Enoton Nguna an mga Interes kan Kahadean
1 Nakakakombensir nanggad na ipinaheling ni Jesus na inenot nia an Kahadean sa saiyang buhay! (Mat. 6:33) Kan binista sa atubang ni Pilato, nagdanay siang marigon. (Juan 18:35, 37) Iyo, minsan kan sia nakapakong magagadan na sa harigi, idinoon nia an paglaom sa Kahadean, na sinabi sa parakasala: “Ika makakaibahan ko sa Paraiso.”—Luc. 23:43.
KUWENTAHON AN GASTOS
2 Taano ta minansay ni Jesus na mahalagang gayo an Kahadean? Huli ta aram nia na an Kahadean nin Dios an magpapagin posible tanganing magibo an kabotan nin Dios sa daga siring sa langit.
3 Kairiba sa pag-arog ki Jesus bilang sarong paradepensa kan Kahadean an pagdadara kan “hariging pasakitan” asin kan gabos na kalabot digdi. ‘An pagkuwenta kan gastos’ nangangahulogan na kita magin andam na magsabing “paaram” sa materyal na mga rogaring kun nakaoolang an mga ini sa satong paglilingkod sa Dios. (Luc. 14:27, 28, 33) An pag-ako nin buhay na daing sagkod sa irarom kan pamamahala kan Kahadean angay sa ano man na gastos.—Mat. 13:44-46.
DAI NA MAGPARAHADIT
4 An pag-agi nin 19 siglo dai nag-ina kan pangangaipo na enoton nguna an mga interes kan Kahadean sa satong buhay. Ipinaliwanag ni Jesus: “Mayo nin siisay man na makapaglilingkod sa duwang kagurangnan . . . Dai kamo makapaglilingkod sa Dios asin sa Kayamanan. . . . Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon.” (Mat. 6:24, 25) Nahahadit daw kita manongod sa satong kalag? O igwa daw kita nin igong pagtubod na hanapon nguna an Kahadean, na nananarig na ini gabos na ibang bagay idadagdag na sana?
5 Hinaboan kan ibang tugang an mga trabahong mas halangkaw an suweldo huli ta an iskedyul nin trabaho nakaoolang sa teokratikong mga gibohon. Liniwat kan iba an empleo kan magkaigwa nin tumang sa mga prinsipyo kan Biblia. An ibang amo nagtao nin mga pribilehiyo sa mga tugang huli ta sinda andam an boot, mapananarigan na mga trabahador. (Col. 3:23, 24) Sierto nanggad, napapakosog an kongregasyon kun an kamagurangan, ministeryal na mga lingkod, asin mga payunir nagtatao nin marahay na halimbawa sa paghanap nguna kan Kahadean.
MAGPLANO NA NGONYAN
6 An iba saindo mga hobenes harani nang matapos sa pag-eskuwela. Nagpaplano daw kamo para sa teokratikong karera? May intension daw kamong magtrabaho nguna nin bilog na panahon bago kamo magpayunir? Angay sa komendasyon an plano nindong magpayunir sa ngapit. Alagad kun totoong an Kahadean an enot sa saindong buhay, taano ta dai nguna magpayunir? Kun maeenot an sekular na trabaho, may peligro na an saindong puso tibaad manganaan kan mga kahaditan na nakakadisganar sa pagpayunir.—Mat. 6:27, 34; Luc. 21:34.
7 Imbes na mahulog sa mga pan-akit kan kinaban, mas marahay nanggad na manarig ki Jehova, na nakaaaram kan satong mga pangangaipo asin nanunugang magtatao kan mga ini! Paagi kan pag-enot nguna kan mga interes kan Kahadean, an satong buhay magkakaigwa nin tunay na katuyohan.—Mat. 6:32; 1 Tim. 6:17-19.