Itumba an Lambang Pangangatanusan na Laban sa Kaaraman Manungod sa Diyos!

1. Anong patanid an isinurat ni apostol Pablo para sa linahidan na mga Kristiyano?

“DAI na kamo magpamolde sa sistemang ini nin mga bagay,” an patanid ni apostol Pablo. (Roma 12:2) Isinurat ni Pablo an mga tataramon na iyan para sa mga Kristiyano kan inot na siglo. Taano ta itinao niya an mapuwersang patanid na iyan sa mga lalaki asin babayi na dusay sa Diyos asin linahidan nin banal na espiritu?—Roma 1:7.

2-3. Paano hinihinguwa ni Satanas na italikod kita ki Jehova, pero paano niyato mahahali an mga bagay na “nakagamot na nin marigon” sa satong isip?

² Nahadit si Pablo huling may mga Kristiyano na minalataw na naiimpluwensiyahan kan nakakaraot na mga pangangatanusan asin pilosopiya na pinapalakop kan kinaban ni Satanas. (Efe. 4:17-19) Puwedeng mangyari iyan sa siisay man sa sato. Si Satanas, an diyos kan sistemang ini nin mga bagay, naggagamit nin manlain-lain na taktika huli sa desperadong pagpurbar na italikod kita ki Jehova. An saro diyan iyo an pag-aprobetsar sa ano man na tibaad tendensiya niyato na makamit an satong mga ambisyon o magin sikat. Tibaad gamiton pa ngani niya an partikular na mga aspekto kan satong dinakulaan, kultura, o edukasyon tanganing mag-isip kita sigun sa gusto niya.

³ Posible daw na mahali niyato sa satong isip an mga bagay na “nakagamot na nin marigon”? (2 Cor. 10:4) Risahon an simbag ni Pablo: “Itinutumba mi an mga pangangatanusan saka an lambang ulang na itinitindog laban sa kaaraman manungod sa Diyos, asin dinadaog mi an lambang kaisipan tanganing gibuhon iyan na masinunod sa Cristo.” (2 Cor. 10:5) Iyo, sa tabang ni Jehova talagang makakaya niyatong halion an salang mga kaisipan. Kun paanong mahahali nin bulong an mga epekto nin hilo, matatabangan kita kan Tataramon nin Diyos na halion an nakakahilong mga epekto kan kinaban ni Satanas.

“PAGBAGO KAN SAINDONG ISIP”

4. Anong mga pagbabago an kinaipuhan na gibuhon kan dakul sa sato kan akuon niyato an katotoohan?

⁴ Pag-isipan an mga pagbabagong kinaipuhan mong gibuhon kan akuon mo an katotoohan na nasa Tataramon nin Diyos asin nagdesisyon kang maglingkod ki Jehova. Para sa dakul sa sato, nangahulugan iyan nin pagbaya sa salang mga paggawi. (1 Cor. 6:9-11) Ipinagpapasalamat nanggad niyato na tinabangan kita ni Jehova na mahali an siring na makasalan na mga gibo!

5. Sigun sa Roma 12:2, anong duwang bagay an kaipuhan niyatong gibuhon?

⁵ Alagad, dapat na nungka kitang magin kampante. Dawa nagpundo na kita sa paggibo nin magabat na mga kasalan na ginigibo ta kaidto bago kita mabawtismuhan, kaipuhan pa man giraray niyatong pagmaigutan na likayan an ano man na makakatentar sa satuya na magbalik sa dating mga gibong iyan. Paano niyato magigibo ini? Sinabi ni Pablo: “Dai na kamo magpamolde sa sistemang ini nin mga bagay, kundi liwaton an saindong pagkatawo paagi sa pagbago kan saindong isip.” (Roma 12:2) Kaya may duwang bagay kitang kaipuhan na gibuhon. Inot, kaipuhan na ‘dai na kita magpamolde,’ o magpaimpluwensiya, sa kinaban na ini. Ikaduwa, kaipuhan niyatong ‘liwaton an satong pagkatawo’ paagi sa pagbago kan satong isip.

