“Banal na Hustisya” na Pandistritong Kombension sa 1988
1 Si Jehova Dios namomoot sa hustisya asin katanosan. (Sal. 33:5) An saiyang lingkod na si Eliu nagsabi: “Kun dapit sa Makakamhan sa gabos, dai niato sia inaabot; sia mamuraway sa kapangyarihan, asin dai nia pagmemenuson an hustisya asin abundang katanosan.”—Job 37:23.
2 Tunay na dai linilingawan ni Jehova Dios an mga inhustisya na ginibo sa kinaban na ini. Mantang sia Dios nin dai nagliliwatliwat na moral na mga pamantayan, makalalaom kita na dai nia totogotan sagkod lamang an katampalasanan ngonyan. (Ikomparar an Isaias 14:3-8.) An totoo, an hula sa Biblia nagtotokdo sa satong panahon bilang an huring mga aldaw kan maraot na kinaban na ini. Kaya kaipuhan na ipaheling niato paagi sa satong mga gibo na kita namomoot sa katanosan asin banal na hustisya patin kita nagdadanay na siblag sa kinokondenar na mga gibo kan kinaban na ini.
3 Hinahalat nin mga Saksi ni Jehova an “Banal na Hustisya” na Pandistritong mga Kombension na nakaiskedyul sa 1988. Sa pandistritong mga kombension kita talagang tinotokdoan ni Jehova. Kita minaatender na igwa kan kaisipan na ipinahahayag sa ipinasabong na pamibi sa Salmo 119:33: “Tokdoi ako, O Jehova, sa dalan kan saimong mga kabotan, tangani na iyan maotob ko sagkod sa katapusan.” Tunay nanggad, an mga tataramon na ini nagpapahayag kan saboot kan gabos na nagdusay na lingkod ni Jehova ngonyan.
4 ATENDERAN AN GABOS NA SESYON: An “Banal na Hustisya” na Pandistritong mga Kombension malawig nin apat na aldaw. Nakapagplano na daw kamo na umatender sa gabos na sesyon? Poon sa enot na sesyon sa Huwebes ala 1:30 n.h. sagkod sa pantapos na pamibi sa mga alas 4:00 n.h. sa Domingo, may iaatubang na importanteng impormasyon na mahalaga sa satong espirituwal na salud. May laen na kabtang nin banal na hustisya na itatampok kada aldaw. An programa may kaibang mga pahayag, demonstrasyon, asin drama. Ginibo man an areglo na an mga misyonero makasongko sa sadiri nindang nasyon asin umatender nin pandistritong kombension kaiba kan saindang pamilya asin mga katood, asin an sarong espesyal na kabtang kan programa manongod sa mga aktibidad kan mga misyonero. Sa nagkapirang kombension, an mga misyonero iimbitaran na ihiras sa sato an saindang mga eksperyensia. Kun siring, dai paglipasan minsan an sarong sesyon.
5 Nasasabotan mi na ini tibaad magkaipo na kamo gumibo nin personal na pagsasakripisyo asin mga pagliliwat sa saindong iskedyul. Tibaad kaipuhan na kaolayon nindo an saindong among tanganing makaatender sa kombension. Kun iyan odok nindong ipamimibi asin gumibo kamo nin odok na paghihingoa na makaatender, tunay na bebendisyonan kamo ni Jehova.—Mat. 5:3.
6 Pagmaigotan na umabot nin amay kada aldaw asin may tukawan na bago pumoon an mga sesyon. Ini matao sato nin oportunidad na makapakiasosyar sa mga tugang na lalaki asin babae hale sa ibang lugar. (Roma 1:12) Matogot man iyan saindo na umiba sa pag-omaw ki Jehova paagi sa pag-awit, na napakahalagang kabtang kan satong pagsamba, asin makiiba sa pambukas na pamibi. Horophoropon man na an mga nagtutukaw harani saindo magpapasalamat na dai nindo naistorbo an saindang pagdangog sa programa huli sa pag-abot nin huri. An Kristianong pagkamoot asin konsiderasyon, kaiba an paggalang ki Jehova asin sa espirituwal na mga bagay na itinatagama nia, maninigong magmotibar sato na gibohon an bilog niatong makakaya na umabot nin nasa oras.
