Parigonon an Pagtubod sa Tataramon nin Dios
1 Kun may panahon na kaipuhan an marigon na pagtubod, iyan ngonyan na. An dakol na tawo mayo man lamang nin pagtubod asin mayo nin paglaom sa ngapit. An mga namomoon sa relihiyon asin politika parateng gayo na nagtatao nin falsong mga malalaoman kaya kadakol kan hayag na nadedesesperar. Tunay nanggad, arog kan ipinaliwanag ni apostol Pablo, “An pagtubod bakong sadiri nin gabos na tawo.” (2 Tes. 3:2) Minsan siring, an pagtubod sadiri nin mga Saksi ni Jehova. Lubos an satong pagsarig na an mga panuga na yaon sa Tataramon nin Dios maootob.
2 An marigon na pagtubod ipinalalaen an mga Saksi ni Jehova sa ibang tawo. Iyan nagmomotibar sa marahay na mga gibo na nagtatao nin pakinabang sa iba saka sa sato, mantang nagtatao nin onra sa Dios. An siring na pagtubod bunga kan pagtogot na magkaigwa nin puwersa sa satong buhay an Tataramon nin Dios. An presenteng internasyonal na kasararoan nin magturugang kan tunay na mga Kristiano nagpapaheling kan halaga nin pagparigon kan pagtubod sa Biblia bilang ipinasabong na Tataramon nin Dios.—2 Tim. 3:16.
KUN TAANO TA MANINIGONG TABANGAN AN IBA NA MAPARIGON AN PAGTUBOD
3 Mantang buhay an nakataya, may makosog kitang dahelan na tabangan an iba na parigonon an saindang pagtubod. Nasa isip ini, ngonyan na Nobyembre iaalok niato sa enot na pangyayari an The Bible—God’s Word or Man’s? An katuyohan kan bagong librong ini tabangan an mga tawo na masabotan na an Biblia Tataramon nin Dios. Ipinaliliwanag kaiyan asin pinatutunayan na falso an dakol sa putik na mga sahot tumang sa Tataramon nin Dios. Iyan nagtatao nin nakakokontentong simbag sa pirang hapot, arog baga kan: An Biblia daw bakong sientipiko? Iyan daw nagkakakontrahan sa saiyang sadiri? Iyan daw eroestorya asin osipon sana? Talaga daw na nangyari an mga milagro na sinasabi sa Biblia? Napahimutikan daw nin arkeolohiya an historikal na katamaan kan Biblia? Dugang pa, an librong ini nagtatao nin dakol na marahay na pruweba sa pagigin ipinasabong kan Biblia. Inaapod man kaiyan an atension sa dai nasasalang mga hula kan Biblia asin sa makangangalas na pankagabsan na pagkaoroyon kaiyan.
4 An praktikal na kadonongan kan Biblia asin an puwersa kaiyan na papagbakleon an mga tawo kabtang sana kan ebidensia na nagpapatunay na an Biblia Tataramon nin Dios. Paninimbagan niato na tabangan an mga tawo na maaraman an ebidensiang ini. Tanganing magibo ini, kaipuhan na tokdoan nguna niato sinda na tumubod sa sinasabi kan Biblia.
5 Posibleng gayo na paagi sa pag-adal sa Biblia na kita natabangan na maparigon an pagtubod sa Tataramon nin Dios. Kun kita nakinabang sa pakipag-adal sa sato nin iba, bobooton niato na bumuwelta tolos sa mga nawarasan niato nin babasahon asin mag-alok nin pag-adal sa Biblia tanganing matabangan sindang rumigon an pagtubod.
AN BAGONG LIBRO NAKATATABANG NA RUMIGON AN PAGTUBOD
6 Kun sadiosan na tinitirutimbang an ebidensia, mayo nin sinserong tawo na dai maako na an Biblia Tataramon nin Dios. An bagong librong ini nag-aatubang kan kadaklan sa ebidensiang iyan sa madaling makuang paagi. Boot niatong dagkahon an iba na akoon an Biblia bilang Tataramon nin Dios asin mamuhay sono sa ipinasabong na hatol kaiyan. An mga minagibo kaiyan magayagayang ipahahayag man an odok sa pusong pamibi kan salmista: “Helinga na namotan ko an saimong mga togon. O Jehova, oyon sa saimong mamomoton na pagkaherak buhaya ako. An sustansia kan saimong tataramon katotoohan, asin an lambang matanos mong paghokom sagkod sa panahon na daing katapusan.”—Sal. 119:159, 160.
7 Ngonyan na Nobyembre, madadagka niato an iba na basahon asin pag-adalan an Tataramon nin Dios paagi sa pag-alok kan librong The Bible—God’s Word or Man’s? sa kontribusyon na ₱16.00.