Magin Epektibo sa Saindong Ministeryo

¹ Nagdiklom an langit, asin an nakapangigirabong tanog orog na nagkokosog sagkod sa nakabobongog na ragubrob. Buminaba an panganoron na garo aso. Ano iyan? An hukbo nin minilyon na doron na nagdadangadang tangani na biyong destrosohon an daga! An situwasyon na ini na ilinadawan ni propeta Joel igwa nin kaotoban ngonyan sa paghuhulit kan linahidan na mga lingkod nin Dios asin kan saindang kairiba, an dakulang kadaklan.

² An Mayo 1, 1998 An Torrengbantayan, pahina, 11, parapo 19, nagsabi: “An hukbo nin mga doron nin Dios sa presenteng aldaw sirot na nagpatotoo sa ‘siudad’ nin Kakristianohan. (Joel 2:9) . . . Pinapangganahan ninda sagkod ngonyan an gabos na kaolangan, linalaog an minilyon na harong, dinodolok an mga tawo sa tinampo, nakikipag-olay sa sainda sa telepono, asin nakikikomunikar sa sainda sa ano man na posibleng paagi mantang ibinabalangibog ninda an mensahe ni Jehova.” Bako daw na dakulang pribilehio na makikabtang sa gibohon na ini na ipinagboot nin Dios?

³ Bakong siring sa literal na mga doron, na an katuyohan sana iyo na pakakanon an saindang sadiri, kita bilang mga lingkod ni Jehova may dakulang pagmalasakit sa buhay kan mga hinuhulitan niato. Boot niatong tabangan an iba na manodan an mamuraway na mga katotoohan na yaon sa Tataramon nin Dios asin pahiroon sindang gumibo nin mga lakdang na magiya pasiring sa saindang kaligtasan na daing katapusan. (Juan 17:​3; 1 Tim. 4:16) Huli kaini, boot niatong magin epektibo sa paagi kan satong pagmiministeryo. Ano man na pamamaagi nin paghuhulit an ginagamit, maninigo niatong estudyaran kun baga ginigibo niato iyan sa paagi asin sa panahon na magtatao kan pinakamarahay na mga resulta. Mantang “an kamugtakan kan kinaban na ini nagbabago,” marahay na analisaron niato an satong mga pamamaagi asin an satong pagdolok tangani na seguradohon na kita nakaaabot sa angat na pagigin mabunga sagkod sa mapupuede.​—1 Cor. 7:31.

⁴ Mantang hinihingoa niatong makaolay an mga tawo sa dakol na paagi, an pagharongharong iyo pa man giraray an mayor na suporta sa satong ministeryo. Nanonompongan daw nindo na an mga tawo parateng mayo sa harong o natotorog kun kamo nagsosongko? Kanigoan kanakapanluluya sa boot, huling dai nindo ikinahihiras sa sainda an mensahe kan maogmang bareta! Paano nindo maaatubang an angat na ini?

⁵ Magin Madaling Makibagay Asin Makatanosan: Sa Israel kan enot na siglo, an mga parasira naninira sa banggi. Taano ta sa banggi? Minsan ngani bako ini an pinakakombenyenteng panahon para sa sainda, iyan an pinakamarahay na panahon na madakop an pinakadakol na sira. Iyan an pinakamabungang panahon. Sa pagkomento sa kaugalean na ini, an Agosto 1, 1992 na An Torrengbantayan (w92-E 6/15), nagsabi: “Maninigo man niatong pag-adalan an satong teritoryo tanganing kita makapanira man, sabi ngani, sa oras na an kadaklan na tawo nasa harong asin maghihinanyog.” An maingat na pagmasid sa mga ugale kan sosyedad nin tawo sa nagkapirang nasyon nagpaheling na sa dakol na residensial na lugar, dawa ngani an mga tawo nasa harong kun kita minasongko nin amay sa mga Sabado asin Domingong aga, an kadaklan sa sainda bakong andam na akoon an satong mga pagdalaw sa panahon na iyan. Kun ini an kamugtakan sa saindong lugar, puede daw nindong liwaton an oras kan saindong mga pagsongko pagtaodtaod sa aga o sa hapon pa ngani? Ini marahay na paagi na mapaoswag an pagigin epektibo kan satong ministeryo saka ipaheling an konsiderasyon sa satong mga kataed, na ebidensia nin tunay na Kristianong pagkamoot.​—Mat. 7:12.