6. Ano an manunudan niyato sa sinabi ni Jesus sa Mateo 12:43-45?

⁶ An pagliliwat na nasa isip ni Pablo bako lang basta pagbabago sa kun ano an nahihiling sa sato. Sakop kaiyan an lambang aspekto kan satong pagkatawo. (Hilingon an kahon na “Naliwat Na o Nagsasagin-sagin?”) Kaipuhan niyatong baguhon an satong isip—an satong kauruiraruming mga kaisipan, sabuot, asin tendensiya. Kaya kaipuhan niyato gabos na haputon an satong sadiri, ‘An mga pagbabago daw na ginigibo ko para magin Kristiyano pangluwas lang, o talaga daw na nagigin Kristiyano ako dawa sa panglaog kong pagkatawo?’ Mahalaga an pagkakaiba kaiyan. Sa sinabi ni Jesus sa Mateo 12:43-45, ipinarisa niya kun ano an kaipuhan na gibuhon. (Basahon.) Itinutukdo sa sato kan mga tataramon na iyan an mahalagang katotoohan na ini: Bakong igo na halion sana an salang mga kaisipan; kaipuhan niyatong salidahan iyan nin mga kaisipan na inuuyunan nin Diyos.

“BAGUHON AN PAAGI KAN SAINDONG PAG-IISIP”

7. Paano niyato mababago an satong panglaog na pagkatawo?

⁷ Puwede daw na baguhon an satong panglaog na pagkatawo o an satong paagi nin pag-iisip? An Tataramon nin Diyos minasimbag: “Dapat na padagos nindong baguhon an paagi kan saindong pag-iisip, asin isulot an bagong personalidad na linalang sigun sa kabutan nin Diyos, kauyon kan tunay na katanusan asin kaimbudan.” (Efe. 4:23, 24) Iyo, puwedeng baguhon an satong panglaog na pagkatawo, pero bako iyan madaling gibuhon. Bako lang pagkontrol sa satong salang mga pagmawot asin gibo an kaipuhan niyatong gibuhon. Kaipuhan niyatong baguhon an ‘paagi kan satong pag-iisip.’ Kalabot diyan an pagbago niyato kan satong mga pagmawot, tendensiya, asin motibo. Nangangaipo ini nin padagos na paghihinguwa.

8-9. Paano ipinahiling sa eksperyensiya nin sarong brother an pangangaipo na baguhon an satong panglaog na pagkatawo?

⁸ Hilingon niyato an halimbawa nin sarong brother na dating bayolente. Kan magpundo na siya sa pagparainom asin pagparapakiiwal, nakuwalipikar siya sa bawtismo. Nagtao iyan nin magayunon na patotoo sa sadit na komunidad kun sain siya nakaistar. Alagad sarong banggi, kan dai pa sana siya nahahaloy na mabawtismuhan, napaatubang siya sa dai inaasahan na pagbalo. May burat na lalaking nagduman sa harong ninda asin nang-agyat nin iwal. Kan primero, nakapagpugol an brother. Pero kan an pangaran na ni Jehova an ininsulto kan lalaki, dai na iyan nakaya kan brother. Linuwas niya an lalaki asin binugbog. Ano ta nagibo niya iyan? Dawa nakatabang sa saiya an pag-adal nin Bibliya na makontrol an tendensiya niyang magin bayolente, dai pa niya nababago an paagi niya nin pag-iisip. Sa ibang pagtaram, dai pa niya nababago an saiyang panglaog na pagkatawo.

⁹ Pero dai nagpundo sa paghihinguwang magbago an brother na ini. (Tal. 24:16) Sa tabang kan mga elder, padagos siyang nag-uswag. Asin pag-abot nin panahon nakuwalipikar siya na magin elder. Dangan sarong banggi, sa atubangan mismo kan Kingdom Hall, napaatubang giraray siya sa kaparehong pagbalo na napaatubang sa saiya pirang taon na an nakaagi. May sarong burat na lalaki na bubugbugon na kuta an saro sa mga elder. Ano an ginibo kan brother? Sa kalmado asin mapakumbabang paagi, kinaulay niya an burat na lalaki, pinakalma ini, asin tinabangan an nagriripay-dipay na lalaking ini na makapuli. Ano ta arog na kaiyan an ginibo kan brother? Binago niya an saiyang paagi nin pag-iisip. An saiyang panglaog na pagkatawo nagi nang mapagpatuninong asin mapakumbaba. Asin nakatao nanggad ini nin kaumawan ki Jehova!

