Kun Paano Magibo nin mga Disipulo Paagi sa Librong Kaaraman
1 Sarong kawiliwiling pasohan para sa gabos na Kristiano na magtokdo kan katotoohan sa iba asin gibohon na mga disipulo an mga “may tamang tendensia sa buhay na daing katapusan.” (Gibo 13:48; Mat. 28:19, 20) An organisasyon ni Jehova itinao sa sato an sarong marahayon na instrumento sa paggibo kaini—an librong Kaaraman na Minagiya Pasiring sa Buhay na Daing Katapusan. Itinatampok kan titulo kaiyan an halaga nin mga pag-adal sa Biblia sa harong, ta an buhay na daing katapusan minadepende sa pagkua nin kaaraman manongod ki Jehova asin sa saiyang Aki, si Jesu-Cristo.—Juan 17:3.
2 An librong Kaaraman iyo ngonyan an pangenot na publikasyon kan Sosyedad na gagamiton sa pagkondukta nin mga pag-adal sa Biblia sa harong. Ginagamit iyan, ikatotokdo niato an katotoohan nin simple, klaro, asin halipot sana. Ini matabang na taroson an puso kan mga tinotokdoan. (Luc. 24:32) Natural, kaipuhan na an nagkokondukta nin pag-adal gumamit nin marahay na mga paagi sa pagtotokdo. Inandam an suplementong ini para sa katuyohan na ini. Nagtatao iyan nin mga suhestion, asin sinusumaryo kaiyan an mga paagi nin pagtotokdo na napatunayan na epektibo sa nag-aging mga taon. Paagi sa pakamansay, asin sono sa indibiduwal na mga kamugtakan, mahihimo nindong ikaaplikar nin progresibo an nagkapira o gabos na iinaatubang digdi. Sarayon an suplementong ini, asin parateng konsultahon iyan. Tibaad matabangan kamo kaini na magin mas epektibo sa paggibo nin mga disipulo, na ginagamit an librong Kaaraman.
3 Magkondukta nin Progresibong Pag-adal sa Biblia sa Harong: Magpaheling nin tunay na personal na interes sa estudyante bilang sarong potensial na Kristianong disipulo asin tugang na lalaki o babae sa espirituwal. Magin mainit, makikatood, asin entusiastiko. Paagi sa pagigin marahay na parahinanyog, mamimidbid nindo an tawo—an saiyang pinaghalean asin kamugtakan sa buhay—na matabang sa saindo na mamansayan kun paano pinakamarahay na matatabangan sia sa espirituwal. Magin andam na magsakripisyo para sa estudyante.—1 Tes. 2:8.
4 Oras na maestablisar an pag-adal, mas marahay na an mga kapitulo sa librong Kaaraman pag-adalan sono sa pagkasunodsunod kan bilang. Magpapangyari ini sa estudyante na magkaigwa nin progresibong pakasabot sa katotoohan, huling ipinaliliwanag kan libro an mga tema sa Biblia sa pinakalohikong pagkasunodsunod. Pagdanayon na simple asin kawiliwili an pag-adal tanganing iyan magin buhay asin nagpapadagos. (Roma 12:11) Depende sa mga kamugtakan asin kakayahan kan estudyante, tibaad posibleng makobrehan nindo an kadaklan na kapitulo sa laog nin mga sarong oras na sesyon, na dai man hinihidale an pag-adal. Mas maoswag an estudyante kun kapwa an nagtotokdo asin estudyante sinusunod an saindang iskedyul sa pag-adal kada semana. Sa siring, sa kadaklan na tawo, posible nanggad na matapos an 19 kapitulo kan libro sa laog sana nin mga anom na bulan.
