Pagbalos sa Pagkamoot ni Jehova sa Panahon nin Pagkabarobata

¹ Naheheling daw nindo na mga hobenes sa kongregasyon an abundang ebidensia kan pagkamoot ni Jehova na napapalibot sa saindo? Binabalosan daw nindo an pagkamoot na iyan sa paagi na ikaoogma nia? Paano daw nindo iyan magigibo?

² An kadaklan sa saindo igwa nin mamomoton na mga magurang na nagtatagama sa saindo sa materyal, espirituwal, emosyonal, asin mental. Tunay na ini nagsosopay na bendisyon ni Jehova. Dugang pa, paagi sa saiyang organisasyon, nagtao sia nin nagkapirang libro asin artikulo na sinadya nin espesyal para sa saindo, tanganing tabangan kamo na maatubang an mga problema sa aroaldaw. Kun inaprobetsaran nindo an mga probisyon na ini, andam nanggad kamo na atubangon an depisil na mga situwasyon na pinoproblema nin mga barobata ngonyan. Ibinibilang daw nindo an gabos na ini na ebidensia kan pagkamoot nin Dios para sa saindo?—1 Juan 4:8, 19.

³ Itinao ni Jehova an Biblia sa sato gabos, baga man gurang o hoben. Asin an pakinabang sa pantubos paagi sa saiyang Aking si Jesu-Cristo aplikado sa maimbod na mga barobata saka sa mga gurang. Igwa kamo kan paglaom sa Kahadean, kaiba an panuga kaiyan na paraisong daga, na duman kamo makatatalingkas sa mga kahaditan na dai makaya ngonyan nin dakol na barobata na dai nakamimidbid ki Jehova. Dai daw kamo napahihirong kamotan si Jehova sa pakaaram na kadakol kan ginibo nia para sa saindo dawa kun dai nindo hinahagad? (Roma 5:8) Paano daw nindo mababalosan an pagkamoot ni Jehova sa praktikal na paagi?