7 Natawan na kamo nin impormasyon manongod sa kombension na dian nakaasignar na umatender an saindong kongregasyon. Dakulang pagpaplano an ginibo tanganing masierto na igwa nin bastanteng tukawan, literatura, kakanon, asin iba pang probisyon para sa gabos. Nasasabotan niato na an mga kamugtakan tibaad dai tumogot sa nagkapira na umatender kun saen sinda iinasignar. Tibaad an iba kaipuhan na tumabang sa mga paryentes sa ibang lugar. Minsan siring, sagkod sa mapupuwede, an pagkooperar nindo sa pag-atender sa kombension na naasignaran kan saindong kongregasyon makatatabang na dai magsurusuan.
8 MAG-ATENTO SA SAINDONG NADADANGOG: “An mga tataramon ni Jehova dalisay na mga tataramon, siring sa pirak na dinalisay sa horno kan daga, na pinalinaw nin makapitong beses.” (Sal. 12:6) An dakol sa “dalisay na mga tataramon” nin Dios madadangog sa “Banal na Hustisya” na Pandistritong Kombension. An impormasyon magigin espesyal na impormasyon para sa banwaan ni Jehova, para sa mga dusay sa saiya, na boot na makapaogma sa saiya, na ‘nagtatakig sa saiyang tataramon.’ (Isa. 66:5) Sa gabos na tawo sa daga, kita mapalad nanggad na matokdoan ni Jehova.—Isa. 54:13.
9 An paghinanyog nangangahulogan nin talagang pag-atento paagi sa satong isip asin puso, sa satong mga talinga asin kakayahan nin pagsabot. Kaipuhan na hinanyogon niato asin dangogon “an tataramon ni Jehova.” (Jer. 2:4) An madadangog niato may kaibang tamang kaaraman na mapahiwas sa satong pagsabot asin mapararom sa satong apresasyon. Makakadangog kita nin impormasyon na maparigon sa satong pagtubod asin mapakosog sa satong paglaom. Maako kita nin hatol asin disiplina na mamomoton na itinagama para sa satong kapakinabangan. Dakol na panahon an ginamit sa pagsiyasat asin pag-andam kan programa. Kun siring, kaipuhan na kita maghinanyog asin magpuka sa sinasabi sato kan Tataramon ni Jehova. Sa siring kita personal na makikinabang asin magagamit an impormasyon na ini sa pagtabang sa iba.—Tal. 18:15.
10 Mantang an pangenot niatong katuyohan sa pag-atender sa kombension umako nin espirituwal na paggiya asin pagpakosog, iplano nindo na umabot nin amay tanganing maasikaso an mga bagay na nagkakaipo nin atension, arog baga kan pagkua nin mga tiket, dangan tumukaw na bago pumoon an programa. Paagi kaini magigin pamugtak an boot nindo, na an saindong isip dai naiistorbo nin pagkahadit sa mga bagay na mayo nin direktang koneksion sa programa.
11 Seguradohon na bastante an torog nindo kada banggi tangani na kamo presko pagkaaga asin biyong makapagkonsentrar sa programa kan aldaw. Minsan ngani an oras kan kombension nagtatao nin marahay na oportunidad na makaolay an mga dating katood asin magkaigwa nin maogmang pag-iribaiba, kun kita magpipirot sa pakiestoryahan sa mga katood, tibaad pagkaaga bako nang alisto an satong isip tanganing lubos na makinabang sa programa.
12 BAUTISMO: An pahayag sa mga kandidato sa bautismo itatao sa Sabadong aga. An bautismo panluwas na simbolo na an saro nagdusay na nin daing kondisyon kan saiyang sadiri ki Jehova Dios. An kabtang na ini kan programa perming saro sa tampok na mga kabtang nin pandistritong kombension. Kita gabos nakikinabang paagi sa maingat na paghinanyog asin paghorophorop sa sadiri niatong relasyon ki Jehova. Dugang pa, nakikiogma kita sa mga magpapabautismo.
13 An mga nagpaplanong magpabautismo sa saro sa mga pandistritong kombension maninigong siertohon na paaramon an nangengenot na paraataman bago pa an kombension tanganing magkaigwa nin igong panahon na repasohon an mga hapot sa librong Our Ministry. Maninigong magdara nin mabining pankarigos asin tuwalya an kada saro na nagpaplanong magpabautismo.—Helingon an An Satong Ministeryo sa Kahadean, Oktubre, 1987, pahina 3, parapo 6.