5 Ponan an lambang sesyon paagi sa halipot na mga komento na inaanimar an interes sa materyal. Maririsa nindo na an titulo kan lambang kapitulo iyo an tema kaiyan, na kaipuhan na idoon. An kada subtema nagpapalataw nin sarong pangenot na punto, na tinatabangan kamong makakonsentrar sa tema kan kapitulo. Ingatan na dai magtaram nin kadakol. Imbes, hingoahon na mapaluwas an mga nasa boot kan estudyante. An paghapot nin naggigiyang mga hapot sa estudyante, basado sa mga aram na nia, matabang sa saiya na mangatanosan asin makaabot sa tamang mga konklusyon. (Mat. 17:24-26; Luc. 10:25-37; helingon an School Guidebook, pahina 51, parapo 10.) Dai magrayo sa inimprentang impormasyon sa librong Kaaraman. An pagsaliot nin dagdag na mga detalye makapararayo o makatatahob sa pangenot na mga punto asin mapalawig sa pag-adal. (Juan 16:12) Kun maglataw an sarong hapot na bako man na konektado sa temang pinag-aadalan, sa parate puede nindong simbagon iyan sa katapusan kan sesyon. Magpapangyari ini sa saindo na makobrehan an leksion para sa semana na dai naoolang. Ipaliwanag sa estudyante na sa katapustapusi an kadaklan sa personal na hapot nia masisimbag sa masunod na mga pag-adal.—Helingon an School Guidebook, pahina 94, parapo 14.
6 Kun an estudyante marigon na nagtutubod sa Trinidad, inmortalidad kan kalag, kalayo sa impierno, o iba pang siring na falsong doktrina, asin an ipinaheheling sa librong Kaaraman dai nakakokombensir sa saiya, puede nindong itao sa saiya an librong Reasoning o saro pang publikasyon na nagpapaliwanag kan tema. Sabihon sa saiya na ipaliliwanag nindo iyan sa saiya pakatapos niang mapag-isip-isip an saiyang nabasa.
7 An pagpoon asin pagtapos sa pag-adal paagi sa pamibi para sa paggiya asin bendisyon ni Jehova nagtataong dignidad sa okasyon, ginigibong may paggalang an kaisipan nin saro, asin dinadara an atension ki Jehova bilang an tunay na Paratokdo. (Juan 6:45) Kun an estudyante nagtatabako pa, tibaad sa katapustapusi kaipuhan na hagadon nindo sa saiya na pumondo durante kan pag-adal.—Gibo 24:16; Sant. 4:3.
8 Magtokdo nin Epektibo Paagi sa Kasuratan, mga Ilustrasyon, Asin mga Hapot sa Repaso: Dawa pirang beses na nindong napag-adalan kan nakaagi an materyal, an maabilidad na paratokdo rerepasohon an kada leksion na nasa isip an partikular na estudyante. Ini nakatatabang na antisiparon an nagkapirang hapot kan estudyante. Tanganing makapagtokdo nin epektibo, saboton nin klaro an pangenot na mga punto sa kapitulo. Hanapon an mga teksto tanganing maheling kun paano iyan aplikado sa materyal, asin pilion kun arin an mga maninigong basahon durante kan pag-adal. Isip-isipon kun paano kamo makapagtotokdo na ginagamit an mga ilustrasyon asin mga hapot sa repaso sa poro kan kapitulo.
9 Paagi sa epektibong paggamit kan mga teksto, matatabangan nindo an estudyante na apresyaron na sia talagang nag-aadal sa Biblia. (Gibo 17:11) Ginagamit an kahon na “Gamiton na Marhay an Saindong Biblia,” sa pahina 14 kan librong Kaaraman, tokdoan sia kun paano hahanapon an mga teksto. Ipaheling sa saiya kun paano mamimidbid an kotadong mga bersikulo sa leksion. Mantang itinotogot nin panahon, hanapon asin basahon an sitadong mga teksto na dai kinotar. Pakomentohon an estudyante sa kun paano iyan nagsusuportar o nagkaklaro sa sinasabi sa parapo. Idoon an pangenot na mga kabtang kan mga teksto tanganing masabotan nia an mga rason para sa pangenot na mga punto sa leksion. (Neh. 8:8) Sa pankagabsan, dai na kaipuhan na an nagtotokdo magdagdag pa nin dakol na teksto na mayo na sa libro. Magkomento manongod sa halaga nin pakaaram sa mga ngaran asin pagkasunodsunod kan mga libro sa Biblia. Tibaad makatabang sa estudyante na basahon an pahina 27-30 kan Hunyo 15, 1991 Watchtower. Kun angay, dagkahon siang gamiton an New World Translation. Puedeng progresibo nindong ipaheling kun paano gagamiton an manlaenlaen na kabtang kaiyan, siring kan mga reperensia sa gilid asin an indese kan mga tataramon sa Biblia.
