Pakakua nin Kagayagayahan Paagi sa Dugang na Ikinawaras na mga Magasin
1 Paagi ki Cristo Jesus, si Jehova nagkaigwa nin daganon na organisasyon na midbid huli sa andam an boot, mabungang mga paragibo. (Sal. 110:3; Mat. 9:37, 38) Kun nagtatao kita nin atension sa kuwalidad siring man sa bilang kan satong ministeryo, dugang na kagayagayahan an siertong magigin resulta. (Luc. 10:17) Partikularmenteng totoo ini kun nagmamaigot kitang dugangan an satong personal na pagwaras kan mga magasin na Torrengbantayan asin Magmata!
2 An pagwaras nin magasin saro sa pangenot na paagi sa pagpalakop kan mensahe kan Kahadean. Alagad sa nagkapirang lugar namangno na nag-iina an ikinawawaras na magasin. Paano puwedeng maremedyohan an tendensiang ini? Ano an nagkapirang kinakaipuhan na puwede niatong isaisip na makatatabang sa sato na makawaras nin orog pang magasin?
SARONG POSITIBONG PAGDOLOK
3 An enot na tangga iyo an: PERMING ISAISIP AN PAGWARAS NIN MAGASIN. Mas pasil na makua ini kun kita mismo regular na mga parabasa kan mga magasin. Basta aram niato an mga laog kaini, mamawoton niatong gamiton an lambang oportunidad tanganing iatubang an mga ini sa publiko. Para sa kadaklan sa sato, an lambang Sabado nag-aalok nin marahay na oportunidad na makikabtang sa gibohon na pagmamagasin. Kadakol na kongregasyon an nag-aareglo nin gibohon na pagmamagasin sa kabangaan nin semana para sa mga dai nakaluluwas kun Sabado. Tibaad manompongan nin nagkapira na kun banggi an marahay na panahon para sa gibohon na pagmamagasin. An paghuhulit sa tinampo, sa mga tindahan, impormal na pagpatotoo asin mga ruta nin magasin gabos mararahay na paagi tanganing makawaras nin mga magasin.
4 An ikaduwang suhestion iyo an: PAGDANAYON INING SIMPLE. An nagkapirang parahayag nagtatao nin haralawig na presentasyon kaya dai sinda nakawawaras nin mga magasin. An iba naggagamit kan Topikong Mapag-oolayan sa gibohon na pagmamagasin. Alagad, dai ini irinerekomendar. An Disyembre 1, 1956 na Watchtower nagsabi: “An halipot, direkta sa puntong presentasyon an pinakamarahay kun nag-aalok nin mga magasin. An katuyohan iyo an makawaras nin kadakol na kopya. An mga ini na an magibo kan saindang sadiring ‘pagtataram.’ An Sosyedad nagsusuherir nin kabanga sagkod sa sarong minutong presentasyon, an puwerte an pakataram na mga tataramon manongod sa sarong punto na ipinakikipag-olay kan magasin na inaalok.”
5 An masunod: MAGIN MAABILIDAD. Mag-andam nin labi sa sarong presentasyon. Dangan makatataram na kamo sa gabos na klase nin tawo asin ibagay an saindong presentasyon sa saindang mga interes.
6 Sarong pantapos na suhestion: MAGBUGTAK NIN PERSONAL NA PASOHAN. Tibaad magirumdoman nindo na idinoon ini sa suplementong “An mga Magasin Nagtotokdo kan Dalan Pasiring sa Buhay,” sa Mayo, 1984 na An Satong Ministeryo sa Kahadean. Tibaad mawoton nindong magmaigot para sa promedyong sarong magasin para sa lambang oras nindo sa paglilingkod. An saindong personal na pasohan maninigong magin rasonable, na kinokonsiderar an saindong indibiduwal na mga kamugtakan asin an panahon na kaya nindong gamiton sa paglilingkod sa langtad.
7 Paagi sa saiyang naheheling na organisasyon, si Jehova nagpapadagos na magtao kan satong mga kinakaipuhan tanganing dugangan an satong pakikabtang sa ministeryo. Igwa kita nin nakaoogma, napapanahon na mga magasin na magagamit. Ngonyan an satong sadiring indibiduwal na pagmamaigot an kaipuhan tanganing makipagtabangan sa mga areglo kan kongregasyon para sa pagwaras nin magasin. Mantang an siring na gibohon nagpapamuraway ki Jehova, magkakaigwa kita nin kagayagayahan hale sa dugang na pakikabtang sa ministeryo na dara an mga magasin.—Juan 15:8.