10. Ano an dapat niyatong gibuhon tanganing mabago an satong panglaog na pagkatawo?

¹⁰ An mga pagbabagong ini dai nangyayari sa halipot na panahon; dai man iyan awtomatikong nangyayari. Tibaad kaipuhan niyatong ‘maghinguwang’ marhay sa laog nin dakul na taon. (2 Ped. 1:5) Dai buot sabihon na miling haloy na kita sa katotoohan mangyayari na an mga pagbabagong ini. Kaipuhan niyatong gibuhon an satong pinakamakakaya na baguhon an satong panglaog na pagkatawo. May nagkapirang simpleng lakdang na makakatabang sa sato na magibo an pagbabagong ini. Siyasaton niyato an pira sa mga iyan.

KUN PAANO BABAGUHON AN SATONG PAAGI NIN PAG-IISIP

11. Paano nakakatabang sa sato an pagpamibi na baguhon an satong paagi nin pag-iisip?

¹¹ An pagpamibi an inot na importanteng lakdang. Kaipuhan niyatong mamibi arog kan salmista: “O Diyos, lalangon mo sa sako an sarong dalisay na puso, asin sarong bagong espiritu, saro na marigon, an ibugtak mo sa sako.” (Sal. 51:10, NW) Dapat niyatong akuon na kaipuhan tang baguhon an satong paagi nin pag-iisip asin hagadon an tabang ni Jehova. Taano ta makakasigurado kita na tatabangan kita ni Jehova na magibo an pagbabagong iyan? Mapapakusog kita kan panuga ni Jehova mapadapit sa mga Israelitang matagas an puso kan panahon ni Ezequiel: ‘Tatawan ko sinda nin nagkakasararong puso, asin bagong espiritu asin tatawan ko sinda nin pusong laman [o, pusong masinunod sa paggiya nin Diyos].’ (Ezeq. 11:19) Andam si Jehova na tabangan na magbago an mga Israelitang idto, asin andam man siya na tabangan kita.

12-13. (a) Sigun sa Salmo 119:59, ano an kaipuhan niyatong hurop-hurupon? (b) Ano an mga dapat mong ihapot sa saimong sadiri?

¹² An paghurop-hurop an ikaduwang mahalagang marhay na lakdang. Mantang binabasa niyato an Tataramon nin Diyos kada aldaw, kaipuhan tang magtao nin panahon na hurop-hurupon, o pag-isipan na marhay, an mga kaisipan asin sabuot na kaipuhan niyatong baguhon. (Basahon an Salmo 119:59; Heb. 4:12; Sant. 1:25) Dapat niyatong aramon kun igwa kita nin ano man na tendensiya na maengganyo sa mga pilosopiya nin tawo. Kaipuhan niyatong onestong admitiron an satong mga kaluyahan asin pagmaigutan na halion iyan.

¹³ Halimbawa, haputon an sadiri: ‘An sakong puso daw igwa nin maski dikit na tendensiya na mauri?’ (1 Ped. 2:1) ‘Nakakamati daw ako maski paano nin pag-orgulyo huli sa dinakulaan ko, edukasyon, o estado sa buhay?’ (Tal. 16:5) ‘Minemenos ko daw an mga tawong mayo kan mga bagay na igwa ako o na iba an rasa?’ (Sant. 2:2-4) ‘Naaakit daw ako kan mga iinaalok kan kinaban ni Satanas?’ (1 Juan 2:15-17) ‘Gusto ko daw an mga libangan na imoral asin madahas?’ (Sal. 97:10; 101:3; Amos 5:15) An simbag mo sa personal na mga hapot na ini puwedeng magtao sa saimo nin ideya kun ano pa an mga kaipuhan mong pauswagon. Kun hahalion niyato an mga kaisipan na tibaad “nakagamot na nin marigon” sa satong puso, mapapaugma niyato an satong Ama sa langit.—Sal. 19:14.