10 An leksion 34 sa Theocratic Ministry School Guidebook nagpapaliwanag na an mga ilustrasyon minapukaw sa mga proseso nin pag-iisip nin saro asin mas pinapapasil na masabotan an bagong mga ideya. Iyan igwang pag-akit sa isip asin pagpahiro sa emosyon, tanganing ikatao an mensahe na may puersa na bakong parateng posible paagi sa simpleng mga pananaram. (Mat. 13:34) An librong Kaaraman igwang dakol na ilustrasyon na simple pero mapuersa. Halimbawa, an sarong ilustrasyon na ginamit sa kapitulo 17 pinakokosog an pag-apresyar sa kun paano si Jehova sa espirituwal na sentido nagtatao nin pagkakan, gubing, asin istaran paagi sa Kristianong kongregasyon. An magayon na mga retrato sa librong Kaaraman magagamit nin epektibo sa pagpukaw nin mga emosyon. Sa irarom kan subtemang “An Magayagayang Pagbuhay Liwat,” sa pahina 185, mapakokosog an epekto kan parapo 18 kun ipaheheling giraray sa estudyante an retrato sa pahina 86. Tibaad mapahiro sia kaini na isipon na an pagkabuhay liwat sarong katunayan sa irarom kan Kahadean nin Dios.
11 An mga estudyante sa Biblia kaipuhan na gumibo nin espirituwal na pag-oswag sa kada leksion. Sa dahelan na ini, dai paglingawan na ihapot an mga hapot sa repaso sa kahon na “Baloon an Saindong Kaaraman” na nasa poro kan kada kapitulo. Hinanyogon bako sanang an tamang simbag sa pinag-aadalan. Dinisenyo an nagkapira sa mga hapot na iyan na dagkahon na iluwas an personal na simbag hale sa puso. Halimbawa, helinga an pahina 31, kun saen an estudyante hinahapot: “Anong mga kualidad ni Jehova Dios an nangorognang nakakaakit sa saindo?”—2 Cor. 13:5.
12 Patoodon an mga Estudyante na Mag-andam Para sa Pag-adal: An estudyante na binabasa an leksion nin patienot, minamarkahan an mga simbag, asin iniisip kun paano sasabihon an mga iyan sa sadiri niang mga tataramon mas marikas na maoswag sa espirituwal. Paagi sa saindong halimbawa asin pagparigon sa boot, mapatotood nindo sia na mag-andam para sa pag-adal. Ipaheling sa saiya an saindong libro, na dian minarkahan o lininyahan nindo an pangenot na mga tataramon o frase. Ipaliwanag kun paano manonompongan an direktang mga simbag sa inimprentang mga hapot. An pag-andam na magkaibahan sa sarong kapitulo tibaad makatabang sa estudyante. Parigonon an saiyang boot na magpahayag sa sadiri niang mga tataramon. Saka sana magigin malinaw kun baga nasasabotan nia an materyal. Kun binabasa nia hale sa libro an saiyang simbag, puede nindong animaron an saiyang isip paagi sa paghapot sa saiya kun paano nia ipaliliwanag sa iba an punto sa sadiri niang mga tataramon.
