Mga Propesiyang Nautob Na

Pinag-ulayan ta kasubago an pangyayari dapit sa kun paano nadaya si Criso kan orakulo kan Delfi, na nagresulta sa pagkadaog niya laban sa hadi kan Persia. Sa ibong na lado, an Bibliya nagtatao nin pambihirang propesiya may koneksiyon sa hadi kan Persia na nautob sagkod sa kasadit-saditing detalye.

Mga 200 na taon bago pa man ipangaki an hadi, an Hebreong propeta na si Isaias sinambit an pangaran na Ciro asin ilinadawan kun paano kaini sasakupon an makapangyarihan na siyudad kan Babilonya.

Isaias 44:24, 27, 28: “Ini an sabi ni Jehova, . . . ‘an Saro na nagsasabi sa hararom na katubigan, “Umalisngaw ka, asin papamarahon ko an gabos na salog mo”; an Saro na nagsasabi manungod ki Ciro, “Siya an pastor ko, asin lubos niyang uutubon an gabos na kabutan ko”; an Saro na nagsasabi manungod sa Jerusalem, “Itutugdok giraray siya,” asin manungod sa templo, “Ilalatag an pundasyon mo.”’”

Sigun sa Griegong historyador na si Herodutos, pinasuki kan hukbo ni Ciro an tubig kan Salog nin Eufrates, na nagbubulos pasiring sa siyudad nin Babilonya. Paagi sa estratehiya ni Ciro, nakaagi an mga hukbo niya sa hababaw na salog kaya nakalaog sinda sa siyudad. Pagkatapos na sakupon an siyudad, pinatalingkas ni Ciro an mga Judiong bihag sa Babilonya asin tinugutan sindang makabalik asin itugdok liwat an Jerusalem, na mga 70 taon nang gaba.

Isaias 45:1: “Ini an sabi ni Jehova sa saiyang linahidan, ki Ciro, na an tuong kamot sakong kinaputan tanganing daugon an mga nasyon sa saiyang atubangan, tanganing dis-armahan an mga hadi, tanganing bukasan sa atubangan niya an mga pintuan na duwa an pinto, tanganing an mga trangkahan dai maisara.”

Nakalaog an mga Persiano paagi sa dakulaon na dobleng mga pinto kan lanob kan siyudad, na napabayaan na bukas. Kun aram kan mga Babilonyo an pinaplano ni Ciro, sinarahan kutana ninda an gabos na trangkahan na nakabukas harani sa salog. Pero arog kan nangyari, mayo nin kalaban-laban an siyudad.

An pambihirang propesiyang ini saro sana sa kadakul-dakul na propesiya sa Bibliya na eksaktong nautob.a Bakong arog kan mga prediksiyon nin mga tawo, na parating konektado sa saindang mga palsong diyos, an mga propesiya sa Bibliya gikan mismo sa Saro na nagsabing: “Puon sa kapinunan patiinot ko nang sinasabi an mangyayari, asin puon kan suanoy na panahon patiinot ko nang sinasabi an mga bagay na dai pa nagigibo.”—Isaias 46:10.

An tunay na Diyos sana, na an pangaran Jehova, an may deretsong magsabi kaiyan. An pangaran na iyan malinaw na nangangahulugan na “Pinangyayari Niyang Magin.” Nanunungod iyan sa kakayahan niyang maaraman asin maimpluwensiyahan an mga mangyayari sa ngapit na magin kauyon sa saiyang kabutan. Sinisigurado kaiyan sa sato na talagang uutubon niya an gabos niyang ipinanuga.

MGA PROPESIYANG NAUUTOB NA NGUNYAN

Gusto mong maaraman an mga propesiya sa Bibliya na nagsasabi dapit sa panahon niyato ngunyan? Mga 2,000 na taon na an nakaagi, ihinula kan Bibliya na an “delikado asin masakit na mga panahon” maabot “sa huring mga aldaw.” Huring mga aldaw kan ano? Bako kan daga o kan katawuhan, kundi kan iriwal, pang-aapi, asin pagsakit na haluyon nang namamatian kan mga tawo. Pag-ulayan niyato an pira sa mga propesiya na nagpapatunay na yaon na kita “sa huring mga aldaw.”