14 An mga kandidato sa bautismo maninigong maghingoa na yaon na sa saindang tukawan sa itinagamang lugar bago pumoon an programa sa Sabadong aga. Pagkatapos kan pahayag sa bautismo asin pamibi kan espiker, an tsirman kan sesyon matao nin halipot na instruksion sa mga kandidato sa bautismo dangan mapaawit. An gabos matindog sa pag-awit. Bago awiton an ultimong berso, gigiyahan kan mga attendant an mga kandidato sa bautismo sa lugar nin pagbautismo o sa mga lunadan na magdadara sa sainda duman, mantang an iba sa mga presente tatapuson an awit.
15 KUMUA NIN NOTA: Apuwera sa saindong Biblia asin songbook, dai paglingawan na magdara nin susuratan asin nin pansurat. Tibaad dai niato nagin ugale an pagkua nin nota sa mga pagtiripon kan kongregasyon huli ta an kadaklan na pahayag asin demonstrasyon kinua sa materyal na mababasa kan gabos sa kongregasyon. Minsan siring, laen man an paghinanyog sa impormasyon na iinaatubang sa pandistritong kombension. Minsan ngani an ibang pahayag pag-abot nin panahon maluwas sa mga publikasyon, an iba dai. Dawa kun an gabos na pahayag iimprentahon sa huri, igwa pa man giraray nin darakulang pakinabang kun kamo makua nin halipot, makahulogan na mga nota.
16 Primero, an pagkua nin nota nagseserbing pantabang sa pagkonsentrar. Ilaen an pangenot na mga punto kan espiker asin an pangenot na mga teksto o bagong ideya na tibaad iatubang. Dangan isurat ini sa halipot. Parate na an saro o duwang sentence igo na para sa sarong pangenot na punto. Paagi sa pagsunod sa suhestion na ini, sierto na maoswag an saindong pagkonsentrar. Mas kadikit an posibilidad na pabayaan nindo an saindong isip na magbiyahe o maistorbo. Masasangkapan man kamo na makinabang sa pagrepaso kan mga tampok na kabtang kan kombension kaiba an saindong kongregasyon sa masunod na semana.
17 May kaiba daw kamong mga aki o tin-edyer? Kun siring taano ta dai iareglo na sinda kumua man nin nota oyon sa saindang edad asin abilidad? Ipaaram sa pamilya na plano nindong repasohon an pirang pangenot na punto na pinalataw kan mga espiker pagpuli nindo sa harong o sa saindong dadagusan. An saradit pang aki puwedeng dagkahon na isurat an gabos na tekstong sinitar o risahon kun pirang beses nindang nadangog na isabi kan espiker an pangenot na mga tataramon o an tema kan pahayag. Marahay na an mga aki makanood na mag-atento sa Kristianong mga pagtiripon. Tinatabangan nindo sinda na magtogdok nin marigon na pundasyon para sa ngapit.—Deut. 31:12; Efe. 6:4.
18 MARAHAY NA GAWE: Taon-taon pagkatapos kan satong mga pandistritong kombension, parate kitang nakareresibi nin marahay na mga komento manongod sa pagkaareglado asin marahay na gaweng naheling. An mga nagmamasid parateng nagkokomento manongod sa malinig na itsura pareho nin mga may edad na asin nin mga aki, apuwera sa katoninongan asin pagkasararo kan mga tugang. Alagad taano ta nasasambitan niato ini? Huli ta nakapakokosog na maaraman na, kun kita nagtatao nin marahay na halimbawa, iyan namamasdan asin inaapresyar nin iba. (1 Ped. 2:12) Alagad, mas mahalaga, iyan nagtatao nin kaomawan sa Dios. Boot niatong tawan nin onra si Jehova sa tataramon asin gibo, asin mantang an mga tawo puwedeng husgaran an organisasyon asin pati an Dios na satong sinasamba basado sa satong gawe, boot niatong perming risahon an satong gawe.
19 Igwa pa nin nagkapirang bagay na kaipuhan na tawan niato nin atension tangani na kita lubos na ‘magliwanag siring sa mga ilaw,’ nangorogna kun kita mayo sa lugar kan kombension, arog baga sa mga restawran asin dadagusan.—Fil. 2:15.
20 Enot, kumusta an ginigibo niato sa pagreserba nin mga tukawan na dai man kaipuhan? Narisa an pag-oswag sa bagay na ini, asin huli kaini tinatawan mi kamo nin komendasyon. Minsan siring, kaipuhan pa man giraray na tawan niato nin atension an bagay na ini, ta an iba inaabuso an areglo. Tabi girumdomon na AN MGA TUKAWAN PUWEDENG IRESERBA SANA PARA SA SAINDONG PAMILYA ASIN SA SIISAY MAN NA TIBAAD KAIBA NINDO SA PAGBIYAHE. Natural sana na magmawot na makataed an mga kaiba niato, asin linalaoman na an magpapamilya matukaw nin taraed. Alagad tabi dai magreserba nin tukawan para sa iba. Parate na an mga katood nagsasadiring maghanap nin tukawan, asin an mga ekstrang tukawan na ireneserba nindo dai nagagamit. Makapagpapaheling kita nin apresasyon sa kombension asin nin konsiderasyon sa iba paagi sa pagkuyog sa mga giyang ini.—Mat. 7:12.
