Ereskuelahan Na Naman

¹ Ngonyan na Hunyo pinoponan kan satong mga hoben an sarong bagong taon sa eskuelahan. May nakaoogmang mga bagay na malalaoman, alagad igwa man nin pirang bagay na puedeng makapahandal. Dakol na hoben an mapapaduman sa manlaenlaen na maestro, makua nin bagong mga kurso, asin makikiiba sa mga estudyanteng bakong kamidbid. Boot kan satong mga hoben na makikooperar sa mga autoridad kan eskuelahan asin makikatood sa saindang mga kaeskuela, alagad kaipuhan sindang magmaan tumang sa ano man na tibaad makadanyar sa espirituwal.​—1 Cor. 15:33.

² An sarong pangenot na dapat isipon kan mga aki asin hoben na Saksi iyo an paglikay sa nakaoolakit na impluwensia kan kinaban, na lakop sa mga sistema nin edukasyon ngonyan. An mga Kristiano kaipuhan na magin mapuso sa pagsikwal sa kinabanon na mga pamantayan asin kaisipan na pinalalakop ngonyan manongod sa moralidad, asin kaipuhan sindang ‘mag-ingat’ paagi sa perming pagkonsulta asin pagpagiya sa Tataramon ni Jehova. (Sal. 119:9) An nagmamakolog na mga magurang kaipuhan na makaaram sa kun ano an kabale sa kurikulum kan eskuelahan tanganing makatao nin angay na paggiya sa saindang mga aki. Kun an itinotokdo sa eskuelahan kontra sa kabanalan asin kalinigan na hinahagad sa mga lingkod ni Jehova, iyan dapat na likayan.​—1 Ped. 1:​15, 16.

³ Ordinaryo na man na mapaatubang sa mga isyu may labot sa nasyonalistikong mga seremonya, pagselebrar nin mga piesta opisyal, o aktibidad sa isports, o sosyal na pagtiripon. An brochure na Jehovah’s Witnesses and Education nakatatabang sa mga hoben manongod sa mga bagay na ini. Maiinaan an depisil na mga situwasyon kun an mga magurang kan saradit pang aki dumolok sa mga maestro dara an sarong kopya kan publikasyon na ini. Puedeng ipaliwanag ninda na matatabangan kaini an maestro na masabotan kun taano an Mga Saksi ni Jehova ta nagdedesisyon na dai magpartisipar sa pirang aktibidad. Tibaad dakula an magibo kaini sa pag-establisar nin espiritu nin kooperasyon.

⁴ Dugang pa, marahay para sa mga estudyanteng Kristiano na magkaigwa nin personal na kopya kan brochure na Education kaiba kan mga materyal na pinag-aadalan ninda sa eskuelahan. Parateng minalataw an mga oportunidad na makapagpatotoo sa ibang estudyante na naghahapot kun napag-oolayan an satong mga paniniwala. Siring man, an mga aking Saksi dapat na personal na dara-dara sa gabos na panahon an saindang Advance Medical Directive/Release card o Identity Card na may pinakahuring impormasyon, tama an pagkakatestigo, asin pirmado. An mga nag-aaplikar kan sadol na ini siertong magigin arog kan ‘mga alisto an isip na nakaheling kan kapahamakan asin nagtago.’​—Tal. 22:3.