Paghuhulit Bilang Pamilya Ngonyan na Disyembre
1 “An saimong banwaan gikan sa boot na magpepresentar kan saindang sadiri sa aldaw kan saimong kapangyarihan.” An mga tataramon na iyan sa Salmo 110:3 marahayon an pagkaladawan sa aktibong organisasyon ni Jehova ngonyan mantang an mga lalaki, babae, asin aki mahigos na nakikakabtang sa pagbalangibog kan maogmang bareta kan Kahadean. Sa bulan nin Disyembre, an dakol na miembro nin pamilya magkakaigwa nin marahayon na mga oportunidad na pahiwason an saindang ‘gikan sa boot na paglilingkod’ paagi sa pagpadakol sa saindang pakikikabtang sa ministeryo sa langtad. Tanganing satong ‘matubos an panahon,’ kaipuhan na gumibo kita nin depinidong mga plano asin maingat na iiskedyul nin patienot an satong panahon.—Col. 4:5; 1 Cor. 9:26.
2 Taano ta dai gibohon na proyekto kan pamilya an paghuhulit? Tumukaw nin iriba asin aramon an mga posibilidad para sa orog pang paglilingkod sa langtad ngonyan na Disyembre. Paagi sa pagpahayag kan gabos na miembro kan saindang saboot, tibaad mapangalas kamo sa dakulang karahayan na magigibo.—Tal. 11:14; 15:22.
3 An dakol na barobata puwedeng lubos na aprobetsaran an panahon nin bakasyon sa eskuwelahan na makikabtang sa paglilingkod sa langtad sa panahon kan kinabanon na kapiyestahan. Puwede daw na umiba an estudyante sa dakol pang ibang hobenes na mag-o-auxiliary payunir ngonyan na Disyembre? Tibaad madiskobre nin mga ina na an Disyembre nagtatao nin marahay na oportunidad na magdusay nin mas dakol na oras sa paglilingkod sa langtad kaiba kan saindang mga aki. Puwede daw na mag-auxiliary payunir kamong mga ama asin ina kaiba kan saindong mga aki? O, paagi sa pagtarabangan kan bilog na pamilya, matatabangan daw nindo an kisuerra saro o tibaad mas dakol pang miembro kan pamilya na mag-auxiliary payunir? Ini magigin nakapagpapakosog asin nakabobogkos nanggad sa bilog nindong pamilya!
GUMIBO NIN DEPINIDONG MGA PLANO
4 Pakatapos na maingat na mahorophorop an mga posibilidad na madugangan an saindong paglilingkod bilang pamilya, kaipuhan na kamo gumibo nin depinidong mga plano asin pagmaigotan na magibo iyan. Isurat an mga pasohan para sa kada miembro kan pamilya asin an aroaldaw na iskedyul sa paglilingkod sa langtad para sa lambang saro. Tibaad ini puwedeng isurat sa teokratikong kalendaryo kan saindong pamilya. Girumdoma, kun dai nindo iyan iiiskedyul, an panahon maabot asin maagi, asin tibaad dai nindo maabot an saindong pasohan.
5 Siyempre, bobooton kan paraataman sa paglilingkod kan kongregasyon na gumibo nin mga plano ngonyan para sa espesyal na pangrupong paghuhulit sa pagpopoon kan bulan. Girumdomon na an paghinanapos nin Disyembre panahon nin kombension. An mga areglo para sa paglilingkod sa langtad magigibo sa aga, hapon asin banggi.
6 Ipinaheling nin kabatidan na an Disyembre nangorognang mabungang bulan sa paghuhulit kan maogmang bareta. Parate, mas dakol na tawo an nasa harong, asin mas pamugtak an saindang isip. An mga relihiyoso parateng nagugustong makipag-olay manongod sa espirituwal na mga bagay. Boot niatong aprobetsaran sa pinakalubos an mga kamugtakan na ini na ihulit an maogmang bareta asin sa siring ‘gikan sa boot na ipresentar an satong sadiri’ bilang pamilya ‘sa aldaw kan kapangyarihan ni Jehova.’