21 Bilang nagdusay na mga lingkod, an satong gawe maninigong marahay SA GABOS NA ORAS. An marahayon na gawe nangorognang naririsa sa darakulang katiriponan, asin an ngaran ni Jehova napamumuraway kan siring na gawe. Minsan siring, an maraot na gawe asin pagigin daing konsiderasyon nin nagkapira puwedeng makalanghad sa ngaran ni Jehova asin sa saiyang banwaan. An espiritu kan kinaban naririsa sa nagkapira pagpuli ninda sa saindang dadagusan. Sa kombension, naheheling niato nin malinaw kun ano an maninigong Kristianong personalidad, pero an iba, pagkahale sa lugar kan kombension, garo nalilingawan an saindang naheling asin nadangog sa programa. (Sant. 1:22-24) An presensia niato sa kombension asin saen man, saka an satong gawe asin pagbobolos, nagpapatotoo manongod sa sato asin sa Dios na satong sinasamba.
22 Sa kombension mismo, itorohok niato an satong isip sa espirituwal na mga bagay, bakong sa negosyo o mga planong pagkakakuwartahan. Boot ming ipagirumdom sa gabos na dai totogotan an pagpabakal nin personal na mga bagay sa laog kan lugar kan kombension, asin mga bagay sana kan Sosyedad an totogotan sa bookroom o ibang departamento kan kombension.
23 Girumdomon man na an refreshment sirrado sa oras kan sesyon, kaya dapat na kuanon na an kaipuhan nindo sa pag-oltanan nin mga sesyon tanganing dai nin istorbo sa oras kan programa.
24 Narisa sa nagkapirang kombension na, pagkahale kan mga nag-atender, kadakol kan kapidasong papel, patos nin dulse, asin mga lalagan, na nawalat sa mga tukawan. Magwawarak daw kita nin siring na mga bagay sa satong Kingdom Hall? Kun siring bako daw na maninigo kitang magin malinig asin areglado, na pinupurot an satong basura asin iinaapon iyan sa tamang lalagan o ipuli iyan tanganing duman iapon? An mga magurang sinasadol na tokdoan an saindang mga aki na likayan an pag-apon nin ati sa istadyum o hall.
25 An ultimong maboot na pagirumdom may koneksion sa pag-orolay-olay sa oras kan mga sesyon. Siyempre, naoogma kitang maheling an mga katood sa kombension, alagad maninigong magin pangenot sa satong isip an paggalang ki Jehova asin konsiderasyon sa satong mga tugang. Kun siring, dai niato mamawoton na man-istorbo sa iba sa oras kan programa. Kun kamo kaipuhan na humale sa saindong tukawan huli sa mahalagang dahelan, gibohon iyan sa pinakamadali asin pinakatoninong na paaging mapupuwede. Siring man, mantang may programa, mayo nin maninigong mag-estoryahan sa mga pasilyo. Kita yaon duman tanganing maghinanyog asin makanood.—Lucas 8:18.
26 MGA PANGANGAIPO SA PAGKAKAN: An mga probisyon para sa kakanon asin inomon kapareho kan yaon sa pandistritong mga kombension sa nakaaagi pa sanang mga taon. Magkakaigwa nin mga tiket sa kombension, na ₱10.00 an saro, na binangabanga sa 25 sentimos.
27 PAGBOBOLUNTARYO: Minsan ngani mas kadikit na boluntaryo an kaipuhan ngonyan na magtrabaho huli sa paggibong simple sa mga prosedimiento sa kombension, kaipuhan pa man giraray an tabang nin mga boluntaryo para sa marahay na dalagan kan kombension. Puwede daw kamong makikabtang? An nagkokoordinar kan kombension sa saindong kongregasyon makareresibi nin impormasyon na ilinilista an mga departamento na nagkakaipo nin tabang, asin ipaaaram nia ini sa kongregasyon. Puwede kamong magboluntaryo paagi sa saiya. An mga aki na mayo pang 16 anyos an edad na magtatrabaho kaipuhan na may kaibang magurang o nag-aasikaso.