13 Dagkahon an estudyante na hanapon an mga tekstong dai kinotar bilang kabtang kan saiyang pag-andam serosemana, huling tibaad mayo nang panahon na basahon gabos iyan durante kan pag-adal. Tawan sia nin komendasyon sa saiyang paghihingoa sa saiyang mga leksion. (2 Ped. 1:5; helingon an Agosto 15, 1993 na Torrengbantayan, pahina 13-14, para sa dugang pang suhestion sa kun ano an magigibo kapwa kan nagtotokdo asin estudyante na madugangan an nanonodan sa pag-adal sa Biblia.) Sa paaging ini, an estudyante pinatotood na mag-andam para sa asin magkomento sa mga pagtiripon kan kongregasyon. Makanonood siang magpatalubo nin marahay na ugale sa personal na pag-adal na masangkap sa saiya na padagos na umoswag sa katotoohan pagkatapos kan saiyang personal na pag-adal sa Biblia sa librong Kaaraman.—1 Tim. 4:15; 1 Ped. 2:2.
14 Giyahan an Estudyante Pasiring sa Organisasyon ni Jehova: Paninimbagan kan paragibo nin disipulo na giyahan an interes kan estudyante pasiring sa organisasyon ni Jehova. Mas marikas na maoswag an estudyante pasiring sa espirituwal na pagkamaygurang kun midbid nia an organisasyon asin nasasabotan an pangangaipong magin kabtang kaiyan. Boot niatong makanompong sia nin kaogmahan sa pakikiasosyar sa banwaan nin Dios asin linalaoman tang makaiba sia sa Kingdom Hall, kun saen makukua nia an espirituwal asin emosyonal na pagsuportar na itinatao kan Kristianong kongregasyon.—1 Tim. 3:15.
15 An brochure na An mga Saksi ni Jehova—Sararong Nag-ootob sa Kabotan nin Dios sa Bilog na Kinaban ginibo tanganing magin pamilyar an mga indibiduwal sa solamenteng naheheling na organisasyon na ginagamit ngonyan ni Jehova sa pag-otob kan saiyang kabotan. Oras na maestablisar an pag-adal, taano ta dai tawan nin kopya an estudyante? Sa kapinonan pa sana, danay na imbitaran an estudyante sa mga pagtiripon. Ipaliwanag kun paano iyan ginigibo. Puede nindong sabihon sa saiya an titulo nin masunod na pahayag-publiko o ipaheling sa saiya an artikulong pag-oolayan sa Pag-adal sa Torrengbantayan. Tibaad puedeng iiba nindo sia sa Kingdom Hall kun mayong pagtiripon tanganing mainaan an tibaad ano man na pag-alangan nia sa pagduman sa sarong bagong lugar sa kaenot-enote. Tibaad puede kamong mag-alok sa saiya nin lunadan pasiring sa mga pagtiripon. Kun sia mag-atender, ipamate na inaako sia asin tabangan na magin pamugtak an boot. (Mat. 7:12) Ipamidbid sia sa ibang mga Saksi, kaiba na an kamagurangan. Awot pa, poponan niang mansayon an kongregasyon bilang saiyang espirituwal na pamilya. (Mat. 12:49, 50; Mar. 10:29, 30) Puedeng tawan nindo sia nin pasohan, siring kan pag-atender sa sarong pagtiripon kada semana, asin progresibong dugangan an pasohan.—Heb. 10:24, 25.
16 Mantang nagpapadagos an pag-adal sa Biblia sa harong paagi sa librong Kaaraman, idoon an mga kabtang na nagtatampok sa pangangaipo nin regular na pakikiasosyar sa kongregasyon sa mga pagtiripon. Espesyalmenteng mangnohon an pahina 52, 115, 137-9, 159, siring man an kapitulo 17. Ipahayag an saindo mismong hararom na mga pakamate nin pagpapahalaga sa organisasyon ni Jehova. (Mat. 24:45-47) Magtaram nin positibo manongod sa lokal na kongregasyon asin manongod sa saindong nanonodan sa mga pagtiripon. (Sal. 84:10; 133:1-3) Marahay kun madadalan kan estudyante an mga video kan Sosyedad, magpoon sa Jehovah’s Witnesses—The Organization Behind the Name. Para sa dugang na mga ideya sa kun paano gigiyahan an interes pasiring sa organisasyon, helingon an Abril 1, 1985 Torrengbantayan, pahina 13-17, asin an suplemento sa Agosto 1993 na An Satong Ministeryo sa Kahadean.
