Pag-aatubang Kan Maogmang Bareta—Na may Pagkalaenlaen sa Gibohon na Pagharongharong
1 Bako daw na an linalang ni Jehova nagsosopay sa pagkalaenlaen? (Sal. 104:24) Igwa man nin kadakol na kabtang kan maogmang bareta na saiyang ipinagboot na ihulit niato. Ginagamit daw nindo an pagkalaenlaen sa saindong paghuhulit tanganing maabot an orog na dakol na tawo na posible?
SA ALDAW NIN PAGMAMAGASIN
2 Pinakokosog kita gabos kan Sosyedad na makikabtang sa pagwaras nin magasin sa lambang Sabado. Imbes na ginagamit an Topikong Mapag-oolayan, an 30 sagkod sa 60 segundong presentasyon na nagtatampok nin saro sanang artikulo nababagay. Kun an kagharong maghapot o magpaheling nin pambihirang interes, mayo nin pangangaipo na maghidale kita pasiring sa masunod na puwertahan.
3 Dai nin kakulangan nin pagkalaenlaen sa satong mga magasin na Torrengbantayan asin Magmata! Parateng an mga tugang na nangengenot sa enot na kabtang kan Pagtiripon sa Paglilingkod mag-aatubang nin mga puntong mapag-oolayan hale sa presenteng mga magasin. Magtao nin atension; isurat an mga suhestion na puwede nindong gamiton. Kun idemonstrar an sarong presentasyon, tandaan ini, ensayohon ini, asin dangan gamiton ini sa langtad sa Sabado. Kun dikit an makua nindong paghimate, pumili nin ibang artikulong itatampok. An lambang isyu igwa nin nagkapirang tema na maakit sa mga tawo na may manlaenlaen na interes. Kabisadohon an pakikipag-olay sa gabos na artikulo tanganing puwede nindong ibagay an saindong presentasyon sa kagharong na saindong manompongan.
LAENLAENON AN SAINDONG INTRODUKSION
4 Marahay na laenlaenon an saindong pagdolok sa mga puwertahan. Naprobaran na daw nindong bukasan an saindong presentasyon paagi sa pag-aalok nin tract o sarong handbill tanganing ponan an pakikipag-olay?
5 Mayong duwa-duwa na may nagkapirang introduksion sa librong Reasoning na dai pa nindo naprobaran. Bilang halimbawa, an pahina 10-11 nagsusuherir nin mga introduksion na basado sa presenteng mga pangyayari. Aramon nindo an bagong mga bareta na puwedeng gamiton. An saindong teritoryo daw perming nagigibo? Kun siring, tibaad magigin marahay na laenlaenon an saindong mga introduksion, na ginagamit idtong nasa pahina 15 kan librong Reasoning. Siring man probaran an nagkapirang suhestion sa Agosto 1, 1988 na Torrengbantayan, pahina 13-18 (Hulyo 15, 1988 sa Watchtower, pahina 15-20). Gamiton an nagkapirang hapot sa pahina 16, parapo 16, na siertong tinotogotan an kagharong na ipahayag an saiyang opinyon.
6 An mga tawo sa satong teritoryo hale sa manlaenlaen na pinaghalean. Kaipuhan niato an pagkalaenlaen sa satong pagdolok tanganing maakit an gabos na maghihinanyog. (1 Cor. 9:19-23) An paggamit nin pagkalaenlaen makatatabang sa sato tanganing ‘iligtas kita man sana asin idtong naghihinanyog sa sato.’—1 Tim. 4:16.