28 Kakaipuhanon an mga boluntaryo sa mismong panahon na kan kombension. Maghapot sa Volunteer Service Department pag-abot tolos nindo sa kombension. Dawa kun makapagtrabaho kamo sa saro sanang kabtang kan kombension, pasasalamatan an saindong paglilingkod.
29 RECORDING: Garo baga napapanahon nang linawon an paninindogan kan Sosyedad manongod sa paggamit nin video equipment asin audio equipment. Minsan ngani dai ipinangangalad an paggamit sa siring na mga kasangkapan, minalataw na kaipuhan na magkaigwa nin kontrol asin limitasyon. An mga attendant maninigong mag-alisto na an mga naggagamit nin video camera asin audio recorder dai makaistorbo sa iba o ikarayo an atension sa programa. An mga tugang na naggagamit nin siring na kasangkapan maninigong makikooperar sa mga attendant asin magurang na nangangataman asin bakong sadiri sana an panigoan. An siring na mga kasangkapan dai maninigong ibugtak sa mga agihan o pinto. Dai maninigong ikonektar an siring na mga kasangkapan sa public address system o mga saksakan nin koryente, ni totogotan man an mga floodlight. Sa nagkapirang kaso, an siring na kasangkapan puwedeng ibugtak sa lugar na iyan dai makaiistorbo sa mga nagdadangog, arog baga sa likod.
30 KONKLUSYON: May marahay na mga dahelan kun taano ta gusto niatong magin presente sa “Banal na Hustisya” na Pandistritong Kombension na duman masasamba niato si Jehova kaiba an rinibo niatong tugang. Si propeta Isaias nagsabi na an mga lingkod ni Jehova “dai magugutom, ni mapapaha pa man sinda, ni tatamaan sinda nin nakapapahang init o aldaw. Huli ta an Saro na naheherak sa sainda gigiyahan sinda, asin sa mga burabod nin tubig dadarahon nia sinda.” (Isa. 49:10) Tunay nanggad, an banwaan ni Jehova dai nagugutom sa espiritu o napapaha sa katotoohan. Iyan an dahelan na ikinaoogma niato an oportunidad na magtiripon sa taon na ini para sa “Banal na Hustisya” na Pandistritong mga Kombension.
[Kahon sa pahina 6]
Mga Pagirumdom sa Pandistritong Kombension
DADAGUSAN: Mapadara kami nin mga pormang Room Request sa kada kongregasyon. An mga nagkakaipo nin dadagusan maninigong magllenar sa saro sa mga pormang ini asin itao iyan sa nagkokoordinar kan kombension sa saindong kongregasyon. Ririsahon nia iyan asin pipirmahan, dangan ipadadara sa Watch Tower Convention sa saro sa mga direksion na nasa ibaba:
Disyembre 22-25, 1988
Ilagan, Isabela: c/o Isidro Balmaceda, Baculod, Ilagan, 3300 Isabela.
Laoag City: c/o Jovencio Gamiao, 20 V. Lagasca Street, 2900 Laoag City.
Quezon City (1): P.O. Box 2044, 1099 Manila.
Marikina, MM: Kingdom Hall, 273 Molave Street, Concepcion, 1800 Marikina, Metro Manila.
Lucena City: c/o Emilio Pascua, Employees Subdivision, Gate 1, 4301 Lucena City.
Puerto Princesa City: Kingdom Hall, Malvar Street, 5300 Puerto Princesa City.
Masbate, Masbate: c/o Yolando Alburo, 56-K Tara Street, Masbate, 5400 Masbate.
Iloilo City: 65 Escarilla Subdivision, Mandurriao, 5000 Iloilo City.
Cebu City: c/o Parcon’s Machine Shop, Bagumbayan Street, 6000 Cebu City.
Tacloban City: 185 M. H. del Pilar Street, 6500 Tacloban City.
Davao City: Kingdom Hall, Corner Lopez Jaena and F. Torres Streets, 8000 Davao City.
Buenavista, Agusan del Norte: c/o Samuel Tabinas, Montillano Street, Buenavista, 8601 Agusan del Norte.
Dipolog City: c/o Leoncio Martin, 097-E Magsaysay Street, 7100 Dipolog City.
Tantangan, South Cotabato: c/o Oscar Presas, Mangilala, Tantangan, 9510 South Cotabato.
Disyembre 29–Enero 1, 1989
Tuguegarao, Cagayan: c/o Nolia’s Beauty Parlor, 77 Gonzaga Street, Tuguegarao, 3500 Cagayan.