17 Parigonon an Boot kan mga Estudyante na Magpatotoo sa Iba: An satuyang pasohan sa pakikipag-adal sa mga tawo makagibo nin mga disipulo na magpapatotoo ki Jehova. (Isa. 43:10-12) Iyan nangangahulogan na an nagtotokdo maninigong parigonon an boot kan estudyante na magtaram sa iba manongod sa saiyang nanonodan sa Biblia. Magigibo ini paagi sana sa paghapot: “Paano nindo ipapaliwanag an katotoohan na ini sa saindong pamilya?” o “Anong teksto an gagamiton nindo tanganing patunayan ini sa sarong katood?” Idoon an pangenot na mga kabtang sa librong Kaaraman kun saen dinadagka an pagpapatotoo, siring kan pahina 22, 93-5, 105-6, siring man an kapitulo 18. An estudyante puedeng tawan nin nagkapirang tract na gagamiton sa impormal na pagpapatotoo sa iba. Isuherir na imbitaran nia an saiyang kairiba sa pamilya na umiba sa saiyang pag-adal. Igwa daw sia nin mga katood na gusto man na mag-adal? Hagadon na itokdo kamo duman sa mga interesado.
18 Paagi sa pag-atender sa Teokratikong Paadalan sa Pagmiministro asin sa Pagtiripon sa Paglilingkod, an linalaoman na magin disipulo makakukua nin dugang na pagpatood asin pagdagka na matabang sa saiya na magin parahayag kan maogmang bareta. Kun sia magpahayag nin interes na magpalista sa paadalan o magin dai pa bautisadong parahayag, aplikado an mga prinsipyo na yaon sa pahina 98 asin 99 kan librong Our Ministry. Kun an sarong aspekto kan saiyang buhay nakaoolang sa saiya na makualipikar, puedeng hanapon nindo sa mga publikasyon kan Sosyedad an nakatatabang na materyal na nagpapaliwanag kan bagay asin ihiras iyan sa saiya. Halimbawa, an sarong estudyante tibaad nadedepisilan na haleon an pagkaadikto sa tabako o iba pang droga. An librong Reasoning itinotokdo an makosog na mga dahelan sa Kasuratan kun taano an mga Kristiano ta linilikayan an siring na nakadadanyar na mga ugale, asin sa pahina 112 sinumaryo kaiyan an sarong paagi na nagin nang mapanggana sa pagtabang sa iba na pumondo. Mamibi kaiba nia manongod sa bagay, na tinotokdoan siang pakosogon an saiyang pagsarig ki Jehova para sa tabang.—Sant. 4:8.
19 An paagi na susunodon sa pagdeterminar kun baga an saro kualipikado nang makikabtang sa pampublikong ministeryo sinumaryo sa Enero 15, 1996 na Torrengbantayan, pahina 16, parapo 6. Kun an estudyante kualipikado, makatatabang an pag-ensayo tanganing andamon sia para sa saiyang primerong aldaw sa paglilingkod sa langtad. Sa sarong positibong paagi, ipakipag-olay an mga reaksion asin pagkontra kan mga tawo na uso sa saindong teritoryo. Papoonon sia sa pagharongharong kun posible man sana, asin progresibong patoodon sia sa iba pang aspekto kan ministeryo. Kun gigibohon nindong halipot asin simple an saindong pag-atubang, magigin pasil sa saiya an pag-arog. Magin nakapakokosog asin nakaparirigon sa boot, na ipinababanaag an kagayagayahan sa gibohon, tanganing marisa nia an saindong espiritu asin ipaheling man nia iyan. (Gibo 18:25) An pasohan nin sarong bagong disipulo dapat na magin sarong regular, maigot na parahayag kan maogmang bareta. Tibaad puede nindo siang tabangan na gumibo nin praktikal na iskedyul sa paglilingkod. Tanganing umoswag sia sa saiyang abilidad na magpatotoo sa iba, puedeng isuherir nindo sa saiya na basahon an mga isyu kan Watchtower na Agosto 15, 1984, pahina 15-25; Enero 15, 1991, pahina 15-20; Torrengbantayan na Agosto 1, 1988, pahina 8-18; Enero 1, 1994, pahina 20-5.