14. Taano ta mahalagang marhay na magpili kita nin marahay na mga kairiba?

¹⁴ An pagpili nin marahay na mga kairiba an ikatulong kinakaipuhan na lakdang. Narerealisar man niyato o dai, dakula an impluwensiya sa sato kan mga kairiba ta. (Tal. 13:20) Sa trabaho o eskuwelahan, posibleng marhay na nakakaiba-iba ta an mga dai makakatabang sa sato na magkaigwa nin diyosnon na kaisipan. Alagad, puwede niyatong mahanap sa satong Kristiyanong mga pagtiripon an pinakamarahay na klase nin mga kairiba. Diyan, puwede kitang mamotibar, o mapahiro, na “magpahiling nin pagkamuot asin marahay na mga gibo.”—Heb. 10:24, 25, nota sa ibaba.

‘PARIGUNON AN SADIRI SA PAGTUBOD’

15-16. Ano an ginigibo ni Satanas tanganing baguhon an satong kaisipan?

¹⁵ Alagad tandaan na desidido si Satanas na baguhon an satong kaisipan. Ginagamit niya an gabos na klase nin ideya tanganing kontrahon an impluwensiya kan katotoohan na nasa Tataramon nin Diyos.

¹⁶ Padagos na ihinahapot ni Satanas an ihinapot niya kaidto ki Eva sa hardin nin Eden: “Talagang sinabi nin Diyos na . . . ?” (Gen. 3:1, NW) Sa kinaban na kontrolado ni Satanas, parati niyatong nadadangog an mga hapot na puwedeng magin dahilan na magduda kita sa satong mga tinutubod, arog kan: ‘Talaga daw na dai uyon an Diyos sa pag-aguman nin magkasekso? Talaga daw na habo nin Diyos na magselebrar ka nin Pasko asin birthday? Talaga daw na inaasahan nin Diyos na masayuma ka sa pagpasalin nin dugo? Talaga daw na inaasahan nin Diyos na lilikayan mong makiiba-iba sa tiwalag na mga mahal sa buhay?’

17. Ano an dapat niyatong gibuhon pag may naghapot sa sato sa katuyuhan na papagdudahon kita sa satong mga tinutubod, asin sigun sa Colosas 2:6, 7, ano an puwedeng magin resulta kaiyan?

¹⁷ Kaipuhan niyatong magin kumbinsido sa satong mga tinutubod. Kun papabayaan ta na sanang dai nasisimbag sa isip ta an siring na mga hapot, puwedeng magduda kita kun baga talagang totoo an mga tinutubod ta. An mga pagdudang iyan puwedeng biribidon an satong kaisipan asin rauton an satong pagtubod pag-abot nin panahon. Ano kun siring an kaipuhan niyatong gibuhon? Sinasabi sa sato kan Tataramon nin Diyos na liwaton an satong isip, tanganing mapatunayan niyato sa satong sadiri “an kabutan nin Diyos na marahay asin akseptable saka perpekto.” (Roma 12:2) Paagi sa regular na pag-adal, puwede niyatong mapatunayan sa satong sadiri an mga katotoohan na nanudan niyato sa Bibliya. Lubos kitang makukumbinsir na tama an mga pamantayan ni Jehova. Dangan, siring sa sarong kahoy na pusog na nakagamot, magigin man kitang masarig na nakagamot, ‘marigon sa pagtubod.’—Basahon an Colosas 2:6, 7.

18. Ano an makakatabang sa sato na mahali an nakakahilong mga epekto kan kinaban ni Satanas?

¹⁸ Mayong ibang puwedeng makaparigon kan saimong pagtubod, kaya padagos na baguhon an paagi kan saimong pag-iisip. Danay na mamibi; hagadon an tabang kan espiritu ni Jehova. Udok na maghurop-hurop; padagos na siyasaton an saimong kaisipan asin mga motibo. Magpili nin marahay na mga kairiba; makiiba-iba sa mga indibidwal na tatabangan kang maliwat an saimong kaisipan. Paagi kaiyan, mahahali mo an nakakahilong mga epekto kan kinaban ni Satanas asin mapanggana mong maitutumba an “mga pangangatanusan saka an lambang ulang na itinitindog laban sa kaaraman manungod sa Diyos.”—2 Cor. 10:5.