⁶ Sa Filipos 4:​5, pinagigirumdom kita ni apostol Pablo na maninigo niatong ‘ipaaram sa gabos na tawo an satong pagkamakatanosan.’ Kaoyon kan ipinasabong na instruksion na ini, gusto niatong magin timbang asin makatanosan sa satong mga pamamaagi mantang satong ginigibo an iinasignar sa sato na paghuhulit na may kaigotan asin entusiasmo. Habo niatong ‘magpogol sa pagtokdo sa publiko asin sa pagharongharong,’ alagad gusto niatong seguradohon na ginigibo niato an satong ministeryo sa harong-harong sa mga panahon na makatanosan asin mabunga. (Gibo 20:20) Arog kan mga parasirang idto sa Israel kan enot na siglo, kita interesado sa ‘paninira’ sa mga panahon na kita puedeng magin pinakamabunga, bakong sa mga panahon na nanonompongan niato na pinakakombenyente para sa satong sadiri.

⁷ Anong mga pagliliwat an puedeng magibo sa mga lugar kun saen an mga tawo habong songkoon nin amay sa aga? May mga grupo nin kamagurangan na nag-areglo na an mga maluwas makikabtang nguna sa ibang porma kan ministeryo, siring baga kan paghuhulit sa tinampo, lugar nin negosyo, o mga pagdalaw liwat, bago magharongharong sa residensial na mga lugar. An ibang kongregasyon iiniskedyul an mga oras kan pagtiripon bago lumuwas sa paglilingkod sa langtad pagtaodtaod sa aga, o sa alas 12:​00 nin odto pa ngani. Pagkatapos, an grupo minadiretso na sa pagharongharong asin naglilingkod sagkod sa enot na mga oras sa hapon. Sa nagkapirang teritoryo, an enot na mga oras sa hapon, imbes na aga, an tibaad pinakamarahay na panahon na magtiripon bago lumuwas sa paglilingkod sa langtad. An siring na mga pagliliwat puedeng makakontribwir na marhay sa nadugangan na pagigin mabunga sa pagharongharong.

⁸ Magin Mapagmansay Asin Mataktika: Mantang kinakaolay niato an mga tawo sa harong-harong, nakanunupar kita nin manlaenlaen na reaksion sa satong mensahe. May mga kagharong na naghihimate, an iba indiperente, asin an nagkapira tibaad parapakidiskutir o makiiwalon. Sa kamugtakan kan huri, sa pahina 7 kan Reasoning From the Scriptures, pinagigirumdom kita na kita dai naghihingoang “‘manggana sa mga pakikiargumento’ sa mga tawo na dai nagpapaheling nin paggalang sa katotoohan.” Kun antipatiko an kagharong, pinakamarahay na kita humale. Maninigo na dai niato noarin man kontrahon an mga tawo paagi sa pag-insistir na sinda makipag-olay sa sato o akoon an satong punto de vista. Dai niato ipinipirit an satong mensahe sa mga tawo. Dai iyan magigin makatanosan asin puedeng magin dahelan nin mga problema para sa ibang Saksi asin sa gibohon sa pankagabsan.

⁹ Bago pumoon sa sarong teritoryo, madonong na helingon an kard kan teritoryo kun igwang nakasurat na mga adres kan mga residente na nagsabi sa sato na dai sumongko. Kun may siring na mga adres, an kada parahayag na maghuhulit sa kalyeng iyan maninigong sabihan kun saen an dai sosongkoon. Mayo nin siisay man na maninigong magsadiring desisyon na songkoon an mga harong na ini na dai nin instruksion kan paraataman sa paglilingkod na gibohon iyan.​—Helingon an Hunyo 1994 An Satong Ministeryo sa Kahadean, “Hapot.”

¹⁰ Mapaooswag niato an satuyang pagigin epektibo paagi sa pagigin mapagmansay mantang kita naghaharongharong. Magin mapagmasid mantang kamo nagdadangadang sa sarong harong. Sirrado daw an gabos na kurtina? Mayo daw kamong nadadangog na may nagtatrabaho? Puedeng tanda ini na natotorog an mga nag-ookupar. Posibleng marhay na magkakaigwa kita nin mas mabungang pakikipag-olay sa kagharong kun kita masongko liwat pakalihis nin nagkapirang oras. Tibaad pinakamarahay na lihisan nguna an harong na ini, na isinusurat an numero kan harong. Puede nindong dumanan giraray an harong bago humale sa teritoryo o isurat nindo na masongko giraray kamo pakalihis nin nagkapirang oras.