20 Motibaron an mga Estudyante Pasiring sa Pagdusay Asin Bautismo: Maninigong magin posible para sa sarong estudyanteng may sadiosan na puso na makanood nin bastante sa pag-adal sa librong Kaaraman tanganing gumibo nin pagdusay sa Dios asin makualipikar para sa bautismo. (Ikomparar an Gibo 8:27-39; 16:25-34.) Minsan siring, bago mamotibar na magdusay an saro, kaipuhan niang pataluboon an debosyon ki Jehova. (Sal. 73:25-28) Durante kan pag-adal, humanap nin mga oportunidad na pakosogon an pagpapahalaga sa mga kualidad ni Jehova. Ipahayag an sadiri nindong hararom na mga saboot para sa Dios. Tabangan an estudyante na mag-isip may koneksion sa pagpapatalubo nin mainit, personal na relasyon ki Jehova. Kun talagang midbid asin namomotan nia an Dios, sia kun siring fiel na maglilingkod sa Saiya, huling an diosnon na debosyon konektado sa kun ano an saboot niato manongod ki Jehova bilang persona.—1 Tim. 4:7, 8; helingon an School Guidebook, pahina 76, parapo 11.
21 Pagmaigotan na taroson an puso kan estudyante. (Sal. 119:11; Gibo 16:14; Roma 10:10) Kaipuhan na maheling nia kun paano an katotoohan personal na nakaaapektar sa saiya asin magdesisyon kun ano an dapat niang gibohon sa saiyang mga nanodan. (Roma 12:2) Sia daw talagang nagtutubod sa mga katotoohan na iinaatubang sa saiya serosemana? (1 Tes. 2:13) Sa katuyohan na iyan, puede nindong mapaluwas an nasa boot kan estudyante paagi sa paghapot nin may pakamansay na mga hapot sa punto-de-vista, arog baga kan: Ano an saboot nindo manongod digdi? Paano nindo ini ikaaaplikar sa saindong buhay? Paagi sa saiyang mga komento mamamansayan nindo kun saen mas kaipuhan an tabang tanganing mataros an saiyang puso. (Luc. 8:15; helingon an School Guidebook, pahina 52, parapo 11.) An mga kapsion para sa mga retrato sa pahina 172 asin 174 kan librong Kaaraman naghahapot: “Naggibo na daw kamo nin pagdusay sa Dios sa pamibi?” asin “Ano an nakaoolang sa saindo na mabautismohan?” Tibaad epektibong mamotibar kaini an estudyante na humiro.
22 An paaging susunodon kun an sarong dai pa bautisadong parahayag boot nang magpabautismo sinumaryo sa Enero 15, 1996 na Torrengbantayan, pahina 17, parapo 9. An librong Kaaraman isinurat sa katuyohan na sangkapan an saro na masimbag an “Questions for Those Desiring to Be Baptized,” na manonompongan sa apendise kan librong Our Ministry, na rerepasohon kan kamagurangan kaiba nia. Kun idinoon nindo an simbag sa inimprentang mga hapot sa librong Kaaraman, an estudyante maninigong andam nang marhay para sa mga sesyon nin mga hapot na kokonduktahan kan kamagurangan bilang pag-andam para sa saiyang bautismo.
