Tabangan an mga Aki sa Pag-omaw ki Jehova
1 Poon kan iyan iluwas kan 1978, an My Book of Bible Stories napatunayan na napakahalagang pantabang pareho sa mga magurang asin mga aki. An sarong ina naogma nin labi-labi kan an nuwebe anyos niang aki, na kaidto dai noarin man naoogmang tumukaw tanganing mag-adal, naglaog sa harong asin naghapot: “Nanay, puwede daw tabing itao mo sako an bago kong libro?” Ini halimbawa sa epekto kan My Book of Bible Stories sa mga aki. Paano niato iyan mas lubos na magagamit tanganing matabangan an mga aki na mag-omaw ki Jehova?
KUN PAANO IYAN MAGIGIBO
2 An librong Bible Stories magagamit sa pagtanom nin espirituwal na mga kuwalidad sa isip asin puso kan saindong mga aki. Halimbawa, an estorya 58 nagdodoon kan mga kuwalidad na kapusoan asin pagsarig ki Jehova sa pagsaysay kaiyan manongod sa paghampang ni David sa higanteng Filisteo na si Goliat. (1 Sam. 17:45-51) Kun beses an mga aki kinakaipuhan na umatubang sa mga kaolangan na garo baga higante para sa sainda. Kun patienot na aandamon nin mga magurang an mga aki, mahihimo nin mga aki na omawon nin mapuso an ngaran ni Jehova sa ibong nin mga pangigipit asin sugot.—Tal. 22:6; helingon an Genesis 18:19.
3 Tibaad kamo mismo mayo nin saradit na aki. Alagad tibaad puwede nindong ibanan an mga aki sa kongregasyon, na tinatabangan sinda sa pag-omaw sa ngaran ni Jehova. An Kristianong mga hobenes napakokosog asin napahihiro kun an nombradong mga lingkod sa kongregasyon nagpapaheling nin personal na interes sa sainda. (Tal. 27:23) Makapagtatao daw kamo nin mas dakol na oras sa mga aki? Nangorognang kapakipakinabang kun tinatabangan niato sinda sa paglilingkod sa langtad.
PAG-ALOK KAN LIBRONG BIBLE STORIES
4 Sa bulan nin Disyembre, iaalok niato an My Book of Bible Stories. An mga aki puwedeng tabangan na ikaalok iyan nin epektibo sa paglilingkod sa langtad. Tibaad makapoon pa ngani sinda nin pag-adal dian.
5 Dinadagka mi kamo mga aki na gumibo nin espesyal na paghihingoa ngonyan na Disyembre na omawon si Jehova sa saindong eskuwelahan. Kaipuhan an kapusoan tanganing magibo iyan, pero itatao saindo ni Jehova an kinakaipuhan na kosog. Gumibo nin mga paagi na magkaoportunidad na ipaheling sa saindong mga kaeskuwela an My Book of Bible Stories.
6 Mga magurang, repasohon an pirang isinusuherir na mga pag-aatubang kaiba kan saindong mga aki. Tabangan sindang gamiton an mga teksto sa Topikong Mapag-oolayan. An hoben asin gurang makakarisa kun makaheling sinda nin nag-andam na mga aki na nag-oomaw ki Jehova.
7 Ipaheling man niato sa mga aki an halaga nin pagsaray nin marahay na house-to-house record tanganing mabalikan ninda an mga nagpaheling nin interes. Ibugtak sa atubangan ninda an pasohan na makapoon nin pag-adal sa Biblia. Tibaad kaipuhan na tabangan nindo sinda sa pangengenot sa pag-adal kun iyan naponan na.
8 Boot niato na an satong mga aki makabilang sa mga sinasabi kan salmista na: “An lambang bagay na naghahangos—mag-omaw iyan ki Jah. Omawa nindo si Jah, banwaan!” (Sal. 150:6) Arangon an paggiya ni Jehova sa pagtao kan kinakaipuhan na tabang.