Magparinigonan Paagi sa Pagkomento sa mga Pagtiripon
1 Sinasadol kita sa Hebreo 10:24 na ‘dagkahon an lambang saro sa pagkamoot asin sa marahay na mga gibo.’ Kaiba digdi an pagparinigonan paagi sa pagtao nin makahulogan na mga komento sa mga pagtiripon kan kongregasyon. Taano ta maninigo kitang magkomento? Paano niato magigibo ini? Sairisay an makikinabang?
2 Isip-isipa an dakol na beses na kamo nakikinabang sa pagdangog sa iba na nagtatao nin simple, malinaw na mga pananaram na nakadadagdag sa saindong pakasabot asin nakapakokosog sa saindo sa espirituwal. May pribilehio kamong gibohon man iyan para sa sainda. Kun kamo nagpapartisipar, ipinaheheling nindo an saindong pagmawot na ‘makawaras nin espirituwal na balaog’ para sa pagparigon kan gabos na nag-aatender.—Roma 1:11, 12.
3 Kun Paano Magibo nin Marahay na Komento: Dai magkomento nin halawig, na kinokobrehan an gabos na ideya sa parapo. An halawig na komento sa parate dai natutumbok an espesipikong simbag asin puedeng makadesganar sa iba na makikabtang. An enot na komento sa parapo maninigong halipot, direktang simbag sa nasusurat na hapot. Dangan an mga matao nin dugang pang komento puedeng gumibo nin praktikal na aplikasyon kan materyal o ipaheling kun paano minaaplikar an mga teksto. Helingon an School Guidebook, pahina 90-2.
4 Kun ikinahahadit nindo an ideya nin pagkomento, patienot na mag-andam nin halipot na komento, asin pakiolayan an konduktor na apodon kamo sa parapong iyan. Pakagiboha nindo kaini sa nagkapirang pagtiripon, magigin mas pasil na an pagpartisipar. Tandaan na si Moises asin Jeremias nagpahayag nin kadaihan nin kompiansa sa saindang abilidad na magtaram sa publiko. (Ex. 4:10; Jer. 1:6, nota sa ibaba) Alagad tinabangan sinda ni Jehova na magtaram para sa saiya, asin tatabangan man nia kamo.
5 Sairisay an Makikinabang sa Saindong Komento? Kamo mismo nakikinabang huli ta orog pang itinatadom kan saindong komento an katotoohan sa saindong isip asin puso, na mas pinapapasil na matandaan nindo sa huri an impormasyon. Siring man, nakikinabang an iba sa pagdangog sa saindong nakaparirigon na mga pananaram. Naparirigon kita kun an gabos, baga man eksperyensiado, hoben, masosopgon, o bagohan, naghihingoang ipahayag an saindang pagtubod sa mga pagtiripon kan kongregasyon.
6 Seguradong manonompongan niato na ‘an mga tataramon sa tamang kapanahonan marahayon nanggad’ kun iyan ginagamit sa pagparinigonan sa mga pagtiripon!—Tal. 15:23.