mag-abot na tulos an Armagedon. Pero pagkabalyo ko sa Turkey, nagpapasalamat ako ki Jehova ta padagos pa siyang nagpapahiling nin pasensiya. Mantang mas nahihiling ko kun paano minamaniobra ni Jehova an mga bagay-bagay, mas lalo kong gustong maparani sa saiya.”

Si Alisa, na sarong sister na labi pa sanang 30 anyos haling Rusia, nagsabi: “An paglilingkod ki Jehova sa arog kaining klase nin ministeryo nakatabang sako na manamitan an gabos niyang karahayan.” (Sal. 34:8) Sinabi pa niya: “Si Jehova bako ko sanang Ama kundi haraning Amigo ko man, na mas namimidbid ko pag napapaatubang ako sa manlain-lain na sitwasyon. An buhay ko pano nin nakakaugmang mga pangyayari, eksperyensiya, saka abundang mga bendisyon!”

“PAGMASDAN AN KAUMAHAN”

Huli sa espesyal na kampanya nin paghuhulit sa Turkey, napaabutan kan maugmang bareta an mas dakul pang tawo. Pero, dakulon pang lugar an dai pa nahuhulitan. An mga need-greater na nagbalyo sa Turkey aroaldaw na may mga nakakaulay na dai pa lamang nadangog an dapit ki Jehova. Gusto mo daw maglingkod sa arog kaiyan na teritoryo? Kun iyo, dinadagka mi ika: “Hilingon [mo] asin pagmasdan an kaumahan, hirinog na an tipasi asin puwede nang anihon.” (Juan 4:35) Nasa kamugtakan ka daw na maglingkod sa sarong parte kan kinaban na an kaumahan “hirinog na an tipasi asin puwede nang anihon”? Kun iyo, gumibo na ngunyan nin praktikal na mga lakdang tanganing maabot an pasuhan na iyan. Sarong bagay an sigurado: Kun lubos kang nakikikabtang sa pagpapalakop kan maugmang bareta “sa pinakaharayong parte kan daga” magkakamit ka nin dakul asin daing kapantay na mga bendisyon!—Gibo 1:8.