Gamiton an Saindong Panahon sa Kapakipakinabang na Paagi
1 An gabos na tawo parareho an panahon na magagamit kada semana. An kabtang na idinudusay niato sa pagpalakop kan maogmang bareta nangorognang mahalaga huli ta iyan panahon na ginamit sa pagliligtas-buhay. (Roma 1:16) Ipinaheheling niato an satong pagpahalaga digdi paagi sa pag-andam nin marhay para sa plinanong paglilingkod, pag-abot sa mga pagtiripon bago lumuwas sa paglilingkod na nasa oras, asin pagduman tolos-tolos sa teritoryo. Mas gusto niatong maghulit kisa maghalat. Huling si Jehova tinokdoan kita na “sa gabos na bagay igwa nin itinalaan na panahon,” kaipuhan na talagang gamiton niato sa kapakipakinabang na paagi an panahon na itinagama niato para sa ministeryo.—Ecl. 3:1.
2 Madonong na Maneharon an Saindong Panahon: Dakol na bendisyon an minadatong sa sato kun kita marigon na nangangapot sa iskedyul na nagtotogot para sa regular na pakikikabtang sa ministeryo sa langtad. Naturalmente, an marahay na mga bunga na nakakamtan niato sa ministeryo maninigong proporsionado sa kadakolan nin panahon na ginamit sa paglilingkod. Paagi sa nagkapirang saradit na pagliliwat sa satong pinagkatodan, puede daw kitang magdusay nin orog pang panahon sa paglilingkod sa langtad? Halimbawa, pakatapos nin pagmamagasin kun Sabado, puede daw kitang gumamit nin dagdag pang oras sa nagkapirang pagdalaw liwat? Kun kita nataodtaod na sa ministeryo sa langtad kun Domingo, puede daw kitang gumamit man nin nagkapirang oras sa mga pagdalaw liwat o pagkondukta nin pag-adal sa Biblia? Mahihimo daw na ibanan nin pagpapatotoo sa tinampo an satong pagharongharong? Sa mga ini o sa iba pang paagi, puede niatong mapaoswag an satong paglilingkod.
3 Kun kita nasa ministeryo, puede kitang mawaran nin mahalagang oras kun kita bakong maingat. Siempre, kun masakit na marhay an kamugtakan nin panahon, an halipot na pahingalo makarerepresko sa sato asin makatatabang sa sato na magpadagos. Minsan siring, magin timbang huling an mga pahingalong iyan tibaad dai man pirmeng kaipuhan.
4 Kan nakaagi pa sanang mga taon paorog nang paorog na nagin depisil na manompongan an mga tawo sa harong. Tangani na mapangganahan an situwasyon na ini, dakol na parahayag an nagpapatotoo sa mga pinto sa laen-laen na oras kan aldaw. Taano ta dai probaran na magpatotoo kun pabanggi na o sa amay na banggi?
5 Mas marahay kun kita dai nag-eerestoryahan mientras na naghuhulit sa tinampo. Imbes, magsuruhaysuhay asin dolokon an mga tawo tangani na makapoon nin mga pakikipag-olay sa sainda. Sa siring mas epektibong mamamanehar an oras asin orog pang kagayagayahan an makakamtan sa paghuhulit.
6 Aprobetsaran an mga Oportunidad na Makapatotoo: Kan sabihon nin sarong kagharong na dai sia interesado, naghapot an sarong Saksi kun igwa nin iba pa sa harong na puede niang makaolay. Ini nagbunga nin pakikipag-olay sa kagsadiri kan harong, na dakol nang taon na naghehelang asin sa kadaklan na panahon sia nakahigda. An paglaom na sinasabi sa Tataramon nin Dios pinakosog giraray an saiyang interes sa buhay. Dai nahaloy nakabangon na sia, nag-aatender na sa mga pagtiripon sa Kingdom Hall, asin ihinihiras na sa iba an saiyang bagong manompongan na paglaom!
7 An sarong tinedyer na tugang na babae iinaplikar an suhestion na maglingkod sa langtad durante kan oras bago an Pag-adal sa Libro kan Kongregasyon. Sa enot niang pinto, nanompongan nia an sarong 13 anyos na aking babae na atentong naghinanyog asin nagkua nin babasahon. Kan sumunod na aldaw sa eskuelahan, naheling kan hoben na tugang na babae an iyo man sanang aking babae na ini. Dai nahaloy pakatapos kaiyan, inalok nia siang mag-adal sa Biblia, asin inako iyan kan aking babae.
8 Gibohon Iyan na De Kualidad na Oras: An regular na pakikikabtang sa paglilingkod sa langtad nakatatabang sa sato na pataluboon an satong mga abilidad sa pag-atubang kan maogmang bareta. Puede daw nindong paoswagon an saindong abilidad na makapoon nin pakikipag-olay sa pinto paagi sa paggamit nin mas epektibong introduksion? Puede daw kamong magin orog na ekspertong paratokdo kun nagkokondukta nin pag-adal sa Biblia sa harong? Sa paggibo kaiyan, talagang magagamit nindo sa kapakipakinabang na paagi an saindong oras sa paglilingkod asin magigibong orog na mabunga an saindong ministeryo.—1 Tim. 4:16.
9 Mantang “nainaan na an panahon na natatada,” an satong buhay maninigong pano nin Kristianong gibohon. (1 Cor. 7:29) An pagtagama nin panahon para sa paghuhulit maninigo na magin pangenot sa satong lista nin mga prioridad. Magkaigwa kita nin mabunga, maigot na pakikikabtang sa ministeryo. An panahon makangangalas na kayamanan na itinao sa sato ni Jehova. Pirmeng gamiton iyan sa madonong asin kapakipakinabang na paagi.
[Kahon sa pahina 4]
Konsideraron an mga Suhestion na Ini:
◼ Mag-abot sa mga pagtiripon bago lumuwas sa paglilingkod na nasa oras.
◼ Sa rasonableng dahelan, papagdanayon na sadit an mga grupong maghuhulit.
◼ Likayan an mga pag-atraso sa pagduman sa teritoryo.
◼ Maghulit sa teritoryo kun nasa harong an kadaklan na tawo.
◼ Maghulit nin solo kun beses kun daing peligro na gibohon iyan.
◼ Gumibo nin mga pagdalaw liwat sa pinakaharani sa teritoryong hinaharongharong.
◼ Magdanay na sibot sa paglilingkod kun an iba sa grupo nahahaloy sa sarong pinto.
◼ Kun posible, depende sa mga kamugtakan, lumuwas nin labi sa sarong oras.