An Gabos Dapat na ‘Maogmang Mag-ako kan Tataramon’!
1 Minilyon an nag-aadal kan Biblia kaiba kan Mga Saksi ni Jehova. Tanganing makualipikar para sa buhay na daing katapusan, dapat sindang ‘maogmang mag-ako kan tataramon,’ siring kan 3,000 na nagsolsol asin nabautismohan kan aldaw nin Pentecostes 33 C.E. (Gibo 2:41) Anong paninimbagan an itinatao kaini sa sato ngonyan?
2 Kaipuhan niatong tabangan an satong mga inaadalan sa Biblia na makapatalubo nin debosyon ki Jehova. (1 Tim. 4:7-10) Sa katuyohan na iyan, an Hunyo 1996 na suplemento kan An Satong Ministeryo sa Kahadean, parapo 20, nagsusuherir: “Durante kan pag-adal, humanap nin mga oportunidad na pakosogon an pagpapahalaga sa mga kualidad ni Jehova. Ipahayag an sadiri nindong hararom na mga saboot para sa Dios. Tabangan an estudyante na mag-isip may koneksion sa pagpapatalubo nin mainit, personal na relasyon ki Jehova.”
3 An Angat na Inaatubang Niato: An kadaklan na tawo, na impluwensiado nin falsong relihion, kontento na sa klase nin pagsamba na kakadikit na panahon asin paghihingoa an kalabot, na dai naghahagad nin ano man na tunay na pagbago sa saindang pamumuhay. (2 Tim. 3:5) An angat na inaatubang niato iyo na tabangan an satong mga inaadalan sa Biblia na masabotan na an kalabot sa tunay na pagsamba labi pa sa pagigin mga paradangog sana kan tataramon nin Dios. Dapat nindang iaplikar sa saindang buhay an saindang nanonodan. (Sant. 1:22-25) Kun may personal na gawe-gawe sinda na dai inooyonan nin Dios, kaipuhan nindang rekonoseron an saindang obligasyon na “magbakle” asin gibohon an tama tangani na paogmahon sia. (Gibo 3:19) Tangani na magkamit nin buhay na daing sagkod, dapat sindang ‘maghingoa nin maigot’ asin manindogan nin marigon para sa katotoohan.—Luc. 13:24, 25.
4 Kun pinag-oolayan an manlaenlaen na aspekto nin moralidad, hapoton an saindong inaadalan sa Biblia kun paano nia talagang minamansay an mga bagay na ini asin kun ano an maninigo niang gibohon kun maheling nia an pangangaipo na gumibo nin mga pagbabago sa saiyang buhay. Darahon an saiyang atension sa organisasyon na paagi kaiyan saiyang nanonodan an katotoohan, asin enkaminaron siang regular na umatender sa mga pagtiripon kan kongregasyon.—Heb. 10:25.
5 Gibohon niatong pasohan na maabot an puso kan inaadalan paagi sa satong pagtotokdo. Kita maggagayagaya mantang minomotibar niato an mga bagohan na maogmang mag-ako kan tataramon nin Dios asin magpabautismo!—1 Tes. 2:13.