Pagpaoswag kan Satong Pagigin Epektibo Bilang mga Ministro
1 Mantang an mga interes kan Kahadean an pangenot sa satong buhay, mawot niatong magin mas mahusay sa ministeryo. (Mar. 13:10) Minsan gurano na kahaloy kitang naghuhulit, mawot niatong padagos na mag-oswag sa satong pagigin epektibo bilang mga ministro. Paano niato magigibo ini?
2 Dakol sa propesyonal na mga langtad an padagos na nagbabagay sa panahon kan saindang kaaraman asin mga abilidad. Bilang mga ministro, kaipuhan man niatong magin mahigos sa pagpaoswag kan satong abilidad na gumibo nin mga disipulo. Maninigo niatong aramon an bagong mga pagdolok na makaaakit sa gabos na klase nin tawo.—Mat. 28:19, 20.
ATUBANGON AN ANGAT
3 Ngonyan na pinaririkas ni Jehova an gibohon na pagtitipon, mas parate kitang nagsosongko sa satong mga kataraed. Huli kan satong nag-oswag na gibohon, an mga presentasyon na dating epektibo tibaad dai na nakaaakit sa mga tawo. An kuwalidad kan satong ministeryo tibaad nangangaipo nang paoswagon.
4 Kaipuhan na pagdanayon an positibong kaisipan tanganing magin tunay na maabilidad sa satong gibohon. An paggamit nin marhay kan praktikal na mga suhestion sa Agosto 1, 1988 na Torrengbantayan makatatabang sato sa bagay na ini. Bilang halimbawa, an pahina 14, parapo 6, nagsasambit kun paano nindo iintrodusir an saindong sadiri sa marahay asin positibong paagi sa teritoryong hinuhulitan nindo haros kada semana asin midbid na gayo kamo.
5 Naghulit na daw kamo sa saindong teritoryo na direktang nag-aalok nin libreng pag-adal sa Biblia? Naghuhulit daw kamo sa saindong teritoryo nin negosyo? Posible daw na magpatotoo sa tinampo sa angay na mga. panahon? Siertohon na repasohon an mga suhestion na itinao sa Agosto 1, 1988 na Torrengbantayan. An pag-aplikar kan siring na mga suhestion rnakatatabang sato na paoswagon an satong pagigin epektibo bilang mga ministro.
6 Kalabot man sa pagigin epektibo an pagigin maingat. (Efe. 6:13) Magin alistong risahon kun labi sa sarong pamilya an nag-iistar sa harong. An ibang tawo nag-iistar sa sirong kan mga apartment, o sa ibang lokasyon na bakong kombenyenteng maabot hale sa pangenot na agihan. Hanapon an ibang miembro kan pamilya—an mas matua tibaad bakong ordinaryong nadolok sa puwertahan o an saro tibaad nasa trabaho kun nagsosongko kita sa harong. Tibaad paagi sa pagsongko sa ibang oras, manompongan nindo an ibang miembro kan pamilya.
GIBOHON INING PASOHAN NIATO
7 An pagpaoswag kan pagigin epektibo niato sarong mahalagang pasohan na puwedeng makamtan kan kadaklan sato. Nangangaipo ini nin odok sa boot na pamibi asin patienot na pag-aandam. Mantang nag-ooswag an satong pagigin epektibo, posible niatong matabangan an iba na gumibo nin kaagid na pag-oswag.—Gal. 6:6.
8 Girumdomon, an satong gibohon na pagtotokdo dai matatapos sa “dakulang kahorasaan.“ (Mat. 24:21) Inaantisipar niato an mga taon nin pagtabang sa mga binuhay liwat na manodan an mga paagi ni Jehova. Paagi sa pagpaoswag kan satong pagigin epektibo ngonyan, makagigibo kita nin orog sa ministeryo—sa onra asin kaomawan ni Jehova.