Pag-ataman sa Banhi kan Kahadean
1 An paraoma nag-aandam kan daga asin nagsasabwag nin banhi, asin dangan dakula nanggad na kagayagayahan an namamatean nia kun nagtutubo na an banhi! Ibinaing ni Jesus “an tataramon nin Dios“ sa banhing isinabwag. (Luc. 8:11) Kaya, mawot niatong makikabtang nin lubos sa pagsabwag kan banhi kan Kahadean, na may paglaom na maabot kaini an mga tawong an puso siring sa “marahay na daga“ sa ilustrasyon Ni Jesus.—Mat. 13:19, 23; Luc. 8:15.
2 Nagkaigwa daw kamo nin pribilehiyong makawaras nin lumang mga libro kan nakaaging bulan, o nagkaigwa daw kamo nin marahay na mga pakipag-olay sa Kasuratan sa mga tawo sa saindong teritoryo? Makagigibo daw kamo nin orog pa tanganing kultibaron an saindang interes sa mensahe kan Kahadean? An mga pagdalaw liwat epektibong paagi tanganing atamanon an ipinaheling na interes. Parate ining puwedeng gibohon sa laog nin saro o duwang aldaw pakalihis kan enot na pagsongko.
3 Durante kan Pebrero, igwa kita nin orog pang oportunidad na ialok an lumang mga publikasyon. Tibaad an laog kaini iyo an mismong kaipuhan kan tawo tanganing mapukaw an saiyang pagmawot na mag-oswag sa espirituwal na paagi. Siring man, magin andam na ihiras an ibang punto manongod sa mga bendisyon na pangyayarihon kan Kahadean sa mga nag-aakong puso.
4 An pagigin auxiliary payunir magtatao sa iba nin oportunidad na gumibo nin orog na pagdalaw liwat asin makapoon nin bagong mga pag-adal. Kada taon dakol an nag-aprobetsar kan oportunidad na magin auxiliary payunir kun Marso asin Abril. Sa taon na ini an Marso igwa nin limang Sabado asin an Abril igwa nin limang Domingo, sarong bentaha para sa mga igwa nin panbilog na panahon na trabahong sekular.
5 Sa ibang kongregasyon, an bilog na grupo nin kamagurangan, mga ministeryal na lingkod, asin an saindang mga agom nagtao nin marahay na halimbawa sa pagigin mga auxiliary payunir. Kan nakaaging Abril sarong kongregasyon an nagkaigwa nin 83 na auxiliary payunir asin 12 regular payunir. Kanigoan na panpakosog sa gabos na kongregasyon!
AN MGA PAGDALAW LIWAT PUWEDENG MAGIN MGA PAG-ADAL SA BIBLIA
6 Tanganing magin epektibo sa mga pagdalaw liwat, kaipuhan kamong gumibo nin mga notasyon sa saindong rekord sa pagharongharong. Makatatabang ini saindo tanganing madeterminar an temang ipakikipag-olay sa pagbalik nindo. An ibang parahayag tinogotan an kagharong na perming magtaram sa enot na pagsongko tanganing maaraman kun anong tema an nakaiinteres saiya. Kun nagpahayag sia nin salang mga ideya, may kadonongan na likayan na magpokus sa siring na mga komento sa kapinonan, kundi, imbes, itampok an mga panuga kan Kahadean.
7 An gibohon na pag-adal sa Biblia an pangenot na paagi tanganing tabangan an mga tawong makanood kan mga katuyohan nin Dios. Gumamit nin mga punto sa mga publikasyon na makaiinteres sa tawo. Maghapot, asin dangan ipaheling kun paanong an literatura madali sanang nagtatao kan simbag kan Biblia. Puwede nindong gamiton an librong ikinawaras nindo sa kagharong o iba na yaon na saiya.
8 Kun paanong nakaoogmang magsabwag nin literal na banhi asin maheling na nagtatalubo an mga tinanom mantang inaataman niato iyan, magkakaigwa kita nin orog pang satispaksion kun maheling niato “an tataramon kan kahadean“ na nagkakagamot asin nagtatalubo sa mga puso kan satong mga tinatabangan sa pag-adal.