Kun Paano Magigin Mas Kapaki-pakinabang Asin Nakakaugma an Pag-adal Mo nin Bibliya

Si Josue na nagbabasa kan Katugunan; nagaba an mga lanob kan Jerico pero nagdanay na nakatindog an harong ni Rahab; si Josue na iiniitaas an mga kamot mantang namimibi

TINAWAN nin masakit na asignasyon si Josue. Kaipuhan niyang panginutan an nasyon nin Israel pasiring sa Dagang Panuga dawa may dakulang mga ulang. Pero siniyerto sa saiya ni Jehova na magigin mapanggana siya, asin pinakusog siya: ‘Kusugi an buot mo asin magpakakusog ka. Sunudon mo an sakong Tugon. Basahon mo iyan aldaw asin banggi, tanganing masunod mo nin maingat an gabos na nakasurat diyan. Paagi kaiyan magigin kang mapanggana asin mahiro kang may kadunungan.’—Jos. 1:7, 8, NW.

Sa “delikado asin masakit na mga panahon” na ini, napapaatubang man kita sa darakulang pagbalo. (2 Tim. 3:1) Arog ni Josue, puwede man kitang magin mapanggana kun susundon ta an sadol na itinao ni Jehova sa saiya. Puwede niyatong regular na basahon an Bibliya asin maingat na iaplikar an mga prinsipyo diyan para matabangan kita sa mga pagbalong inaatubang ta.

Pero, dakul sa sato an maadmitir na bako kitang madaling makanuod saka bakong madali para sa sato an pag-adal. Alagad huling mahalagang marhay an pag-adal nin Bibliya, repasuhon ta an kahon na “Purbaran an mga Suhestiyon na Ini” para magkaigwa kita nin ideya kun paano magigin mas kapaki-pakinabang asin nakakaugma an pag-adal mo nin Bibliya.

“Giyahan mo ako sa dalan kan saimong mga tugon,” an kanta kan salmista, “huling iyan an ikinakaugma ko.” (Sal. 119:35, NW) Makakakua ka nin dakulang kaugmahan sa pag-adal kan Tataramon nin Diyos. Kadakul nin kapaki-pakinabang na espirituwal na kayamanan an naghahalat na kutkuton mo.

Bako ka man arog ni Josue na kaipuhan na panginutan an sarong nasyon, pero may mga kadipisilan ka man na aatubangon. Kaya, arog ni Josue, pag-adalan asin iaplikar an mga isinurat para sa saimong kapakinabangan. Kun gigibuhon mo iyan, magigin mapanggana ka man asin madunong.

PURBARAN AN MGA SUHESTIYON NA INI

Mamibi nguna bago mag-adal. An Bibliya igwa nin mga impormasyon mapadapit sa makakamhan sa gabos na Diyos na ipinasurat niya para sa saimong kapakinabangan. Kaya pag nagbabasa ka nin Bibliya, hagadon an tabang niya na masabutan iyan, na matandaan iyan, asin na maiaplikar iyan sa saimong buhay.—Esd. 7:10.
Haputon an sadiri mantang binabasa mo an Bibliya o an mga publikasyon na basado sa Bibliya: ‘Ano an sinasabi kaini sa sako dapit ki Jehova? Paano ini konektado sa kabilugan na mensahe kan saiyang Tataramon? Paano ko magagamit an mga impormasyon na ini para tabangan an iba?’
Hurop-hurupon an pinag-aadalan mo. Pumundo sa pagbasa, dangan mag-isip: ‘Ano an ipinapamati sako kan nabasa ko? Taano ta arog kaiyan an epekto sa sako? Paano iyan konektado sa nakaagi kong mga eksperyensiya, sa sitwasyon ko ngunyan, o sa mga posible pang mangyari? Paano ko maiaaplikar sa sakong buhay an mga prinsipyo asin mga sadol na ini sa Bibliya?’ (Job 23:5; Sal. 49:3) Hilingon kun ikakapaliwanag mo kun taano ta sinasadol ni Jehova an saiyang banwaan na likayan an partikular na mga gibo o kun ano an posibleng magin konsekwensiya nin sarong paggawi.—Deut. 32:28, 29.
Gamiton an saimong imahinasyon pag nagbabasa nin deskriptibong mga teksto sa Bibliya. Halimbawa, imahinaron an eksena mantang ipinapabakal si Jose kan mga tugang niya sa mga Ismaelita. (Gen. 37:18-28) Ano an nahihiling mo, nadadangog, asin napaparong? Imahinaron na ika an karakter. Ano an iniisip niya asin namamatian? An mga impormasyon na iyan makakatabang sa saimo na magin mas buhay na buhay asin makahulugan an saimong pag-adal.
Gamiton an mga pantabang sa pag-adal na itinatao kan organisasyon tanganing magin mas kapaki-pakinabang an saimong pag-research. Magin pamilyar sa mga pantabang na igwa sa saindong lengguwahe, online man o nakaimprenta. Dai mag-alangan na magpatabang sa iba kun paano iyan magagamit nin lubos. Halimbawa, an Watch Tower Publications Index o an Giya sa Pag-research Para sa Mga Saksi ni Jehova makakatabang sa saimo na mahanap an mga impormasyon dapit sa dakul na tema asin tanganing makahanap nin mga paliwanag mapadapit sa dakul na teksto sa Bibliya. Gamiton an mga apendise kan New World Translation of the Holy Scriptures kun igwa kaiyan sa lengguwaheng nasasabutan mo o an buklet na Giya sa Pag-adal sa Tataramon nin Diyos. Igwa iyan nin kapaki-pakinabang na mga impormasyon dapit sa heograpiya, kronolohiya, mga timbang saka pansukol, asin iba pa.
Sumaryuhon an mahalagang mga punto sa materyal na pinag-adalan mo pa sana para matandaan an mga iyan. Mas marahay ngani kun sasabihon mo iyan sa iba. Igwa daw diyan nin magagamit mo sa ministeryo? Paagi kaini, matatandaan mo an panginot na mga punto saka magagamit mo pa an mga napag-adalan mo tanganing makinabang an iba.