Kun Paano Kokombensiron an Iba
1 Si apostol Pablo nagkaigwa kan reputasyon na ministro na matibay mangombensir. (Gibo 19:26) Dawa si Hadeng Agripa nagsabi sa saiya: “Sa halipot na panahon makokombensir mo akong magin Kristiano.” (Gibo 26:28) Ano an nagpangyari sa ministeryo ni Pablo na magin nakabebensir na marhay? Sia nangatanosan sa lohikong paagi basado sa Kasuratan, na ibinabagay an saiyang mga argumento sa mga naghihinanyog sa saiya.—Gibo 28:23.
2 Bilang pag-arog ki Pablo, kita man nangangaipong magin matibay mangombensir sa satong ministeryo. Paano? Paagi sa paggamit nin pakarorop kun nakikipag-olay asin naghihinanyog sa iba. (Tal. 16:23) Tolong importanteng tangga an matabang sa sato na magibo ini.
3 Maghinanyog nin Maingat: Mantang nagtataram an kaolay nindo, himateon kun may puntong pinagkakaoyonan na magagamit nindong basehan. Kun sia may palatawon na pagkontra, pagmaigotan na mamansayan an pangangatanosan sa likod kaiyan. Makatatabang na aramon nin eksakto kun ano an saiyang paniniwala, kun taano ta naniniwala sia dian, asin kun ano an nakakombensir sa saiya dian. (Tal. 18:13) Mataktikang enganyaron sia na magtaram.
4 Magpalataw nin mga Hapot: Kun an sarong tawo nagpapahayag nin paniniwala sa Trinidad, puede nindong ihapot: “Kaidto pa kamo naniniwala sa Trinidad?” Sundan nin: “Lubos na daw nindong pinag-adalan an sinasabi kan Biblia manongod sa temang ini?” Puede man nindong ihapot: “Kun an Dios kabtang nin sarong Trinidad, dai daw niato malalaoman na iyan malinaw na sasabihon kan Biblia?” An simbag na nakukua nindo makatatabang sa saindo na mangatanosan sa indibiduwal manongod sa sinasabi kan Kasuratan.
5 Gumamit nin Marahay na Pangangatanosan: Hinapot nin sarong Saksi an sarong babae na naniniwala na si Jesus Dios: ‘Kun hinihingoa nindong iilustrar na magkapantay an duwang tawo, ano daw na relasyon sa pamilya an gagamiton nindo?’ Sia nagsimbag: “Tibaad gamiton ko an magtugang.” Idinagdag kan Saksi: “Tibaad kambal na magkalalauogon pa ngani. Alagad sa pagtokdo sa sato na mansayon an Dios bilang an Ama asin sia mismo bilang an Aki, anong mensahe an ipinaaabot ni Jesus?” Nasabotan kan babae an punto na an saro mas may edad asin orog an autoridad. (Mat. 20:23; Juan 14:28; 20:17) An saiyang isip asin puso napahiro kan teknika sa pangongombensir.
6 Siempre, bakong gabos andam na umako kan katotoohan, gurano man kalohiko asin kaeksakto kan satong pag-atubang. Alagad siring ki Pablo, magin kitang mahigos sa paghanap kan mga sadiosan an puso sa satong teritoryo, na kinokombensir sinda na akoon an mensahe kan Kahadean.—Gibo 19:8.