Pag-aatubang kan Maogmang Bareta—Na May Pandagka
1 Angay daw sa mga ministro kan maogmang bareta na dagkahon an mga tawo na akoon an katotoohan? Iyo nanggad! (Gibo 18:4) Ipinagirumdom ni Pablo ki Timoteo na sia dinagka na magin paratubod kan saiyang ina asin lola. (2 Tim. 3:14) An pagdagka sa saro nangangahulugan na pahiroon sia paagi sa pakiolay, makipagrasonan nin maigot sa saiya manongod sa pagtubod o kurso nin paghiro.
2 Ginamit nin marahay ni Pablo an pagdagka. Kan sia nasa Areopago, dai nia direktang sinabi sa mga yaon kaidto na an saindang pagsamba sa mga idolo mayong kamanungdanan. May kahusayan na linikayan an malanit na orolay, saiyang inapod an saindang atension sa “sarong altar na nasusuratan nin ‘Sa Dios na Dai Midbid.’” Dangan nagtao sia nin mapuwersang patotoo, na may mararahay na resulta.—Gibo 17:23, 28, 29, 34.
MAGIN MAPAGMANSAY
3 Malinaw na ipinaheling ni Pablo na an pandagka nangangaipo nin orog pa sa basta na sana emosyonal na presentasyon o kadakulan nin mga tataramon. Kaipuhan kitang magin mapagmansay manongod sa mga saboot asin paniniwala kan mga tawong satong nakakaolay. Kaipuhan kitang magin alistong risahon kun an mga emosyon nin kagharong tibaad iyo an totoong olang sa bukas an kaisipan na pagkonsiderar kan mga katokdoan kan Biblia.—Tal. 16:23.
4 Halimbawa, an tawo tibaad nagtutubod sa inmortalidad nin kalag huli sa sentimental na paggirumdom sa namomotan na nagadan. Imbes na direktang sabihon saiya na sala sia sa saiyang paniniwala asin na an kalag nagagadan, bako daw na mas marahay na gamiton an pandagka tanganing mapangganahan an emosyonal na olang asin makipagrasonan saiya? Puwede niatong sabihon saiya na nasasabotan niato an saiyang mga pagmate huli ta kita man nawaran nin namomotan sa kagadanan. Nakanompong kita nin karangahan sa panuga na pagkabuhay liwat, na makakasumaro niato liwat an satong nawarang mga namomotan. Dangan puwedeng basahon asin pag-olayan an angay na mga kasuratan.—Tal. 16:21; Col. 4:6.
GUMAMIT NIN MGA ILUSTRASYON
5 An mga ilustrasyon magigin epektibo sa pagdagka sa mga tawo na bagohon an saindang kaisipan. An risang gayo na halimbawa iyo an paagi ni Natan sa pag-abot sa puso ni Hadeng David. (2 Sam. 12:1-14) Pinagigin pasil nin mga ilustrasyon na masabotan nin mga tawo an mga bagong ideya. Halimbawa, an daga puwedeng iarog sa sarong harong asin an mga tawo sa mga nakaistar. Kun pinabayaan kan mga nakaistar an harong, an kagsadiri dai raraoton an harong, kundi pahahaleon an mga nakaistar.—Isa. 45:18.
6 Siempre, kun habo nin mga tawo na magtubod o magbago kan saindang buhay, magdadanay sinda siring kan dati. (Mat. 13:14, 15) Alagad, kadakol pa man nin mga sinserong tawo na mapaaabotan kan katotoohan. Tanganing matabangan sinda, satuyang paoswagon asin gamiton an arte nin pagdagka sa satong ministeryo.