¹¹ Puedeng lumataw an mga situwasyon na dian dai niato tinutuyong mapagmata an natotorog o madisturbo sia. Tibaad mairitar o maanggot pa ngani sia. Ano daw an maninigo niatong magin reaksion? Naghahatol an Talinhaga 17:​27: “An tawong may pakamansay malipot an espiritu.” Minsan ngani dai kita naghahagad nin dispensasyon para sa satong ministeryo, puede nanggad niatong sabihon na kita naghahagad na gayo nin dispensasyon na kita nagsongko sa oras na bakong kombenyente. Puede niatong magalang na ihapot kun baga mas kombenyente sia sa ibang panahon asin alokon na madalaw liwat. An sinserong kapahayagan nin personal na pagmakolog sa mahoyong tingog nakatatabang na kumalma an boot kan tawong iyan. (Tal. 15:1) Kun impormaran kita kan kagharong na regular siang nagtatrabaho sa relyibo sa banggi, puedeng iiba iyan sa kard kan teritoryo tangani na magibo sa angay na oras an masunod na mga pagsongko.

¹² Angay man na magmansay mantang hinihingoa niatong maghulit nin sirot sa satong teritoryo. Mantang dakol na tawo an mayo sa harong sa enot niatong pagsongko, kaipuhan niatong gumibo nin dugang pang paghihingoa na makaolay sinda tangani na ikahiras sa sainda an mensahe nin kaligtasan. (Roma 10:13) May mga report na nagsasabi na kun beses an mga parahayag nagsosongko sa iyo man sanang harong nin nagkapirang beses sa sarong aldaw sa paghihingoa na manompongan an mga tawo sa harong. Naririparo ini kan mga kataed. Puedeng magkaigwa nin negatibong impresyon na an Mga Saksi ni Jehova ‘pirmeng nagsosongko’ sa saindang kalye. Paano ini malilikayan?

¹³ Gumamit nin pakamansay. Kun minasongko giraray sa sarong harong na mayo nin tawo kan nakaagi, may mga nagpaparisa daw na igwa nang tawo sa harong ngonyan? Kun may mga surat o anunsio na naheheling sa buson o naheheling sa irarom kan pinto, posibleng marhay na an tawong iyan mayo pa sa harong asin an dugang pang pagsongko sa harong na iyan dai magigin mabunga sa panahon na ini. Kun dai nakakaolay an tawong iyan pakalihis nin pirang pagprobar sa laen-laen na oras nin aldaw, siring baga sa banggi, tibaad may posibilidad na makaolay an kagharong paagi sa telepono. Kun dai, an sarong tract o handbill puedeng maingat na iwalat sa pinto, nangorogna kun an teritoryo parate man na nakokobrehan. Tibaad makaolay an tawong iyan sa masunod na maghulit sa teritoryo.

¹⁴ Maninigo niatong likayan an halawig na mga pakikipag-olay sa pinto kun naooranan an kagharong. Kun palaogon, mag-ingat na dai maatian an salog. Gumamit nin marahay na paghusgar kun binabatok kamo nin ayam. Kun naghuhulit sa mga edipisyo nin apartment, magtaram nin maluway asin likayan an pagribok na nakadidisturbo sa mga nag-iistar asin nag-aanunsiar kan saindong presensia.

¹⁵ Magin Areglado Asin May Dignidad: Paagi sa marahay na pag-organisar malilikayan niato an pagkaigwa nin dakula, heling-heling na mga grupo na nagtitiripon sa teritoryo. An nagkapirang kagharong tibaad matakot kun may nagkapirang sasakyan na dumatong sa atubangan kan saindang harong na may dakulang grupo nin mga parahayag. Habo niatong magtao kan impresyon na “sinasakyada” niato an residensial na mga lugar. An mga areglo sa paghuhulit sa teritoryo pinakamarahay na gibohon sa pagtiripon bago lumuwas sa paglilingkod sa langtad. An saradit na grupo nin mga parahayag, siring baga nin sarong pamilya, daing gayo nakatatakot sa mga kagharong asin mas pasil na organisaron mientras na naghuhulit sa teritoryo.

¹⁶ An pagigin areglado naghahagad na maingat na bantayan kan mga magurang an gawe-gawe kan saindang mga aki mantang naghuhulit sa teritoryo. Maninigo na an mga aki magin pormal na marhay kun minaiba sa mga nasa edad na sa pinto. An mga aki pa dai maninigong togotan na magkawat o magparalagawlagaw, na nakakukua nin dai maninigong atension sa mga residente o nag-aagi.

