Pagsabwag nin Banhi kan Kahadean
1 An Salmo 126:6 nagtataram manongod sa pagsabwag nin literal na banhi asin nagsasabi: “An minalakaw, . . . dara an supot nin mga banhi, sierto na mabalik na may maogmang kurahaw, na dara an saiyang mga goygoy.” Sa Eclesiastes 11:6 an parasabwag nin banhi pinakokosog kan mga tataramon na: “Pagkaaga itanom mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa anas na marahay.”
2 Kun kita nakikikabtang sa ministeryo sa langtad, kita man garo may darang sarong supot nin banhi pero espirituwal. An pagkaepektibo kan pagsabwag niato nin espirituwal na banhi nadudugangan nin babasahon na nagtatampok kan maogmang bareta nin Kahadean. An babasahon na ini nagpapaliwanag nin mga tema na dian interesado an dakol asin nagpapaheling kun gurano kahalaga na manodan ninda an Kahadean. Si Jehova, paagi sa maimbod na oripon, nagtagama sato nin dakol na suplay nin mga babasahon sa Biblia na gagamiton sa gibong pagsabwag kan banhi nin Kahadean sa panahon na ini kan katapusan.
DARA AN LIBRONG WORLDWIDE SECURITY
3 Sa Enero asin Pebrero iaalok niato an librong Worldwide Security sa mga nasa satong teritoryo. An temang ini nasa isip nin dakol ngonyan asin an libro igwa nin tunay na paglaom gikan sa Biblia. Kun ginagamit an bagong Topikong Mapag-oolayan na “Mga Bendisyon kan Kahadean nin Dios,” sierto na maririsa nindo na marahay na gamiton an ilustrasyon sa pahina 4 asin 5 sa libro. O tibaad gusto nindong bukasan sa Kapitulo 21 na may titulong “The Garden of Eden Restored—Earth Wide,” na ipinaheheling an magayon na ilustrasyon sa pahina 172 asin 173. Sinasadol mi an gabos na gamiton an librong ini sa ministeryo sa langtad sa laog kan duwang bulan na kampanya.
DARA AN MAS DAAN NA MGA PUBLIKASYON
4 An ibang kongregasyon tibaad igwa pa nin mga edisyon sa newsprint kan mas daan na mga libro. An iba tibaad gustong pedidohon ini sa Sosyedad. Tabi helingon an lista nin mga librong newsprint na igwa digdi sa Bethel sa ikaduwang paisi sa pahina 3. Nangorognang gusto ming sadolon an gabos na kongregasyon na Hiligaynon, Pangasinan asin Samar-Leyte na pumedido kan librong Good News to Make You Happy, na ikaaalok sa kontribusyon sanang ₱2.50 sa kampanyang ini.
5 Bilang pansalidang alok, kun an arin man na kongregasyon may istak pang mas daan na 192-pahinas na libro sa dialekto pero dai inimprenta sa newsprint, an mga ini ikaaalok sa regular na kontribusyon na ₱14.00. Ini makatatabang nangorogna sa mga teritoryo na an mga tawo dai napapasilan na magbasa kan iinaalok na librong Ingles.
6 Sa pagtanom nindo asin pagbaribi sa mga banhi nin katotoohan, mamibi nin daing ontok para sa bendisyon ni Jehova ta “an Dios iyo an nagpapatubo.”—1 Cor. 3:6.