Pag-aatubang kan Maogmang Bareta—Sa Tabang kan Espiritu ni Jehova
1 Tanganing magin mapanggana sa ministeryo sa Kahadean, kaipuhan niato an paggiya asin bendisyon ni Jehova. Kaipuhan na arangon niato an tabang kan banal na espiritu sa satong aktibidad.—Luc. 11:13.
2 Kun nagpapatotoo sa nagkapirang klase nin tawo, tibaad kaipuhan kitang magin andam nanggad. (Ikomparar an 1 Corinto 2:1-5.) Alagad tatabangan kita kan espiritu nin Dios kun hahagadon niato iyan, asin ikapahahayag niato an katotoohan nin tama asin klaro.
3 An banal na espiritu magtatao sato kan kinakaipuhan na kapusoan na itaram an katotoohan “sa gabos na klase nin tawo.” (1 Tim. 2:3, 4; 1 Tes. 2:2) Siyempre, an pagigin mapuso dai nangangahulogan na kita magigin dominante o mapan-angat sa satong hiro-hiro.
PATALUBOON AN MGA BUNGA NIN ESPIRITU
4 Si apostol Pedro nagsasabi na kun nagtataram, maninigo kitang magkaigwa nin “mahoyong boot asin hararom na paggalang.” (1 Ped. 3:15) An kahoyoan sarong bunga kan espiritu asin nangorognang mahalaga kun an kaolay niato mga tawong bakong rasonable. An iba pang bunga kan espiritu makatatabang man sa pag-atubang sa masakit na mga kamugtakan. (Gal. 5:22, 23) Dai niato maninigong ibilang na personal na insulto an paghabo nin nagkapira. Imbes, girumdomon na tibaad dai ninda nasasabotan an halaga kan mensahe. An pagkaigwa kan kaisipan na ini matabang sato na magin mahoyo asin magalang. Kun maninigo, magwalat nin maboot na tataramon sa paghale. Ini puwedeng magkaigwa nin kapakipakinabang na epekto sa mga tawo na bakong marahay an boot.—Tal. 15:1.
5 Kun nasa ministeryo kita pinagmamasdan nin iba. An satong pag-orolay asin hiro-hiro maninigo na perming dai nin katatsaran. Bakong gabos nag-aapresyar sa satong gibohon. An dakol habong maghinanyog. Dai manluya an boot. Girumdoma na an hinahanap niato mga arog-karnero. (Mat. 10:12-14) An satong mga hiro-hiro sa paglilingkod sa langtad maninigong magtaong-onra sa Dios paagi sa pagpaheling kan mga bunga kan saiyang espiritu, asin ini tibaad makapalomoy sa puso nin nagkapira.—2 Cor. 6:3.
6 Kun an kaolay niato talagang sibot, tibaad halipot sana an masabi niato. Alagad an satong pagigin makonsiderasyon tibaad magbunga nin mas mainit na reaksion sa sumunod na may dumalaw na Saksi. An espiritu nin Dios matabang sato na magpaheling nin tunay na pagkamoot asin magin matinios asin maboot. Kita naoogma na an Dios huli sa saiyang pagkaherak nagtatao sa mga tawo nin dakol na oportunidad na makadangog, na an resulta an iba sa huri minatubod.—1 Cor. 13:4.
7 Mantang tinotogotan niato na an espiritu nin Dios gumiya sa satong mga paghihingoa, iaatubang niato an mensahe sa paagi na nakaaagyat sa rasonableng mga tawo. Gibohon na pasohan na “masamnohan . . . an katokdoan kan satong Paraligtas, an Dios, sa gabos na bagay.”—Tito 2:10.