¹⁷ Kaipuhan man an pagigin timbang manongod sa mga pagmeryenda. An Hunyo 1995 An Satong Ministeryo sa Kahadean, pahina 3, nagsabi: “Kun kita yaon sa langtad nin paglilingkod, puedeng mawaran kita nin mahalagang oras sa mga pagmeryenda. Alagad, . . . kun maraot nanggad an panahon, an pagpahingalo maparepresko asin matabang sato na magpadagos. Dakol, minsan siring, an gusto na magin sibot sa paghuhulit sa mga tawo asin dai na nguna makipagtipontipon sa mga tugang sa mga pagmeryenda sa panahon na itinagama para sa ministeryo.” Maski ngani an pagpondo para sa mga pagmeryenda personal na desisyon, narisa na kun beses, an darakulang grupo nin mga tugang na lalaki asin babae nagtataragboan sa sarong kapihan o restawran. Apuera sa oras na ginamit tangani na mapuestohan, an presensia nin sarong kadaklan puedeng ikatakot kan ibang parokyano. Kun beses, an mga eksperyensia sa paglilingkod sa langtad sa aga pinag-oorolayan nin makosog, asin puede ining makahale kan dignidad kan satong ministeryo patin makaraot sa pagigin epektibo kaiyan. Paagi sa pakamansay, puedeng malikayan nin mga parahayag an pagsurusuan sa sarong establisimiento asin pagkua nin dai kinakaipuhan na oras sa ministeryo.

¹⁸ Dakol an nakaeksperyensia nin marahay na mga resulta paagi sa pagdolok sa mga tawo saen man sinda manompongan​—sa mga tinampo, sa mga paradahan, sa mga parke, asin sa iba pang pampublikong mga lugar. Digdi man boot niatong magtao nin marahay na patotoo, bako sanang paagi sa satong mga tataramon kundi paagi man sa satong pagkamakatanosan. An mga parahayag sa kada kongregasyon maninigo na seguradohon na igalang an saindang mga linderos sa teritoryo tangani na dai sinda makaolang sa mga naglalakaw sa komersial na mga lugar asin parke o mga empleyado sa lugar nin mga negosyo, siring baga kan mga gasolinahan, na 24 oras na bukas. Tangani na seguradohon na ginigibo niato an satong ministeryo sa areglado, may dignidad na paagi, maghuhulit sana kita sa iinasignar sa sato na teritoryo apuera sana kun may espesipikong mga areglo na ginibo paagi sa Komite sa Paglilingkod kan Kongregasyon kan ibang kongregasyon, na tumabang sa sainda.​—Ikomparar an 2 Corinto 10:​13-​15.

¹⁹ An nagkapirang kongregasyon na may dakol na lugar kun saen posible an pagpapatotoo sa publiko inorganisar an mga lugar na ini na magin mga teritoryo. Dangan tinatawan nin kard kan teritoryo an sarong indibiduwal na parahayag o an sarong grupo. Pinapapasil kaini an mas epektibong pagkobre asin nalilikayan an kadakol na parahayag na maghulit nin durungan sa sasarong lugar, kaoyon kan prinsipyo sa 1 Corinto 14:​40: “Gibohon an gabos na bagay sa disente asin aregladong paagi.”

²⁰ An satong personal na itsura maninigo na pirmeng magin may dignidad asin nagrerepresentar sa mga ministro na nagdadara kan ngaran ni Jehova. Totoo man iyan sa mga kasangkapan niato. An luma nang mga bag nin libro asin tiriklop o maati nang mga Biblia nakararayo kan atension sa mensahe kan Kahadean. May nagsabi na an gubing asin pag-alinyar “sarong marikas na paagi nin pakikikomunikar kan sosyedad nin tawo na nagtatao nin impormasyon sa nakapalibot na mga tawo dapit sa kun siisay asin kun anong klaseng tawo kamo patin kun saen kamo nababagay sa areglo nin mga bagay.” Huli kaini, an satong itsura maninigo na magin bakong bagla ni daing kahusayan, bakong mapagpasikat ni sobra, kundi pirmeng “angay sa maogmang bareta.”​—Fil. 1:27; ikomparar an 1 Timoteo 2:​9, 10.

²¹ Sa 1 Corinto 9:​26, si apostol Pablo nagsabi: “An paagi kan sakong pagdalagan bakong daing kasiertohan; an paagi kan sakong mga pagsuntok bakong tanganing sumuntok sa doros.” Bilang pag-arog ki Pablo, determinado kitang magkaigwa nin epektibo, mabungang ministeryo. Mantang maigot kitang nakikikabtang sa pagpapatotoo bilang kabtang kan “hukbo nin mga doron” ni Jehova ngonyan, gamiton logod niato an Kristianong pagkamakatanosan asin pakamansay sa pagdara kan mensahe nin kaligtasan sa gabos sa satong teritoryo.