23 Tabangan an mga Nakatapos Na sa Pag-adal sa Biblia sa Harong: Maninigong laoman na sa panahon na matapos na nin saro an pag-adal sa librong Kaaraman, an sinseridad asin rarom kan interes nia na maglingkod sa Dios risa na. (Mat. 13:23) Kaya ngani an ultimong subtema kan libro naghahapot, “Ano an Gigibohon Nindo?” An pantapos na mga parapo nakikiolay sa estudyante na magkonsentrar sa saiyang relasyon na maninigong napatalubo nia sa Dios, sa pangangaipong iaplikar an kaaraman na nanodan nia, asin sa pangangaipong humiro tolos na ipaheling an pagkamoot nia ki Jehova. Dai nin probisyon para sa dagdag na mga pag-adal sa publikasyon sa mga nakatapos na sa librong Kaaraman. Ipaliwanag nin maboot asin klaro sa sarong estudyante na dai nakahimong maghimate sa kaaraman nin Dios kun ano an kaipuhan niang gibohon tanganing umoswag sa espirituwal. Puedeng kumustahon nindo sia sa panapanahon, na iwinawalat na bukas an dalan na lalakawan nia na minagiya pasiring sa buhay na daing katapusan.—Ecl. 12:13.
24 An sarong bagong disipulo na nag-ako sa katotoohan asin nagpabautismo mas dakol pang pag-oswag na gigibohon sa saiyang kaaraman asin pakasabot tanganing lubos na magin marigon sa pagtubod. (Col. 2:6, 7) Imbes na ipadagos an saiyang pag-adal sa Biblia sa harong pagkatapos nindo sa librong Kaaraman, puede kamong magboluntaryo na tumao nin ano man na personal na tabang na tibaad kaipuhanon nia tanganing magin maygurang sa espirituwal. (Gal. 6:10; Heb. 6:1) Sa saiyang kabtang, makokompleto nia an saiyang pakasabot paagi sa aroaldaw na pagbasa sa Biblia, personal na pag-adal sa An Torrengbantayan asin iba pang publikasyon kan fiel na oripon, pag-andam para sa asin pag-atender sa mga pagtiripon, asin pakikipag-olay kan katotoohan sa mga kapagtubod. (Mat. 24:45-47; Sal. 1:2; Gibo 2:41, 42; Col. 1:9, 10) An pagbasa nia sa librong Our Ministry asin pag-aplikar kan laog kaiyan magkakaigwa nin mahalagang marhay na kabtang sa saiyang pagigin organisado sa teokratikong paagi tanganing lubos na maotob an saiyang ministeryo.—2 Tim. 2:2; 4:5.
25 Pataluboon an Abilidad sa Pagtotokdo: Isinugo kita na ‘gibohon na mga disipulo an mga tawo . . . , na tinotokdoan sinda.’ (Mat. 28:19, 20) Huling an abilidad sa pagtotokdo konektadong marhay sa paggibo nin mga disipulo, boot niatong magmaigot na umoswag bilang mga paratokdo. (1 Tim. 4:16; 2 Tim. 4:2) Para sa dugang pang mga suhestion sa kun paano paooswagon an abilidad sa pagtotokdo, tibaad boot nindong basahon an: “Developing the Art of Teaching” asin “Reaching the Heart of Your Listeners” sa School Guidebook, leksion 10 asin 15; “Teacher, Teaching” sa Insight, Tomo 2; asin an mga artikulo sa Torrengbantayan na “Pagtotogdok na Ginagamit an mga Materyales na Dai Nasosolo,” asin “Kun Kamo Nagtotokdo, Taroson an Puso,” Marso 1, 1985; “Kun Paano Makanonompong nin Kagayagayahan sa Paggibo nin mga Disipulo,” Pebrero 15, 1996; asin “Do You Effectively Reason From the Scriptures?” sa Watchtower na Marso 1, 1986.
26 Mantang kamo nagmamaigot na gumibo nin mga disipulo, na ginagamit an librong Kaaraman, dayaday na mamibi na si Jehova, an saro “na nagpapatalubo kaiyan,” bebendisyonan an saindong mga paghihingoa na mapaabotan nin maogmang bareta kan Kahadean an puso nin mga tawo. (1 Cor. 3:5-7) Mamatean logod nindo an kagayagayahan sa pagtotokdo sa iba na makasabot, mag-apresyar, asin humiro sono sa kaaraman na minagiya pasiring sa buhay na daing katapusan!