Agoo, La Union: c/o Edgar Rivera, Bubblebee Burgerland, Agoo, 2504 La Union.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
Quezon City (2): P.O. Box 2044, 1099 Manila.
Mabalacat, Pampanga: c/o Generoso D. Canlas, 142 MacArthur Highway, Dau, Mabalacat, 2010 Pampanga.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Tagbilaran City: c/o Felix Acma, 44 R. Palma Street, 6300 Tagbilaran City.
Bacolod City: c/o Serafin Sabordo, 68 Mabini Street, 6100 Bacolod City.
Zamboanga City: 541 San Jose Road, Baliwasan, 7000 Zamboanga City.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
General Santos City: Kingdom Hall, 8 Siniguelas Street, 9500 General Santos City.
Cagayan de Oro City: c/o Nicolas Reymundo, Jr., 52 Vamenta Blvd., Carmen, 9000 Cagayan de Oro City.
Enero 5-8, 1989
Urdaneta, Pangasinan: c/o Manantan Technical School, Urdaneta, 2428 Pangasinan.
MGA ORAS NIN PROGRAMA: Sarong kadonongan asin pagpaheling nin magalang na pag-apresyar na kita yaon na sa satong tukawan pagpoon kan programa. Sa gabos na siudad nin kombension, an programa poponan nin musika, dangan awit asin pamibi sa Huwebes, ala 1:30 n.h. asin an mga sesyon matatapos sa ala 5:10 n.h. An programa sa Biyernes mapoon sa alas 8:20 n.a. asin matatapos sa alas 4:40 n.h. An programa sa Sabado mapoon sa alas 8:20 n.a. asin matatapos sa alas 4:50 n.h. Sa Domingo an programa mapoon sa alas 8:30 n.a. asin matatapos mga alas 4:00 n.h. An pahayag-publiko sa Domingo mapoon paagi sa awit asin pamibi sa alas 2:00 n.h.
ESPESYAL NA MGA MITING: May gigibohon na pakipagmiting sa gabos na regular asin espesyal payunir saka mga nagbibiyaheng paraataman sa alas 11:15 n.a. sa Biyernes, mantang an pakipagmiting sa gabos na kamagurangan gigibohon sa alas 11:15 n.a. sa Sabado. An mga lugar kan mga miting na ini ipaiisi sa plataporma.
PIONEER IDENTIFICATION: An gabos na regular asin espesyal payunir, saka nagbibiyaheng mga paraataman kaipuhan na darahon sa kombension an saindang Identification and Assignment card (S-202). An mga nasa lista poon kan Hulyo 1, 1988 o bago kan petsang iyan puwedeng umako nin halagang ₱60.00 na tiket sa kombension basta ipresentar an saindang ID card sa sarong kombension na iyan sana. Ingatan an card na garo kuwarta. Dai iyan masasalidahan sa kombension. An ano man na regalong publikasyon o iba pang literatura sa halaga sa payunir makukua nin mga payunir sa bookroom basta ipaheling an saindang ID card.
LAPEL CARDS: An mga card na ini itinatagama bilang paagi na ikapaisi an kombension patin gibohon na pasil an pakamidbid sa satong mga tugang na nag-atender. Sa katuyohan na ini, tabi gamiton an lapel card sa kombension patin kun nagbibiyahe pasiring asin papuli hale sa kombension. Ini maninigo nindong kuanon paagi sa saindong kongregasyon ta iyan dai makukua sa mga kombension. An lapel card 15¢ an saro asin an celluloid holder ₱1.00 an saro. (Pasabot sa sekretaryo: An lapel card maninigong pedidohon sa Special Order Blank for Forms. Kun ini dai nagibo, magpadara na ngonyan kan regular na S-14 na pedido para kaini.)
PATANID: Saen man kamo umatender, bantayan an saindong mga dara-dara sa gabos na oras. Kun kamo may kotse, seguradohon na iyan barat asin dai magwalat nin ano man na mahalaga sa napaparadang kotse. Saro pa, mag-ingat kamo sa mga parahabon asin mandurukot na perming yaon sa darakulang katiriponan. Kabale digdi an dai pagwalat nin ano man na may halaga sa mga tukawan sa kombension na mayo nin nagbabantay. Dugang pa, nabareta na may orog na peligro na maholog sa mga hagyanan asin rampa kun an mga tugang na babae haralangkaw an takon kan sapatos. Tabi magmaan kamo.