Hapot

● Taano ta maninigong ipakipag-adal niato an duwang libro sa mga bagohan, minsan pa sinda tibaad magpabautismo na bago matapos an duwang libro?

Sa pagtotokdo niato kan katotoohan sa mga bagohan, an iba masasabotan asin aakoon iyan nin mas marikas kisa iba. An iba tibaad makuwalipikar para sa bautismo sa halipot sanang panahon. Minsan siring, mahalaga na an gabos na nakakamidbid ki Jehova “mapano nin tamang kaaraman kan saiyang kabotan sa bilog na kadonongan asin espirituwal na pakatalastas, tanganing maglakaw na angay ki Jehova sa katuyohan na lubos na makapaogma sa saiya.” (Col. 1: 9, 10) Paagi sa pag-adal sa bilog na librong Mabuhay Sagkod Lamang dangan sa United in Worship o True Peace, an mga bagohan matatabangan na magibo ini.

Paagi sa pag-adal nin enot sa libro manongod sa pundamental na mga katokdoan, na sinusundan nin libro na manongod sa Kristianong mga kuwalidad, an nag-aadal nag-aako nin kompletong kaaraman. Nakakanood man sia nin mga prinsipyo manongod sa personal na gawe asin pagsamba na kaipuhan sa pagigin tunay na Kristiano nin saro. An kada saro na minalaog sa organisasyon ni Jehova kaipuhan na magin dakula na kun dapit sa mga kakayahan nin pagsabot. —1 Cor. 14:20.

Dugang pa, ipinaheling nin kabatidan na kaipuhan an tabang nin sarong maygurang na paratokdo. Minsan ngani mahalaga an personal na pagbasa sa mga publikasyon asin pag-atender sa mga pagtiripon, an mga siring dai perming nagbubunga kan “kadonongan asin espirituwal na pakatalastas” na kaipuhan tanganing makapaglingkod ki Jehova nin tama. Kaipuhan an personal na pag-adal sa Biblia kaiba an sarong paratokdo. (Gibo 8: 30, 31) An nangengenot sa pag-adal puwedeng ireport an oras, pagdalaw liwat, asin pag-adal sa Biblia sagkod na matapos an ikaduwang libro, dawa kun nabautismohan na an inaadalan.