Paano Ka Magkakaigwa nin Mas Marahay na Buhay?

AN BUHAY ta ngunyan iba man sa talagang katuyuhan nin Diyos. An daga pano kuta dapat nin mga tawo na may paggalang sa soberaniya kan Kaglalang, nag-aako kan saiyang paggiya, asin nag-aarog sa saiyang mamumuton na personalidad. Maugma dapat sindang nakikipagtabangan sa lambang saro mantang nagpapamilya, nagdidiskubre nin bagong mga bagay, asin ginigibong paraiso an bilog na daga.

NANUNUGA AN DIYOS NA BABAGUHON NIYA AN BUHAY SA DAGA AROG KAN KATUYUHAN NIYA DIGDI

• ‘Pinapapundo niya an mga giyera sa bilog na kinaban.’—Salmo 46:9, An Marahay na Bareta Biblia.

• “Uminabot an itinalaan na panahon . . . tanganing ipahamak idtong mga nagpapahamak kan daga.”—Kapahayagan 11:18.

• ‘Mayong nag-iirok diyan na masabi: “May hilang ako.”’—Isaias 33:24, An Banal na Biblia (Paulines).

• “An gibo kan [saindang] sadiring kamot papakinabangan kan sakong mga pinili.”—Isaias 65:22, An Banal na Biblia (Paulines).

Paano mauutob an mga propesiyang ini? Ninombrahan nin Diyos an saiyang Aki, si Jesus, bilang Hadi kan perpektong gobyerno sa langit na mamamahala sa daga. Inaapod iyan kan Bibliya na Kahadian nin Diyos. (Daniel 2:44) An Bibliya nagsasabi dapit ki Jesus: ‘Itatao sa saiya kan Diyos an trono asin mamamahala siya bilang Hadi.’—Lucas 1:32, 33.

Kan nasa daga pa si Jesus, naggibo siya nin dakul na milagro para ipahiling na bilang Tagapamahala gigibuhon niyang mas marahay an buhay kan mga tawo kumpara sa buhay ta ngunyan.

IPINAHILING NI JESUS AN MARAHAY NA MGA BAGAY NA GIGIBUHON NIYA SA MASINUNOD NA KATAWUHAN

• Pinaumayan niya an manlain-lain na klase nin hilang, na nagpapahiling kun paano niya hahalion an mga kamatian nin tawo.—Mateo 9:35.

• Pinakalma niya an dagat, na nagpapahiling kun paano niya poprotektaran an mga tawo paagi sa pagkontrol sa mga puwersa nin naturalesa.—Marcos 4:36-39.

• Pinakakan niya an rinibong tawo, na nagpapahiling na itatao niya an mga pangangaipo nin mga tawo.—Marcos 6:41-44.

• Ginibo niyang arak an tubig sa sarong handaan sa kasal, patunay na tatabangan niya an mga tawo na magin maugma sa buhay.—Juan 2:7-11.

Paano ka magkakaigwa kan klase nin buhay na itatao nin Diyos sa mga tawong namumuot sa saiya? Igwa nin “dalan” na dapat mong lakawan. Ilinaladawan iyan kan Bibliya bilang “an dalan pasiring sa buhay, asin dikit an nakakakua kaiyan.”—Mateo 7:14.

HANAPON AN DALAN PASIRING SA MAS MARAHAY NA BUHAY

Ano an dalan pasiring sa buhay? Sinabi nin Diyos: ‘Ako, si Jehova, na saimong Diyos, na nagtutukdo saimo [para] makinabang ka, na nagpapalakaw sa saimo sa dalan na [dapat mong lakawan].’ (Isaias 48:17) An paglakaw sa dalan na ini an pinakamarahay na paagi nin pamumuhay.

Sinabi ni Jesus: “Ako an dalan asin an katotoohan asin an buhay.” (Juan 14:6) Paagi sa pagtubod sa mga katotoohan na itinukdo ni Jesus asin paagi sa pag-arog sa ipinahiling niyang halimbawa, mapaparani kita sa Diyos asin magigin mas marahay an satong buhay.

Paano mo mahahanap an dalan pasiring sa buhay? Igwa nin dakul na relihiyon, pero nagpatanid si Jesus: “Bakong gabos na nagsasabi sa sako, ‘Kagurangnan, Kagurangnan,’ makakalaog sa Kahadian kan kalangitan, kundi an naggigibo sana kan kabutan kan sakuyang Ama na nasa langit.” (Mateo 7:21) Sinabi pa niya: “Paagi sa saindang mga bunga mamimidbid nindo sinda.” (Mateo 7:16) Matatabangan ka kan Bibliya na maaraman kun arin an tunay na pagsamba asin an pagkakalain kaiyan sa palsong pagsamba.—Juan 17:17.

Paano mo pupunan an paglakaw sa dalan pasiring sa buhay? Kaipuhan mong mamidbid an Gikanan nin buhay: Siisay siya? Ano an pangaran niya? Anong klaseng persona siya? Ano an ginigibo niya para sa sato? Ano an gusto niyang gibuhon ta?a

Gusto nin Diyos na an mga tawo dai lang basta magtrabaho, magkakan, magkawat, asin magpamilya. Puwede tang mamidbid an satong Kaglalang asin magin amigo niya. Maipapahiling tang namumutan ta siya paagi sa paggibo kan saiyang kabutan. Sinabi ni Jesus: “Ini nangangahulugan nin buhay na daing katapusan, na mamidbid ninda ika, an iyo sanang tunay na Diyos.”—Juan 17:3.

AN INOT NA LAKDANG SA SAIMONG PAGBAKLAY

Tanganing mapaugma an iyo sanang tunay na Diyos, kaipuhan tang gumibo nin mga pagbabago. Garo baga dipisil iyan. Pero an totoo, saro iyan na nakakaugmang marhay na pagbaklay, na arog kan ibang pagbaklay, nagpupuon sa inot na lakad. Para tabangan kang masimbag an pundamental na mga hapot manungod sa Diyos, nag-aalok an mga Saksi ni Jehova nin libreng pag-adal sa Bibliya sa oras asin lugar na kumbenyente saimo. Puwede mo kaming kontakon paagi sa samong website na www.jw.org/bcl.