2 Timoteo 3:1-5: “Sa huring mga aldaw . . . , an mga tawo magigin interesado na sana sa sadiri nindang kapakanan, mamumuton sa kuwarta, mahambog, mapalangkaw, paralanghad, masinuway sa mga magurang, dai tataong magpasalamat, bakong maimbod, mayong natural na kapadangatan, habo nin ano man na kasunduan, parapakaraot, daing pagpupugol sa sadiri, maringis, daing pagkamuot sa karahayan, traydor, matagas an payo, orgulyoso, mahilig magpasiram-siram imbes na magpahiling nin pagkamuot sa Diyos, na nagsasagin man ngayang maki-Diyos pero dai man talaga iyan nahihiling sa buhay ninda.”

Bako daw na mauyon ka na talagang hiling-hiling an mga ugaling iyan sa mga tawo ngunyan? Naririsa mo daw na napapalibutan na kita nin mga tawong makasadiri, mamumuton sa kuwarta, asin orgulyoso? Bako daw na mas gusto kan mga tawo na sinda an nasusunod saka habo nindang magdangog sa iba? Siguradong narisa mo na dakulon an masinuway sa mga magurang asin an kadaklan na tawo mas gustong magpasiram-siram kisa maglingkod sa Diyos. Asin naggagrabe pa an mga kamugtakan sa paglihis nin mga aldaw.

Mateo 24:6, 7: “Makakadangog kamo nin ribok nin mga giyera asin mga bareta manungod sa mga giyera. . . . An nasyon makikilaban sa nasyon asin an kahadian makikilaban sa kahadian.”

Kinakarkulo nin nagkapira na an bilang kan mga nagadan sa giyera asin mga engkuwentro puon kan 1914 uminabot nin haros labing 100 na milyon, na an bilang luminampas pa sa populasyon kan dakul na nasyon. Imahinara an luha, kamunduan, asin pagsakit na resulta kan arog kaiyan kadakulang bilang nin mga nagadan. Nakanuod na daw an mga nasyon asin ipinundo na an pakikigiyera?

Mateo 24:7: “Magkakaigwa nin . . . kakulangan nin kakanon.”

Sinabi kan World Food Programme: “Sa panahon ngunyan na nakakaprodusir kita nin igong kakanon para sa gabos, 815 milyon katawo—saro sa kada siyam na tawo—an nagtuturog pa man giraray na gutom kada banggi. Urog pa diyan—saro sa kada tulong tawo—an biktima nin malnutrisyon.” Kinakarkulo na kada taon, mga tulong milyon na aki an nagagadan huli sa gutom.

Lucas 21:11: “Magkakaigwa nin makusog na mga linog.”

Mga 50,000 na linog kada taon an may kusog na puwedeng mamati kan mga tawo. Mga 100 an kayang makaraot nin mga edipisyo, asin sarong makusugon na linog an nangyayari kada taon. Sigun sa sarong pagkarkulo, 471,000 katawo an nagadan huli sa linog puon kan 1975 sagkod 2000.

Mateo 24:14: “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.”

An Mga Saksi ni Jehova, na may bilang na labing walong milyon, padagos na naghuhulit asin nagpapatotoo kan maugmang bareta kan Kahadian nin Diyos sa bilog na kinaban sa mga 240 kadagaan. Ipinapahayag ninda an maugmang bareta sa mahiwas na mga siyudad, hararayong banwaan, sa mga kadlagan, asin sa kabukidan. An propesiya nagsasabi na pag natapos na an gibuhon na ini uyon sa kabutan nin Diyos, “maabot an katapusan.” Ano an buot sabihon kaiyan? Mangangahulugan iyan nin katapusan kan pamamahala nin tawo asin kapinunan kan pamamahala kan Kahadian nin Diyos. Anong mga panuga an mauutob pag namahala na an Kahadian nin Diyos? Aramon iyan sa sunod na artikulo.