Nagkakasararo sa Paggibo kan Kabotan ni Jehova
1 Mantang Disyembre an satong bulan nin kombension, kita gabos nagpaplano na magbiyahe pasiring sa kombension sa masunod na nagkapirang semana. Alagad mantang nagtatao nin atension sa mga plano niato para sa kombension, dai niato paglingawan an satong mahalagang gibohon na paghuhulit durante kan bulan. Pinakokosog niamo an gabos na gumamit nin pinakadakol na panahon na posible sa ministeryo sa langtad sa mga semana bago an kombension, na dai pinababayaan an satong mga pag-adal sa Biblia asin regular na gibohon na pagharongharong durante kan panahon na ini.
2 Para sa kadakol na tawo an Disyembre sarong bulan nin kapiyestahan. An saindang isip nasa mga selebrasyon, sa pagbakal nin mga regalo, pagsongko sa mga paryentes, asin iba pa. Mantang an dakol na selebrasyon hinohonang sa pagtaong onra ki Jesus, tibaad marahay na itampok an mga bagay manongod ki Cristo sa satong gibohon na paghuhulit. An impormal na pagpatotoo nag-aalok man nin oportunidad na ipakipag-olay an tunay na katuyohan kan pagkamundag ni Jesus, na nagpopokus sa pantubos. Kun nagbibiyahe pasiring asin hale sa mga kombension puwede kitang magkaigwa nin marahay na mga oportunidad na makipag-olay sa mga tawo manongod sa siring na mga punto.
AN ALOK
3 Mag-aalok kita kan My Book of Bible Stories sa bulan na ini. Alagad, puwede man kitang mag-alok kan librong Mabuhay Sagkod Lamang bilang pagpipilian kun minamawot. An duwang publikasyon nagtatao nin kadakol na paagi nin pagdolok na dara an maogmang bareta. An kabtang 6 kan librong Bible Stories, magpoon sa estorya 84, nagkokobre kan panahon magpoon sa pagkamundag ni Jesus sagkod sa saiyang kagadanan. Igwa kita digdi nin mayaman na impormasyon manongod sa mga tema may koneksion sa pagkamundag ni Jesus. Igwa nin mga estoryang may titulong “An Angel Visits Mary,” “Jesus Born in a Stable,” asin “Men Guided by a Star.” Sa tolong estoryang ini sana igwa na kamo nin kadakol na puntong magagamit durante kan mga kapiyestahan sa Pasko. Magigin partikularmenteng totoo ini kun igwa nin mga aki sa pamilya.
4 An kapitulo 6 kan librong Mabuhay Sagkod Lamang may titulong “Si Jesu-Cristo—Isinugo daw nin Dios?” Nagtatao ini nin kadakol na puntong mapag-oolayan manongod sa pag-eksister ni Jesus bago nagin tawo, sa saiyang buhay sa daga, asin sa saiyang presenteng kabtang bilang Tagapamahala sa Kahadean nin Dios. An paggamit kan mga puntong ini magpapatalubo kan saindang interes sa tamang impormasyon manongod sa satong Kagurangnan durante kan bulan na ini mantang an isip ninda nasa pagkamundag ni Jesus.
5 An kadakol na hoben na parahayag magkakaigwa kan saindang bakasyon sa Disyembre, puwede man sindang magkaigwa nin lubos na kabtang sa gibohon sa Kahadean kairiba kan saindang pamilya sa bulan na ini. Mantang igwa nin limang Sabado asin limang Domingo sa Disyembre, kadakol an puwedeng mag-auxiliary payunir sa ibong kan pag-atender sa kombension.
6 Maninigong siertohon kan kamagurangan na mag-iskedyul nin igong pagtiripon para sa paglilingkod sa langtad asin gumibo man nin espesyal na pagmamaigot na tiponon an gabos na report sa katapusan kan bulan tanganing makompleto an report kan kongregasyon. Magmaigot kita gabos na nagkakasararong gibohon an kabotan ni Jehova sa Disyembre.