Tabangan an mga Bagohan na Magkomento sa Pagtiripon
1 Nakaoogma nanggad na madangog an sarong inaadalan sa Biblia na tumao kan enot niang komento sa Kingdom Hall! Iyan nagpapatunay nanggad na talagang pinangangaptan na kan bagohan an katotoohan. Kaipuhan na marealisar nin mga bagohan na kaipuhan an pagpahayag sa publiko. Iyan pruweba nin pagtubod na nagdadara sa kaligtasan.—Roma 10:10.
2 Si Jesus nagsabi: “An gabos na natokdoan sa sangkap na paagi makaaarog sa saiyang paratokdo.” (Lucas 6:40) Ini nangangahulogan na matotokdoan niato an mga bagohan na magkomento sa pagtiripon paagi sa pagkomento niato mismo. Tokdoan sinda na an pag-adal maninigong gibohon sa katuyohan na gamiton an kaaraman sa pagtiripon asin sa langtad saka sa paggiya sa personal na buhay.
3 An ibang bagohan tibaad mag-alangan, na an saboot dai ninda kayang magkomento nin arog karahay sa iba. Minsan siring, puwede niato sindang tabangan na makasabot na mahalaga an pagigin simple sa pagtao nin marahay na komento. Kun an mismong komento niato halipot sana asin diretso sa punto, dai makakamate nin obligasyon an mga bagohan na tumao nin haralawig na kapahayagan. Matatabangan sindang analisaron an hapot, hanapon sa parapo an ideya na nagtatao kan simbag, dangan ipahayag iyan sa sadiri nindang tataramon. Tabangan sindang maaraman kun paano ninda magagamit an mga teksto sa parapo tanganing sumuportar sa saindang komento. Tokdoan sinda na linyahan an pangenot na mga termino asin tibaad sumurat nin haralipot na nota sa gilid. An pagigin andam maolang sa sainda sa pagkatakot na magkomento.
4 Ano pa an magigibo niato tanganing madagkang magkomento an mga bagohan? Siyempre, an pagtaed sa sainda puwedeng makapakosog sa boot asin makaranga. Tibaad boot nindong isuherir na tumukaw sinda sa enotan na mas kadikit an istorbo. Itokdo an mga hapot na masisimbag sa pira sanang termino.
5 Kun namidbid kan nangengenot sa Pag-adal sa Libro kan Kongregasyon an sarong bagohan sa saiyang grupo, tibaad pabasahon nia sia nin sarong teksto. Dangan, an tunay na kapahayagan nin pag-apresyar sa saiyang paghihingoa tibaad makadagka sa bagohan na magpadagos na magkomento sa pag-adal sa libro dangan pumoon na makikabtang nin regular sa iba pang pagtiripon.
6 Sarong pribilehiyo an makikabtang sa pagkomento sa mga pagtiripon. (Heb. 10:24, 25) Boot niatong tabangan an mga bagohan na maapresyar ini. Baga man nasa paglilingkod sa langtad o sa satong mga pagtiripon kan kongregasyon, may mga oportunidad kitang gibohon an arog kan ipinagigirumdom sato kan Hebreo 13:15: “Paagi sa saiya danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.”